Devatā देवता

Viśvedevās

Ṛṣi ऋषि

Sadāpṛṇa Ātreya

Chandas छन्दस्

Triṣṭubh

1. Ṛk 1

   वि॒दा दि॒वो वि॒ष्यन्नद्रि॑मु॒क्थैरा॑य॒त्या उ॒षसो॑ अ॒र्चिनो॑ गुः ।
   अपा॑वृत व्र॒जिनी॒रुत्स्व॑र्गा॒द्वि दुरो॒ मानु॑षीर्दे॒व आ॑वः ॥

   विदा दिवो विष्यन्न् अद्रिम् उक्थैर् आयत्या उषसो अर्चिनो गुः |
   अपावृत व्रजिनीर् उत् स्वर् गाद् वि दुरो मानुषीर् देव आवः ||

   vidā́ divó viṣyánnádrimuktháirāyatyā́ uṣáso arcíno guḥ ǀ
   ápāvṛta vrajínīrútsvárgādví dúro mā́nuṣīrdevá āvaḥ ǁ

   vidā divo viṣyann adrim ukthair āyatyā uṣaso arcino guḥ |
   apāvṛta vrajinīr ut svar gād vi duro mānuṣīr deva āvaḥ ||

   वि॒दाः । दि॒वः । वि॒ऽस्यन् । अद्रि॑म् । उ॒क्थैः । आ॒ऽय॒त्याः । उ॒षसः॑ । अ॒र्चिनः॑ । गुः॒ ।
   अप॑ । अ॒वृ॒त॒ । व्र॒जिनीः॑ । उत् । स्वः॑ । गा॒त् । वि । दुरः॑ । मानु॑षीः । दे॒वः । आ॒व॒रित्या॑वः ॥

   विदाः । दिवः । विऽस्यन् । अद्रिम् । उक्थैः । आऽयत्याः । उषसः । अर्चिनः । गुः ।
   अप । अवृत । व्रजिनीः । उत् । स्वः । गात् । वि । दुरः । मानुषीः । देवः । आवरित्यावः ॥

   vidā́ḥ ǀ diváḥ ǀ vi-syán ǀ ádrim ǀ uktháiḥ ǀ ā-yatyā́ḥ ǀ uṣásaḥ ǀ arcínaḥ ǀ guḥ ǀ
   ápa ǀ avṛta ǀ vrajínīḥ ǀ út ǀ sváḥ ǀ gāt ǀ ví ǀ dúraḥ ǀ mā́nuṣīḥ ǀ deváḥ ǀ āvarítyāvaḥ ǁ

   vidāḥ ǀ divaḥ ǀ vi-syan ǀ adrim ǀ ukthaiḥ ǀ ā-yatyāḥ ǀ uṣasaḥ ǀ arcinaḥ ǀ guḥ ǀ
   apa ǀ avṛta ǀ vrajinīḥ ǀ ut ǀ svaḥ ǀ gāt ǀ vi ǀ duraḥ ǀ mānuṣīḥ ǀ devaḥ ǀ āvarityāvaḥ ǁ

   5.45.1 Aṣṭaka 4.2.26.1Anuvāka 5.4.1Interpretations

2. Ṛk 2

   वि सूर्यो॑ अ॒मतिं॒ न श्रियं॑ सा॒दोर्वाद्गवां॑ मा॒ता जा॑न॒ती गा॑त् ।
   धन्व॑र्णसो न॒द्यः१॒॑ खादो॑अर्णाः॒ स्थूणे॑व॒ सुमि॑ता दृंहत॒ द्यौः ॥

   वि सूर्यो अमतिं न श्रियं साद् ओर्वाद् गवाम् माता जानती गात् |
   धन्वर्णसो नद्यः खादोअर्णा स्थूणेव सुमिता दृंहत द्यौः ||

   ví sū́ryo amátim ná śríyam sādórvā́dgávām mātā́ jānatī́ gāt ǀ
   dhánvarṇaso nadyáḥ khā́doarṇāḥ sthū́ṇeva súmitā dṛṃhata dyáuḥ ǁ

   vi sūryo amatiṃ na śriyaṃ sād orvād gavām mātā jānatī gāt |
   dhanvarṇaso nadyaḥ khādoarṇā sthūṇeva sumitā dṛṃhata dyauḥ ||

