और्व उवाच । (१।१)

ब्राह्मणान् भोजयेच्छ्राद्धे यद्गुणांस्तान्निबोध मे ॥ (१।२)

त्रिणाचिकेतस्त्रिमधुस्त्रिसुपर्णः षडङ्गवित् । (२।१)

वेदविच्छ्रोत्रियो योगी तथा वै ज्येष्ठसामगः ॥ (२।२)

ऋत्विक्स्वस्रीयदौहित्रजामातृश्वशुरास्तथा । (३।१)

मातुलो ऽथ तपोनिष्ठः पञ्चाग्न्यभिरतस्तथा । (३।२)

शिष्याः संबन्धिनश्चैव मातापितृरतश्च यः ॥ (३।३)

एतान्नियोजयेच्छ्राद्धे पूर्वोक्तान्प्रथमं नृप । (४।१)

ब्राह्मणान् पितृपुष्ट्यर्थमनुकल्पेष्वनन्तरान् ॥ (४।२)

मित्रध्रुक् कुनखी क्लीबः श्यावदन्तस्तथा द्विजः । (५।१)

कन्यादूषयिता वह्निवेदोज्झः सोमविक्रयी ॥ (५।२)

अभिशस्तस्तथा स्तेनः पिशुनो ग्रामयाजकः । (६।१)

भृतकाध्यापकस्तद्वद्भृतकाध्यापितश्च यः ॥ (६।२)

परपूर्वापतिश्चैव मातापित्रोस्तथोज्झकः । (७।१)

वृषलीसूतिपोष्टा च वृषलीपतिरेव च ॥ (७।२)

तथा देवलकश्चैव श्राद्धे नार्हति केतनम् ॥ (८।१)

प्रथमे ऽह्नि बुधः शस्ताञ्श्रोत्रियादीन्निमन्त्रयेत् । (९।१)

कथयेच्च तदैवैषां नियोगान्पितृदैविकान् ॥ (९।२)

ततः क्रोधव्यवायादीनायासं च द्विजैः सह । (१०।१)

यजमानो न कुर्वीत दोषस्तत्र महानयम् ॥ (१०।२)

श्राद्धे नियुक्तो भुक्त्वा वा भोजयित्वा नियुज्य च । (११।१)

व्यवायी रेतसो गर्ते मज्जयत्यात्मनः पितॄन् ॥ (११।२)

तस्मात्प्रथमम् अत्रोक्तं द्विजाग्र्याणां निमन्त्रणम् । (१२।१)

अनिमन्त्र्य द्विजान्गेहमागतान्भोजयेद्यतीन् ॥ (१२।२)

पादशौचादिना गेहमागतान्पूजयेद्द्विजान् ॥ (१३।१)

पवित्रपाणिराचान्तान् आसनेषूपवेशयेत् । (१४।१)

पितॄणामयुजो युग्मान्देवानामिच्छया द्विजान् ॥ (१४।२)

देवानामेकमेकं वा पितॄणां च नियोजयेत् ॥ (१५।१)

तथा मातामहश्राद्धं वैश्वदेवसमन्वितम् । (१६।१)

कुर्वीत भक्तिसम्पन्नस्तन्त्रं वा वैश्वदेविकम् ॥ (१६।२)

प्राङ्मुखान्भोजयेद्विप्रान् देवानामुभयात्मकान् । (१७।१)

पितृपैतामहानां पृथक्तयोः केचिदाहुः श्राद्धस्य करणं नृप । (१७।२)

एकत्रैकेन पाकेन वदन्त्यन्ये महर्षयः ॥ (१७।३)

विष्टरार्थं कुशान्दत्त्वा सम्पूज्यार्घ्यं विधानतः । (१८।१)

कुर्यादावाहनं प्राज्ञो देवानां तदनुज्ञया ॥ (१८।२)

यवाम्बुना च देवानां दद्यादर्घ्यं विधानतः । (१९।१)

स्रग्गन्धधूपदीपांश्च दत्त्वा तेभ्यो यथाविधि ॥ (१९।२)

