Devatā देवता

Agni

Ṛṣi ऋषि

Vasuśruta Ātreya

Chandas छन्दस्

Triṣṭubh

1. Ṛk 1

   त्वाम॑ग्ने॒ वसु॑पतिं॒ वसू॑नाम॒भि प्र मं॑दे अध्व॒रेषु॑ राजन् ।
   त्वया॒ वाजं॑ वाज॒यंतो॑ जयेमा॒भि ष्या॑म पृत्सु॒तीर्मर्त्या॑नां ॥

   त्वाम् अग्ने वसुपतिं वसूनाम् अभि प्र मन्दे अध्वरेषु राजन् |
   त्वया वाजं वाजयन्तो जयेमाभि ष्याम पृत्सुतीर् मर्त्यानाम् ||

   tvā́magne vásupatim vásūnāmabhí prá mande adhvaréṣu rājan ǀ
   tváyā vā́jam vājayánto jayemābhí ṣyāma pṛtsutī́rmártyānām ǁ

   tvām agne vasupatiṃ vasūnām abhi pra mande adhvareṣu rājan |
   tvayā vājaṃ vājayanto jayemābhi ṣyāma pṛtsutīr martyānām ||

   त्वाम् । अ॒ग्ने॒ । वसु॑ऽपतिम् । वसू॑नाम् । अ॒भि । प्र । म॒न्दे॒ । अ॒ध्व॒रेषु॑ । रा॒ज॒न् ।
   त्वया॑ । वाज॑म् । वा॒ज॒ऽयन्तः॑ । ज॒ये॒म॒ । अ॒भि । स्या॒म॒ । पृ॒त्सु॒तीः । मर्त्या॑नाम् ॥

   त्वाम् । अग्ने । वसुऽपतिम् । वसूनाम् । अभि । प्र । मन्दे । अध्वरेषु । राजन् ।
   त्वया । वाजम् । वाजऽयन्तः । जयेम । अभि । स्याम । पृत्सुतीः । मर्त्यानाम् ॥

   tvā́m ǀ agne ǀ vásu-patim ǀ vásūnām ǀ abhí ǀ prá ǀ mande ǀ adhvaréṣu ǀ rājan ǀ
   tváyā ǀ vā́jam ǀ vāja-yántaḥ ǀ jayema ǀ abhí ǀ syāma ǀ pṛtsutī́ḥ ǀ mártyānām ǁ

   tvām ǀ agne ǀ vasu-patim ǀ vasūnām ǀ abhi ǀ pra ǀ mande ǀ adhvareṣu ǀ rājan ǀ
   tvayā ǀ vājam ǀ vāja-yantaḥ ǀ jayema ǀ abhi ǀ syāma ǀ pṛtsutīḥ ǀ martyānām ǁ

   5.4.1 Aṣṭaka 3.8.18.1Anuvāka 5.1.37Interpretations

2. Ṛk 2

   ह॒व्य॒वाळ॒ग्निर॒जरः॑ पि॒ता नो॑ वि॒भुर्वि॒भावा॑ सु॒दृशी॑को अ॒स्मे ।
   सु॒गा॒र्ह॒प॒त्याः समिषो॑ दिदीह्यस्म॒द्र्य१॒॑क्सं मि॑मीहि॒ श्रवां॑सि ॥

   हव्यवाऌ अग्निर् अजरः पिता नो विभुर् विभावा सुदृशीको अस्मे |
   सुगार्हपत्याः सम् इषो दिदीह्य् अस्मद्र्यक् सम् मिमीहि श्रवांसि ||

   havyavā́ḷagnírajáraḥ pitā́ no vibhúrvibhā́vā sudṛ́śīko asmé ǀ
   sugārhapatyā́ḥ sámíṣo didīhyasmadryáksám mimīhi śrávāṃsi ǁ

   havyavāḷ agnir ajaraḥ pitā no vibhur vibhāvā sudṛśīko asme |
   sugārhapatyāḥ sam iṣo didīhy asmadryak sam mimīhi śravāṃsi ||

   ह॒व्य॒ऽवाट् । अ॒ग्निः । अ॒जरः॑ । पि॒ता । नः॒ । वि॒ऽभुः । वि॒भाऽवा॑ । सु॒ऽदृशी॑कः । अ॒स्मे इति॑ ।
   सु॒ऽगा॒र्ह॒प॒त्याः । सम् । इषः॑ । दि॒दी॒हि॒ । अ॒स्म॒द्र्य॑क् । सम् । मि॒मी॒हि॒ । श्रवां॑सि ॥