   वि । सूर्यः॑ । अ॒मति॑म् । न । श्रिय॑म् । सा॒त् । आ । ऊ॒र्वात् । गवा॑म् । मा॒ता । जा॒न॒ती । गा॒त् ।
   धन्व॑ऽअर्णसः । न॒द्यः॑ । खादः॑ऽअर्णाः । स्थूणा॑ऽइव । सुऽमि॑ता । दृं॒ह॒त॒ । द्यौः ॥

   वि । सूर्यः । अमतिम् । न । श्रियम् । सात् । आ । ऊर्वात् । गवाम् । माता । जानती । गात् ।
   धन्वऽअर्णसः । नद्यः । खादःऽअर्णाः । स्थूणाऽइव । सुऽमिता । दृंहत । द्यौः ॥

   ví ǀ sū́ryaḥ ǀ amátim ǀ ná ǀ śríyam ǀ sāt ǀ ā́ ǀ ūrvā́t ǀ gávām ǀ mātā́ ǀ jānatī́ ǀ gāt ǀ
   dhánva-arṇasaḥ ǀ nadyáḥ ǀ khā́daḥ-arṇāḥ ǀ sthū́ṇā-iva ǀ sú-mitā ǀ dṛṃhata ǀ dyáuḥ ǁ

   vi ǀ sūryaḥ ǀ amatim ǀ na ǀ śriyam ǀ sāt ǀ ā ǀ ūrvāt ǀ gavām ǀ mātā ǀ jānatī ǀ gāt ǀ
   dhanva-arṇasaḥ ǀ nadyaḥ ǀ khādaḥ-arṇāḥ ǀ sthūṇā-iva ǀ su-mitā ǀ dṛṃhata ǀ dyauḥ ǁ

   5.45.2 Aṣṭaka 4.2.26.2Anuvāka 5.4.2Interpretations

3. Ṛk 3

   अ॒स्मा उ॒क्थाय॒ पर्व॑तस्य॒ गर्भो॑ म॒हीनां॑ ज॒नुषे॑ पू॒र्व्याय॑ ।
   वि पर्व॑तो॒ जिही॑त॒ साध॑त॒ द्यौरा॒विवा॑संतो दसयंत॒ भूम॑ ॥

   अस्मा उक्थाय पर्वतस्य गर्भो महीनां जनुषे पूर्व्याय |
   वि पर्वतो जिहीत साधत द्यौर् आविवासन्तो दसयन्त भूम ||

   asmā́ ukthā́ya párvatasya gárbho mahī́nām janúṣe pūrvyā́ya ǀ
   ví párvato jíhīta sā́dhata dyáurāvívāsanto dasayanta bhū́ma ǁ

   asmā ukthāya parvatasya garbho mahīnāṃ januṣe pūrvyāya |
   vi parvato jihīta sādhata dyaur āvivāsanto dasayanta bhūma ||

   अ॒स्मै । उ॒क्थाय॑ । पर्व॑तस्य । गर्भः॑ । म॒हीना॑म् । ज॒नुषे॑ । पू॒र्व्याय॑ ।
   वि । पर्व॑तः । जिही॑त । साध॑त । द्यौः । आ॒ऽविवा॑सन्तः । द॒स॒य॒न्त॒ । भूम॑ ॥