पितॄणाम् अपसव्यं तत्सर्वमेवोपकल्पयेत् । (२०।१)

अनुज्ञां च ततः प्राप्य दत्त्वा दर्भान्द्विधाकृतान् ॥ (२०।२)

मन्त्रपूर्वं पितॄणां तु कुर्यादावाहनं बुधः । (२१।१)

तिलाम्बुना चापसव्यं दद्यादर्घ्यादिकं नृप ॥ (२१।२)

काले तत्रातिथिं प्राप्तमन्नकामं नृपाध्वगम् । (२२।१)

ब्राह्मणैरभ्यनुज्ञातः कामं तमपि भोजयेत् ॥ (२२।२)

योगिनो विविधै रूपैर्नराणाम् उपकारिणः । (२३।१)

भ्रमन्ति पृथिवीमेतामविज्ञातस्वरूपिणः ॥ (२३।२)

तस्मादभ्यर्चयेत्प्राप्तं श्राद्धकाले ऽतिथिं बुधः । (२४।१)

श्राद्धक्रियाफलं हन्ति नरेन्द्रापूजितो ऽतिथिः ॥ (२४।२)

जुहुयाद्व्यञ्जनक्षारवर्जमन्नं ततो ऽनले । (२५।१)

अनुज्ञातो द्विजैस्तैस्तु त्रिकृत्वः पुरुषर्षभ ॥ (२५।२)

अग्नये कव्यवाहाय स्वाहेत्यादौ नृपाहुतिः । (२६।१)

सोमाय वै पितृमते दातव्या तदनन्तरम् ॥ (२६।२)

वैवस्वताय चैवान्या तृतीया दीयते ततः । (२७।१)

हुतावशिष्टमल्पाल्पं विप्रपात्रेषु निर्वपेत् ॥ (२७।२)

ततो ऽन्नं मृष्टम् अत्यर्थमभीष्टम् अतिसंस्कृतम् । (२८।१)

दत्त्वा जुषध्वमिच्छातो वाच्यमेतदनिष्ठुरम् ॥ (२८।२)

भोक्तव्यं तैश्च तच्चित्तैर्मौनिभिः सुमुखैः सुखम् । (२९।१)

अक्रुध्यता चात्वरता देयं तेनापि भक्तितः ॥ (२९।२)

रक्षोघ्नमन्त्रपठनं भूमेरास्तरणं तिलैः । (३१।१)

कृत्वा ध्येयाः स्वपितरस्त एव द्विजसत्तमाः ॥ (३१।२)

पिता पितामहश्चैव तथैव प्रपितामहः । (३२।१)

मम तृप्तिं प्रयान्त्वद्य विप्रदेहेषु संस्थिताः ॥ (३२।२)

पिता पितामहश्चैव तथैव प्रपितामहः । (३३।१)

मम तृप्तिं प्रयान्त्वग्निहोमाप्यायितमूर्तयः ॥ (३३।२)

पिता पितामहश्चैव तथैव प्रपितामहः । (३४।१)

तृप्तिं प्रयान्तु पिण्डेन मया दत्तेन भूतले ॥ (३४।२)

पिता पितामहश्चैव तथैव प्रपितामहः । (३५।१)

तृप्तिं प्रयान्तु मे भक्त्या यन्मयैतदिहाहृतम् ॥ (३५।२)

मातामहस्तृप्तिम् उपैतु तस्य तथा पिता तस्य पिता तथान्यः । (३६।१)

विश्वे च देवाः परमां प्रयान्तु तृप्तिं प्रणश्यन्तु च यातुधानाः ॥ (३६।२)

यज्ञेश्वरो हव्यसमस्तकव्यभोक्ताव्ययात्मा हरिरीश्वरो ऽत्र । (३७।१)

तत्संनिधानादपयान्तु सद्यो रक्षांस्यशेषाण्यसुराश्च सर्वे ॥ (३७।२)

तृप्तेषु तेषु विकिरेदन्नं विप्रेषु भूतले दद्याच्चाचमनार्थाय तेभ्यो वारि सकृत् सकृत् ॥ (३८।०)

