पराशर उवाच । (१।१)

तारामयं भगवतः शिशुमाराकृति प्रभोः । (१।२)

दिवि रूपं हरेर्यत्तु तस्य पुच्छे स्थितो ध्रुवः ॥ (१।३)

एष भ्रमन्भ्रामयति चन्द्रादित्यादिकान्ग्रहान् । (२।१)

भ्रमन्तम् अनु तं यान्ति नक्षत्राणि च चक्रवत् ॥ (२।२)

सूर्याचन्द्रमसौ तारा नक्षत्राणि ग्रहैः सह । (३।१)

वातानीकमयैर्बन्धैर्ध्रुवे बद्धानि तानि वै ॥ (३।२)

शिशुमाराकृति प्रोक्तं यद्रूपं ज्योतिषां दिवि । (४।१)

नारायणो ऽयनं धाम्नां तस्याधारः स्वयं हृदि ॥ (४।२)

उत्तानपादपुत्रस्तु तमाराध्य जगत्पतिम् । (५।१)

सताराशिशुमारस्य ध्रुवः पुच्छे व्यवस्थितः ॥ (५।२)

आधारः शिशुमारस्य सर्वाध्यक्षो जनार्दनः । (६।१)

ध्रुवस्य शिशुमारश्च ध्रुवे भानुर्व्यवस्थितः ॥ (६।२)

तदाधारं जगच्चेदं सदेवासुरमानुषम् ॥ (७।१)

येन विप्र विधानेन तन् ममैकमनाः शृणु । (८।१)

विवस्वान् अष्टभिर्मासैरादायापो रसान्विताः । (८।२)

वर्षत्यम्बु ततश्चान्नम् अन्नादप्यखिलं जगत् ॥ (८।३)

विवस्वान् अंशुभिस्तीक्ष्णैरादाय जगतो जलम् । (९।१)

सोमे मुञ्चत्यथेन्दुश्च वायुनाडीमयैर् दिवि । (९।२)

नालैर् विक्षिपते ऽभ्रेषु धूमाग्न्यनिलमूर्तिषु ॥ (९।३)

न भ्रश्यन्ति यतस्तेभ्यो जलान्यभ्राणि तान्यतः । (१०।१)

अभ्रस्थाः प्रपतन्त्यापो वायुना समुदीरिताः । (१०।२)

संस्कारं कालजनितं मैत्रेयासाद्य निर्मलाः ॥ (१०।३)

सरित्समुद्रभौमास्तु तथापः प्राणिसंभवाः । (११।१)

चतुष्प्रकारा भगवानादत्ते सविता मुने ॥ (११।२)

आकाशगङ्गासलिलं तथादाय गभस्तिमान् । (१२।१)

अनभ्रगतमेवोर्व्यां सद्यः क्षिपति रश्मिभिः ॥ (१२।२)

तस्य संस्पर्शनिर्धूतपापपङ्को द्विजोत्तम । (१३।१)

न याति नरकं मर्त्यो दिव्यं स्नानं हि तत्स्मृतम् ॥ (१३।२)

दृष्टसूर्यं हि यद् वारि पतत्यभ्रैर्विना दिवः । (१४।१)

आकाशगङ्गासलिलं तद्गोभिः क्षिप्यते रवेः ॥ (१४।२)

कृत्तिकादिषु ऋक्षेषु विषमेष्वम्बु यद्दिवः । (१५।१)

दृष्टार्कं पतितं ज्ञेयं तद्गाङ्गं दिग्गजोज्झितम् ॥ (१५।२)

युग्मर्क्षेषु तु यत्तोयं पतत्यर्कोज्झितं दिवः । (१६।१)

तत्सूर्यरश्मिभिः सद्यः समादाय निरस्यते ॥ (१६।२)

उभयं पुण्यमत्यर्थं नृणां पापहरं द्विज । (१७।१)

आकाशगङ्गासलिलं दिव्यं स्नानं महामुने ॥ (१७।२)

यत्तु मेघैः समुत्सृष्टं वारि तत्प्राणिनां द्विज । (१८।१)

पुष्णात्योषधयः सर्वा जीवनायामृतं हि तत् ॥ (१८।२)

तेन वृद्धिं परां नीतः सलिलेनौषधीगणः । (१९।१)

साधकः फलपाकान्तः प्रजानां द्विज जायते ॥ (१९।२)

तेन यज्ञान्यथाप्रोक्तान् मानवाः शास्त्रचक्षुषः । (२०।१)

कुर्वन्त्यहरहस्तैश्च देवान् आप्याययन्ति ते ॥ (२०।२)

एवं यज्ञाश्च वेदाश्च वर्णाश्च द्विजपूर्वकाः । (२१।१)

सर्वे देवनिकायाश्च पशुभूतगणाश्च ये ॥ (२१।२)

वृष्ट्या धृतमिदं सर्वमन्नं निष्पाद्यते यया । (२२।१)

सापि निष्पाद्यते वृष्टिः सवित्रा मुनिसत्तम ॥ (२२।२)

आधारभूतः सवितुर्ध्रुवो मुनिवरोत्तम । (२३।१)

ध्रुवस्य शिशुमारो ऽसौ सो ऽपि नारायणाश्रयः ॥ (२३।२)

हृदि नारायणस्तस्य शिशुमारस्य संस्थितः । (२४।१)

बिभर्ता सर्वभूतानामादिभूतः सनातनः ॥ (२४।२)