Devatā देवता

Agni

Ṛṣi ऋषि

Iṣa Ātreya

Chandas छन्दस्

Jagatī

1. Ṛk 1

   त्वाम॑ग्न ऋता॒यवः॒ समी॑धिरे प्र॒त्नं प्र॒त्नास॑ ऊ॒तये॑ सहस्कृत ।
   पु॒रु॒श्चं॒द्रं य॑ज॒तं वि॒श्वधा॑यसं॒ दमू॑नसं गृ॒हप॑तिं॒ वरे॑ण्यं ॥

   त्वाम् अग्न ऋतायवः सम् ईधिरे प्रत्नम् प्रत्नास ऊतये सहस्कृत |
   पुरुश्चन्द्रं यजतं विश्वधायसं दमूनसं गृहपतिं वरेण्यम् ||

   tvā́magna ṛtāyávaḥ sámīdhire pratnám pratnā́sa ūtáye sahaskṛta ǀ
   puruścandrám yajatám viśvádhāyasam dámūnasam gṛhápatim váreṇyam ǁ

   tvām agna ṛtāyavaḥ sam īdhire pratnam pratnāsa ūtaye sahaskṛta |
   puruścandraṃ yajataṃ viśvadhāyasaṃ damūnasaṃ gṛhapatiṃ vareṇyam ||

   त्वाम् । अ॒ग्ने॒ । ऋ॒त॒ऽयवः॑ । सम् । ई॒धि॒रे॒ । प्र॒त्नम् । प्र॒त्नासः॑ । ऊ॒तये॑ । स॒हः॒ऽकृ॒त॒ ।
   पु॒रु॒ऽच॒न्द्रम् । य॒ज॒तम् । वि॒श्वऽधा॑यसम् । दमू॑नसम् । गृ॒हऽप॑तिम् । वरे॑ण्यम् ॥

   त्वाम् । अग्ने । ऋतऽयवः । सम् । ईधिरे । प्रत्नम् । प्रत्नासः । ऊतये । सहःऽकृत ।
   पुरुऽचन्द्रम् । यजतम् । विश्वऽधायसम् । दमूनसम् । गृहऽपतिम् । वरेण्यम् ॥

   tvā́m ǀ agne ǀ ṛta-yávaḥ ǀ sám ǀ īdhire ǀ pratnám ǀ pratnā́saḥ ǀ ūtáye ǀ sahaḥ-kṛta ǀ
   puru-candrám ǀ yajatám ǀ viśvá-dhāyasam ǀ dámūnasam ǀ gṛhá-patim ǀ váreṇyam ǁ

   tvām ǀ agne ǀ ṛta-yavaḥ ǀ sam ǀ īdhire ǀ pratnam ǀ pratnāsaḥ ǀ ūtaye ǀ sahaḥ-kṛta ǀ
   puru-candram ǀ yajatam ǀ viśva-dhāyasam ǀ damūnasam ǀ gṛha-patim ǀ vareṇyam ǁ

   5.8.1 Aṣṭaka 3.8.26.1Anuvāka 5.1.79Interpretations

2. Ṛk 2

   त्वाम॑ग्ने॒ अति॑थिं पू॒र्व्यं विशः॑ शो॒चिष्के॑शं गृ॒हप॑तिं॒ नि षे॑दिरे ।
   बृ॒हत्के॑तुं पुरु॒रूपं॑ धन॒स्पृतं॑ सु॒शर्मा॑णं॒ स्वव॑सं जर॒द्विषं॑ ॥

   त्वाम् अग्ने अतिथिम् पूर्व्यं विशः शोचिष्केशं गृहपतिं नि षेदिरे |
   बृहत्केतुम् पुरुरूपं धनस्पृतं सुशर्माणं स्ववसं जरद्विषम् ||

   tvā́magne átithim pūrvyám víśaḥ śocíṣkeśam gṛhápatim ní ṣedire ǀ
   bṛhátketum pururū́pam dhanaspṛ́tam suśármāṇam svávasam jaradvíṣam ǁ

   tvām agne atithim pūrvyaṃ viśaḥ śociṣkeśaṃ gṛhapatiṃ ni ṣedire |
   bṛhatketum pururūpaṃ dhanaspṛtaṃ suśarmāṇaṃ svavasaṃ jaradviṣam ||