   अस्मै । उक्थाय । पर्वतस्य । गर्भः । महीनाम् । जनुषे । पूर्व्याय ।
   वि । पर्वतः । जिहीत । साधत । द्यौः । आऽविवासन्तः । दसयन्त । भूम ॥

   asmái ǀ ukthā́ya ǀ párvatasya ǀ gárbhaḥ ǀ mahī́nām ǀ janúṣe ǀ pūrvyā́ya ǀ
   ví ǀ párvataḥ ǀ jíhīta ǀ sā́dhata ǀ dyáuḥ ǀ ā-vívāsantaḥ ǀ dasayanta ǀ bhū́ma ǁ

   asmai ǀ ukthāya ǀ parvatasya ǀ garbhaḥ ǀ mahīnām ǀ januṣe ǀ pūrvyāya ǀ
   vi ǀ parvataḥ ǀ jihīta ǀ sādhata ǀ dyauḥ ǀ ā-vivāsantaḥ ǀ dasayanta ǀ bhūma ǁ

   5.45.3 Aṣṭaka 4.2.26.3Anuvāka 5.4.3Interpretations

4. Ṛk 4

   सू॒क्तेभि॑र्वो॒ वचो॑भिर्दे॒वजु॑ष्टै॒रिंद्रा॒ न्व१॒॑ग्नी अव॑से हु॒वध्यै॑ ।
   उ॒क्थेभि॒र्हि ष्मा॑ क॒वयः॑ सुय॒ज्ञा आ॒विवा॑संतो म॒रुतो॒ यजं॑ति ॥

   सूक्तेभिर् वो वचोभिर् देवजुष्टैर् इन्द्रा न्व् अग्नी अवसे हुवध्यै |
   उक्थेभिर् हि ष्मा कवयः सुयज्ञा आविवासन्तो मरुतो यजन्ति ||

   sūktébhirvo vácobhirdevájuṣṭairíndrā nvágnī́ ávase huvádhyai ǀ
   ukthébhirhí ṣmā kaváyaḥ suyajñā́ āvívāsanto marúto yájanti ǁ

   sūktebhir vo vacobhir devajuṣṭair indrā nv agnī avase huvadhyai |
   ukthebhir hi ṣmā kavayaḥ suyajñā āvivāsanto maruto yajanti ||

   सु॒ऽउ॒क्तेभिः॑ । वः॒ । वचः॑ऽभिः । दे॒वऽजु॑ष्टैः । इन्द्रा॑ । नु । अ॒ग्नी इति॑ । अव॑से । हु॒वध्यै॑ ।
   उ॒क्थेभिः । हि । स्म॒ । क॒वयः॑ । सु॒ऽय॒ज्ञाः । आ॒ऽविवा॑सन्तः । म॒रुतः॑ । यज॑न्ति ॥

   सुऽउक्तेभिः । वः । वचःऽभिः । देवऽजुष्टैः । इन्द्रा । नु । अग्नी इति । अवसे । हुवध्यै ।
   उक्थेभिः । हि । स्म । कवयः । सुऽयज्ञाः । आऽविवासन्तः । मरुतः । यजन्ति ॥

   su-uktébhiḥ ǀ vaḥ ǀ vácaḥ-bhiḥ ǀ devá-juṣṭaiḥ ǀ índrā ǀ nú ǀ agnī́ íti ǀ ávase ǀ huvádhyai ǀ
   ukthébhíḥ ǀ hí ǀ sma ǀ kaváyaḥ ǀ su-yajñā́ḥ ǀ ā-vívāsantaḥ ǀ marútaḥ ǀ yájanti ǁ

   su-uktebhiḥ ǀ vaḥ ǀ vacaḥ-bhiḥ ǀ deva-juṣṭaiḥ ǀ indrā ǀ nu ǀ agnī iti ǀ avase ǀ huvadhyai ǀ
   ukthebhiḥ ǀ hi ǀ sma ǀ kavayaḥ ǀ su-yajñāḥ ǀ ā-vivāsantaḥ ǀ marutaḥ ǀ yajanti ǁ