   हव्यऽवाट् । अग्निः । अजरः । पिता । नः । विऽभुः । विभाऽवा । सुऽदृशीकः । अस्मे इति ।
   सुऽगार्हपत्याः । सम् । इषः । दिदीहि । अस्मद्र्यक् । सम् । मिमीहि । श्रवांसि ॥

   havya-vā́ṭ ǀ agníḥ ǀ ajáraḥ ǀ pitā́ ǀ naḥ ǀ vi-bhúḥ ǀ vibhā́-vā ǀ su-dṛ́śīkaḥ ǀ asmé íti ǀ
   su-gārhapatyā́ḥ ǀ sám ǀ íṣaḥ ǀ didīhi ǀ asmadryák ǀ sám ǀ mimīhi ǀ śrávāṃsi ǁ

   havya-vāṭ ǀ agniḥ ǀ ajaraḥ ǀ pitā ǀ naḥ ǀ vi-bhuḥ ǀ vibhā-vā ǀ su-dṛśīkaḥ ǀ asme iti ǀ
   su-gārhapatyāḥ ǀ sam ǀ iṣaḥ ǀ didīhi ǀ asmadryak ǀ sam ǀ mimīhi ǀ śravāṃsi ǁ

   5.4.2 Aṣṭaka 3.8.18.2Anuvāka 5.1.38Interpretations

3. Ṛk 3

   वि॒शां क॒विं वि॒श्पतिं॒ मानु॑षीणां॒ शुचिं॑ पाव॒कं घृ॒तपृ॑ष्ठम॒ग्निं ।
   नि होता॑रं विश्व॒विदं॑ दधिध्वे॒ स दे॒वेषु॑ वनते॒ वार्या॑णि ॥

   विशां कविं विश्पतिम् मानुषीणां शुचिम् पावकं घृतपृष्ठम् अग्निम् |
   नि होतारं विश्वविदं दधिध्वे स देवेषु वनते वार्याणि ||

   viśā́m kavím viśpátim mā́nuṣīṇām śúcim pāvakám ghṛtápṛṣṭhamagním ǀ
   ní hótāram viśvavídam dadhidhve sá devéṣu vanate vā́ryāṇi ǁ

   viśāṃ kaviṃ viśpatim mānuṣīṇāṃ śucim pāvakaṃ ghṛtapṛṣṭham agnim |
   ni hotāraṃ viśvavidaṃ dadhidhve sa deveṣu vanate vāryāṇi ||

   वि॒शाम् । क॒विम् । वि॒श्पति॑म् । मानु॑षीणाम् । शुचि॑म् । पा॒व॒कम् । घृ॒तऽपृ॑ष्ठम् । अ॒ग्निम् ।
   नि । होता॑रम् । वि॒श्व॒ऽविद॑म् । द॒धि॒ध्वे॒ । सः । दे॒वेषु॑ । व॒न॒ते॒ । वार्या॑णि ॥

   विशाम् । कविम् । विश्पतिम् । मानुषीणाम् । शुचिम् । पावकम् । घृतऽपृष्ठम् । अग्निम् ।
   नि । होतारम् । विश्वऽविदम् । दधिध्वे । सः । देवेषु । वनते । वार्याणि ॥

   viśā́m ǀ kavím ǀ viśpátim ǀ mā́nuṣīṇām ǀ śúcim ǀ pāvakám ǀ ghṛtá-pṛṣṭham ǀ agním ǀ
   ní ǀ hótāram ǀ viśva-vídam ǀ dadhidhve ǀ sáḥ ǀ devéṣu ǀ vanate ǀ vā́ryāṇi ǁ

   viśām ǀ kavim ǀ viśpatim ǀ mānuṣīṇām ǀ śucim ǀ pāvakam ǀ ghṛta-pṛṣṭham ǀ agnim ǀ
   ni ǀ hotāram ǀ viśva-vidam ǀ dadhidhve ǀ saḥ ǀ deveṣu ǀ vanate ǀ vāryāṇi ǁ

   5.4.3 Aṣṭaka 3.8.18.3Anuvāka 5.1.39Interpretations

4. Ṛk 4

   जु॒षस्वा॑ग्न॒ इळ॑या स॒जोषा॒ यत॑मानो र॒श्मिभिः॒ सूर्य॑स्य ।
   जु॒षस्व॑ नः स॒मिधं॑ जातवेद॒ आ च॑ दे॒वान्ह॑वि॒रद्या॑य वक्षि ॥

