पराशर उवाच । (१।१)

इत्थं स्तुतस्तदा तेन मुचुकुन्देन धीमता । (१।२)

प्राहेशः सर्वभूतानामनादिर्भगवान्हरिः ॥ (१।३)

यथाभिवाञ्छितान्दिव्यान्लोकान्गच्छ नरेश्वर । (२।१)

अव्याहतपरैश्वर्यो मत्प्रसादोपबृंहितः ॥ (२।२)

भुक्त्वा दिव्यान्महाभोगान्भविष्यसि महाकुले । (३।१)

जातिस्मरो मत्प्रसादात्ततो मोक्षमवाप्स्यसि ॥ (३।२)

पराशर उवाच । (४।१)

इत्युक्तः प्रणिपत्येशं जगतामच्युतं नृपः । (४।२)

गुहामुखाद्विनिष्क्रान्तः ददृशे सो ऽल्पकान्नरान् ॥ (४।३)

ततः कलियुगं ज्ञात्वा प्राप्तं तप्तुं नृपस्तपः । (५।१)

नरनारायणस्थानं प्रययौ गन्धमादनम् ॥ (५।२)

कृष्णो ऽपि घातयित्वारिमुपायेन हि तद्बलम् । (६।१)

जग्राह मथुरामेत्य हस्त्यश्वस्यन्दनोज्ज्वलम् ॥ (६।२)

आनीय चोग्रसेनाय द्वारवत्यां न्यवेदयत् । (७।१)

पराभिभवनिःशङ्कं बभूव च यदोः कुलम् ॥ (७।२)

बलदेवो ऽपि मैत्रेय प्रशान्ताखिलविग्रहः । (८।१)

ज्ञातिदर्शनसोत्कण्ठः प्रययौ नन्दगोकुलम् ॥ (८।२)

ततो गोपांश्च गोपीश्च यथापूर्वममित्रजित् । (९।१)

तथैवाभ्यवदत्प्रेम्णा बहुमानपुरःसरम् ॥ (९।२)

कैश्चापि सम्परिष्वक्तः कांश्चिच्च परिषस्वजे । (१०।१)

हास्यं चक्रे समं कैश्चिद्गोपैर्गोपीजनैस्तथा ॥ (१०।२)

प्रियाण्यनेकान्यवदन्गोपास्तत्र हलायुधम् । (११।१)

गोप्यश्च प्रेमकुपिताः प्रोचुः सेर्ष्यमथापराः ॥ (११।२)

गोप्यः पप्रच्छुरपरा नागरीजनवल्लभः । (१२।१)

कच्चिदास्ते सुखं कृष्णश्चलत्प्रेमलवात्मकः ॥ (१२।२)

अस्मच्चेष्टामपहसन्न कच्चित्पुरयोषिताम् । (१३।१)

सौभाग्यमानमधिकं करोति क्षणसौहृदः ॥ (१३।२)

कच्चित्स्मरति नः कृष्णो गीतानुगमनं कलम् । (१४।१)

अप्यसौ मातरं द्रष्टुं सकृदप्यागमिष्यति ॥ (१४।२)

अथवा किं तदालापैरपरा क्रियतां कथा । (१५।१)

यस्यास्माभिर्विना तेन विनास्माकं भविष्यति ॥ (१५।२)

पिता माता तथा भ्राता भर्ता बन्धुजनश्च किम् । (१६।१)

न त्यक्तस्तत्कृते ऽस्माभिरकृतज्ञध्वजो हि सः ॥ (१६।२)

तथापि कच्चिदालापमिहागमनसंश्रयम् । (१७।१)

करोति कृष्णो वक्तव्यं भवता राम नानृतम् ॥ (१७।२)

दामोदरः स गोविन्दः पुरस्त्रीसक्तमानसः । (१८।१)

अपेतप्रीतिरस्मासु दुर्दर्शः प्रतिभाति नः ॥ (१८।२)

पराशर उवाच । (१९।१)

आमन्त्रितः स कृष्णेति पुनर्दामोदरेति च । (१९।२)

रुरुदुः सस्वरं गोप्यो हरिणा हृतचेतसः ॥ (१९।३)

संदेशैः साममधुरैः प्रेमगर्भैर् अगर्वितैः । (२०।१)

रामेणाश्वासिता गोप्यः कृष्णस्यातिमनोहरैः ॥ (२०।२)

गोपैश्च पूर्ववद् रामः परिहासमनोरमाः । (२१।१)

कथाश्चकार रेमे च सह तैर्व्रजभूमिषु ॥ (२१।२)