पराशर उवाच । (१।१)

अशीतिमण्डलशतं काष्ठयोरन्तरं द्वयोः । (१।२)

आरोहणावरोहाभ्यां भानोरब्देन या गतिः ॥ (१।३)

स रथो ऽधिष्ठितो देवैर् आदित्यै ऋषिभिस्तथा । (२।१)

गन्धर्वैरप्सरोभिश्च ग्रामणीसर्पराक्षसैः ॥ (२।२)

धाता कृतस्थला चैव पुलस्त्यो वासुकिस्तथा । (३।१)

रथकृद्ग्रामणीर्हेतिस्तुम्बुरुश्चैव सप्तमः ॥ (३।२)

एते वसन्ति वै चैत्रे मधुमासे सदैव हि । (४।१)

मैत्रेय स्यन्दने भानोः सप्त मासाधिकारिणः ॥ (४।२)

अर्यमा पुलहश्चैव रथौजाः पुञ्जिकस्थला । (५।१)

प्रहेतिः कच्छनीरश्च नारदश्च रथे रवेः ॥ (५।२)

माधवे निवसन्त्येते शुचिसंज्ञे निबोध मे ॥ (६।१)

मित्रो ऽत्रिस्तक्षको रक्षः पौरुषेयो ऽथ मेनका । (७।१)

हाहा रथस्वनश्चैव मैत्रेयैते वसन्ति वै ॥ (७।२)

वरुणो वसिष्ठो रम्भा सहजन्या हुहू रथः । (८।१)

रथचित्रस् तथा शुक्रे वसन्त्याषाढसंज्ञिते ॥ (८।२)

इन्द्रो विश्वावसुः स्रोत एलापत्रस्तथाङ्गिराः । (९।१)

प्रम्लोचा च नभस्येते सर्पश्चार्के वसन्ति वै ॥ (९।२)

विवस्वानुग्रसेनश्च भृगुरापूरणस् तथा । (१०।१)

उम्लोचा शङ्खपालश्च व्याघ्रो भाद्रपदे तथा ॥ (१०।२)

पूषा च सुरुचिर्वातो गौतमो ऽथ धनंजयः । (११।१)

सुषेणो ऽन्यो घृताची च वसन्त्याश्वयुजे रवौ ॥ (११।२)

विश्वावसुर्भरद्वाजः पर्जन्यैरावतौ तथा । (१२।१)

विश्वाची सेनजिच्चापि कार्त्तिके चाधिकारिणः ॥ (१२।२)

अंशुकाश्यपतार्क्ष्यास्तु महापद्मस्तथोर्वशी । (१३।१)

चित्रसेनस्तथा विद्युन्मार्गशीर्षाधिकारिणः ॥ (१३।२)

क्रतुर्भगस्तथोर्णायुः स्फूर्जः कर्कोटकस्तथा । (१४।१)

अरिष्टनेमिश्चैवान्या पूर्वचित्तिर्वराप्सराः ॥ (१४।२)

पौषमासे वसन्त्येते सप्त भास्करमण्डले । (१५।१)

लोकप्रकाशनार्थाय विप्रवर्याधिकारिणः ॥ (१५।२)

त्वष्टा च जमदग्निश्च कम्बलो ऽथ तिलोत्तमा । (१६।१)

ब्रह्मापेतो ऽथ ऋतजिद्धृतराष्ट्रश्च सप्तमः ॥ (१६।२)

माघमासे वसन्त्येते सप्त मैत्रेय भास्करे । (१७।१)

श्रूयतां चापरे सूर्ये फाल्गुने निवसन्ति ये ॥ (१७।२)

विष्णुर् अश्वतरो रम्भा सूर्यवर्चाश्च सत्यजित् । (१८।१)

विश्वामित्रस्तथा रक्षो यज्ञोपेतो महामुने ॥ (१८।२)

मासेष्वेतेषु मैत्रेय वसन्त्येते तु सप्तकाः । (१९।१)

सवितुर्मण्डले ब्रह्मन् विष्णुशक्त्युपबृंहिताः ॥ (१९।२)

स्तुवन्ति मुनयः सूर्यं गन्धर्वैर्गीयते पुरः । (२०।१)

नृत्यन्त्यप्सरसो यान्ति सूर्यस्यानु निशाचराः ॥ (२०।२)

वहन्ति पन्नगा यक्षैः क्रियते ऽभीषुसंग्रहः ॥ (२१।१)

वालखिल्यास्तथैवैनं परिवार्य समासते ॥ (२२।१)

सो ऽयं सप्तगणः सूर्यमण्डले मुनिसत्तम । (२३।१)

हिमोष्णवारिवृष्टीनां हेतुः स्वसमयं गतः ॥ (२३।२)