   त्वाम् । अ॒ग्ने॒ । अति॑थिम् । पू॒र्व्यम् । विशः॑ । शो॒चिःऽके॑शम् । गृ॒हऽप॑तिम् । नि । से॒दि॒रे॒ ।
   बृ॒हत्ऽके॑तुम् । पु॒रु॒ऽरूप॑म् । ध॒न॒ऽस्पृत॑म् । सु॒ऽशर्मा॑णम् । सु॒ऽअव॑सम् । ज॒र॒त्ऽविष॑म् ॥

   त्वाम् । अग्ने । अतिथिम् । पूर्व्यम् । विशः । शोचिःऽकेशम् । गृहऽपतिम् । नि । सेदिरे ।
   बृहत्ऽकेतुम् । पुरुऽरूपम् । धनऽस्पृतम् । सुऽशर्माणम् । सुऽअवसम् । जरत्ऽविषम् ॥

   tvā́m ǀ agne ǀ átithim ǀ pūrvyám ǀ víśaḥ ǀ śocíḥ-keśam ǀ gṛhá-patim ǀ ní ǀ sedire ǀ
   bṛhát-ketum ǀ puru-rū́pam ǀ dhana-spṛ́tam ǀ su-śármāṇam ǀ su-ávasam ǀ jarat-víṣam ǁ

   tvām ǀ agne ǀ atithim ǀ pūrvyam ǀ viśaḥ ǀ śociḥ-keśam ǀ gṛha-patim ǀ ni ǀ sedire ǀ
   bṛhat-ketum ǀ puru-rūpam ǀ dhana-spṛtam ǀ su-śarmāṇam ǀ su-avasam ǀ jarat-viṣam ǁ

   5.8.2 Aṣṭaka 3.8.26.2Anuvāka 5.1.80Interpretations

3. Ṛk 3

   त्वाम॑ग्ने॒ मानु॑षीरीळते॒ विशो॑ होत्रा॒विदं॒ विवि॑चिं रत्न॒धात॑मं ।
   गुहा॒ संतं॑ सुभग वि॒श्वद॑र्शतं तुविष्व॒णसं॑ सु॒यजं॑ घृत॒श्रियं॑ ॥

   त्वाम् अग्ने मानुषीर् ईऌअते विशो होत्राविदं विविचिं रत्नधातमम् |
   गुहा सन्तं सुभग विश्वदर्शतं तुविष्वणसं सुयजं घृतश्रियम् ||

   tvā́magne mā́nuṣīrīḷate víśo hotrāvídam vívicim ratnadhā́tamam ǀ
   gúhā sántam subhaga viśvádarśatam tuviṣvaṇásam suyájam ghṛtaśríyam ǁ

   tvām agne mānuṣīr īḷate viśo hotrāvidaṃ viviciṃ ratnadhātamam |
   guhā santaṃ subhaga viśvadarśataṃ tuviṣvaṇasaṃ suyajaṃ ghṛtaśriyam ||

   त्वाम् । अ॒ग्ने॒ । मानु॑षीः । ई॒ळ॒ते॒ । विशः॑ । हो॒त्रा॒ऽविद॑म् । विवि॑चिम् । र॒त्न॒ऽधात॑मम् ।
   गुहा॑ । सन्त॑म् । सु॒ऽभ॒ग॒ । वि॒श्वऽद॑र्शतम् । तु॒वि॒ऽस्व॒नस॑म् । सु॒ऽयज॑म् । घृ॒त॒ऽश्रिय॑म् ॥

   त्वाम् । अग्ने । मानुषीः । ईळते । विशः । होत्राऽविदम् । विविचिम् । रत्नऽधातमम् ।
   गुहा । सन्तम् । सुऽभग । विश्वऽदर्शतम् । तुविऽस्वनसम् । सुऽयजम् । घृतऽश्रियम् ॥

   tvā́m ǀ agne ǀ mā́nuṣīḥ ǀ īḷate ǀ víśaḥ ǀ hotrā-vídam ǀ vívicim ǀ ratna-dhā́tamam ǀ
   gúhā ǀ sántam ǀ su-bhaga ǀ viśvá-darśatam ǀ tuvi-svanásam ǀ su-yájam ǀ ghṛta-śríyam ǁ

   tvām ǀ agne ǀ mānuṣīḥ ǀ īḷate ǀ viśaḥ ǀ hotrā-vidam ǀ vivicim ǀ ratna-dhātamam ǀ
   guhā ǀ santam ǀ su-bhaga ǀ viśva-darśatam ǀ tuvi-svanasam ǀ su-yajam ǀ ghṛta-śriyam ǁ

