श्रीकूर्म उवाच । (१।१)

आसीदेकार्णवं घोरमविभागं तमोमयम् । (१।२)

शान्तवातादिकं सर्वं न प्रज्ञायत किंचन ॥ (१।३)

एकार्णवे तदा तस्मिन् नष्टे स्थावरजङ्गमे । (२।१)

तदा समभवद् ब्रह्मा सहस्राक्षः सहस्रपात् ॥ (२।२)

सहस्रशीर्षा पुरुषो रुक्मवर्णस्त्वतीन्द्रियः । (३।१)

ब्रह्मा नारायणाख्यस्तु सुष्वाप सलिले तदा ॥ (३।२)

इमं चोदाहरन्त्यत्र श्लोकं नारायणं प्रति । (४।१)

ब्रह्मस्वरूपिणं देवं जगतः प्रभवाप्ययम् ॥ (४।२)

आपो नारा इति प्रोक्ता नाम्ना पूर्वमिति श्रुतिः । (५।१)

अयनं तस्य ता यस्मात् तेन नारायणः स्मृतः ॥ (५।२)

विष्णु अस् वराहतुल्यं युगसहस्रस्य नैशं कालमुपास्य सः । (६।१)

शर्वर्यन्ते प्रकुरुते ब्रह्मत्वं सर्गकारणात् ॥ (६।२)

ततस्तु सलिले तस्मिन् विज्ञायान्तर्गतां महीम् । (७।१)

अनुमानात् तदुद्धारं कर्तुकामः प्रजापतिः ॥ (७।२)

जलक्रीडासु रुचिरं वाराहं रूपम् आस्थितः । (८।१)

अधृष्यं मनसाप्यन्यैर्वाङ्मयं ब्रह्मसंज्ञितम् ॥ (८।२)

पृथिव्युद्धरणार्थाय प्रविश्य च रसातलम् । (९।१)

दंष्ट्रयाभ्युज्जहारैनामात्माधारो धराधरः ॥ (९।२)

दृष्ट्वा दंष्ट्राग्रविन्यस्तां पृथिवीं प्रथितपौरुषम् । (१०।१)

अस्तुवञ्जनलोकस्थाः सिद्धा ब्रह्मर्षयो हरिम् ॥ (१०।२)

ऋषय ऊचुः । (११।१)

नमस्ते देवदेवाय ब्रह्मणे परमेष्ठिने । (११।२)

पुरुषाय पुराणाय शाश्वताय जयाय च ॥ (११।३)

नमः स्वयंभुवे तुभ्यं स्रष्ट्रे सर्वार्थवेदिने । (१२।१)

नमो हिरण्यगर्भाय वेधसे परमात्मने ॥ (१२।२)

नमस्ते वासुदेवाय विष्णवे विश्वयोनये । (१३।१)

नारायणाय देवाय देवानां हितकारिणे ॥ (१३।२)

नमो ऽस्तु ते चतुर्वक्त्रे शार्ङ्गचक्रासिधारिणे । (१४।१)

सर्वभूतात्मभूताय कूटस्थाय नमो नमः ॥ (१४।२)

नमो वेदरहस्याय नमस्ते वेदयोनये । (१५।१)

नमो बुद्धाय शुद्धाय नमस्ते ज्ञानरूपिणे ॥ (१५।२)

नमो ऽस्त्वानन्दरूपाय साक्षिणे जगतां नमः । (१६।१)

अनन्तायाप्रमेयाय कार्याय करणाय च ॥ (१६।२)

नमस्ते पञ्चभूताय पञ्चभूतात्मने नमः । (१७।१)

नमो मूलप्रकृतये मायारूपाय ते नमः ॥ (१७।२)

नमो ऽस्तु ते वराहाय नमस्ते मत्स्यरूपिणे । (१८।१)

नमो योगाधिगम्याय नमः संकर्षणाय ते ॥ (१८।२)

नमस्त्रिमूर्तये तुभ्यं त्रिधाम्ने दिव्यतेजसे । (१९।१)

नमः सिद्धाय पूज्याय गुणत्रयविभाविने ॥ (१९।२)

नमो ऽस्त्वादित्यवर्णाय नमस्ते पद्मयोनये । (२०।१)

नमो ऽमूर्ताय मूर्ताय माधवाय नमो नमः ॥ (२०।२)

त्वयैव सृष्टमखिलं त्वय्येव लयमेष्यति । (२१।१)

पालयैतज्जगत् सर्वं त्राता त्वं शरणं गतिः ॥ (२१।२)

इत्थं स भगवान् विष्णुः सनकाद्यैरभिष्टुतः । (२२।१)

प्रसादमकरोत् तेषां वराहवपुरीश्वरः ॥ (२२।२)

ततः संस्थानमानीय पृथिवीं पृथिवीपतिः । (२३।१)

मुमोच रूपं मनसा धारयित्वा प्रजापतिः ॥ (२३।२)

तस्योपरि जलौघस्य महती नौरिव स्थिता । (२४।१)

विततत्वाच्च देहस्य न मही याति संप्लवम् ॥ (२४।२)

पृथिवीं तु समीकृत्य पृथिव्यां सो ऽचिनोद् गिरीन् । (२५।१)

प्राक्सर्गदग्धानखिलांस् ततः सर्गे ऽदधन्मनः ॥ (२५।२)

इति श्रीकूर्मपुराणे षट्साहस्र्यां संहितायां पूर्वविभागे षष्ठो ऽध्यायः ॥ (२६।१)