   5.45.4 Aṣṭaka 4.2.26.4Anuvāka 5.4.4Interpretations

5. Ṛk 5

   एतो॒ न्व१॒॑द्य सु॒ध्यो॒३॒॑ भवा॑म॒ प्र दु॒च्छुना॑ मिनवामा॒ वरी॑यः ।
   आ॒रे द्वेषां॑सि सनु॒तर्द॑धा॒माया॑म॒ प्रांचो॒ यज॑मान॒मच्छ॑ ॥

   एतो न्व् अद्य सुध्यो भवाम प्र दुच्छुना मिनवामा वरीयः |
   आरे द्वेषांसि सनुतर् दधामायाम प्राञ्चो यजमानम् अच्छ ||

   éto nvádyá sudhyó bhávāma prá ducchúnā minavāmā várīyaḥ ǀ
   āré dvéṣāṃsi sanutárdadhāmā́yāma prā́ñco yájamānamáccha ǁ

   eto nv adya sudhyo bhavāma pra ducchunā minavāmā varīyaḥ |
   āre dveṣāṃsi sanutar dadhāmāyāma prāñco yajamānam accha ||

   एतो॒ इति॑ । नु । अ॒द्य । सु॒ऽध्यः॑ । भवा॑म । प्र । दु॒च्छुनाः॑ । मि॒न॒वा॒म॒ । वरी॑यः ।
   आ॒रे । द्वेषां॑सि । स॒नु॒तः । द॒धा॒म॒ । अया॑म । प्राञ्चः॑ । यज॑मानम् । अच्छ॑ ॥

   एतो इति । नु । अद्य । सुऽध्यः । भवाम । प्र । दुच्छुनाः । मिनवाम । वरीयः ।
   आरे । द्वेषांसि । सनुतः । दधाम । अयाम । प्राञ्चः । यजमानम् । अच्छ ॥

   éto íti ǀ nú ǀ adyá ǀ su-dhyáḥ ǀ bhávāma ǀ prá ǀ ducchúnāḥ ǀ minavāma ǀ várīyaḥ ǀ
   āré ǀ dvéṣāṃsi ǀ sanutáḥ ǀ dadhāma ǀ áyāma ǀ prā́ñcaḥ ǀ yájamānam ǀ áccha ǁ

   eto iti ǀ nu ǀ adya ǀ su-dhyaḥ ǀ bhavāma ǀ pra ǀ ducchunāḥ ǀ minavāma ǀ varīyaḥ ǀ
   āre ǀ dveṣāṃsi ǀ sanutaḥ ǀ dadhāma ǀ ayāma ǀ prāñcaḥ ǀ yajamānam ǀ accha ǁ

   5.45.5 Aṣṭaka 4.2.26.5Anuvāka 5.4.5Interpretations

6. Ṛk 6

   एता॒ धियं॑ कृ॒णवा॑मा सखा॒योऽप॒ या मा॒ताँ ऋ॑णु॒त व्र॒जं गोः ।
   यया॒ मनु॑र्विशिशि॒प्रं जि॒गाय॒ यया॑ व॒णिग्वं॒कुरापा॒ पुरी॑षं ॥

   एता धियं कृणवामा सखायो ऽप या मातां ऋणुत व्रजं गोः |
   यया मनुर् विशिशिप्रं जिगाय यया वणिग् वङ्कुर् आपा पुरीषम् ||

   étā dhíyam kṛṇávāmā sakhāyó’pa yā́ mātā́m̐ ṛṇutá vrajám góḥ ǀ
   yáyā mánurviśiśiprám jigā́ya yáyā vaṇígvaṅkúrā́pā púrīṣam ǁ

   etā dhiyaṃ kṛṇavāmā sakhāyo 'pa yā mātāṃ ṛṇuta vrajaṃ goḥ |
   yayā manur viśiśipraṃ jigāya yayā vaṇig vaṅkur āpā purīṣam ||

   आ । इ॒त॒ । धिय॑म् । कृ॒णवा॑म । स॒खा॒यः॒ । अप॑ । या । मा॒ता । ऋ॒णु॒त । व्र॒जम् । गोः ।
   यया॑ । मनुः॑ । वि॒शि॒ऽशि॒प्रम् । जि॒गाय॑ । यया॑ । व॒णिक् । व॒ङ्कुः । आप॑ । पुरी॑षम् ॥

