अत्र गूढं प्रच्छन्नम् अप्रकाशमित्यर्थः ॥ (१।०)

व्रतं नाम यदायतने स्नानहसिताद्यः साधनवर्गस्तद् व्रतम् ॥ (२।०)

कस्मात् ॥ (३।०)

साकृतत्वाद् यस्मादयं ब्राह्मणस्तथा प्रयुङ्क्ते यथा लौकिकानां धर्मसाधनभावो न विद्यत इति अतो गूढव्रत इति ॥ (४।०)

आह अव्यक्तप्रेतत्वादेव गूढत्वप्राप्तेः पुनरुक्तम् इति ॥ (५।०)

उच्यते ऽर्थान्यत्वाद् अपुनरुक्तम् ॥ (६।०)

तत्रावस्थानमात्रम् एवाव्यक्तम् ॥ (७।०)

इह तु स्नानहसितादिगोपनम् ॥ (८।०)

अपि च तत्र निष्पन्नं लिङ्गम् अव्यक्तम् ॥ (९।०)

इह तु निष्पत्तिकाले च गोपनोपदेशः ॥ (१०।०)

न वाव्यक्तप्रेतत्वं वा विद्यालिङ्गम् ॥ (११।०)

अतश्चापुनरुक्तम् ॥ (१२।०)

तस्माद् गूढव्रतोपदेशाय स्थानापदेशापवादाय स्थाने वस्तव्यम् ॥ (१३।०)

स्नानहसितादयश्च गूढाः कर्तव्याः ॥ (१४।०)

एवं विद्या गुप्ता भवतीत्यर्थः ॥ (१५।०)

आह किं व्रतमेवैकं विद्यालिङ्गं गोप्यम् आहोस्विद् अन्यदप्यस्ति नेति ॥ (१६।०)

उच्यते ऽस्ति ॥ (१७।०)

यस्मादाह ॥ (१८।०)