   जुषस्वाग्न इऌअया सजोषा यतमानो रश्मिभिः सूर्यस्य |
   जुषस्व नः समिधं जातवेद आ च देवान् हविरद्याय वक्षि ||

   juṣásvāgna íḷayā sajóṣā yátamāno raśmíbhiḥ sū́ryasya ǀ
   juṣásva naḥ samídham jātaveda ā́ ca devā́nhavirádyāya vakṣi ǁ

   juṣasvāgna iḷayā sajoṣā yatamāno raśmibhiḥ sūryasya |
   juṣasva naḥ samidhaṃ jātaveda ā ca devān haviradyāya vakṣi ||

   जु॒षस्व॑ । अ॒ग्ने॒ । इळ॑या । स॒ऽजोषाः॑ । यत॑मानः । र॒श्मिऽभिः॑ । सूर्य॑स्य ।
   जु॒षस्व॑ । नः॒ । स॒म्ऽइध॑म् । जा॒त॒ऽवे॒दः॒ । आ । च॒ । दे॒वान् । ह॒विः॒ऽअद्या॑य । व॒क्षि॒ ॥

   जुषस्व । अग्ने । इळया । सऽजोषाः । यतमानः । रश्मिऽभिः । सूर्यस्य ।
   जुषस्व । नः । सम्ऽइधम् । जातऽवेदः । आ । च । देवान् । हविःऽअद्याय । वक्षि ॥

   juṣásva ǀ agne ǀ íḷayā ǀ sa-jóṣāḥ ǀ yátamānaḥ ǀ raśmí-bhiḥ ǀ sū́ryasya ǀ
   juṣásva ǀ naḥ ǀ sam-ídham ǀ jāta-vedaḥ ǀ ā́ ǀ ca ǀ devā́n ǀ haviḥ-ádyāya ǀ vakṣi ǁ

   juṣasva ǀ agne ǀ iḷayā ǀ sa-joṣāḥ ǀ yatamānaḥ ǀ raśmi-bhiḥ ǀ sūryasya ǀ
   juṣasva ǀ naḥ ǀ sam-idham ǀ jāta-vedaḥ ǀ ā ǀ ca ǀ devān ǀ haviḥ-adyāya ǀ vakṣi ǁ

   5.4.4 Aṣṭaka 3.8.18.4Anuvāka 5.1.40Interpretations

5. Ṛk 5

   जुष्टो॒ दमू॑ना॒ अति॑थिर्दुरो॒ण इ॒मं नो॑ य॒ज्ञमुप॑ याहि वि॒द्वान् ।
   विश्वा॑ अग्ने अभि॒युजो॑ वि॒हत्या॑ शत्रूय॒तामा भ॑रा॒ भोज॑नानि ॥

   जुष्टो दमूना अतिथिर् दुरोण इमं नो यज्ञम् उप याहि विद्वान् |
   विश्वा अग्ने अभियुजो विहत्या शत्रूयताम् आ भरा भोजनानि ||

   júṣṭo dámūnā átithirduroṇá imám no yajñámúpa yāhi vidvā́n ǀ
   víśvā agne abhiyújo vihátyā śatrūyatā́mā́ bharā bhójanāni ǁ

   juṣṭo damūnā atithir duroṇa imaṃ no yajñam upa yāhi vidvān |
   viśvā agne abhiyujo vihatyā śatrūyatām ā bharā bhojanāni ||

   जुष्टः॑ । दमू॑नाः । अति॑थिः । दु॒रो॒णे । इ॒मम् । नः॒ । य॒ज्ञम् । उप॑ । या॒हि॒ । वि॒द्वान् ।
   विश्वा॑ । अ॒ग्ने॒ । अ॒भि॒ऽयुजः॑ । वि॒ऽहत्य॑ । श॒त्रु॒ऽय॒ताम् । आ । भ॒र॒ । भोज॑नानि ॥

