Devatā देवता

Parjanya

Ṛṣi ऋषि

Atri Bhauma

Chandas छन्दस्

Triṣṭubh, Jagatī, Anuṣṭubh

1. Ṛk 1

   अच्छा॑ वद त॒वसं॑ गी॒र्भिरा॒भिः स्तु॒हि प॒र्जन्यं॒ नम॒सा वि॑वास ।
   कनि॑क्रदद्वृष॒भो जी॒रदा॑नू॒ रेतो॑ दधा॒त्योष॑धीषु॒ गर्भं॑ ॥

   अच्छा वद तवसं गीर्भिर् आभि स्तुहि पर्जन्यं नमसा विवास |
   कनिक्रदद् वृषभो जीरदानू रेतो दधात्य् ओषधीषु गर्भम् ||

   ácchā vada tavásam gīrbhírābhíḥ stuhí parjányam námasā́ vivāsa ǀ
   kánikradadvṛṣabhó jīrádānū réto dadhātyóṣadhīṣu gárbham ǁ

   acchā vada tavasaṃ gīrbhir ābhi stuhi parjanyaṃ namasā vivāsa |
   kanikradad vṛṣabho jīradānū reto dadhāty oṣadhīṣu garbham ||

   अच्छ॑ । व॒द॒ । त॒वस॑म् । गीः॒ऽभिः । आ॒भिः । स्तु॒हि । प॒र्जन्य॑म् । नम॑सा । आ । वि॒वा॒स॒ ।
   कनि॑क्रदत् । वृ॒ष॒भः । जी॒रऽदा॑नुः । रेतः॑ । द॒धा॒ति॒ । ओष॑धीषु । गर्भ॑म् ॥

   अच्छ । वद । तवसम् । गीःऽभिः । आभिः । स्तुहि । पर्जन्यम् । नमसा । आ । विवास ।
   कनिक्रदत् । वृषभः । जीरऽदानुः । रेतः । दधाति । ओषधीषु । गर्भम् ॥

   áccha ǀ vada ǀ tavásam ǀ gīḥ-bhíḥ ǀ ābhíḥ ǀ stuhí ǀ parjányam ǀ námasā ǀ ā́ ǀ vivāsa ǀ
   kánikradat ǀ vṛṣabháḥ ǀ jīrá-dānuḥ ǀ rétaḥ ǀ dadhāti ǀ óṣadhīṣu ǀ gárbham ǁ

   accha ǀ vada ǀ tavasam ǀ gīḥ-bhiḥ ǀ ābhiḥ ǀ stuhi ǀ parjanyam ǀ namasā ǀ ā ǀ vivāsa ǀ
   kanikradat ǀ vṛṣabhaḥ ǀ jīra-dānuḥ ǀ retaḥ ǀ dadhāti ǀ oṣadhīṣu ǀ garbham ǁ

   5.83.1 Aṣṭaka 4.4.27.1Anuvāka 5.6.79Interpretations

2. Ṛk 2

   वि वृ॒क्षान् हं॑त्यु॒त हं॑ति र॒क्षसो॒ विश्वं॑ बिभाय॒ भुव॑नं म॒हाव॑धात् ।
   उ॒ताना॑गा ईषते॒ वृष्ण्या॑वतो॒ यत्प॒र्जन्यः॑ स्त॒नय॒न् हंति॑ दु॒ष्कृतः॑ ॥

   वि वृक्षान् हन्त्य् उत हन्ति रक्षसो विश्वम् बिभाय भुवनम् महावधात् |
   उतानागा ईषते वृष्ण्यावतो यत् पर्जन्य स्तनयन् हन्ति दुष्कृतः ||

   ví vṛkṣā́n hantyutá hanti rakṣáso víśvam bibhāya bhúvanam mahā́vadhāt ǀ
   utā́nāgā īṣate vṛ́ṣṇyāvato yátparjányaḥ stanáyan hánti duṣkṛ́taḥ ǁ

   vi vṛkṣān hanty uta hanti rakṣaso viśvam bibhāya bhuvanam mahāvadhāt |
   utānāgā īṣate vṛṣṇyāvato yat parjanya stanayan hanti duṣkṛtaḥ ||

