पराशर उवाच । (१।१)

आद्यो वेदश्चतुष्पादः शतसाहस्रसंमितः । (१।२)

ततो दशगुणः कृत्स्नो यज्ञो ऽयं सर्वकामधुक् ॥ (१।३)

ततो ऽत्र मत्सुतो व्यासो ऽष्टाविंशतितमे ऽन्तरे । (२।१)

वेदमेकं चतुष्पादं चतुर्धा व्यभजत्प्रभुः ॥ (२।२)

यथा तु तेन वै व्यस्ता वेदव्यासेन धीमता । (३।१)

वेदास्तथा समस्तैस्तैर्व्यस्ता व्यस्तैस्तथा मया ॥ (३।२)

तदनेनैव वेदानां शाखाभेदान्द्विजोत्तम । (४।१)

चतुर्युगेषु रचितान्समस्तेष्ववधारय ॥ (४।२)

कृष्णद्वैपायनं व्यासं विद्धि नारायणं प्रभुम् । (५।१)

को ऽन्यो हि भुवि मैत्रेय महाभारतकृद्भवेत् ॥ (५।२)

तेन व्यस्ता यथा वेदा मत्पुत्रेण महात्मना । (६।१)

द्वापरे ह्यत्र मैत्रेय तन्मे शृणु यथार्थतः ॥ (६।२)

ब्रह्मणा चोदितो व्यासो वेदान्व्यस्तुं प्रचक्रमे । (७।१)

अथ शिष्यान्स जग्राह चतुरो वेदपारगान् ॥ (७।२)

ऋग्वेदश्रावकं पैलं जग्राह स महामुनिः । (८।१)

वैशम्पायननामानं यजुर्वेदस्य चाग्रहीत् ॥ (८।२)

जैमिनिं सामवेदस्य तथैवाथर्ववेदवित् । (९।१)

सुमन्तुस्तस्य शिष्यो ऽभूद्वेदव्यासस्य धीमतः ॥ (९।२)

रोमहर्षणनामानं महाबुद्धिं महामुनिः । (१०।१)

सूतं जग्राह शिष्यं स इतिहासपुराणयोः ॥ (१०।२)

एक आसीद्यजुर्वेदस् तं चतुर्धा व्यकल्पयत् । (११।१)

चातुर्होत्रम् अभूद्यस्मिंस् तेन यज्ञमथाकरोत् ॥ (११।२)

आध्वर्यवं यजुर्भिस्तु ऋग्भिर्होत्रं तथा मुनिः । (१२।१)

औद्गात्रं सामभिश्चक्रे ब्रह्मत्वं चाप्यथर्वभिः ॥ (१२।२)

ततः स ऋच उद्धृत्य ऋग्वेदं कृतवान्मुनिः । (१३।१)

यजूंषि च यजुर्वेदं सामवेदं च सामभिः ॥ (१३।२)

राज्ञस्त्वथर्ववेदेन सर्वकर्माणि स प्रभुः । (१४।१)

कारयामास मैत्रेय ब्रह्मत्वं च यथास्थितिः ॥ (१४।२)

सो ऽयमेको महावेदतरुस्तेन पृथक्कृतः । (१५।१)

चतुर्धा तु ततो जातं वेदपादपकाननम् ॥ (१५।२)

बिभेद प्रथमं विप्र पैल ऋग्वेदपादपम् । (१६।१)

इन्द्रप्रमतये प्रादाद् बाष्कलाय च संहिते ॥ (१६।२)

चतुर्धा स बिभेदाथ बाष्कलो निजसंहिताम् । (१७।१)

बौध्यादिभ्यो ददौ तास्तु शिष्येभ्यः स महामतिः ॥ (१७।२)

बौध्याग्निमाठरौ तद्वद्याज्ञवल्क्यपराशरौ । (१८।१)

प्रतिशाखास्तु शाखायास्तस्यास्ते जगृहुर्मुने ॥ (१८।२)

इन्द्रप्रमतिरेकां तु संहितां स्वसुतं ततः । (१९।१)

माण्डुकेयं महात्मानं मैत्रेयाध्यापयत्तदा ॥ (१९।२)

तस्य शिष्यप्रशिष्येभ्यः पुत्रशिष्यान्क्रमाद्ययौ ॥ (२०।१)

वेदमित्रस्तु शाकल्यः संहितां तामधीतवान् । (२१।१)

चकार संहिताः पञ्च शिष्येभ्यः प्रददौ च ताः ॥ (२१।२)

तस्य शिष्यास्तु ये पञ्च तेषां नामानि मे शृणु । (२२।१)

मुद्गलो गालवश्चैव वात्स्यः शालीय एव च । (२२।२)

शिशिरः पञ्चमश्चासीत् मैत्रेय सुमहामुनिः ॥ (२२।३)

संहितात्रितयं चक्रे शाकपूणिरथेतरः । (२३।१)

निरुक्तमकरोत्तद्वच्चतुर्थं मुनिसत्तम ॥ (२३।२)

क्रौञ्चो वैतालकिस्तद्वद्बलाकश्च महामुनिः । (२४।१)

निरुक्तश्च चतुर्थो ऽभूद्वेदवेदाङ्गपारगः ॥ (२४।२)

इत्येताः प्रतिशाखाभ्यो ऽप्यनुशाखा द्विजोत्तम । (२५।१)

बाष्कलश्चापरास्तिस्रः संहिताः कृतवान्द्विज । (२५।२)

शिष्यः कालायनिर्गार्ग्यस्तृतीयश्च तथा जवः ॥ (२५।३)

इत्येते बह्वृचाः प्रोक्ताः संहिता यैः प्रवर्तिताः ॥ (२६।१)