और्व उवाच । (१।१)

सचैलस्य पितुः स्नानं जाते पुत्रे विधीयते । (१।२)

जातकर्म तथा कुर्याच्छ्राद्धम् अभ्युदये च यत् ॥ (१।३)

युग्मान् देवांश्च पित्र्यांश्च सम्यक्सव्यक्रमाद्द्विजान् । (२।१)

पूजयेद्भोजयेच्चैव तन्मना नान्यमानसः ॥ (२।२)

दध्यक्षतैः सबदरैः प्राङ्मुखोदङ्मुखो ऽपि वा । (३।१)

देवतीर्थेन वै पिण्डान्दद्यात्कायेन वा नृप ॥ (३।२)

नान्दीमुखः पितृगणस्तेन श्राद्धेन पार्थिव । (४।१)

प्रीयते तत्तु कर्तव्यं पुरुषैः सर्ववृद्धिषु ॥ (४।२)

कन्यापुत्रविवाहेषु प्रवेशे नववेश्मनः । (५।१)

नामकर्मणि बालानां चूडाकर्मादिके तथा ॥ (५।२)

सीमन्तोन्नयने चैव पुत्रादिमुखदर्शने । (६।१)

नान्दीमुखं पितृगणं पूजयेत्प्रयतो गृही ॥ (६।२)

पितृपूजाक्रमः प्रोक्तो वृद्धावेष समासतः । (७।१)

श्रूयतामवनीपाल प्रेतकर्मक्रियाविधिः ॥ (७।२)

प्रेतदेहं शुभैः स्नानैः स्नापितं स्रग्विभूषितम् । (८।१)

दग्ध्वा ग्रामाद्बहिः स्नात्वा सचैलाः सलिलाशये ॥ (८।२)

यत्र तत्र स्थितायैतदमुकायेति वादिनः । (९।१)

दक्षिणाभिमुखा दद्युर्बान्धवाः सलिलाञ्जलिम् ॥ (९।२)

प्रविष्टाश्च समं गोभिर्ग्रामं नक्षत्रदर्शने । (१०।१)

कटधर्मांस्ततः कुर्युर्भूमौ प्रस्तरशायिनः ॥ (१०।२)

दातव्यो ऽनुदिनं पिण्डः प्रेताय भुवि पार्थिव । (११।१)

दिवा च भक्तं भोक्तव्यममांसं मनुजर्षभ ॥ (११।२)

दिनानि तानि चेच्छातः कर्तव्यं विप्रभोजनम् । (१२।१)

प्रेतस्तृप्तिं तथा याति बन्धुवर्गेण भुञ्जता ॥ (१२।२)

प्रथमे ऽह्नि तृतीये च सप्तमे नवमे तथा । (१३।१)

वस्त्रत्यागं बहिःस्नानं कृत्वा दद्यात्तिलोदकम् ॥ (१३।२)

चतुर्थे ऽह्नि च कर्तव्यं भस्मास्थिचयनं नृप । (१४।१)

तदूर्ध्वमङ्गस्पर्शश्च सपिण्डानामपीष्यते ॥ (१४।२)

योग्याः सर्वक्रियाणां तु समानसलिलास्तथा । (१५।१)

अनुलेपनपुष्पादिभोगादन्यत्र पार्थिव ॥ (१५।२)

शय्यासनोपभोगश्च सपिण्डानामपीष्यते । (१६।१)

भस्मास्थिचयनादूर्ध्वं संयोगो न तु योषिताम् ॥ (१६।२)

बाले देशान्तरस्थे च पतिते च मुनौ मृते । (१७।१)

सद्यः शौचं तथेच्छातो जलाग्न्युद्बन्धनादिषु ॥ (१७।२)

मृतबन्धोर्दशाहानि कुलस्यान्नं न भुज्यते । (१८।१)

दानं प्रतिग्रहो यज्ञः स्वाध्यायश्च निवर्तते ॥ (१८।२)

विप्रस्यैतद्द्वादशाहं राजन्यस्याप्यशौचकम् । (१९।१)

अर्धमासं तु वैश्यस्य मासं शूद्रस्य शुद्धये ॥ (१९।२)

अयुजो भोजयेत्कामं द्विजानाद्ये ततो दिने । (२०।१)

दद्याद्दर्भेषु पिण्डं च प्रेतायोच्छिष्टसंनिधौ ॥ (२०।२)