   जुष्टः । दमूनाः । अतिथिः । दुरोणे । इमम् । नः । यज्ञम् । उप । याहि । विद्वान् ।
   विश्वा । अग्ने । अभिऽयुजः । विऽहत्य । शत्रुऽयताम् । आ । भर । भोजनानि ॥

   júṣṭaḥ ǀ dámūnāḥ ǀ átithiḥ ǀ duroṇé ǀ imám ǀ naḥ ǀ yajñám ǀ úpa ǀ yāhi ǀ vidvā́n ǀ
   víśvā ǀ agne ǀ abhi-yújaḥ ǀ vi-hátya ǀ śatru-yatā́m ǀ ā́ ǀ bhara ǀ bhójanāni ǁ

   juṣṭaḥ ǀ damūnāḥ ǀ atithiḥ ǀ duroṇe ǀ imam ǀ naḥ ǀ yajñam ǀ upa ǀ yāhi ǀ vidvān ǀ
   viśvā ǀ agne ǀ abhi-yujaḥ ǀ vi-hatya ǀ śatru-yatām ǀ ā ǀ bhara ǀ bhojanāni ǁ

   5.4.5 Aṣṭaka 3.8.18.5Anuvāka 5.1.41Interpretations

6. Ṛk 6

   व॒धेन॒ दस्युं॒ प्र हि चा॒तय॑स्व॒ वयः॑ कृण्वा॒नस्त॒न्वे॒३॒॑ स्वायै॑ ।
   पिप॑र्षि॒ यत्स॑हसस्पुत्र दे॒वान्त्सो अ॑ग्ने पाहि नृतम॒ वाजे॑ अ॒स्मान् ॥

   वधेन दस्युम् प्र हि चातयस्व वयः कृण्वानस् तन्वे स्वायै |
   पिपर्षि यत् सहसस् पुत्र देवान्त् सो अग्ने पाहि नृतम वाजे अस्मान् ||

   vadhéna dásyum prá hí cātáyasva váyaḥ kṛṇvānástanve svā́yai ǀ
   píparṣi yátsahasasputra devā́ntsó agne pāhi nṛtama vā́je asmā́n ǁ

   vadhena dasyum pra hi cātayasva vayaḥ kṛṇvānas tanve svāyai |
   piparṣi yat sahasas putra devānt so agne pāhi nṛtama vāje asmān ||

   वे॒धेन॑ । दस्यु॑म् । प्र । हि । चा॒तय॑स्व । वयः॑ । कृ॒ण्वा॒नः । त॒न्वे॑ । स्वायै॑ ।
   पिप॑र्षि । यत् । स॒ह॒सः॒ । पु॒त्र॒ । दे॒वान् । सः । अ॒ग्ने॒ । पा॒हि॒ । नृ॒ऽत॒म॒ । वाजे॑ । अ॒स्मान् ॥

   वेधेन । दस्युम् । प्र । हि । चातयस्व । वयः । कृण्वानः । तन्वे । स्वायै ।
   पिपर्षि । यत् । सहसः । पुत्र । देवान् । सः । अग्ने । पाहि । नृऽतम । वाजे । अस्मान् ॥

   vedhéna ǀ dásyum ǀ prá ǀ hí ǀ cātáyasva ǀ váyaḥ ǀ kṛṇvānáḥ ǀ tanvé ǀ svā́yai ǀ
   píparṣi ǀ yát ǀ sahasaḥ ǀ putra ǀ devā́n ǀ sáḥ ǀ agne ǀ pāhi ǀ nṛ-tama ǀ vā́je ǀ asmā́n ǁ

   vedhena ǀ dasyum ǀ pra ǀ hi ǀ cātayasva ǀ vayaḥ ǀ kṛṇvānaḥ ǀ tanve ǀ svāyai ǀ
   piparṣi ǀ yat ǀ sahasaḥ ǀ putra ǀ devān ǀ saḥ ǀ agne ǀ pāhi ǀ nṛ-tama ǀ vāje ǀ asmān ǁ

   5.4.6 Aṣṭaka 3.8.19.1Anuvāka 5.1.42Interpretations

7. Ṛk 7

   व॒यं ते॑ अग्न उ॒क्थैर्वि॑धेम व॒यं ह॒व्यैः पा॑वक भद्रशोचे ।
   अ॒स्मे र॒यिं वि॒श्ववा॑रं॒ समि॑न्वा॒स्मे विश्वा॑नि॒ द्रवि॑णानि धेहि ॥