   वि । वृ॒क्षान् । ह॒न्ति॒ । उ॒त । ह॒न्ति॒ । र॒क्षसः॑ । विश्व॑म् । बि॒भा॒य॒ । भुव॑नम् । म॒हाऽव॑धात् ।
   उ॒त । अना॑गाः । ई॒ष॒ते॒ । वृष्ण्य॑ऽवतः । यत् । प॒र्जन्यः॑ । स्त॒नय॑न् । हन्ति॑ । दुः॒ऽकृतः॑ ॥

   वि । वृक्षान् । हन्ति । उत । हन्ति । रक्षसः । विश्वम् । बिभाय । भुवनम् । महाऽवधात् ।
   उत । अनागाः । ईषते । वृष्ण्यऽवतः । यत् । पर्जन्यः । स्तनयन् । हन्ति । दुःऽकृतः ॥

   ví ǀ vṛkṣā́n ǀ hanti ǀ utá ǀ hanti ǀ rakṣásaḥ ǀ víśvam ǀ bibhāya ǀ bhúvanam ǀ mahā́-vadhāt ǀ
   utá ǀ ánāgāḥ ǀ īṣate ǀ vṛ́ṣṇya-vataḥ ǀ yát ǀ parjányaḥ ǀ stanáyan ǀ hánti ǀ duḥ-kṛ́taḥ ǁ

   vi ǀ vṛkṣān ǀ hanti ǀ uta ǀ hanti ǀ rakṣasaḥ ǀ viśvam ǀ bibhāya ǀ bhuvanam ǀ mahā-vadhāt ǀ
   uta ǀ anāgāḥ ǀ īṣate ǀ vṛṣṇya-vataḥ ǀ yat ǀ parjanyaḥ ǀ stanayan ǀ hanti ǀ duḥ-kṛtaḥ ǁ

   5.83.2 Aṣṭaka 4.4.27.2Anuvāka 5.6.80Interpretations

3. Ṛk 3

   र॒थीव॒ कश॒याश्वाँ॑ अभिक्षि॒पन्ना॒विर्दू॒तान्कृ॑णुते व॒र्ष्याँ॒३॒॑ अह॑ ।
   दू॒रात्सिं॒हस्य॑ स्त॒नथा॒ उदी॑रते॒ यत्प॒र्जन्यः॑ कृणु॒ते व॒र्ष्यं१॒॑ नभः॑ ॥

   रथीव कशयाश्वां अभिक्षिपन्न् आविर् दूतान् कृणुते वर्ष्यां अह |
   दूरात् सिंहस्य स्तनथा उद् ईरते यत् पर्जन्यः कृणुते वर्ष्यं नभः ||

   rathī́va káśayā́śvām̐ abhikṣipánnāvírdūtā́nkṛṇute varṣyā́m̐ áha ǀ
   dūrā́tsiṃhásya stanáthā údīrate yátparjányaḥ kṛṇuté varṣyám nábhaḥ ǁ

   rathīva kaśayāśvāṃ abhikṣipann āvir dūtān kṛṇute varṣyāṃ aha |
   dūrāt siṃhasya stanathā ud īrate yat parjanyaḥ kṛṇute varṣyaṃ nabhaḥ ||

   र॒थीऽइ॑व । कश॑या । अश्वा॑न् । अ॒भि॒ऽक्षि॒पन् । आ॒विः । दू॒तान् । कृ॒णु॒ते॒ । व॒र्ष्या॑न् । अह॑ ।
   दू॒रात् । सिं॒हस्य॑ । स्त॒नथाः॑ । उत् । ई॒र॒ते॒ । यत् । प॒र्जन्यः॑ । कृ॒णु॒ते । व॒र्ष्य॑म् । नभः॑ ॥