वार्यायुधप्रतोदास्तु दण्डश्च द्विजभोजनात् । (२१।१)

स्प्रष्टव्यो ऽनन्तरं वर्णैः शुध्येरंस्ते ततः क्रमात् ॥ (२१।२)

ततः स्ववर्णधर्मा ये विप्रादीनाम् उदाहृताः । (२२।१)

तान्कुर्वीत पुमाञ्जीवेन्निजधर्मार्जनैस्तथा ॥ (२२।२)

मृते ऽहनि च कर्तव्यमेकोद्दिष्टमतः परम् । (२३।१)

आह्वानादिक्रिया दैवनियोगरहितं हि तत् ॥ (२३।२)

एको ऽर्घ्यस्तत्र दातव्यस्तथैवैकं पवित्रकम् । (२४।१)

प्रेताय पिण्डो दातव्यो भुक्तवत्सु द्विजातिषु ॥ (२४।२)

प्रश्नश्च तत्राभिरतिर्यजमानद्विजन्मनाम् । (२५।१)

अक्षय्यममुकस्येति वक्तव्यं विरतौ तथा ॥ (२५।२)

एकोद्दिष्टमयो धर्म इत्थम् आवत्सरात् स्मृतः । (२६।१)

सपिण्डीकरणं तस्मिन्काले राजेन्द्र तच्छृणु ॥ (२६।२)

एकोद्दिष्टविधानेन कार्यं तदपि पार्थिव । (२७।१)

तिलगन्धोदकैर्युक्तं तत्र पात्रचतुष्टयम् ॥ (२७।२)

पात्रं प्रेतस्य तत्रैकं पैत्रं पात्रत्रयं तथा । (२८।१)

सेचयेत्पितृपात्रेषु प्रेतपात्रं नृप त्रिषु ॥ (२८।२)

ततः पितृत्वमापन्ने तस्मिन्प्रेते महीपते । (२९।१)

श्राद्धधर्मैरशेषैस्तु तत्पूर्वानर्चयेत् पितॄन् ॥ (२९।२)

पुत्रः पौत्रः प्रपौत्रो वा बन्धुर्वा भ्रातृसंततिः । (३०।१)

सपिण्डसंततिर्वापि क्रियार्हो नृप जायते ॥ (३०।२)

तेषामभावे सर्वेषां समानोदकसंततिः । (३१।१)

मातृपक्षस्य पिण्डेन सम्बद्धा ये जलेन वा ॥ (३१।२)

कुलद्वये ऽपि चोच्छिन्ने स्त्रीभिः कार्याः क्रिया नृप । (३२।१)

संघातान्तर्गतैर्वापि कार्याः प्रेतस्य याः क्रियाः । (३२।२)

उत्सन्नबन्धुरिक्थानां कारयेदवनीपतिः ॥ (३२।३)

पूर्वाः क्रिया मध्यमाश्च तथा चैवोत्तराः क्रियाः । (३३।१)

त्रिःप्रकाराः क्रिया ह्येतास्तासां भेदं शृणुष्व मे ॥ (३३।२)

आदाहवार्यायुधादिस्पर्शाद्यन्तास् तु याः क्रियाः । (३४।१)

ताः पूर्वा मध्यमा मासि मास्येकोद्दिष्टसंज्ञिताः ॥ (३४।२)

प्रेते पितृत्वमापन्ने सपिण्डीकरणादनु । (३५।१)

क्रियन्ते याः क्रियाः पित्र्याः प्रोच्यन्ते ता नृपोत्तराः ॥ (३५।२)

पितृमातृसपिण्डैस्तु समानसलिलैस्तथा । (३६।१)

तत्संघातगतैश्चैव राज्ञा वा धनहारिणा ॥ (३६।२)

पूर्वाः क्रियास्तु कर्तव्याः पुत्राद्यैरेव चोत्तराः । (३७।१)

दौहित्रैर्वा नरश्रेष्ठ कार्यास्तत्तनयैस्तथा ॥ (३७।२)

मृताहनि च कर्तव्याः स्त्रीणामप्युत्तराः क्रियाः । (३८।१)

प्रतिसंवत्सरं राजन्नेकोद्दिष्टविधानतः ॥ (३८।२)

तस्मादुत्तरसंज्ञा याः क्रियास्ताः शृणु पार्थिव । (३९।१)

यदा यदा च कर्तव्या विधिना येन चानघ ॥ (३९।२)