सुतृप्तैस्तैरनुज्ञातः सर्वेणान्नेन भूतले । (३९।१)

सतिलेन ततः पिण्डान्सम्यग्दद्यात्समाहितः ॥ (३९।२)

पितृतीर्थेन सलिलं दद्यादथ जलाञ्जलिम् । (४०।१)

मातामहेभ्यस्तेनैव पिण्डांस्तीर्थेन निर्वपेत् ॥ (४०।२)

दक्षिणाग्रेषु दर्भेषु पुष्पधूपादिपूजितम् । (४१।१)

स्वपित्रे प्रथमं पिण्डं दद्यादुच्छिष्टसंनिधौ ॥ (४१।२)

पितामहाय चैवान्यं तत्पित्रे च तथा परम् । (४२।१)

दर्भमूले लेपभुजः प्रीणयेल्लेपघर्षणैः ॥ (४२।२)

पिण्डैर्मातामहांस्तद्वद्गन्धमाल्यादिसंयुतैः । (४३।१)

पूजयित्वा द्विजाग्र्याणां दद्यादाचमनं ततः ॥ (४३।२)

पितृभ्यः प्रथमं भक्त्या तन्मनस्को नरेश्वर । (४४।१)

सुस्वधेत्याशिषा युक्तां दद्याच्छक्त्या च दक्षिणाम् ॥ (४४।२)

दत्त्वा च दक्षिणां तेभ्यो वाचयेद्वैश्वदेविकान् । (४५।१)

प्रीयन्ताम् इति ये विश्वेदेवास्तेन इतीरयेत् ॥ (४५।२)

तथेति चोक्ते तैर्विप्रैः प्रार्थनीयास्तथाशिषः । (४६।१)

पश्चाद्विसर्जयेद्देवान्पूर्वं पैत्रान्महामते ॥ (४६।२)

मातामहानामप्येवं सह देवैः क्रमः स्मृतः । (४७।१)

भोजने च स्वशक्त्या च दाने तद्वद्विसर्जने ॥ (४७।२)

आपादशौचनात् पूर्वं कुर्याद्देवद्विजन्मसु । (४८।१)

विसर्जनं तु प्रथमं पैत्रं मातामहेषु वै ॥ (४८।२)

विसर्जयेत्प्रीतिवचः सन्मानाभ्यर्चितांस्ततः । (४९।१)

निवर्तेताभ्यनुज्ञात आद्वारात् ताननुव्रजेत् ॥ (४९।२)

ततस्तु वैश्वदेवाख्यां कुर्यान्नित्यक्रियां बुधः । (५०।१)

भुञ्जीयाच्च समं पूज्यभृत्यबन्धुभिरात्मनः ॥ (५०।२)

एवं श्राद्धं बुधः कुर्यात्पैत्रं मातामहं तथा । (५१।१)

श्राद्धैराप्यायिता दद्युः सर्वकामान्पितामहाः ॥ (५१।२)

त्रीणि श्राद्धे पवित्राणि दौहित्रः कुतपस्तिलाः । (५२।१)

रजतस्य तथा दानं कथासंदर्शनादिकम् ॥ (५२।२)

वर्ज्यानि कुर्वता श्राद्धं कोपो ऽध्वगमनं त्वरा । (५३।१)

भोक्तुरप्यत्र राजेन्द्र त्रयमेतन्न शस्यते ॥ (५३।२)

विश्वेदेवाः सपितरस्तथा मातामहा नृप । (५४।१)

कुलं चाप्याय्यते पुंसां सर्वं श्राद्धं प्रकुर्वताम् ॥ (५४।२)

सोमाधारः पितृगणो योगाधारश्च चन्द्रमाः । (५५।१)

श्राद्धे योगिनियोगस्तु तस्माद्भूपाल शस्यते ॥ (५५।२)

सहस्रस्यापि विप्राणां योगी चेत्पुरतः स्थितः । (५६।१)

सर्वान्भोक्तॄंस्तारयति यजमानं तथा नृप ॥ (५६।२)