कामरूपी इत्य् अत्रापि च नस् त्रिकं चिन्त्यते ॥ (१।०)

कामी कामः काम्यम् इति ॥ (२।०)

तत्र कामी सिद्धः ॥ (३।०)

कामो ऽस्येच्छा ॥ (४।०)

काम्यानि रूपाणि ॥ (५।०)

कथम् ॥ (६।०)

कमु इच्छायां भवति ॥ (७।०)

रूपाणि यावन्ति यादृशानि चेच्छति तावन्ति तादृशानि च करोति ॥ (८।०)

आत्मायत्तानि चास्य रूपकरणानि पृथिव्यादीनि ॥ (९।०)

विभुत्वाच् च करणानां यत्र यत्र रूपाण्य् अभिनिर्वर्तयति तत्र तत्र चास्य बुद्ध्यादीनां करणानां वृत्तिलाभो भवति ॥ (१०।०)

चक्षुरादिवद् दृष्टान्तात् ॥ (११।०)

नाधिष्ठाता इति चेत् ॥ (१२।०)

तच् च न ॥ (१३।०)

कस्मात् ॥ (१४।०)

यस्माद् आह रूपीति ॥ (१५।०)

अत्र रूपाण्य् अधितिष्ठतीति रूपी ॥ (१६।०)

दण्डिवत् ॥ (१७।०)

रूपिवचनाच् च सर्वेषाम् एव रूपाणां युगपद् एवाधिष्ठाता भवति ॥ (१८।०)

विभुत्वाद् अभिन्नो महेश्वरात् ॥ (१९।२)

इदं च रुद्रसायुज्यनिर्देशाद् गम्यते ॥ (२०।०)

त्वम् इति भावनिर्देशाद् गम्यते वित्तम् अस्य शक्तिः सामर्थ्यम् ॥ (२१।०)

ऐश्वर्यम् ईदृशम् इत्य् अर्थः ॥ (२२।०)

आह परिमितेषु कृत्येषु अशक्तिदर्शनात् संदेहः ॥ (२३।०)

अथ किम् अयं सिद्धस् तेषां स्वकृतानां रूपाणां संहारे शक्तः उत विश्वामित्रवद् अशक्तः इति ॥ (२४।०)

उच्यते ॥ (२५।०)

यस्माद् आह ॥ (२६।०)