पराशर उवाच । (१।१)

धृते गोवर्धने शैले परित्राते च गोकुले । (१।२)

रोचयामास कृष्णस्य दर्शनं पाकशासनः ॥ (१।३)

सो ऽधिरुह्य महानागमैरावतम् अमित्रजित् । (२।१)

गोवर्धनगिरौ कृष्णं ददर्श त्रिदशेश्वरः ॥ (२।२)

चारयन्तं महावीर्यं गाश्च गोपवपुर्धरम् । (३।१)

कृत्स्नस्य जगतो गोपं वृतं गोपकुमारकैः ॥ (३।२)

गरुडं च ददर्शोच्चैरन्तर्धानगतं द्विज । (४।१)

कृतच्छायं हरेर्मूर्ध्नि पक्षाभ्यां पक्षिपुंगवम् ॥ (४।२)

अवरुह्य स नागेन्द्रादेकान्ते मधुसूदनम् । (५।१)

शक्रः सस्मितमाहेदं प्रीतिविस्तारितेक्षणः ॥ (५।२)

इन्द्र उवाच । (६।१)

कृष्ण कृष्ण शृणुष्वेदं यदर्थमहमागतः । (६।२)

त्वत्समीपं महाभाग नैतच्चिन्त्यं त्वयान्यथा ॥ (६।३)

भारावतारणार्थाय पृथिव्याः पृथिवीतलम् । (७।१)

अवतीर्णो ऽखिलाधार त्वमेव परमेश्वरः ॥ (७।२)

महभङ्गविरुद्धेन मया गोकुलनाशकाः । (८।१)

समादिष्टा महामेघास्तैश्चैतत्कदनं कृतम् ॥ (८।२)

त्रातास्ताश्च त्वया गावः समुत्पाट्य महागिरिम् । (९।१)

तेनाहं तोषितो वीर कर्मणात्यद्भुतेन ते ॥ (९।२)

साधितं कृष्ण देवानामहं मन्ये प्रयोजनम् । (१०।१)

त्वयायमद्रिप्रवरः करेणैकेन यद्धृतः ॥ (१०।२)

गोभिश्च चोदितः कृष्ण त्वत्सकाशमिहागतः । (११।१)

त्वया त्राताभिरत्यर्थं युष्मत्सत्कारकारणात् ॥ (११।२)

स त्वां कृष्णाभिषेक्ष्यामि गवां वाक्यप्रचोदितः । (१२।१)

उपेन्द्रत्वे गवामिन्द्रो गोविन्दस्त्वं भविष्यसि ॥ (१२।२)

पराशर उवाच । (१३।१)

अथोपवाह्यादादाय घण्टामैरावताद्गजात् । (१३।२)

अभिषेकं तया चक्रे पवित्रजलपूर्णया ॥ (१३।३)

क्रियमाणे ऽभिषेके तु गावः कृष्णस्य तत्क्षणात् । (१४।१)

प्रस्नवोद्भूतदुग्धार्द्रां सद्यश्चक्रुर्वसुंधराम् ॥ (१४।२)

अभिषिच्य गवां वाक्याद्देवेन्द्रो वै जनार्दनम् । (१५।१)

प्रीत्या सप्रश्रयं कृष्णं पुनराह शचीपतिः ॥ (१५।२)

गवामेतत्कृतं वाक्यं तथान्यदपि मे शृणु । (१६।१)

यद्ब्रवीमि महाभाग भारावतरणेच्छया ॥ (१६।२)

ममांशः पुरुषव्याघ्र पृथायां पृथिवीतले । (१७।१)

अवतीर्णो ऽर्जुनो नाम स रक्ष्यो भवता सदा ॥ (१७।२)

भारावतरणे साह्यं स ते वीरः करिष्यति । (१८।१)

स रक्षणीयो भवता यथात्मा मधुसूदन ॥ (१८।२)

भगवानुवाच । (१९।१)

जानामि भारते वंशे जातं पार्थं तवांशकम् । (१९।२)

तमहं पालयिष्यामि यावत्स्थास्यामि भूतले ॥ (१९।३)

यावन्महीतले शक्र स्थास्याम्यहमरिंदम । (२०।१)

न तावदर्जुनं कश्चिद्देवेन्द्र युधि जेष्यति ॥ (२०।२)

कंसो नाम महाबाहुर्दैत्यो ऽरिष्टस्तथापरः । (२१।१)

केशी कुवलयापीडो नरकाद्यास्तथापरे ॥ (२१।२)

हतेष्वेतेषु देवेन्द्र भविष्यति महाहवः । (२२।१)

तत्र विद्धि सहस्राक्ष भारावतरणं कृतम् ॥ (२२।२)

स त्वं गच्छ न संतापं पुत्रार्थे कर्तुमर्हसि । (२३।१)

नार्जुनस्य रिपुः कश्चिन्ममाग्रे प्रभविष्यति ॥ (२३।२)

अर्जुनार्थे त्वहं सर्वान्युधिष्ठिरपुरोगमान् । (२४।१)

निवृत्ते भारते युद्धे कुन्त्यै दास्याम्यविक्षतान् ॥ (२४।२)

पराशर उवाच । (२५।१)

इत्युक्तः सम्परिष्वज्य देवराजो जनार्दनम् । (२५।२)

आरुह्यैरावतं नागं पुनरेव दिवं ययौ ॥ (२५।३)

कृष्णो ऽपि सहितो गोभिर्गोपालैश्च पुनर्व्रजम् । (२६।१)

आजगामाथ गोपीनां दृष्टिपूतेन वर्त्मना ॥ (२६।२)