   आ । इत । धियम् । कृणवाम । सखायः । अप । या । माता । ऋणुत । व्रजम् । गोः ।
   यया । मनुः । विशिऽशिप्रम् । जिगाय । यया । वणिक् । वङ्कुः । आप । पुरीषम् ॥

   ā́ ǀ ita ǀ dhíyam ǀ kṛṇávāma ǀ sakhāyaḥ ǀ ápa ǀ yā́ ǀ mātā́ ǀ ṛṇutá ǀ vrajám ǀ góḥ ǀ
   yáyā ǀ mánuḥ ǀ viśi-śiprám ǀ jigā́ya ǀ yáyā ǀ vaṇík ǀ vaṅkúḥ ǀ ā́pa ǀ púrīṣam ǁ

   ā ǀ ita ǀ dhiyam ǀ kṛṇavāma ǀ sakhāyaḥ ǀ apa ǀ yā ǀ mātā ǀ ṛṇuta ǀ vrajam ǀ goḥ ǀ
   yayā ǀ manuḥ ǀ viśi-śipram ǀ jigāya ǀ yayā ǀ vaṇik ǀ vaṅkuḥ ǀ āpa ǀ purīṣam ǁ

   5.45.6 Aṣṭaka 4.2.27.1Anuvāka 5.4.6Interpretations

7. Ṛk 7

   अनू॑नो॒दत्र॒ हस्त॑यतो॒ अद्रि॒रार्च॒न्येन॒ दश॑ मा॒सो नव॑ग्वाः ।
   ऋ॒तं य॒ती स॒रमा॒ गा अ॑विंद॒द्विश्वा॑नि स॒त्यांगि॑राश्चकार ॥

   अनूनोद् अत्र हस्तयतो अद्रिर् आर्चन् येन दश मासो नवग्वाः |
   ऋतं यती सरमा गा अविन्दद् विश्वानि सत्याङ्गिराश् चकार ||

   ánūnodátra hástayato ádrirā́rcanyéna dáśa māsó návagvāḥ ǀ
   ṛtám yatī́ sarámā gā́ avindadvíśvāni satyā́ṅgirāścakāra ǁ

   anūnod atra hastayato adrir ārcan yena daśa māso navagvāḥ |
   ṛtaṃ yatī saramā gā avindad viśvāni satyāṅgirāś cakāra ||

   अनू॑नोत् । अत्र॑ । हस्त॑ऽयतः । अद्रिः॑ । आर्च॑न् । येन॑ । दश॑ । मा॒सः । नव॑ऽग्वाः ।
   ऋ॒तम् । य॒ती । स॒रमा॑ । गाः । अ॒वि॒न्द॒त् । विश्वा॑नि । स॒त्या । अङ्गि॑राः । च॒का॒र॒ ॥

   अनूनोत् । अत्र । हस्तऽयतः । अद्रिः । आर्चन् । येन । दश । मासः । नवऽग्वाः ।
   ऋतम् । यती । सरमा । गाः । अविन्दत् । विश्वानि । सत्या । अङ्गिराः । चकार ॥

   ánūnot ǀ átra ǀ hásta-yataḥ ǀ ádriḥ ǀ ā́rcan ǀ yéna ǀ dáśa ǀ māsáḥ ǀ náva-gvāḥ ǀ
   ṛtám ǀ yatī́ ǀ sarámā ǀ gā́ḥ ǀ avindat ǀ víśvāni ǀ satyā́ ǀ áṅgirāḥ ǀ cakāra ǁ

   anūnot ǀ atra ǀ hasta-yataḥ ǀ adriḥ ǀ ārcan ǀ yena ǀ daśa ǀ māsaḥ ǀ nava-gvāḥ ǀ
   ṛtam ǀ yatī ǀ saramā ǀ gāḥ ǀ avindat ǀ viśvāni ǀ satyā ǀ aṅgirāḥ ǀ cakāra ǁ

   5.45.7 Aṣṭaka 4.2.27.2Anuvāka 5.4.7Interpretations

8. Ṛk 8

   विश्वे॑ अ॒स्या व्युषि॒ माहि॑नायाः॒ सं यद्गोभि॒रंगि॑रसो॒ नवं॑त ।
   उत्स॑ आसां पर॒मे स॒धस्थ॑ ऋ॒तस्य॑ प॒था स॒रमा॑ विद॒द्गाः ॥

   विश्वे अस्या व्युषि माहिनायाः सं यद् गोभिर् अङ्गिरसो नवन्त |
   उत्स आसाम् परमे सधस्थ ऋतस्य पथा सरमा विदद् गाः ||

   víśve asyā́ vyúṣi mā́hināyāḥ sám yádgóbhiráṅgiraso návanta ǀ
   útsa āsām paramé sadhástha ṛtásya pathā́ sarámā vidadgā́ḥ ǁ

   viśve asyā vyuṣi māhināyāḥ saṃ yad gobhir aṅgiraso navanta |
   utsa āsām parame sadhastha ṛtasya pathā saramā vidad gāḥ ||

   विश्वे॑ । अ॒स्याः । वि॒ऽउषि॑ । माहि॑नायाः । सम् । यत् । गोभिः॑ । अङ्गि॑रसः । नव॑न्त ।
   उत्सः॑ । आ॒सा॒म् । प॒र॒मे । स॒धऽस्थे॑ । ऋ॒तस्य॑ । प॒था । स॒रमा॑ । वि॒द॒त् । गाः ॥

   विश्वे । अस्याः । विऽउषि । माहिनायाः । सम् । यत् । गोभिः । अङ्गिरसः । नवन्त ।
   उत्सः । आसाम् । परमे । सधऽस्थे । ऋतस्य । पथा । सरमा । विदत् । गाः ॥

   víśve ǀ asyā́ḥ ǀ vi-úṣi ǀ mā́hināyāḥ ǀ sám ǀ yát ǀ góbhiḥ ǀ áṅgirasaḥ ǀ návanta ǀ
   útsaḥ ǀ āsām ǀ paramé ǀ sadhá-sthe ǀ ṛtásya ǀ pathā́ ǀ sarámā ǀ vidat ǀ gā́ḥ ǁ

   viśve ǀ asyāḥ ǀ vi-uṣi ǀ māhināyāḥ ǀ sam ǀ yat ǀ gobhiḥ ǀ aṅgirasaḥ ǀ navanta ǀ
   utsaḥ ǀ āsām ǀ parame ǀ sadha-sthe ǀ ṛtasya ǀ pathā ǀ saramā ǀ vidat ǀ gāḥ ǁ

   5.45.8 Aṣṭaka 4.2.27.3Anuvāka 5.4.8Interpretations

9. Ṛk 9

   आ सूर्यो॑ यातु स॒प्ताश्वः॒ क्षेत्रं॒ यद॑स्योर्वि॒या दी॑र्घया॒थे ।
   र॒घुः श्ये॒नः प॑तय॒दंधो॒ अच्छा॒ युवा॑ क॒विर्दी॑दय॒द्गोषु॒ गच्छ॑न् ॥

   आ सूर्यो यातु सप्ताश्वः क्षेत्रं यद् अस्योर्विया दीर्घयाथे |
   रघुः श्येनः पतयद् अन्धो अच्छा युवा कविर् दीदयद् गोषु गच्छन् ||

   ā́ sū́ryo yātu saptā́śvaḥ kṣétram yádasyorviyā́ dīrghayāthé ǀ
   raghúḥ śyenáḥ patayadándho ácchā yúvā kavírdīdayadgóṣu gácchan ǁ

   ā sūryo yātu saptāśvaḥ kṣetraṃ yad asyorviyā dīrghayāthe |
   raghuḥ śyenaḥ patayad andho acchā yuvā kavir dīdayad goṣu gacchan ||

   आ । सूर्यः॑ । या॒तु॒ । स॒प्तऽअ॑श्वः । क्षेत्र॑म् । यत् । अ॒स्य॒ । उ॒र्वि॒या । दी॒र्घ॒ऽया॒थे ।
   र॒घुः । श्ये॒नः । प॒त॒य॒त् । अन्धः॑ । अच्छ॑ । युवा॑ । क॒विः । दी॒द॒य॒त् । गोषु॑ । गच्छ॑न् ॥

   आ । सूर्यः । यातु । सप्तऽअश्वः । क्षेत्रम् । यत् । अस्य । उर्विया । दीर्घऽयाथे ।
   रघुः । श्येनः । पतयत् । अन्धः । अच्छ । युवा । कविः । दीदयत् । गोषु । गच्छन् ॥

   ā́ ǀ sū́ryaḥ ǀ yātu ǀ saptá-aśvaḥ ǀ kṣétram ǀ yát ǀ asya ǀ urviyā́ ǀ dīrgha-yāthé ǀ
   raghúḥ ǀ śyenáḥ ǀ patayat ǀ ándhaḥ ǀ áccha ǀ yúvā ǀ kavíḥ ǀ dīdayat ǀ góṣu ǀ gácchan ǁ

   ā ǀ sūryaḥ ǀ yātu ǀ sapta-aśvaḥ ǀ kṣetram ǀ yat ǀ asya ǀ urviyā ǀ dīrgha-yāthe ǀ
   raghuḥ ǀ śyenaḥ ǀ patayat ǀ andhaḥ ǀ accha ǀ yuvā ǀ kaviḥ ǀ dīdayat ǀ goṣu ǀ gacchan ǁ

   5.45.9 Aṣṭaka 4.2.27.4Anuvāka 5.4.9Interpretations

10. Ṛk 10

    आ सूर्यो॑ अरुहच्छु॒क्रमर्णोऽयु॑क्त॒ यद्ध॒रितो॑ वी॒तपृ॑ष्ठाः ।
    उ॒द्ना न नाव॑मनयंत॒ धीरा॑ आशृण्व॒तीरापो॑ अ॒र्वाग॑तिष्ठन् ॥

    आ सूर्यो अरुहच् छुक्रम् अर्णो ऽयुक्त यद् धरितो वीतपृष्ठाः |
    उद्ना न नावम् अनयन्त धीरा आशृण्वतीर् आपो अर्वाग् अतिष्ठन् ||

    ā́ sū́ryo aruhacchukrámárṇó’yukta yáddharíto vītápṛṣṭhāḥ ǀ
    udnā́ ná nā́vamanayanta dhī́rā āśṛṇvatī́rā́po arvā́gatiṣṭhan ǁ

    ā sūryo aruhac chukram arṇo 'yukta yad dharito vītapṛṣṭhāḥ |
    udnā na nāvam anayanta dhīrā āśṛṇvatīr āpo arvāg atiṣṭhan ||

    आ । सूर्यः॑ । अ॒रु॒ह॒त् । शु॒क्रम् । अर्णः॑ । अयु॑क्त । यत् । ह॒रितः॑ । वी॒तऽपृ॑ष्ठाः ।
    उ॒द्ना । न । नाव॑म् । अ॒न॒य॒न्त॒ । धीराः॑ । आ॒ऽशृ॒ण्व॒तीः । आपः॑ । अ॒र्वाक् । अ॒ति॒ष्ठ॒न् ॥

    आ । सूर्यः । अरुहत् । शुक्रम् । अर्णः । अयुक्त । यत् । हरितः । वीतऽपृष्ठाः ।
    उद्ना । न । नावम् । अनयन्त । धीराः । आऽशृण्वतीः । आपः । अर्वाक् । अतिष्ठन् ॥