   वयं ते अग्न उक्थैर् विधेम वयं हव्यैः पावक भद्रशोचे |
   अस्मे रयिं विश्ववारं सम् इन्वास्मे विश्वानि द्रविणानि धेहि ||

   vayám te agna uktháirvidhema vayám havyáiḥ pāvaka bhadraśoce ǀ
   asmé rayím viśvávāram sáminvāsmé víśvāni dráviṇāni dhehi ǁ

   vayaṃ te agna ukthair vidhema vayaṃ havyaiḥ pāvaka bhadraśoce |
   asme rayiṃ viśvavāraṃ sam invāsme viśvāni draviṇāni dhehi ||

   व॒यम् । ते॒ । अ॒ग्ने॒ । उ॒क्थैः । वि॒धे॒म॒ । व॒यम् । ह॒व्यैः । पा॒व॒क॒ । भ॒द्र॒ऽशो॒चे॒ ।
   अ॒स्मे इति॑ । र॒यिम् । वि॒श्वऽवा॑रम् । सम् । इ॒न्व॒ । अ॒स्मे इति॑ । विश्वा॑नि । द्रवि॑णानि । धे॒हि॒ ॥

   वयम् । ते । अग्ने । उक्थैः । विधेम । वयम् । हव्यैः । पावक । भद्रऽशोचे ।
   अस्मे इति । रयिम् । विश्वऽवारम् । सम् । इन्व । अस्मे इति । विश्वानि । द्रविणानि । धेहि ॥

   vayám ǀ te ǀ agne ǀ uktháiḥ ǀ vidhema ǀ vayám ǀ havyáiḥ ǀ pāvaka ǀ bhadra-śoce ǀ
   asmé íti ǀ rayím ǀ viśvá-vāram ǀ sám ǀ inva ǀ asmé íti ǀ víśvāni ǀ dráviṇāni ǀ dhehi ǁ

   vayam ǀ te ǀ agne ǀ ukthaiḥ ǀ vidhema ǀ vayam ǀ havyaiḥ ǀ pāvaka ǀ bhadra-śoce ǀ
   asme iti ǀ rayim ǀ viśva-vāram ǀ sam ǀ inva ǀ asme iti ǀ viśvāni ǀ draviṇāni ǀ dhehi ǁ

   5.4.7 Aṣṭaka 3.8.19.2Anuvāka 5.1.43Interpretations

8. Ṛk 8

   अ॒स्माक॑मग्ने अध्व॒रं जु॑षस्व॒ सह॑सः सूनो त्रिषधस्थ ह॒व्यं ।
   व॒यं दे॒वेषु॑ सु॒कृतः॑ स्याम॒ शर्म॑णा नस्त्रि॒वरू॑थेन पाहि ॥

   अस्माकम् अग्ने अध्वरं जुषस्व सहसः सूनो त्रिषधस्थ हव्यम् |
   वयं देवेषु सुकृतः स्याम शर्मणा नस् त्रिवरूथेन पाहि ||

   asmā́kamagne adhvarám juṣasva sáhasaḥ sūno triṣadhastha havyám ǀ
   vayám devéṣu sukṛ́taḥ syāma śármaṇā nastrivárūthena pāhi ǁ

   asmākam agne adhvaraṃ juṣasva sahasaḥ sūno triṣadhastha havyam |
   vayaṃ deveṣu sukṛtaḥ syāma śarmaṇā nas trivarūthena pāhi ||

   अ॒स्माक॑म् । अ॒ग्ने॒ । अ॒ध्व॒रम् । जु॒ष॒स्व॒ । सह॑सः । सू॒नो॒ इति॑ । त्रि॒ऽस॒ध॒स्थ॒ । ह॒व्यम् ।
   व॒यम् । दे॒वेषु॑ । सु॒ऽकृतः॑ । स्या॒म॒ । शर्म॑णा । नः॒ । त्रि॒ऽवरू॑थेन । पा॒हि॒ ॥

   अस्माकम् । अग्ने । अध्वरम् । जुषस्व । सहसः । सूनो इति । त्रिऽसधस्थ । हव्यम् ।
   वयम् । देवेषु । सुऽकृतः । स्याम । शर्मणा । नः । त्रिऽवरूथेन । पाहि ॥

   asmā́kam ǀ agne ǀ adhvarám ǀ juṣasva ǀ sáhasaḥ ǀ sūno íti ǀ tri-sadhastha ǀ havyám ǀ
   vayám ǀ devéṣu ǀ su-kṛ́taḥ ǀ syāma ǀ śármaṇā ǀ naḥ ǀ tri-várūthena ǀ pāhi ǁ

   asmākam ǀ agne ǀ adhvaram ǀ juṣasva ǀ sahasaḥ ǀ sūno iti ǀ tri-sadhastha ǀ havyam ǀ
   vayam ǀ deveṣu ǀ su-kṛtaḥ ǀ syāma ǀ śarmaṇā ǀ naḥ ǀ tri-varūthena ǀ pāhi ǁ

