पराशर उवाच । (१।१)

मैत्रेय श्रूयतां तस्य बलस्य बलशालिनः । (१।२)

कृतं यदन्यत्तेनाभूत्तदपि श्रूयतां त्वया ॥ (१।३)

नरकस्यासुरेन्द्रस्य देवपक्षविरोधिनः । (२।१)

सखाभवन्महावीर्यो द्विविदो नाम वानरः ॥ (२।२)

वैरानुबन्धं बलवान्स चकार सुरान्प्रति । (३।१)

नरकं हतवान्कृष्णो देवराजेन चोदितः ॥ (३।२)

करिष्ये सर्वदेवानां तस्मादेष प्रतिक्रियाम् । (४।१)

यज्ञविध्वंसनं कुर्वन्मर्त्यलोकक्षयं तथा ॥ (४।२)

ततो विध्वंसयामास यज्ञानज्ञानमोहितः । (५।१)

बिभेद साधुमर्यादां क्षयं चक्रे च देहिनाम् ॥ (५।२)

ददाह चपलो देशान्पुरग्रामान्तराणि च । (६।१)

क्वचिच्च पर्वताक्षेपैर्ग्रामादीन्समचूर्णयत् ॥ (६।२)

शैलानुत्पाट्य तोयेषु मुमोचाम्बुनिधौ तथा । (७।१)

पुनश्चार्णवमध्यस्थः क्षोभयामास सागरम् ॥ (७।२)

तेन विक्षोभितश्चाब्धिरुद्वेलो द्विज जायते । (८।१)

प्लावयंस्तीरजान् ग्रामान् पुरादीनतिवेगवान् ॥ (८।२)

कामरूपी महारूपं कृत्वा सस्यान्यशेषतः । (९।१)

लुठन्भ्रमणसंमर्दैः संचूर्णयति वानरः ॥ (९।२)

तेन विप्रकृतं सर्वं जगदेतद्दुरात्मना । (१०।१)

निःस्वाध्यायवषट्कारं मैत्रेयासीत्सुदुःखितम् ॥ (१०।२)

एकदा रैवतोद्याने पपौ पानं हलायुधः । (११।१)

रेवती च महाभागा तथैवान्या वरस्त्रियः ॥ (११।२)

उपगीयमानो विलसल्ललनामौलिमध्यगः । (१२।१)

रेमे यदुवरश्रेष्ठः कुबेर इव मन्दरे ॥ (१२।२)

ततः स वानरो ऽभ्येत्य गृहीत्वा सीरिणो हलम् । (१३।१)

मुसलं च चकारास्य संमुखं सविडम्बनम् ॥ (१३।२)

तथैव योषितां तासां जहासाभिमुखं कपिः । (१४।१)

पानपूर्णांश्च करकाञ् चिक्षेपाहत्य वै पदा ॥ (१४।२)

ततः कोपपरीतात्मा भर्त्सयामास तं बलः । (१५।१)

तथापि तमवज्ञाय चक्रे किलकिलाध्वनिम् ॥ (१५।२)

ततः समुत्थाय बलो जगृहे मुसलं रुषा । (१६।१)

सो ऽपि शैलशिलां भीमां जग्राह प्लवगोत्तमः ॥ (१६।२)

चिक्षेप च स तां क्षिप्तां मुसलेन सहस्रधा । (१७।१)

बिभेद यादवश्रेष्ठः सा पपात महीतले ॥ (१७।२)

आपतन्मुसलं चासौ समुल्लङ्घ्य प्लवंगमः । (१८।१)

वेगेनागम्य रोषेण तलेनोरस्यताडयत् ॥ (१८।२)

ततो बलेन कोपेन मुष्टिना मूर्ध्नि ताडितः । (१९।१)

पपात रुधिरोद्गारी द्विविदः क्षीणजीवितः ॥ (१९।२)

पतता तच्छरीरेण गिरेः शृङ्गमशीर्यत । (२०।१)

मैत्रेय शतधा वज्रिवज्रेणेव हि ताडितम् ॥ (२०।२)

पुष्पवृष्टिं ततो देवा रामस्योपरि चिक्षिपुः । (२१।१)

प्रशशंसुस् तथाभ्येत्य साध्वेतत्ते महत्कृतम् ॥ (२१।२)

अनेन दुष्टकपिना दैत्यपक्षोपकारिणा । (२२।१)

जगन् निराकृतं वीर दिष्ट्या स क्षयमागतः ॥ (२२।२)

पराशर उवाच । (२३।१)

एवंविधान्यनेकानि बलदेवस्य धीमतः । (२३।२)

कर्माण्यपरिमेयानि शेषस्य धरणीभृतः ॥ (२३।३)