   5.8.3 Aṣṭaka 3.8.26.3Anuvāka 5.1.81Interpretations

4. Ṛk 4

   त्वाम॑ग्ने धर्ण॒सिं वि॒श्वधा॑ व॒यं गी॒र्भिर्गृ॒णंतो॒ नम॒सोप॑ सेदिम ।
   स नो॑ जुषस्व समिधा॒नो अं॑गिरो दे॒वो मर्त॑स्य य॒शसा॑ सुदी॒तिभिः॑ ॥

   त्वाम् अग्ने धर्णसिं विश्वधा वयं गीर्भिर् गृणन्तो नमसोप सेदिम |
   स नो जुषस्व समिधानो अङ्गिरो देवो मर्तस्य यशसा सुदीतिभिः ||

   tvā́magne dharṇasím viśvádhā vayám gīrbhírgṛṇánto námasópa sedima ǀ
   sá no juṣasva samidhānó aṅgiro devó mártasya yaśásā sudītíbhiḥ ǁ

   tvām agne dharṇasiṃ viśvadhā vayaṃ gīrbhir gṛṇanto namasopa sedima |
   sa no juṣasva samidhāno aṅgiro devo martasya yaśasā sudītibhiḥ ||

   त्वाम् । अ॒ग्ने॒ । ध॒र्ण॒सिम् । वि॒श्वधा॑ । व॒यम् । गीः॒ऽभिः । गृ॒णन्तः॑ । नम॑सा । उप॑ । से॒दि॒म॒ ।
   सः । नः॒ । जु॒ष॒स्व॒ । स॒म्ऽइ॒धा॒नः । अ॒ङ्गि॒रः॒ । दे॒वः । मर्त॑स्य । य॒शसा॑ । सु॒दी॒तिऽभिः॑ ॥

   त्वाम् । अग्ने । धर्णसिम् । विश्वधा । वयम् । गीःऽभिः । गृणन्तः । नमसा । उप । सेदिम ।
   सः । नः । जुषस्व । सम्ऽइधानः । अङ्गिरः । देवः । मर्तस्य । यशसा । सुदीतिऽभिः ॥

   tvā́m ǀ agne ǀ dharṇasím ǀ viśvádhā ǀ vayám ǀ gīḥ-bhíḥ ǀ gṛṇántaḥ ǀ námasā ǀ úpa ǀ sedima ǀ
   sáḥ ǀ naḥ ǀ juṣasva ǀ sam-idhānáḥ ǀ aṅgiraḥ ǀ deváḥ ǀ mártasya ǀ yaśásā ǀ sudītí-bhiḥ ǁ

   tvām ǀ agne ǀ dharṇasim ǀ viśvadhā ǀ vayam ǀ gīḥ-bhiḥ ǀ gṛṇantaḥ ǀ namasā ǀ upa ǀ sedima ǀ
   saḥ ǀ naḥ ǀ juṣasva ǀ sam-idhānaḥ ǀ aṅgiraḥ ǀ devaḥ ǀ martasya ǀ yaśasā ǀ sudīti-bhiḥ ǁ

   5.8.4 Aṣṭaka 3.8.26.4Anuvāka 5.1.82Interpretations

5. Ṛk 5

   त्वम॑ग्ने पुरु॒रूपो॑ वि॒शेवि॑शे॒ वयो॑ दधासि प्र॒त्नथा॑ पुरुष्टुत ।
   पु॒रूण्यन्ना॒ सह॑सा॒ वि रा॑जसि॒ त्विषिः॒ सा ते॑ तित्विषा॒णस्य॒ नाधृषे॑ ॥

