और्व उवाच । (१।१)

हविष्यमत्स्यमांसैस्तु शशस्य शकुनस्य च । (१।२)

सौकरच्छागलैणेयरौरवैर्गवयेन च ॥ (१।३)

औरभ्रगव्यैश्च तथा मासवृद्ध्या पितामहाः । (२।१)

प्रयान्ति तृप्तिं मांसैस्तु नित्यं वार्ध्रीणसामिषैः ॥ (२।२)

खड्गमांसमतीवात्र कालशाकं तथा मधु । (३।१)

शस्तानि कर्मण्यत्यन्ततृप्तिदानि नरेश्वर ॥ (३।२)

गयामुपेत्य यः श्राद्धं करोति पृथिवीपते । (४।१)

सफलं तस्य तज्जन्म जायते पितृतुष्टिदम् ॥ (४।२)

प्रसातिकाः सनीवाराः श्यामाका द्विविधास्तथा । (५।१)

वन्यौषधीप्रधानास्तु श्राद्धार्हाः पुरुषर्षभ ॥ (५।२)

यवाः प्रियंगवो मुद्गा गोधूमा व्रीहयस्तिलाः । (६।१)

निष्पावाः कोविदाराश्च सर्षपाश्चात्र शोभनाः ॥ (६।२)

अकृताग्रयणं यच्च धान्यजातं नरेश्वर । (७।१)

राजमाषान् अणूंश्चैव मसूरांश्च विवर्जयेत् ॥ (७।२)

अलाबुं गृञ्जनं चैव पलाण्डुं पिण्डमूलकम् । (८।१)

गन्धारकं करम्भाणि लवणान्यौषराणि च ॥ (८।२)

आरक्ताश्चैव निर्यासाः प्रत्यक्षलवणानि च । (९।१)

वर्ज्यान्येतानि वै श्राद्धे यच्च वाचा न शस्यते ॥ (९।२)

नक्ताहृतमनुत्सृष्टं तृप्यते न च यत्र गौः । (१०।१)

दुर्गन्धि फेनिलं चाम्बु श्राद्धयोग्यं न पार्थिव ॥ (१०।२)

क्षीरमेकशफानां यदौष्ट्रमाविकमेव च । (११।१)

मार्गं च माहिषं चैव वर्जयेच्छ्राद्धकर्मणि ॥ (११।२)

षण्डापविद्धचण्डालपाषण्ड्युन्मत्तरोगिभिः । (१२।१)

कृकवाकुश्च नग्नैश्च वानरग्रामसूकरैः ॥ (१२।२)

उदक्यासूतिकाशौचिमृतहारैश्च वीक्षिते । (१३।१)

श्राद्धे सुरा न पितरो भुञ्जते पुरुषर्षभ ॥ (१३।२)

तस्मात्परिश्रिते कुर्याच्छ्राद्धं श्रद्धासमन्वितः । (१४।१)

उर्व्यां च तिलविक्षेपाद्यातुधानान्निवारयेत् ॥ (१४।२)

न पूति नैवोपपन्नं केशकीटादिभिर्नृप । (१५।१)

न चैवाभिषवैर्मिश्रमन्नं पर्युषितं तथा ॥ (१५।२)

श्रद्धासमन्वितैर्दत्तं पितृभ्यो नामगोत्रतः । (१६।१)

यदाहारास्तु ते जातास्तदाहारत्वमेति तत् ॥ (१६।२)

श्रूयन्ते चापि पितृभिर्गीता गाथा महीपते । (१७।१)

इक्ष्वाकोर्मनुपुत्रस्य कलापोपवने पुरा ॥ (१७।२)

अपि नस्ते भविष्यन्ति कुले सन्मार्गशीलिनः । (१८।१)

गयामुपेत्य ये पिण्डान्दास्यन्त्यस्माकमादरात् ॥ (१८।२)

अपि नः स कुले जायाद्यो नो दद्यात्त्रयोदशीम् । (१९।१)

पायसं मधुसर्पिभ्यां वर्षासु च मघासु च ॥ (१९।२)

गौरीं वाप्युद्वहेत्कन्यां नीलं वा वृषमुत्सृजेत् । (२०।१)

यजेत वाश्वमेधेन विधिवद्दक्षिणावता ॥ (२०।२)