   रथीऽइव । कशया । अश्वान् । अभिऽक्षिपन् । आविः । दूतान् । कृणुते । वर्ष्यान् । अह ।
   दूरात् । सिंहस्य । स्तनथाः । उत् । ईरते । यत् । पर्जन्यः । कृणुते । वर्ष्यम् । नभः ॥

   rathī́-iva ǀ káśayā ǀ áśvān ǀ abhi-kṣipán ǀ āvíḥ ǀ dūtā́n ǀ kṛṇute ǀ varṣyā́n ǀ áha ǀ
   dūrā́t ǀ siṃhásya ǀ stanáthāḥ ǀ út ǀ īrate ǀ yát ǀ parjányaḥ ǀ kṛṇuté ǀ varṣyám ǀ nábhaḥ ǁ

   rathī-iva ǀ kaśayā ǀ aśvān ǀ abhi-kṣipan ǀ āviḥ ǀ dūtān ǀ kṛṇute ǀ varṣyān ǀ aha ǀ
   dūrāt ǀ siṃhasya ǀ stanathāḥ ǀ ut ǀ īrate ǀ yat ǀ parjanyaḥ ǀ kṛṇute ǀ varṣyam ǀ nabhaḥ ǁ

   5.83.3 Aṣṭaka 4.4.27.3Anuvāka 5.6.81Interpretations

4. Ṛk 4

   प्र वाता॒ वांति॑ प॒तयं॑ति वि॒द्युत॒ उदोष॑धी॒र्जिह॑ते॒ पिन्व॑ते॒ स्वः॑ ।
   इरा॒ विश्व॑स्मै॒ भुव॑नाय जायते॒ यत्प॒र्जन्यः॑ पृथि॒वीं रेत॒साव॑ति ॥

   प्र वाता वान्ति पतयन्ति विद्युत उद् ओषधीर् जिहते पिन्वते स्वः |
   इरा विश्वस्मै भुवनाय जायते यत् पर्जन्यः पृथिवीं रेतसावति ||

   prá vā́tā vā́nti patáyanti vidyúta údóṣadhīrjíhate pínvate sváḥ ǀ
   írā víśvasmai bhúvanāya jāyate yátparjányaḥ pṛthivī́m rétasā́vati ǁ

   pra vātā vānti patayanti vidyuta ud oṣadhīr jihate pinvate svaḥ |
   irā viśvasmai bhuvanāya jāyate yat parjanyaḥ pṛthivīṃ retasāvati ||

   प्र । वाताः॑ । वान्ति॑ । प॒तय॑न्ति । वि॒ऽद्युतः॑ । उत् । ओष॑धीः । जिह॑ते । पिन्व॑ते । स्वः॑ ।
   इरा॑ । विश्व॑स्मै । भुव॑नाय । जा॒य॒ते॒ । यत् । प॒र्जन्यः॑ । पृ॒थि॒वीम् । रेत॑सा । अव॑ति ॥

   प्र । वाताः । वान्ति । पतयन्ति । विऽद्युतः । उत् । ओषधीः । जिहते । पिन्वते । स्वः ।
   इरा । विश्वस्मै । भुवनाय । जायते । यत् । पर्जन्यः । पृथिवीम् । रेतसा । अवति ॥

   prá ǀ vā́tāḥ ǀ vā́nti ǀ patáyanti ǀ vi-dyútaḥ ǀ út ǀ óṣadhīḥ ǀ jíhate ǀ pínvate ǀ sváḥ ǀ
   írā ǀ víśvasmai ǀ bhúvanāya ǀ jāyate ǀ yát ǀ parjányaḥ ǀ pṛthivī́m ǀ rétasā ǀ ávati ǁ

   pra ǀ vātāḥ ǀ vānti ǀ patayanti ǀ vi-dyutaḥ ǀ ut ǀ oṣadhīḥ ǀ jihate ǀ pinvate ǀ svaḥ ǀ
   irā ǀ viśvasmai ǀ bhuvanāya ǀ jāyate ǀ yat ǀ parjanyaḥ ǀ pṛthivīm ǀ retasā ǀ avati ǁ

   5.83.4 Aṣṭaka 4.4.27.4Anuvāka 5.6.82Interpretations

5. Ṛk 5

   यस्य॑ व्र॒ते पृ॑थि॒वी नन्न॑मीति॒ यस्य॑ व्र॒ते श॒फव॒ज्जर्भु॑रीति ।
   यस्य॑ व्र॒त ओष॑धीर्वि॒श्वरू॑पाः॒ स नः॑ पर्जन्य॒ महि॒ शर्म॑ यच्छ ॥