   त्वम् अग्ने पुरुरूपो विशे-विशे वयो दधासि प्रत्नथा पुरुष्टुत |
   पुरूण्य् अन्ना सहसा वि राजसि त्विषिः सा ते तित्विषाणस्य नाधृषे ||

   tvámagne pururū́po viśéviśe váyo dadhāsi pratnáthā puruṣṭuta ǀ
   purū́ṇyánnā sáhasā ví rājasi tvíṣiḥ sā́ te titviṣāṇásya nā́dhṛ́ṣe ǁ

   tvam agne pururūpo viśe-viśe vayo dadhāsi pratnathā puruṣṭuta |
   purūṇy annā sahasā vi rājasi tviṣiḥ sā te titviṣāṇasya nādhṛṣe ||

   त्वम् । अ॒ग्ने॒ । पु॒रु॒ऽरूपः॑ । वि॒शेऽवि॑शे । वयः॑ । द॒धा॒सि॒ । प्र॒त्नऽथा॑ । पु॒रु॒ऽस्तु॒त॒ ।
   पु॒रूणि॑ । अन्ना॑ । सह॑सा । वि । रा॒ज॒सि॒ । त्विषिः॑ । सा । ते॒ । ति॒त्वि॒षा॒णस्य॑ । न । आ॒ऽधृषे॑ ॥

   त्वम् । अग्ने । पुरुऽरूपः । विशेऽविशे । वयः । दधासि । प्रत्नऽथा । पुरुऽस्तुत ।
   पुरूणि । अन्ना । सहसा । वि । राजसि । त्विषिः । सा । ते । तित्विषाणस्य । न । आऽधृषे ॥

   tvám ǀ agne ǀ puru-rū́paḥ ǀ viśé-viśe ǀ váyaḥ ǀ dadhāsi ǀ pratná-thā ǀ puru-stuta ǀ
   purū́ṇi ǀ ánnā ǀ sáhasā ǀ ví ǀ rājasi ǀ tvíṣiḥ ǀ sā́ ǀ te ǀ titviṣāṇásya ǀ ná ǀ ā-dhṛ́ṣe ǁ

   tvam ǀ agne ǀ puru-rūpaḥ ǀ viśe-viśe ǀ vayaḥ ǀ dadhāsi ǀ pratna-thā ǀ puru-stuta ǀ
   purūṇi ǀ annā ǀ sahasā ǀ vi ǀ rājasi ǀ tviṣiḥ ǀ sā ǀ te ǀ titviṣāṇasya ǀ na ǀ ā-dhṛṣe ǁ

   5.8.5 Aṣṭaka 3.8.26.5Anuvāka 5.1.83Interpretations

6. Ṛk 6

   त्वाम॑ग्ने समिधा॒नं य॑विष्ठ्य दे॒वा दू॒तं च॑क्रिरे हव्य॒वाह॑नं ।
   उ॒रु॒ज्रय॑सं घृ॒तयो॑नि॒माहु॑तं त्वे॒षं चक्षु॑र्दधिरे चोद॒यन्म॑ति ॥

   त्वाम् अग्ने समिधानं यविष्ठ्य देवा दूतं चक्रिरे हव्यवाहनम् |
   उरुज्रयसं घृतयोनिम् आहुतं त्वेषं चक्षुर् दधिरे चोदयन्मति ||

   tvā́magne samidhānám yaviṣṭhya devā́ dūtám cakrire havyavā́hanam ǀ
   urujráyasam ghṛtáyonimā́hutam tveṣám cákṣurdadhire codayánmati ǁ

   tvām agne samidhānaṃ yaviṣṭhya devā dūtaṃ cakrire havyavāhanam |
   urujrayasaṃ ghṛtayonim āhutaṃ tveṣaṃ cakṣur dadhire codayanmati ||

   त्वाम् । अ॒ग्ने॒ । स॒म्ऽइ॒धा॒नम् । य॒वि॒ष्ठ्य॒ । दे॒वाः । दू॒तम् । च॒क्रि॒रे॒ । ह॒व्य॒ऽवाह॑नम् ।
   उ॒रु॒ऽज्रय॑सम् । घृ॒तऽयो॑निम् । आऽहु॑तम् । त्वे॒षम् । चक्षुः॑ । द॒धि॒रे॒ । चो॒द॒यत्ऽम॑ति ॥