   5.4.8 Aṣṭaka 3.8.19.3Anuvāka 5.1.44Interpretations

9. Ṛk 9

   विश्वा॑नि नो दु॒र्गहा॑ जातवेदः॒ सिंधुं॒ न ना॒वा दु॑रि॒ताति॑ पर्षि ।
   अग्ने॑ अत्रि॒वन्नम॑सा गृणा॒नो॒३॒॑ऽस्माकं॑ बोध्यवि॒ता त॒नूनां॑ ॥

   विश्वानि नो दुर्गहा जातवेदः सिन्धुं न नावा दुरिताति पर्षि |
   अग्ने अत्रिवन् नमसा गृणानो ऽस्माकम् बोध्य् अविता तनूनाम् ||

   víśvāni no durgáhā jātavedaḥ síndhum ná nāvā́ duritā́ti parṣi ǀ
   ágne atrivánnámasā gṛṇānó’smā́kam bodhyavitā́ tanū́nām ǁ

   viśvāni no durgahā jātavedaḥ sindhuṃ na nāvā duritāti parṣi |
   agne atrivan namasā gṛṇāno 'smākam bodhy avitā tanūnām ||

   विश्वा॑नि । नः॒ । दुः॒ऽगहा॑ । जा॒त॒ऽवे॒दः॒ । सिन्धु॑म् । न । ना॒वा । दुः॒ऽइ॒ता । अति॑ । प॒र्षि॒ ।
   अग्ने॑ । अ॒त्रि॒ऽवत् । नम॑सा । गृ॒णा॒नः । अ॒स्माक॑म् । बो॒धि॒ । अ॒वि॒ता । त॒नूना॑म् ॥

   विश्वानि । नः । दुःऽगहा । जातऽवेदः । सिन्धुम् । न । नावा । दुःऽइता । अति । पर्षि ।
   अग्ने । अत्रिऽवत् । नमसा । गृणानः । अस्माकम् । बोधि । अविता । तनूनाम् ॥

   víśvāni ǀ naḥ ǀ duḥ-gáhā ǀ jāta-vedaḥ ǀ síndhum ǀ ná ǀ nāvā́ ǀ duḥ-itā́ ǀ áti ǀ parṣi ǀ
   ágne ǀ atri-vát ǀ námasā ǀ gṛṇānáḥ ǀ asmā́kam ǀ bodhi ǀ avitā́ ǀ tanū́nām ǁ

   viśvāni ǀ naḥ ǀ duḥ-gahā ǀ jāta-vedaḥ ǀ sindhum ǀ na ǀ nāvā ǀ duḥ-itā ǀ ati ǀ parṣi ǀ
   agne ǀ atri-vat ǀ namasā ǀ gṛṇānaḥ ǀ asmākam ǀ bodhi ǀ avitā ǀ tanūnām ǁ

   5.4.9 Aṣṭaka 3.8.19.4Anuvāka 5.1.45Interpretations

10. Ṛk 10

    यस्त्वा॑ हृ॒दा की॒रिणा॒ मन्य॑मा॒नोऽम॑र्त्यं॒ मर्त्यो॒ जोह॑वीमि ।
    जात॑वेदो॒ यशो॑ अ॒स्मासु॑ धेहि प्र॒जाभि॑रग्ने अमृत॒त्वम॑श्यां ॥

    यस् त्वा हृदा कीरिणा मन्यमानो ऽमर्त्यम् मर्त्यो जोहवीमि |
    जातवेदो यशो अस्मासु धेहि प्रजाभिर् अग्ने अमृतत्वम् अश्याम् ||

    yástvā hṛdā́ kīríṇā mányamānó’martyam mártyo jóhavīmi ǀ
    jā́tavedo yáśo asmā́su dhehi prajā́bhiragne amṛtatvámaśyām ǁ

    yas tvā hṛdā kīriṇā manyamāno 'martyam martyo johavīmi |
    jātavedo yaśo asmāsu dhehi prajābhir agne amṛtatvam aśyām ||

