मार्कण्डेय उवाच । (१।१)

षष्टिस्तीर्थसहस्राणि षष्टिस्तीर्थशतानि च । (१।२)

माघमासे गमिष्यन्ति गङ्गायमुनसंगमम् ॥ (१।३)

गवां शतसहस्रस्य सम्यग् दत्तस्य यत् फलम् । (२।१)

प्रयागे माघमासे तु त्र्यहं स्नातस्य तत् फलम् ॥ (२।२)

गङ्गायमुनयोर्मध्ये कार्षाग्निं यस्तु साधयेत् । (३।१)

अहीनाङ्गो ऽप्यरोगश्च पञ्चेन्द्रियसमन्वितः ॥ (३।२)

यावन्ति रोमकूपाणि तस्य गात्रेषु मानद । (४।१)

तावद् वर्षसहस्राणि स्वर्गलोके महीयते ॥ (४।२)

ततः स्वर्गात् परिभ्रष्टो जम्बूद्वीपपतिर्भवेत् । (५।१)

स भुक्त्वा विपुलान् भोगांस्तत् तीर्थं भजते पुनः ॥ (५।२)

जलप्रवेशं यः कुर्यात् संगमे लोकविश्रुते । (६।१)

राहुग्रस्तो यथा सोमो विमुक्तः सर्वपातकैः ॥ (६।२)

सोमलोकमवाप्नोति सोमेन सह मोदते । (७।१)

षष्टिं वर्षसहस्राणि षष्टिं वर्षशतानि च ॥ (७।२)

स्वर्गतः शक्रलोके ऽसौ मुनिगन्धर्वसेवितः । (८।१)

ततो भ्रष्टस्तु राजेन्द्र समृद्धे जायते कुले ॥ (८।२)

अधःशिरास् त्वयोधाराम् ऊर्ध्वपादः पिबेन्नरः । (९।१)

शतं वर्षसहस्राणि स्वर्गलोके महीयते ॥ (९।२)

तस्माद् भ्रष्टस्तु राजेन्द्र अग्निहोत्री भवेन्नरः । (१०।१)

भुक्त्वा तु विपुलान् भोगांस्तत् तीर्थं भजते पुनः ॥ (१०।२)

यः स्वदेहं विकर्तेद् वा शकुनिभ्यः प्रयच्छति । (११।१)

विहगैरुपभुक्तस्य शृणु तस्यापि यत्फलम् ॥ (११।२)

शतं वर्षसहस्राणि सोमलोके महीयते । (१२।१)

ततस्तस्मात् परिभ्रष्टो राजा भवति धार्मिकः ॥ (१२।२)

गुणवान् रूपसम्पन्नो विद्वान् सुप्रियवाक्यवान् । (१३।१)

भुक्त्वा तु विपुलान् भोगांस्तत् तीर्थं भजते पुनः ॥ (१३।२)

उत्तरे यमुनातीरे प्रयागस्य तु दक्षिणे । (१४।१)

ऋणप्रमोचनं नाम तीर्थं तु परमं स्मृतम् ॥ (१४।२)

एकरात्रोषितः स्नात्वा ऋणैस्तत्र प्रमुच्यते । (१५।१)

सूर्यलोकमवाप्नोति अनृणश्च सदा भवेत् ॥ (१५।२)

इति श्रीकूर्मपुराणे षट्साहस्र्यां संहितायां पूर्वविभागे षट्त्रिंशो ऽध्यायः ॥ (१६।१)