   यस्य व्रते पृथिवी नन्नमीति यस्य व्रते शफवज् जर्भुरीति |
   यस्य व्रत ओषधीर् विश्वरूपाः स नः पर्जन्य महि शर्म यच्छ ||

   yásya vraté pṛthivī́ nánnamīti yásya vraté śaphávajjárbhurīti ǀ
   yásya vratá óṣadhīrviśvárūpāḥ sá naḥ parjanya máhi śárma yaccha ǁ

   yasya vrate pṛthivī nannamīti yasya vrate śaphavaj jarbhurīti |
   yasya vrata oṣadhīr viśvarūpāḥ sa naḥ parjanya mahi śarma yaccha ||

   यस्य॑ । व्र॒ते । पृ॒थि॒वी । नम्न॑मीति । यस्य॑ । व्र॒ते । श॒फऽव॑त् । जर्भु॑रीति ।
   यस्य॑ । व्र॒ते । ओष॑धीः । वि॒श्वऽरू॑पाः । सः । नः॒ । प॒र्ज॒न्य॒ । महि॑ । शर्म॑ । य॒च्छ॒ ॥

   यस्य । व्रते । पृथिवी । नम्नमीति । यस्य । व्रते । शफऽवत् । जर्भुरीति ।
   यस्य । व्रते । ओषधीः । विश्वऽरूपाः । सः । नः । पर्जन्य । महि । शर्म । यच्छ ॥

   yásya ǀ vraté ǀ pṛthivī́ ǀ námnamīti ǀ yásya ǀ vraté ǀ śaphá-vat ǀ járbhurīti ǀ
   yásya ǀ vraté ǀ óṣadhīḥ ǀ viśvá-rūpāḥ ǀ sáḥ ǀ naḥ ǀ parjanya ǀ máhi ǀ śárma ǀ yaccha ǁ

   yasya ǀ vrate ǀ pṛthivī ǀ namnamīti ǀ yasya ǀ vrate ǀ śapha-vat ǀ jarbhurīti ǀ
   yasya ǀ vrate ǀ oṣadhīḥ ǀ viśva-rūpāḥ ǀ saḥ ǀ naḥ ǀ parjanya ǀ mahi ǀ śarma ǀ yaccha ǁ

   5.83.5 Aṣṭaka 4.4.27.5Anuvāka 5.6.83Interpretations

6. Ṛk 6

   दि॒वो नो॑ वृ॒ष्टिं म॑रुतो ररीध्वं॒ प्र पि॑न्वत॒ वृष्णो॒ अश्व॑स्य॒ धाराः॑ ।
   अ॒र्वाङे॒तेन॑ स्तनयि॒त्नुनेह्य॒पो नि॑षिं॒चन्नसु॑रः पि॒ता नः॑ ॥

   दिवो नो वृष्टिम् मरुतो ररीध्वम् प्र पिन्वत वृष्णो अश्वस्य धाराः |
   अर्वाङ् एतेन स्तनयित्नुनेह्य् अपो निषिञ्चन्न् असुरः पिता नः ||

   divó no vṛṣṭím maruto rarīdhvam prá pinvata vṛ́ṣṇo áśvasya dhā́rāḥ ǀ
   arvā́ṅeténa stanayitnúnéhyapó niṣiñcánnásuraḥ pitā́ naḥ ǁ

   divo no vṛṣṭim maruto rarīdhvam pra pinvata vṛṣṇo aśvasya dhārāḥ |
   arvāṅ etena stanayitnunehy apo niṣiñcann asuraḥ pitā naḥ ||

   दि॒वः । नः॒ । वृ॒ष्टिम् । म॒रु॒तः॒ । र॒री॒ध्व॒म् । प्र । पि॒न्व॒त॒ । वृष्णः॑ । अश्व॑स्य । धाराः॑ ।
   अ॒र्वाङ् । ए॒तेन॑ । स्त॒न॒यि॒त्नुना॑ । आ । इ॒हि॒ । अ॒पः । नि॒ऽसि॒ञ्चन् । असु॑रः । पि॒ता । नः॒ ॥

