Devatā देवता

Indra

Ṛṣi ऋषि

Saṃvaraṇa Prājāpatya

Chandas छन्दस्

Triṣṭubh

1. Ṛk 1

   महि॑ म॒हे त॒वसे॑ दीध्ये॒ नॄनिंद्रा॑ये॒त्था त॒वसे॒ अत॑व्यान् ।
   यो अ॑स्मै सुम॒तिं वाज॑सातौ स्तु॒तो जने॑ सम॒र्य॑श्चि॒केत॑ ॥

   महि महे तवसे दीध्ये नॄन् इन्द्रायेत्था तवसे अतव्यान् |
   यो अस्मै सुमतिं वाजसातौ स्तुतो जने समर्यश् चिकेत ||

   máhi mahé taváse dīdhye nṝ́níndrāyetthā́ taváse átavyān ǀ
   yó asmai sumatím vā́jasātau stutó jáne samaryáścikéta ǁ

   mahi mahe tavase dīdhye nṝn indrāyetthā tavase atavyān |
   yo asmai sumatiṃ vājasātau stuto jane samaryaś ciketa ||

   महि॑ । म॒हे । त॒वसे॑ । दी॒ध्ये॒ । नॄन् । इन्द्रा॑य । इ॒त्था । त॒वसे॑ । अत॑व्यान् ।
   यः । अ॒स्मै॒ । सु॒ऽम॒तिम् । वाज॑ऽसातौ । स्तु॒तः । जने॑ । स॒ऽम॒र्यः॑ । चि॒केत॑ ॥

   महि । महे । तवसे । दीध्ये । नॄन् । इन्द्राय । इत्था । तवसे । अतव्यान् ।
   यः । अस्मै । सुऽमतिम् । वाजऽसातौ । स्तुतः । जने । सऽमर्यः । चिकेत ॥

   máhi ǀ mahé ǀ taváse ǀ dīdhye ǀ nṝ́n ǀ índrāya ǀ itthā́ ǀ taváse ǀ átavyān ǀ
   yáḥ ǀ asmai ǀ su-matím ǀ vā́ja-sātau ǀ stutáḥ ǀ jáne ǀ sa-maryáḥ ǀ cikéta ǁ

   mahi ǀ mahe ǀ tavase ǀ dīdhye ǀ nṝn ǀ indrāya ǀ itthā ǀ tavase ǀ atavyān ǀ
   yaḥ ǀ asmai ǀ su-matim ǀ vāja-sātau ǀ stutaḥ ǀ jane ǀ sa-maryaḥ ǀ ciketa ǁ

   5.33.1 Aṣṭaka 4.2.1.1Anuvāka 5.3.1Interpretations

2. Ṛk 2

   स त्वं न॑ इंद्र धियसा॒नो अ॒र्कैर्हरी॑णां वृष॒न्योक्त्र॑मश्रेः ।
   या इ॒त्था म॑घव॒न्ननु॒ जोषं॒ वक्षो॑ अ॒भि प्रार्यः स॑क्षि॒ जना॑न् ॥

   स त्वं न इन्द्र धियसानो अर्कैर् हरीणां वृषन् योक्त्रम् अश्रेः |
   या इत्था मघवन्न् अनु जोषं वक्षो अभि प्रार्यः सक्षि जनान् ||

   sá tvám na indra dhiyasānó arkáirhárīṇām vṛṣanyóktramaśreḥ ǀ
   yā́ itthā́ maghavannánu jóṣam vákṣo abhí prā́ryáḥ sakṣi jánān ǁ

   sa tvaṃ na indra dhiyasāno arkair harīṇāṃ vṛṣan yoktram aśreḥ |
   yā itthā maghavann anu joṣaṃ vakṣo abhi prāryaḥ sakṣi janān ||

   सः । त्वम् । नः॒ । इ॒न्द्र॒ । धि॒य॒सा॒नः । अ॒र्कैः । हरी॑णाम् । वृ॒ष॒न् । योक्त्र॑म् । अ॒श्रेः॒ ।
   याः । इ॒त्था । म॒घ॒ऽव॒न् । अनु॑ । जोष॑म् । वक्षः॑ । अ॒भि । प्र । अ॒र्यः । स॒क्षि॒ । जना॑न् ॥

   सः । त्वम् । नः । इन्द्र । धियसानः । अर्कैः । हरीणाम् । वृषन् । योक्त्रम् । अश्रेः ।
   याः । इत्था । मघऽवन् । अनु । जोषम् । वक्षः । अभि । प्र । अर्यः । सक्षि । जनान् ॥

   sáḥ ǀ tvám ǀ naḥ ǀ indra ǀ dhiyasānáḥ ǀ arkáiḥ ǀ hárīṇām ǀ vṛṣan ǀ yóktram ǀ aśreḥ ǀ
   yā́ḥ ǀ itthā́ ǀ magha-van ǀ ánu ǀ jóṣam ǀ vákṣaḥ ǀ abhí ǀ prá ǀ aryáḥ ǀ sakṣi ǀ jánān ǁ

   saḥ ǀ tvam ǀ naḥ ǀ indra ǀ dhiyasānaḥ ǀ arkaiḥ ǀ harīṇām ǀ vṛṣan ǀ yoktram ǀ aśreḥ ǀ
   yāḥ ǀ itthā ǀ magha-van ǀ anu ǀ joṣam ǀ vakṣaḥ ǀ abhi ǀ pra ǀ aryaḥ ǀ sakṣi ǀ janān ǁ

