मैत्रेय उवाच । (१।१)

कथितं मे त्वया सर्वं यत् पृष्टो ऽसि महामुने । (१।२)

भृगुसर्गात् प्रभृत्य् एष सर्गो मे कथ्यतां पुनः ॥ (१।३)

पराशर उवाच । (२।१)

भृगोः ख्यात्यां समुत्पन्ना लक्ष्मीर् विष्णुपरिग्रहः । (२।२)

तथा धातृविधातारौ ख्यात्यां जातौ सुतौ भृगोः ॥ (२।३)

आयतिर् नियतिश् चैव मेरोः कन्ये महात्मनः । (३।१)

धातृविधात्रोस् ते भार्ये तयोर् जातौ सुताव् उभौ ॥ (३।२)

प्राणश् चैव मृकण्डुश् च मार्कण्डेयो मृकण्डुतः । (४।१)

ततो वेदशिरा जज्ञे प्राणस्यापि सुतं शृणु ॥ (४।२)

प्राणस्य द्युतिमान् पुत्रो राजवांश् च ततो ऽभवत् । (५।१)

ततो वंशो महाभाग विस्तारं भार्गवो गतः ॥ (५।२)

पत्नी मरीचेः संभूतिः पौर्णमासम् असूयत । (६।१)

विरजाः पर्वतश् चैव तस्य पुत्रौ महात्मनः ॥ (६।२)

वंशसंकीर्तने पुत्रान् वदिष्ये ऽहं ततो द्विज । (७।१)

स्मृतिश् चाङ्गिरसः पत्नी प्रसूता कन्यकास् तथा । (७।२)

सिनीवाली कुहूश् चैव राका चानुमती तथा ॥ (७।३)

अनसूया तथैवात्रेर् जज्ञे पुत्रान् अकल्मषान् । (८।१)

सोमं दुर्वाससं चैव दत्तात्रेयं च योगिनम् ॥ (८।२)

प्रीत्यां पुलस्त्यभार्यायां दत्तोलिस् तत्सुतो ऽभवत् । (९।१)

पूर्वजन्मनि सो ऽगस्त्यः स्मृतः स्वायम्भुवे ऽन्तरे ॥ (९।२)

कर्दमश् चार्वरीवांश् च सहिष्णुश् च सुतत्रयम् । (१०।१)

क्षमा तु सुषुवे भार्या पुलहस्य प्रजापतेः ॥ (१०।२)

क्रतोश् च सन्नतिर् भार्या वालखिल्यान् असूयत । (११।१)

षष्टिस् तानि सहस्राणि ऋषीणाम् ऊर्ध्वरेतसाम् । (११।२)

अङ्गुष्ठपर्वमात्राणां ज्वलद्भास्करतेजसाम् ॥ (११।३)

ऊर्जायां च वसिष्ठस्य सप्ताजायन्त वै सुताः ॥ (१२।१)

रजो गोत्रोर्ध्वबाहुश् च सवनश् चानघस् तथा । (१३।१)

सुतपाः शुक्र इत्य् एते सर्वे सप्तर्षयो ऽमलाः ॥ (१३।२)

यो ऽसाव् अग्निर् अभिमानी ब्रह्मणस् तनयो ऽग्रजः । (१४।१)

तस्मात् स्वाहा सुतांल्लेभे त्रीन् उदारौजसो द्विज ॥ (१४।२)

पावकं पवमानं च शुचिं चापि जलाशिनम् ॥ (१५।१)

तेषां तु संतताव् अन्ये चत्वारिंशच्च पञ्च च । (१६।१)

कथ्यन्ते वह्नयश् चैते पिता पुत्रत्रयं च यत् ॥ (१६।२)

एवम् एकोनपञ्चाशद् वह्नयः परिकीर्तिताः ॥ (१७।१)

पितरो ब्रह्मणा सृष्टा व्याख्याता ये मया तव । (१८।१)

अग्निष्वात्ता बर्हिषदो ऽनग्नयः साग्नयश् च ये ॥ (१८।२)

तेभ्यः स्वधा सुते जज्ञे मेनां वै धारिणीं तथा । (१९।१)

ते उभे ब्रह्मवादिन्यौ योगिन्यौ चाप्य् उभे द्विज ॥ (१९।२)

उत्तमज्ञानसम्पन्ने सर्वैः समुदितैर् गुणैः ॥ (२०।१)

इत्य् एषा दक्षकन्यानां कथितापत्यसंततिः । (२१।१)

श्रद्धावान् संस्मरन्न् एताम् अनपत्यो न जायते ॥ (२१।२)