   दिवः । नः । वृष्टिम् । मरुतः । ररीध्वम् । प्र । पिन्वत । वृष्णः । अश्वस्य । धाराः ।
   अर्वाङ् । एतेन । स्तनयित्नुना । आ । इहि । अपः । निऽसिञ्चन् । असुरः । पिता । नः ॥

   diváḥ ǀ naḥ ǀ vṛṣṭím ǀ marutaḥ ǀ rarīdhvam ǀ prá ǀ pinvata ǀ vṛ́ṣṇaḥ ǀ áśvasya ǀ dhā́rāḥ ǀ
   arvā́ṅ ǀ eténa ǀ stanayitnúnā ǀ ā́ ǀ ihi ǀ apáḥ ǀ ni-siñcán ǀ ásuraḥ ǀ pitā́ ǀ naḥ ǁ

   divaḥ ǀ naḥ ǀ vṛṣṭim ǀ marutaḥ ǀ rarīdhvam ǀ pra ǀ pinvata ǀ vṛṣṇaḥ ǀ aśvasya ǀ dhārāḥ ǀ
   arvāṅ ǀ etena ǀ stanayitnunā ǀ ā ǀ ihi ǀ apaḥ ǀ ni-siñcan ǀ asuraḥ ǀ pitā ǀ naḥ ǁ

   5.83.6 Aṣṭaka 4.4.28.1Anuvāka 5.6.84Interpretations

7. Ṛk 7

   अ॒भि क्रं॑द स्त॒नय॒ गर्भ॒मा धा॑ उद॒न्वता॒ परि॑ दीया॒ रथे॑न ।
   दृतिं॒ सु क॑र्ष॒ विषि॑तं॒ न्यं॑चं स॒मा भ॑वंतू॒द्वतो॑ निपा॒दाः ॥

   अभि क्रन्द स्तनय गर्भम् आ धा उदन्वता परि दीया रथेन |
   दृतिं सु कर्ष विषितं न्यञ्चं समा भवन्तूद्वतो निपादाः ||

   abhí kranda stanáya gárbhamā́ dhā udanvátā pári dīyā ráthena ǀ
   dṛ́tim sú karṣa víṣitam nyáñcam samā́ bhavantūdváto nipādā́ḥ ǁ

   abhi kranda stanaya garbham ā dhā udanvatā pari dīyā rathena |
   dṛtiṃ su karṣa viṣitaṃ nyañcaṃ samā bhavantūdvato nipādāḥ ||

   अ॒भि । क्र॒न्द॒ । स्त॒नय॑ । गर्भ॑म् । आ । धाः॒ । उ॒द॒न्ऽवता॑ । परि॑ । दी॒य॒ । रथे॑न ।
   दृति॑म् । सु । क॒र्ष॒ । विऽसि॑तम् । न्य॑ञ्चम् । स॒माः । भ॒व॒न्तु॒ । उ॒त्ऽवतः॑ । नि॒ऽपा॒दाः ॥

   अभि । क्रन्द । स्तनय । गर्भम् । आ । धाः । उदन्ऽवता । परि । दीय । रथेन ।
   दृतिम् । सु । कर्ष । विऽसितम् । न्यञ्चम् । समाः । भवन्तु । उत्ऽवतः । निऽपादाः ॥

   abhí ǀ kranda ǀ stanáya ǀ gárbham ǀ ā́ ǀ dhāḥ ǀ udan-vátā ǀ pári ǀ dīya ǀ ráthena ǀ
   dṛ́tim ǀ sú ǀ karṣa ǀ ví-sitam ǀ nyáñcam ǀ samā́ḥ ǀ bhavantu ǀ ut-vátaḥ ǀ ni-pādā́ḥ ǁ

   abhi ǀ kranda ǀ stanaya ǀ garbham ǀ ā ǀ dhāḥ ǀ udan-vatā ǀ pari ǀ dīya ǀ rathena ǀ
   dṛtim ǀ su ǀ karṣa ǀ vi-sitam ǀ nyañcam ǀ samāḥ ǀ bhavantu ǀ ut-vataḥ ǀ ni-pādāḥ ǁ

