पराशर उवाच । (१।१)

कथितस् तामसः सर्गो ब्रह्मणस् ते महामुने । (१।२)

रुद्रसर्गं प्रवक्ष्यामि तन् मे निगदतः शृणु ॥ (१।३)

कल्पादाव् आत्मनस् तुल्यं सुतं प्रध्यायतस् ततः । (२।१)

प्रादुरासीत् प्रभोर् अङ्के कुमारो नीललोहितः ॥ (२।२)

रुदन् वै सुस्वरं सो ऽथ द्रवंश् च द्विजसत्तम । (३।१)

किं रोदिषीति तं ब्रह्मा रुदन्तं प्रत्युवाच ह ॥ (३।२)

नाम देहीति तं सो ऽथ प्रत्युवाच प्रजापतिः । (४।१)

रुद्रस् त्वं देव नाम्नासि मा रोदीर् धैर्यम् आवह । (४।२)

एवम् उक्तः पुनः सो ऽथ सप्तकृत्वो रुरोद वै ॥ (४।३)

ततो ऽन्यानि ददौ तस्मै सप्त नामानि स प्रभुः । (५।१)

स्थानानि चैषाम् अष्टानां पत्नीः पुत्रांश् च वै विभुः ॥ (५।२)

भवं शर्वम् अथेशानं तथा पशुपतिं द्विज । (६।१)

भीमम् उग्रं महादेवम् उवाच स पितामहः ॥ (६।२)

चक्रे नामान्य् अथैतानि स्थानान्य् एषां चकार सः । (७।१)

सूर्यो जलं मही वायुर् वह्निर् आकाशम् एव च । (७।२)

दीक्षितो ब्राह्मणः सोम इत्य् एतास् तनवः क्रमात् ॥ (७।३)

सुवर्चला तथैवोषा विकेशी चापरा शिवा । (८।१)

स्वाहा दिशस् तथा दीक्षा रोहिणी च यथाक्रमम् ॥ (८।२)

सूर्यादीनां नरश्रेष्ठ रुद्राद्यैर् नामभिः सह । (९।१)

पत्न्यः स्मृता महाभाग तदपत्यानि मे शृणु ॥ (९।२)

येषां सूतिप्रसूतैश् च इदम् आपूरितं जगत् ॥ (१०।१)

शनैश्चरस् तथा शुक्रो लोहिताङ्गो मनोजवः । (११।१)

स्कन्दः स्वर्गो ऽथ संतानो बुधश् चानुक्रमात् सुताः ॥ (११।२)

एवंप्रकारो रुद्रो ऽसौ सतीं भार्याम् अविन्दत । (१२।१)

दक्षकोपाच्च तत्याज सा सती स्वं कलेवरम् ॥ (१२।२)

हिमवद्दुहिता साभून् मेनायां द्विजसत्तम । (१३।१)

उपयेमे पुनश् चोमाम् अनन्यां भगवान् भवः ॥ (१३।२)

देवौ धातृविधातारौ भृगोः ख्यातिर् असूयत । (१४।१)

श्रियं च देवदेवस्य पत्नी नारायणस्य या ॥ (१४।२)

मैत्रेय उवाच । (१५।१)

क्षीराब्धौ श्रीः समुत्पन्ना श्रूयते ऽमृतमन्थने । (१५।२)

भृगोः ख्यात्यां समुत्पन्नेत्य् एतद् आह कथं भवान् ॥ (१५।३)

पराशर उवाच । (१६।१)

नित्यैवैषा जगन्माता विष्णोः श्रीर् अनपायिनी । (१६।२)

यथा सर्वगतो विष्णुस् तथैवेयं द्विजोत्तम ॥ (१६।३)

अर्थो विष्णुर् इयं वाणी नीतिर् एषा नयो हरिः । (१७।१)

बोधो विष्णुर् इयं बुद्धिर् धर्मो ऽसौ सत्क्रिया त्व् इयम् ॥ (१७।२)

