पराशर उवाच । (१।१)

सामवेदतरोः शाखा व्यासशिष्यः स जैमिनिः । (१।२)

क्रमेण येन मैत्रेय बिभेद शृणु तन्मम ॥ (१।३)

सुमन्तुस्तस्य पुत्रो ऽभूत्सुकर्मास्याप्यभूत्सुतः । (२।१)

अधीतवन्तावेकैकां संहितां तौ महामुनी ॥ (२।२)

साहस्रं संहिताभेदं सुकर्मा तत्सुतस्ततः । (३।१)

चकार तं च तच्छिष्यौ जगृहाते महाव्रतौ ॥ (३।२)

हिरण्यनाभः कौसल्यः पौष्पिञ्जिश्च द्विजोत्तम । (४।१)

उदीच्याः सामगाः शिष्यास्तस्य पञ्चदश स्मृताः ॥ (४।२)

हिरण्यनाभात्तावत्यः संहिता यैर्द्विजोत्तमैः । (५।१)

गृहीतास्ते ऽपि चोच्यन्ते पण्डितैः प्राच्यसामगाः ॥ (५।२)

लोकाक्षिः कुथुमिश्चैव कुषीदी लाङ्गलिस्तथा । (६।१)

पौष्पिञ्जिशिष्यास्तद्भेदैः संहिता बहुलीकृताः ॥ (६।२)

हिरण्यनाभशिष्यश्च चतुर्विंशतिसंहिताः । (७।१)

प्रोवाच कृतिनामासौ शिष्येभ्यः सुमहामतिः ॥ (७।२)

तैश्चापि सामवेदो ऽसौ शाखाभिर्बहुलीकृतः । (८।१)

अथर्वणाम् अथो वक्ष्ये संहितानां समुच्चयम् । (८।२)

अथर्ववेदं स मुनिः सुमन्तुरमितद्युतिः ॥ (८।३)

शिष्यमध्यापयामास कबन्धं सो ऽपि तं द्विधा । (९।१)

कृत्वा तु देवदर्शाय तथा पथ्याय दत्तवान् ॥ (९।२)

देवदर्शस्य शिष्यास्तु मौद्गो ब्रह्मबलिस्तथा । (१०।१)

शौल्कायनिः पिप्पलादस्तथान्यो मुनिसत्तम ॥ (१०।२)

पथ्यस्यापि त्रयः शिष्याः कृता यैर्द्विज संहिताः । (११।१)

जाजलिः कुमुदादिश्च तृतीयः शौनको द्विज ॥ (११।२)

शौनकस्तु द्विधा कृत्वा ददावेकां तु बभ्रवे । (१२।१)

द्वितीयां संहितां प्रादात्सैन्धवाय च संज्ञिने ॥ (१२।२)

सैन्धवान्मुञ्जकेशश्च ऽभिनद्वेदं द्विधा पुनः । (१३।१)

नक्षत्रकल्पो वेदानां संहितानां तथैव च ॥ (१३।२)

चतुर्थः स्यादाङ्गिरसः शान्तिकल्पश्च पञ्चमः । (१४।१)

श्रेष्ठास्त्वथर्वणाम् एते संहितानां विकल्पकाः ॥ (१४।२)

आख्यानैश्चाप्युपाख्यानैर्गाथाभिः कल्पशुद्धिभिः । (१५।१)

पुराणसंहितां चक्रे पुराणार्थविशारदः ॥ (१५।२)

प्रख्यातो व्यासशिष्यो ऽभूत्सूतो वै रोमहर्षणः । (१६।१)

पुराणसंहितां तस्मै ददौ व्यासो महामुनिः ॥ (१६।२)

सुमतिश्चाग्निवर्चाश्च मित्रायुः शांसपायनः । (१७।१)

अकृतव्रणो ऽथ सावर्णिः षट्शिष्यास्तस्य चाभवन् ॥ (१७।२)

काश्यपः संहिताकर्ता सावर्णिः शांशपायनः । (१८।१)

रोमहर्षणिका चान्या तिसॄणां मूलसंहिता ॥ (१८।२)

चतुष्टयेनाप्येतेन संहितानाम् इदं मुने ॥ (१९।१)

आद्यं सर्वपुराणानां पुराणं ब्राह्ममुच्यते । (२०।१)

अष्टादश पुराणानि पुराणज्ञाः प्रचक्षते ॥ (२०।२)

ब्राह्मं पाद्मं वैष्णवं च शैवं भागवतं तथा । (२१।१)

तथान्यं नारदीयं च मार्कण्डेयं च सप्तमम् ॥ (२१।२)

आग्नेयमष्टमं चैव भविष्यं नवमं तथा । (२२।१)

दशमं ब्रह्मवैवर्तं लैङ्गमेकादशं स्मृतम् ॥ (२२।२)

वाराहं द्वादशं चैव स्कान्दं चात्र त्रयोदशम् । (२३।१)

चतुर्दशं वामनं च कौर्मं पञ्चदशं स्मृतम् । (२३।२)

मात्स्यं च गारुडं चैव ब्रह्माण्डं च ततः परम् ॥ (२३।३)

सर्गश्च प्रतिसर्गश्च वंशो मन्वन्तराणि च । (२४।१)

सर्वेष्वेतेषु कथ्यन्ते वंशानुचरितं च यत् ॥ (२४।२)

यदेतत्तव मैत्रेय पुराणं कथ्यते मया । (२५।१)

एतद्वैष्णवसंज्ञं वै पाद्मस्य समनन्तरम् ॥ (२५।२)

सर्गे च प्रतिसर्गे च वंशमन्वन्तरादिषु । (२६।१)

कथ्यते भगवान्विष्णुरशेषेष्वेव सत्तम ॥ (२६।२)

अङ्गानि चतुरो वेदा मीमांसा न्यायविस्तरः । (२७।१)

पुराणं धर्मशास्त्रं च विद्या ह्येताश्चतुर्दश ॥ (२७।२)

आयुर्वेदो धनुर्वेदो गान्धर्वश्चैव ते त्रयः । (२८।१)

अर्थशास्त्रं चतुर्थं तु विद्या ह्यष्टादशैव ताः ॥ (२८।२)

ज्ञेया ब्रह्मर्षयः पूर्वं तेभ्यो देवर्षयः पुनः । (२९।१)

राजर्षयः पुनस्तेभ्य ऋषिप्रकृतयस्त्रयः ॥ (२९।२)

इति शाखाः समाख्याताः शाखाभेदास्तथैव च । (३०।१)

कर्तारश्चैव शाखानां भेदहेतुस्तथोदितः ॥ (३०।२)

सर्वमन्वन्तरेष्वेवं शाखाभेदाः समाः स्मृताः ॥ (३१।१)

प्राजापत्या श्रुतिर्नित्या तद्विकल्पास्त्विमे द्विज ॥ (३२।१)

एतत्तवोदितं सर्वं यत्पृष्टो ऽहमिह त्वया । (३३।१)

मैत्रेय वेदसम्बद्धं किमन्यत्कथयामि ते ॥ (३३।२)