अत्र भवे भवे इति वीप्सा ॥ (१।०)

भव इति विद्याकलापशूनां समस्तानां ग्रहणम् ॥ (२।०)

भवः कस्मात् ॥ (३।०)

भवनभावनकृतत्वात् ॥ (४।०)

यस्माद् देवमनुष्यतिर्यक्त्वेन भावयति च तानीश्वरः ॥ (५।०)

धर्मज्ञानवैराग्यैश्वर्याधर्माज्ञानावैराग्यानैश्वर्याणां भवनभावनत्वाद् भवः ॥ (६।०)

तस्य भूयोभूय उत्पत्त्यनुग्रहतिरोभावं च दृष्ट्वा ॥ (७।०)

वीप्सायाः उत्पत्ताव् उत्पत्ताव् अनुग्रहेऽनुग्रहे तिरोभावे तिरोभावे चेत्य् अर्थः ॥ (८।०)

नातिभवे इति ॥ (९।०)

नकारः कार्यत्वं प्रतिषेधयति ॥ (१०।०)

अतिशयितभवेषु मा भवामीत्यर्थः ॥ (११।०)

आह किं भवाद् वियोगमात्रम् एवैकं मृगयते ॥ (१२।०)

तद् उच्यते न ॥ (१३।०)

यस्माद् आह ॥ (१४।०)