स्रष्टा विष्णुर् इयं सृष्टिः श्रीर् भूमिर् भूधरो हरिः । (१८।१)

संतोषो भगवांल् लक्ष्मीस् तुष्टिर् मैत्रेय शाश्वती ॥ (१८।२)

इच्छा श्रीर् भगवान् कामो यज्ञो ऽसौ दक्षिणा तु सा । (१९।१)

आज्याहुतिर् असौ देवी पुरोडाशो जनार्दनः ॥ (१९।२)

पत्नीशाला मुने लक्ष्मीः प्राग्वंशो मधुसूदनः । (२०।१)

चितिर् लक्ष्मीर् हरिर् यूप इध्मा श्रीर् भगवान् कुशः ॥ (२०।२)

सामस्वरूपी भगवान् उद्गीतिः कमलालया । (२१।१)

स्वाहा लक्ष्मीर् जगन्नाथो वासुदेवो हुताशनः ॥ (२१।२)

शंकरो भगवाञ्छौरिर् गौरी लक्ष्मीर् द्विजोत्तम । (२२।१)

मैत्रेय केशवः सूर्यस् तत्प्रभा कमलालया ॥ (२२।२)

विष्णुः पितृगणः पद्मा स्वधा शाश्वतपुष्टिदा । (२३।१)

द्यौः श्रीः सर्वात्मको विष्णुर् अवकाशो ऽतिविस्तरः ॥ (२३।२)

शशाङ्कः श्रीधरः कान्तिः श्रीस् तस्यैवानपायिनी । (२४।१)

धृतिर् लक्ष्मीर् जगच्चेष्टा वायुः सर्वत्रगो हरिः ॥ (२४।२)

जलधिर् द्विज गोविन्दस् तद्वेला श्रीर् महामते । (२५।१)

लक्ष्मीस्वरूपम् इन्द्राणी देवेन्द्रो मधुसूदनः ॥ (२५।२)

यमश् चक्रधरः साक्षाद् धूमोर्णा कमलालया । (२६।१)

ऋद्धिः श्रीः श्रीधरो देवः स्वयम् एव धनेश्वरः ॥ (२६।२)

गौरी लक्ष्मीर् महाभागा केशवो वरुणः स्वयम् । (२७।१)

श्रीर् देवसेना विप्रेन्द्र देवसेनापतिर् हरिः ॥ (२७।२)

अवष्टम्भो गदापाणिः शक्तिर् लक्ष्मीर् द्विजोत्तम । (२८।१)

काष्ठा लक्ष्मीर् निमेषो ऽसौ मुहूर्तो ऽसौ कला तु सा ॥ (२८।२)

ज्योत्स्ना लक्ष्मीः प्रदीपो ऽसौ सर्वः सर्वेश्वरो हरिः । (२९।१)

लताभूता जगन्माता श्रीर् विष्णुर् द्रुमसंस्थितिः ॥ (२९।२)

विभावरी श्रीर् दिवसो देवश् चक्रगदाधरः । (३०।१)

वरप्रदो वरो विष्णुर् वधूः पद्मवनालया ॥ (३०।२)

नदस्वरूपी भगवाञ् श्रीर् नदीरूपसंस्थिता । (३१।१)

ध्वजश् च पुण्डरीकाक्षः पताका कमलालया ॥ (३१।२)

तृष्णा लक्ष्मीर् जगत्स्वामी लोभो नारायणः परः । (३२।१)

रतिरागौ च धर्मज्ञ लक्ष्मीर् गोविन्द एव च ॥ (३२।२)

किं वात्र बहुनोक्तेन संक्षेपेणेदम् उच्यते ॥ (३३।१)

देवतिर्यङ्मनुष्येषु पुंनाम्नि भगवान् हरिः । (३४।१)

स्त्रीनाम्नि लक्ष्मीर् मैत्रेय नानयोर् विद्यते परम् ॥ (३४।२)