ईश्वर उवाच । (१।१)

अन्यद् गुह्यतमं ज्ञानं वक्ष्ये ब्राह्मणपुङ्गवाः । (१।२)

येनासौ तरते जन्तुर्घोरं संसारसागरम् ॥ (१।३)

अहं ब्रह्ममयः शान्तः शाश्वतो निर्मलो ऽव्ययः । (२।१)

एकाकी भगवानुक्तः केवलः परमेश्वरः ॥ (२।२)

मम योनिर्महद् ब्रह्म तत्र गर्भं दधाम्यहम् । (३।१)

मूलं मायाभिधानं तु ततो जातमिदं जगत् ॥ (३।२)

प्रधानं पुरुषो ह्यात्मा महान् भूतादिरेव च । (४।१)

तन्मात्राणि महाभूतानीन्द्रियाणि च जज्ञिरे ॥ (४।२)

ततो ऽण्डमभवद्धैमं सूर्यकोटिसमप्रभम् । (५।१)

तस्मिन् जज्ञे महाब्रह्मा मच्छक्त्या चोपबृंहितः ॥ (५।२)

ये चान्ये बहवो जीवा मन्मयाः सर्व एव ते । (६।१)

न मां पश्यन्ति पितरं मायया मम मोहिताः ॥ (६।२)

याश्च योनिषु सर्वासु सम्भवन्ति हि मूर्तयः । (७।१)

तासां माया परा योनिर्मामेव पितरं विदुः ॥ (७।२)

यो मामेवं विजानाति बीजिनं पितरं प्रभुम् । (८।१)

स धीरः सर्वलोकेषु न मोहमधिगच्छति ॥ (८।२)

ईशानः सर्वविद्यानां भूतानां परमेश्वरः । (९।१)

ओङ्कारमूर्तिर्भगवानहं ब्रह्मा प्रजापतिः ॥ (९।२)

समं सर्वेषु भूतेषु तिष्ठन्तं परमेश्वरम् । (१०।१)

विनश्यत्स्वविनश्यन्तं यः पश्यति स पश्यति ॥ (१०।२)

समं पश्यन् हि सर्वत्र समवस्थितमीश्वरम् । (११।१)

न हिनस्त्यात्मनात्मानं ततो याति परां गतिम् ॥ (११।२)

विदित्वा सप्त सूक्ष्माणि षडङ्गं च महेश्वरम् । (१२।१)

प्रधानविनियोगज्ञः परं ब्रह्माधिगच्छति ॥ (१२।२)

सर्वज्ञता तृप्तिरनादिबोधः स्वतन्त्रता नित्यमलुप्तशक्तिः । (१३।१)

अनन्तशक्तिश्च विभोर्विदित्वा षडाहुरङ्गानि महेश्वरस्य ॥ (१३।२)

तन्मात्राणि मन आत्मा च तानि सूक्ष्माण्याहुः सप्ततत्त्वात्मकानि । (१४।१)

या सा हेतुः प्रकृतिः सा प्रधानं बन्धः प्रोक्तो विनियोगो ऽपि तेन ॥ (१४।२)

या सा शक्तिः प्रकृतौ लीनरूपा वेदेषूक्ता कारणं ब्रह्मयोनिः । (१५।१)

तस्या एकः परमेष्ठी परस्तान्महेश्वरः पुरुषः सत्यरूपः ॥ (१५।२)

ब्रह्मा योगी परमात्मा महीयान् व्योमव्यापी वेदवेद्यः पुराणः । (१६।१)

एको रुद्रो मृत्युरव्यक्तमेकं बीजं विश्वं देव एकः स एव ॥ (१६।२)

तमेवैकं प्राहुरन्ये ऽप्यनेकं त्वेकात्मानं केचिदन्यत्तथाहुः । (१७।१)

अणोरणीयान् महतो ऽसौ महीयान् महादेवः प्रोच्यते वेदविद्भिः ॥ (१७।२)

एवम् हि यो वेद गुहाशयं परं प्रभुं पुराणं पुरुषं विश्वरूपम् । (१८।१)

हिरण्मयं बुद्धिमतां परां गतिं सबुद्धिमान् बुद्धिमतीत्य तिष्ठति ॥ (१८।२)

इति श्रीकूर्मपुराणे षट्साहस्र्यां संहितायामुपरिविभागे ईश्वरगीतासु अष्टमो ऽध्यायः ॥ (१९।१)