   5.83.7 Aṣṭaka 4.4.28.2Anuvāka 5.6.85Interpretations

8. Ṛk 8

   म॒हांतं॒ कोश॒मुद॑चा॒ नि षिं॑च॒ स्यंदं॑तां कु॒ल्या विषि॑ताः पु॒रस्ता॑त् ।
   घृ॒तेन॒ द्यावा॑पृथि॒वी व्युं॑धि सुप्रपा॒णं भ॑वत्व॒घ्न्याभ्यः॑ ॥

   महान्तं कोशम् उद् अचा नि षिञ्च स्यन्दन्तां कुल्या विषिताः पुरस्तात् |
   घृतेन द्यावापृथिवी व्य् उन्धि सुप्रपाणम् भवत्व् अघ्न्याभ्यः ||

   mahā́ntam kóśamúdacā ní ṣiñca syándantām kulyā́ víṣitāḥ purástāt ǀ
   ghṛténa dyā́vāpṛthivī́ vyúndhi suprapāṇám bhavatvaghnyā́bhyaḥ ǁ

   mahāntaṃ kośam ud acā ni ṣiñca syandantāṃ kulyā viṣitāḥ purastāt |
   ghṛtena dyāvāpṛthivī vy undhi suprapāṇam bhavatv aghnyābhyaḥ ||

   म॒हान्त॑म् । कोश॑म् । उत् । अ॒च॒ । नि । सि॒ञ्च॒ । स्यन्द॑न्ताम् । कु॒ल्याः । विऽसि॑ताः । पु॒रस्ता॑त् ।
   घृ॒तेन॑ । द्यावा॑पृथि॒वी इति॑ । वि । उ॒न्धि॒ । सु॒ऽप्र॒पा॒नम् । भ॒व॒तु॒ । अ॒घ्न्याभ्यः॑ ॥

   महान्तम् । कोशम् । उत् । अच । नि । सिञ्च । स्यन्दन्ताम् । कुल्याः । विऽसिताः । पुरस्तात् ।
   घृतेन । द्यावापृथिवी इति । वि । उन्धि । सुऽप्रपानम् । भवतु । अघ्न्याभ्यः ॥

   mahā́ntam ǀ kóśam ǀ út ǀ aca ǀ ní ǀ siñca ǀ syándantām ǀ kulyā́ḥ ǀ ví-sitāḥ ǀ purástāt ǀ
   ghṛténa ǀ dyā́vāpṛthivī́ íti ǀ ví ǀ undhi ǀ su-prapānám ǀ bhavatu ǀ aghnyā́bhyaḥ ǁ

   mahāntam ǀ kośam ǀ ut ǀ aca ǀ ni ǀ siñca ǀ syandantām ǀ kulyāḥ ǀ vi-sitāḥ ǀ purastāt ǀ
   ghṛtena ǀ dyāvāpṛthivī iti ǀ vi ǀ undhi ǀ su-prapānam ǀ bhavatu ǀ aghnyābhyaḥ ǁ

   5.83.8 Aṣṭaka 4.4.28.3Anuvāka 5.6.86Interpretations

9. Ṛk 9

   यत्प॑र्जन्य॒ कनि॑क्रदत्स्त॒नय॒न् हंसि॑ दु॒ष्कृतः॑ ।
   प्रती॒दं विश्वं॑ मोदते॒ यत्किं च॑ पृथि॒व्यामधि॑ ॥

   यत् पर्जन्य कनिक्रदत् स्तनयन् हंसि दुष्कृतः |
   प्रतीदं विश्वम् मोदते यत् किं च पृथिव्याम् अधि ||

   yátparjanya kánikradatstanáyan háṃsi duṣkṛ́taḥ ǀ
   prátīdám víśvam modate yátkím ca pṛthivyā́mádhi ǁ

   yat parjanya kanikradat stanayan haṃsi duṣkṛtaḥ |
   pratīdaṃ viśvam modate yat kiṃ ca pṛthivyām adhi ||

