पराशर उवाच । (१।१)

जरासंधसुते कंस उपयेमे महाबलः । (१।२)

अस्तिं प्राप्तिं च मैत्रेय तयोर्भर्तृहणं हरिम् ॥ (१।३)

महाबलपरीवारो मगधाधिपतिर्बली । (२।१)

हन्तुमभ्याययौ कोपाज्जरासंधः स यादवम् ॥ (२।२)

उपेत्य मथुरां सो ऽथ रुरोध मगधेश्वरः । (३।१)

अक्षौहिणीभिः सैन्यस्य त्रयोविंशतिभिर्वृतः ॥ (३।२)

निष्क्रम्याल्पपरीवारावुभौ रामजनार्दनौ । (४।१)

युयुधाते समं तस्य बलिनौ बलिसैनिकैः ॥ (४।२)

ततो रामश्च कृष्णश्च चक्राते मतिमुत्तमाम् । (५।१)

आयुधानां पुराणानामादाने मुनिसत्तम ॥ (५।२)

अनन्तरं हरेः शार्ङ्गं तूणौ चाक्षयसायकौ । (६।१)

आकाशादागतौ विप्र तथा कौमोदकी गदा ॥ (६।२)

हलं च बलभद्रस्य गगनादागतं ज्वलत् । (७।१)

मनसाभिमतं विप्र सौनन्दं मुसलं तथा ॥ (७।२)

ततो युद्धे पराजित्य ससैन्यं मगधाधिपम् । (८।१)

पुरीं विविशतुर्वीरावुभौ रामजनार्दनौ ॥ (८।२)

जिते तस्मिन् सुदुर्वृत्ते जरासंधे महामुने । (९।१)

जीवमाने गते कृष्णस्तं नामन्यत निर्जितम् ॥ (९।२)

पुनरप्याजगामाथ जरासंधो बलान्वितः । (१०।१)

जितश्च रामकृष्णाभ्यामपक्रान्तो द्विजोत्तम ॥ (१०।२)

दश चाष्टौ च संग्रामानेवमत्यन्तदुर्मदः । (११।१)

यदुभिर्मागधो राजा चक्रे कृष्णपुरोगमैः ॥ (११।२)

सर्वेष्वेतेषु युद्धेषु यादवैः स पराजितः । (१२।१)

अपक्रान्तो जरासंधः स्वल्पसैन्यैर्बलाधिकः ॥ (१२।२)

तद्बलं यादवानां तैरजितं यदनेकशः । (१३।१)

तत्तु संनिधिमाहात्म्यं विष्णोरंशस्य चक्रिणः ॥ (१३।२)

मनुष्यधर्मशीलस्य लीला सा जगतः पतेः । (१४।१)

अस्त्राण्यनेकरूपाणि यदरातिषु मुञ्चति ॥ (१४।२)

मनसैव जगत्सृष्टिं संहारं च करोति यः । (१५।१)

तस्यारिपक्षक्षपणे कियानुद्यमविस्तरः ॥ (१५।२)

तथापि ये मनुष्याणां धर्मास्तदनुवर्तनम् । (१६।१)

कुर्वन्बलवता संधिं हीनैर्युद्धं करोत्यसौ ॥ (१६।२)

साम चोपप्रदानं च तथा भेदं प्रदर्शयन् । (१७।१)

करोति दण्डपातं च क्वचिदेव पलायनम् ॥ (१७।२)

मनुष्यदेहिनां चेष्टामित्येवमनुवर्ततः । (१८।१)

लीला जगत्पतेस्तस्य छन्दतः सम्प्रवर्तते ॥ (१८।२)