   5.33.2 Aṣṭaka 4.2.1.2Anuvāka 5.3.2Interpretations

3. Ṛk 3

   न ते त॑ इंद्रा॒भ्य१॒॑स्मदृ॒ष्वायु॑क्तासो अब्र॒ह्मता॒ यदस॑न् ।
   तिष्ठा॒ रथ॒मधि॒ तं व॑ज्रह॒स्ता र॒श्मिं दे॑व यमसे॒ स्वश्वः॑ ॥

   न ते त इन्द्राभ्य् अस्मद् ऋष्वायुक्तासो अब्रह्मता यद् असन् |
   तिष्ठा रथम् अधि तं वज्रहस्ता रश्मिं देव यमसे स्वश्वः ||

   ná té ta indrābhyásmádṛṣvā́yuktāso abrahmátā yádásan ǀ
   tíṣṭhā ráthamádhi tám vajrahastā́ raśmím deva yamase sváśvaḥ ǁ

   na te ta indrābhy asmad ṛṣvāyuktāso abrahmatā yad asan |
   tiṣṭhā ratham adhi taṃ vajrahastā raśmiṃ deva yamase svaśvaḥ ||

   न । ते । ते॒ । इ॒न्द्र॒ । अ॒भि । अ॒स्मत् । ऋ॒ष्व॒ । अयु॑क्तासः । अ॒ब्र॒ह्मता॑ । यत् । अस॑न् ।
   तिष्ठ॑ । रथ॑म् । अधि॑ । तम् । व॒ज्र॒ऽह॒स्त॒ । आ । र॒श्मिम् । दे॒व॒ । य॒म॒से॒ । सु॒ऽअश्वः॑ ॥

   न । ते । ते । इन्द्र । अभि । अस्मत् । ऋष्व । अयुक्तासः । अब्रह्मता । यत् । असन् ।
   तिष्ठ । रथम् । अधि । तम् । वज्रऽहस्त । आ । रश्मिम् । देव । यमसे । सुऽअश्वः ॥

   ná ǀ té ǀ te ǀ indra ǀ abhí ǀ asmát ǀ ṛṣva ǀ áyuktāsaḥ ǀ abrahmátā ǀ yát ǀ ásan ǀ
   tíṣṭha ǀ rátham ǀ ádhi ǀ tám ǀ vajra-hasta ǀ ā́ ǀ raśmím ǀ deva ǀ yamase ǀ su-áśvaḥ ǁ

   na ǀ te ǀ te ǀ indra ǀ abhi ǀ asmat ǀ ṛṣva ǀ ayuktāsaḥ ǀ abrahmatā ǀ yat ǀ asan ǀ
   tiṣṭha ǀ ratham ǀ adhi ǀ tam ǀ vajra-hasta ǀ ā ǀ raśmim ǀ deva ǀ yamase ǀ su-aśvaḥ ǁ

   5.33.3 Aṣṭaka 4.2.1.3Anuvāka 5.3.3Interpretations

4. Ṛk 4

   पु॒रू यत्त॑ इंद्र॒ संत्यु॒क्था गवे॑ च॒कर्थो॒र्वरा॑सु॒ युध्य॑न् ।
   त॒त॒क्षे सूर्या॑य चि॒दोक॑सि॒ स्वे वृषा॑ स॒मत्सु॑ दा॒सस्य॒ नाम॑ चित् ॥

   पुरू यत् त इन्द्र सन्त्य् उक्था गवे चकर्थोर्वरासु युध्यन् |
   ततक्षे सूर्याय चिद् ओकसि स्वे वृषा समत्सु दासस्य नाम चित् ||

   purū́ yátta indra sántyukthā́ gáve cakárthorvárāsu yúdhyan ǀ
   tatakṣé sū́ryāya cidókasi své vṛ́ṣā samátsu dāsásya nā́ma cit ǁ

   purū yat ta indra santy ukthā gave cakarthorvarāsu yudhyan |
   tatakṣe sūryāya cid okasi sve vṛṣā samatsu dāsasya nāma cit ||

   पु॒रु । यत् । ते॒ । इ॒न्द्र॒ । सन्ति॑ । उ॒क्था । गवे॑ । च॒कर्थ॑ । उ॒र्वरा॑सु । युध्य॑न् ।
   त॒त॒क्षे । सूर्या॑य । चि॒त् । ओक॑सि । स्वे । वृषा॑ । स॒मत्ऽसु॑ । दा॒सस्य॑ । नाम॑ । चि॒त् ॥

   पुरु । यत् । ते । इन्द्र । सन्ति । उक्था । गवे । चकर्थ । उर्वरासु । युध्यन् ।
   ततक्षे । सूर्याय । चित् । ओकसि । स्वे । वृषा । समत्ऽसु । दासस्य । नाम । चित् ॥

   purú ǀ yát ǀ te ǀ indra ǀ sánti ǀ ukthā́ ǀ gáve ǀ cakártha ǀ urvárāsu ǀ yúdhyan ǀ
   tatakṣé ǀ sū́ryāya ǀ cit ǀ ókasi ǀ své ǀ vṛ́ṣā ǀ samát-su ǀ dāsásya ǀ nā́ma ǀ cit ǁ

   puru ǀ yat ǀ te ǀ indra ǀ santi ǀ ukthā ǀ gave ǀ cakartha ǀ urvarāsu ǀ yudhyan ǀ
   tatakṣe ǀ sūryāya ