स्तोर्य् ओड़् बाणबलेः पुत्रशतं त्वासीन्महाबलपराक्रमम् । (१।१)

तेषां प्रधानो द्युतिमान् बाणो नाम महाबलः ॥ (१।२)

सो ऽतीव शङ्करे भक्तो राजा राज्यमपालयत् । (२।१)

त्रैलोक्यं वशमानीय बाधयामास वासवम् ॥ (२।२)

ततः शक्रादयो देवा गत्वोचुः कृत्तिवाससम् । (३।१)

त्वदीयो बाधते ह्यस्मान् बाणो नाम महासुरः ॥ (३।२)

व्याहृतो दैवतैः सर्वैर्देवदेवो महेश्वरः । (४।१)

ददाह बाणस्य पुरं शरेणैकेन लीलया ॥ (४।२)

दह्यमाने पुरे तस्मिन् बाणो रुद्रं त्रिशूलिनम् । (५।१)

ययौ शरणमीशानं गोपतिं नीललोहितम् ॥ (५।२)

मूर्धन्याधाय तल्लिङ्गं शांभवं भीतवर्जितः । (६।१)

निर्गत्य तु पुरात् तस्मात् तुष्टाव परमेश्वरम् ॥ (६।२)

संस्तुतो भगवानीशः शङ्करो नीललोहितः । (७।१)

गाणपत्येन बाणं तं योजयामास भावतः ॥ (७।२)

अथाभवन् दनोः पुत्रास्ताराद्या ह्यतिभीषणाः । (८।१)

तारस्तथा शम्बरश्च कपिलः शङ्करस्तथा । (८।२)

स्वर्भानुर्वृषपर्वा च प्राधान्येन प्रकीर्तिताः ॥ (८।३)

सुरसायाः सहस्रं तु सर्पाणामभवद् द्विजाः । (९।१)

अनेकशिरसां तद्वत् खेचराणां महात्मनाम् ॥ (९।२)

अरिष्टा जनयामास गन्धर्वाणां सहस्रकम् । (१०।१)

अनन्ताद्या महानागाः काद्रवेयाः प्रकीर्तिताः ॥ (१०।२)

ताम्रा च जनयामास षट् कन्या द्विजपुङ्गवाः । (११।१)

शुकीं श्येनीं च भासीं च सुग्रीवां गृध्रिकां शुचिम् ॥ (११।२)

गास्तथा जनयामास सुरभिर्महिषीस्तथा । (१२।१)

इरा वृक्षलतावल्लीस्तृणजातीश्च सर्वशः ॥ (१२।२)

खसा वै यक्षरक्षांसि मुनिरप्सरसस्तथा । (१३।१)

रक्षोगणं क्रोधवशा जनयामास सत्तमाः ॥ (१३।२)

विनतायाश्च पुत्रौ द्वौ प्रख्यातौ गरुडारुणौ । (१४।१)

तयोश्च गरुडो धीमान् तपस्तप्त्वा सुदुश्चरम् । (१४।२)

प्रसादाच्छूलिनः प्राप्तो वाहनत्वं हरेः स्वयम् ॥ (१४।३)

आराध्य तपसा रुद्रं महादेवं तथारुणः । (१५।१)

सारथ्ये कल्पितः पूर्वं प्रीतेनार्कस्य शंभुना ॥ (१५।२)

एते कश्यपदायादाः कीर्तिताः स्थाणुजङ्गमाः । (१६।१)

वैवस्वते ऽन्ते ह्यस्मिञ्छृण्वतां पापनाशनाः ॥ (१६।२)

सप्तविंशत् सुताः प्रोक्ताः सोमपत्न्यश्च सुव्रताः । (१७।१)

अरिष्टनेमिपत्नीनामपत्यानीह षोडश ॥ (१७।२)

बहुपुत्रस्य विदुषश्चतस्रो विद्युतः स्मृताः । (१८।१)

तद्वदङ्गिरसः पुत्रा ऋषयो ब्रह्मसत्कृताः ॥ (१८।२)

कुशाश्वस्य तु देवर्षेर्देवप्रहरणाः सुताः । (१९।१)

एते युगसहस्रान्ते जायन्ते पुनरेव हि । (१९।२)

मन्वन्तरेषु नियतं तुल्यैः कार्यैः स्वनामभिः ॥ (१९।३)

इति श्रीकूर्मपुराणे षट्साहस्र्यां संहितायां पूर्वविभागे सप्तदशो ऽध्यायः ॥ (२०।१)