   त्वाम् । अग्ने । सम्ऽइधानम् । यविष्ठ्य । देवाः । दूतम् । चक्रिरे । हव्यऽवाहनम् ।
   उरुऽज्रयसम् । घृतऽयोनिम् । आऽहुतम् । त्वेषम् । चक्षुः । दधिरे । चोदयत्ऽमति ॥

   tvā́m ǀ agne ǀ sam-idhānám ǀ yaviṣṭhya ǀ devā́ḥ ǀ dūtám ǀ cakrire ǀ havya-vā́hanam ǀ
   uru-jráyasam ǀ ghṛtá-yonim ǀ ā́-hutam ǀ tveṣám ǀ cákṣuḥ ǀ dadhire ǀ codayát-mati ǁ

   tvām ǀ agne ǀ sam-idhānam ǀ yaviṣṭhya ǀ devāḥ ǀ dūtam ǀ cakrire ǀ havya-vāhanam ǀ
   uru-jrayasam ǀ ghṛta-yonim ǀ ā-hutam ǀ tveṣam ǀ cakṣuḥ ǀ dadhire ǀ codayat-mati ǁ

   5.8.6 Aṣṭaka 3.8.26.6Anuvāka 5.1.84Interpretations

7. Ṛk 7

   त्वाम॑ग्ने प्र॒दिव॒ आहु॑तं घृ॒तैः सु॑म्ना॒यवः॑ सुष॒मिधा॒ समी॑धिरे ।
   स वा॑वृधा॒न ओष॑धीभिरुक्षि॒तो॒३॒॑ऽभि ज्रयां॑सि॒ पार्थि॑वा॒ वि ति॑ष्ठसे ॥

   त्वाम् अग्ने प्रदिव आहुतं घृतैः सुम्नायवः सुषमिधा सम् ईधिरे |
   स वावृधान ओषधीभिर् उक्षितो ऽभि ज्रयांसि पार्थिवा वि तिष्ठसे ||

   tvā́magne pradíva ā́hutam ghṛtáiḥ sumnāyávaḥ suṣamídhā sámīdhire ǀ
   sá vāvṛdhāná óṣadhībhirukṣitó’bhí jráyāṃsi pā́rthivā ví tiṣṭhase ǁ

   tvām agne pradiva āhutaṃ ghṛtaiḥ sumnāyavaḥ suṣamidhā sam īdhire |
   sa vāvṛdhāna oṣadhībhir ukṣito 'bhi jrayāṃsi pārthivā vi tiṣṭhase ||

   त्वाम् । अ॒ग्ने॒ । प्र॒ऽदिवः॑ । आऽहु॑तम् । घृ॒तैः । सु॒म्न॒ऽयवः॑ । सु॒ऽस॒मिधा॑ । सम् । ई॒धि॒रे॒ ।
   सः । व॒वृ॒धा॒नः । ओष॑धीभिः । उ॒क्षि॒तः । अ॒भि । ज्रयां॑सि । पार्थि॑वा । वि । ति॒ष्ठ॒से॒ ॥

   त्वाम् । अग्ने । प्रऽदिवः । आऽहुतम् । घृतैः । सुम्नऽयवः । सुऽसमिधा । सम् । ईधिरे ।
   सः । ववृधानः । ओषधीभिः । उक्षितः । अभि । ज्रयांसि । पार्थिवा । वि । तिष्ठसे ॥

   tvā́m ǀ agne ǀ pra-dívaḥ ǀ ā́-hutam ǀ ghṛtáiḥ ǀ sumna-yávaḥ ǀ su-samídhā ǀ sám ǀ īdhire ǀ
   sáḥ ǀ vavṛdhānáḥ ǀ óṣadhībhiḥ ǀ ukṣitáḥ ǀ abhí ǀ jráyāṃsi ǀ pā́rthivā ǀ ví ǀ tiṣṭhase ǁ

   tvām ǀ agne ǀ pra-divaḥ ǀ ā-hutam ǀ ghṛtaiḥ ǀ sumna-yavaḥ ǀ su-samidhā ǀ sam ǀ īdhire ǀ
   saḥ ǀ vavṛdhānaḥ ǀ oṣadhībhiḥ ǀ ukṣitaḥ ǀ abhi ǀ jrayāṃsi ǀ pārthivā ǀ vi ǀ tiṣṭhase ǁ

   5.8.7 Aṣṭaka 3.8.26.7Anuvāka 5.1.85Interpretations

Text, recitation and interpretations from the Ṛgveda database of theveda.org.in.