    ā́ ǀ sū́ryaḥ ǀ aruhat ǀ śukrám ǀ árṇaḥ ǀ áyukta ǀ yát ǀ harítaḥ ǀ vītá-pṛṣṭhāḥ ǀ
    udnā́ ǀ ná ǀ nā́vam ǀ anayanta ǀ dhī́rāḥ ǀ ā-śṛṇvatī́ḥ ǀ ā́paḥ ǀ arvā́k ǀ atiṣṭhan ǁ

    ā ǀ sūryaḥ ǀ aruhat ǀ śukram ǀ arṇaḥ ǀ ayukta ǀ yat ǀ haritaḥ ǀ vīta-pṛṣṭhāḥ ǀ
    udnā ǀ na ǀ nāvam ǀ anayanta ǀ dhīrāḥ ǀ ā-śṛṇvatīḥ ǀ āpaḥ ǀ arvāk ǀ atiṣṭhan ǁ

    5.45.10 Aṣṭaka 4.2.27.5Anuvāka 5.4.10Interpretations

11. Ṛk 11

    धियं॑ वो अ॒प्सु द॑धिषे स्व॒र्षां ययात॑रं॒दश॑ मा॒सो नव॑ग्वाः ।
    अ॒या धि॒या स्या॑म दे॒वगो॑पा अ॒या धि॒या तु॑तुर्या॒मात्यंहः॑ ॥

    धियं वो अप्सु दधिषे स्वर्षां ययातरन् दश मासो नवग्वाः |
    अया धिया स्याम देवगोपा अया धिया तुतुर्यामात्य् अंहः ||

    dhíyam vo apsú dadhiṣe svarṣā́m yáyā́tarandáśa māsó návagvāḥ ǀ
    ayā́ dhiyā́ syāma devágopā ayā́ dhiyā́ tuturyāmā́tyáṃhaḥ ǁ

    dhiyaṃ vo apsu dadhiṣe svarṣāṃ yayātaran daśa māso navagvāḥ |
    ayā dhiyā syāma devagopā ayā dhiyā tuturyāmāty aṃhaḥ ||

    धिय॑म् । वः॒ । अ॒प्ऽसु । द॒धि॒षे॒ । स्वः॒ऽसाम् । यया॑ । अत॑रन् । दश॑ । मा॒सः । नव॑ऽग्वाः ।
    अ॒या । धि॒या । स्या॒म॒ । दे॒वऽगो॑पाः । अ॒या । धि॒या । तु॒तु॒र्या॒म॒ । अति॑ । अंहः॑ ॥

    धियम् । वः । अप्ऽसु । दधिषे । स्वःऽसाम् । यया । अतरन् । दश । मासः । नवऽग्वाः ।
    अया । धिया । स्याम । देवऽगोपाः । अया । धिया । तुतुर्याम । अति । अंहः ॥

    dhíyam ǀ vaḥ ǀ ap-sú ǀ dadhiṣe ǀ svaḥ-sā́m ǀ yáyā ǀ átaran ǀ dáśa ǀ māsáḥ ǀ náva-gvāḥ ǀ
    ayā́ ǀ dhiyā́ ǀ syāma ǀ devá-gopāḥ ǀ ayā́ ǀ dhiyā́ ǀ tuturyāma ǀ áti ǀ áṃhaḥ ǁ

    dhiyam ǀ vaḥ ǀ ap-su ǀ dadhiṣe ǀ svaḥ-sām ǀ yayā ǀ ataran ǀ daśa ǀ māsaḥ ǀ nava-gvāḥ ǀ
    ayā ǀ dhiyā ǀ syāma ǀ deva-gopāḥ ǀ ayā ǀ dhiyā ǀ tuturyāma ǀ ati ǀ aṃhaḥ ǁ

    5.45.11 Aṣṭaka 4.2.27.6Anuvāka 5.4.11Interpretations

Text, recitation and interpretations from the Ṛgveda database of theveda.org.in.