अत्र नकारोपदेशो ऽन्याचरणप्रतिपत्तिप्रतिषेधार्थः ॥ (१।०)

कश्चिद् इति गृहस्थाद्यः ॥ (२।०)

स्थानमात्रवैलक्षण्यदर्शनाद् ब्राह्मणेष्वेव कश्चिच् छब्दः ॥ (३।०)

गृहस्थो ब्रह्मचारी वानप्रस्थो भिक्षुर् एकवेदो द्विवेदस् त्रिवेदश् चतुर्वेदो गायत्रीमात्रसारो वानेन विधिना रुद्रसमीपं प्राप्तः सन् न कश्चिद् ब्राह्मणः पुनरावर्तत इत्यर्थः ॥ (४।०)

ब्राह्मणग्रहणं ब्राह्मण्यावधारणार्थं ब्राह्मण एव नान्य इत्यर्थः ॥ (५।०)

क्षेत्रज्ञे च ब्राह्मणसंज्ञा ॥ (६।०)

कस्मात् ॥ (७।०)

उपचयजन्मयोगात् संस्कारयोगात् श्रुतयोगाच् च ब्राह्मणः ॥ (८।०)

पुनःशब्दः पुनरावृत्तिप्रतिषेधे ॥ (९।०)

यथा पूर्वसंज्ञानादिभिर् गत्वा आवर्तते पुनः पुनः तथानेन विधिना रुद्रसमीपं गत्वा न सकृदावर्तते ॥ (१०।०)

पुनः पुनः सर्वथापि नावर्तत इत्यर्थः ॥ (११।०)

आङ् इति स्वशास्त्रोक्तमर्यादाम् अधिकुरुते अभिविध्यर्थं च ॥ (१२।०)

ये चानेन विधिनाक्षपिताज्ञानकलुषपापमायादयः क्षीणाः ते पुनः पुनरावर्तन्ते ॥ (१३।०)

न तैः सह संयोगो भवति ॥ (१४।०)

न चापरं जन्म प्रतिपद्यत इत्यर्थः ॥ (१५।०)

एवम् अध्यायपरिसमाप्तिं कृत्वा युक्तं वक्तुम् ॥ (१६।०)