अत्र गूढा गुप्ता प्रच्छन्ना अप्रकाशेत्यर्थः ॥ (१।०)

पवित्रा नाम सत्या संस्कृता अर्घ्यहेतुः सम्पन्ना न तु विपरीतेत्यर्थः ॥ (२।०)

सा गोप्या ॥ (३।०)

किमर्थमिति चेत् ॥ (४।०)

तदुच्यते जातिज्ञानतपःस्तवसूचनार्थम् ॥ (५।०)

यथा शरदं कुररः सूचयति ॥ (६।०)

उक्तं हि । (७।१)

शरदं कुररः प्राह वसन्तं प्राह कोकिलः । (७।२)

प्राह वर्षा मयूरश्च वाक् पवित्राह ब्राह्मणम् ॥ (७।३)

तथा । (८।१)

वागेव हि मनुष्यस्य श्रुतमाख्याति भाषिता । (८।२)

दीपयन्ती यथा सर्वं प्रभा भानुमिवामला ॥ (८।३)

अतो जातिज्ञानतपःस्तवा भवन्ति ॥ (९।०)

स्तविते चावसानादिमत्त्वयोः पुण्यपापक्षयवृद्ध्योरभावः ॥ (१०।०)

अत एतदुक्तं गूढपवित्रवाणिरिति ॥ (११।०)

आह किं व्रतं वाणी च द्वयमेवात्र गोप्यम् आहोस्विद् अन्यदप्यस्ति नेति ॥ (१२।०)

उच्यते अस्ति ॥ (१३।०)

यस्मादाह ॥ (१४।०)