    यः । त्वा॒ । हृ॒दा । की॒रिणा॑ । मन्य॑मानः । अम॑र्त्यम् । मर्त्यः॑ । जोह॑वीमि ।
    जात॑ऽवेदः । यशः॑ । अ॒स्मासु॑ । धे॒हि॒ । प्र॒ऽजाभिः॑ । अ॒ग्ने॒ । अ॒मृ॒त॒ऽत्वम् । अ॒श्या॒म् ॥

    यः । त्वा । हृदा । कीरिणा । मन्यमानः । अमर्त्यम् । मर्त्यः । जोहवीमि ।
    जातऽवेदः । यशः । अस्मासु । धेहि । प्रऽजाभिः । अग्ने । अमृतऽत्वम् । अश्याम् ॥

    yáḥ ǀ tvā ǀ hṛdā́ ǀ kīríṇā ǀ mányamānaḥ ǀ ámartyam ǀ mártyaḥ ǀ jóhavīmi ǀ
    jā́ta-vedaḥ ǀ yáśaḥ ǀ asmā́su ǀ dhehi ǀ pra-jā́bhiḥ ǀ agne ǀ amṛta-tvám ǀ aśyām ǁ

    yaḥ ǀ tvā ǀ hṛdā ǀ kīriṇā ǀ manyamānaḥ ǀ amartyam ǀ martyaḥ ǀ johavīmi ǀ
    jāta-vedaḥ ǀ yaśaḥ ǀ asmāsu ǀ dhehi ǀ pra-jābhiḥ ǀ agne ǀ amṛta-tvam ǀ aśyām ǁ

    5.4.10 Aṣṭaka 3.8.19.5Anuvāka 5.1.46Interpretations

11. Ṛk 11

    यस्मै॒ त्वं सु॒कृते॑ जातवेद उ लो॒कम॑ग्ने कृ॒णवः॑ स्यो॒नं ।
    अ॒श्विनं॒ स पु॒त्रिणं॑ वी॒रवं॑तं॒ गोमं॑तं र॒यिं न॑शते स्व॒स्ति ॥

    यस्मै त्वं सुकृते जातवेद उ लोकम् अग्ने कृणवः स्योनम् |
    अश्विनं स पुत्रिणं वीरवन्तं गोमन्तं रयिं नशते स्वस्ति ||

    yásmai tvám sukṛ́te jātaveda u lokámagne kṛṇávaḥ syonám ǀ
    aśvínam sá putríṇam vīrávantam gómantam rayím naśate svastí ǁ

    yasmai tvaṃ sukṛte jātaveda u lokam agne kṛṇavaḥ syonam |
    aśvinaṃ sa putriṇaṃ vīravantaṃ gomantaṃ rayiṃ naśate svasti ||

    यस्मै॑ । त्वम् । सु॒ऽकृते॑ । जा॒त॒ऽवे॒दः॒ । ऊं॒ इति॑ । लो॒कम् । अ॒ग्ने॒ । कृ॒णवः॑ । स्यो॒नम् ।
    अ॒श्विन॑म् । सः । पु॒त्रिण॑म् । वी॒रऽव॑न्तम् । गोऽम॑न्तम् । र॒यिम् । न॒श॒ते॒ । स्व॒स्ति ॥

    यस्मै । त्वम् । सुऽकृते । जातऽवेदः । ऊं इति । लोकम् । अग्ने । कृणवः । स्योनम् ।
    अश्विनम् । सः । पुत्रिणम् । वीरऽवन्तम् । गोऽमन्तम् । रयिम् । नशते । स्वस्ति ॥

    yásmai ǀ tvám ǀ su-kṛ́te ǀ jāta-vedaḥ ǀ ūṃ íti ǀ lokám ǀ agne ǀ kṛṇávaḥ ǀ syonám ǀ
    aśvínam ǀ sáḥ ǀ putríṇam ǀ vīrá-vantam ǀ gó-mantam ǀ rayím ǀ naśate ǀ svastí ǁ

    yasmai ǀ tvam ǀ su-kṛte ǀ jāta-vedaḥ ǀ ūṃ iti ǀ lokam ǀ agne ǀ kṛṇavaḥ ǀ syonam ǀ
    aśvinam ǀ saḥ ǀ putriṇam ǀ vīra-vantam ǀ go-mantam ǀ rayim ǀ naśate ǀ svasti ǁ

    5.4.11 Aṣṭaka 3.8.19.6Anuvāka 5.1.47Interpretations

Text, recitation and interpretations from the Ṛgveda database of theveda.org.in.