   यत् । प॒र्ज॒न्य॒ । कनि॑क्रदत् । स्त॒नय॑न् । हंसि॑ । दुः॒ऽकृतः॑ ।
   प्रति॑ । इ॒दम् । विश्व॑म् । मो॒द॒ते॒ । यत् । किम् । च॒ । पृ॒थि॒व्याम् । अधि॑ ॥

   यत् । पर्जन्य । कनिक्रदत् । स्तनयन् । हंसि । दुःऽकृतः ।
   प्रति । इदम् । विश्वम् । मोदते । यत् । किम् । च । पृथिव्याम् । अधि ॥

   yát ǀ parjanya ǀ kánikradat ǀ stanáyan ǀ háṃsi ǀ duḥ-kṛ́taḥ ǀ
   práti ǀ idám ǀ víśvam ǀ modate ǀ yát ǀ kím ǀ ca ǀ pṛthivyā́m ǀ ádhi ǁ

   yat ǀ parjanya ǀ kanikradat ǀ stanayan ǀ haṃsi ǀ duḥ-kṛtaḥ ǀ
   prati ǀ idam ǀ viśvam ǀ modate ǀ yat ǀ kim ǀ ca ǀ pṛthivyām ǀ adhi ǁ

   5.83.9 Aṣṭaka 4.4.28.4Anuvāka 5.6.87Interpretations

10. Ṛk 10

    अव॑र्षीर्व॒र्षमुदु॒ षू गृ॑भा॒याक॒र्धन्वा॒न्यत्ये॑त॒वा उ॑ ।
    अजी॑जन॒ ओष॑धी॒र्भोज॑नाय॒ कमु॒त प्र॒जाभ्यो॑ऽविदो मनी॒षां ॥

    अवर्षीर् वर्षम् उद् उ षू गृभायाकर् धन्वान्य् अत्येतवा उ |
    अजीजन ओषधीर् भोजनाय कम् उत प्रजाभ्यो ऽविदो मनीषाम् ||

    ávarṣīrvarṣámúdu ṣū́ gṛbhāyā́kardhánvānyátyetavā́ u ǀ
    ájījana óṣadhīrbhójanāya kámutá prajā́bhyo’vido manīṣā́m ǁ

    avarṣīr varṣam ud u ṣū gṛbhāyākar dhanvāny atyetavā u |
    ajījana oṣadhīr bhojanāya kam uta prajābhyo 'vido manīṣām ||

    अव॑र्षीः । व॒र्षम् । उत् । ऊं॒ इति॑ । सु । गृ॒भा॒य॒ । अकः॑ । धन्वा॑नि । अति॑ऽए॒त॒वै । ऊं॒ इति॑ ।
    अजी॑जनः । ओष॑धीः । भोज॑नाय । कम् । उ॒त । प्र॒ऽजाभ्यः॑ । अ॒वि॒दः॒ । म॒नी॒षाम् ॥

    अवर्षीः । वर्षम् । उत् । ऊं इति । सु । गृभाय । अकः । धन्वानि । अतिऽएतवै । ऊं इति ।
    अजीजनः । ओषधीः । भोजनाय । कम् । उत । प्रऽजाभ्यः । अविदः । मनीषाम् ॥

    ávarṣīḥ ǀ varṣám ǀ út ǀ ūṃ íti ǀ sú ǀ gṛbhāya ǀ ákaḥ ǀ dhánvāni ǀ áti-etavái ǀ ūṃ íti ǀ
    ájījanaḥ ǀ óṣadhīḥ ǀ bhójanāya ǀ kám ǀ utá ǀ pra-jā́bhyaḥ ǀ avidaḥ ǀ manīṣā́m ǁ

    avarṣīḥ ǀ varṣam ǀ ut ǀ ūṃ iti ǀ su ǀ gṛbhāya ǀ akaḥ ǀ dhanvāni ǀ ati-etavai ǀ ūṃ iti ǀ
    ajījanaḥ ǀ oṣadhīḥ ǀ bhojanāya ǀ kam ǀ uta ǀ pra-jābhyaḥ ǀ avidaḥ ǀ manīṣām ǁ

    5.83.10 Aṣṭaka 4.4.28.5Anuvāka 5.6.88Interpretations

Text, recitation and interpretations from the Ṛgveda database of theveda.org.in.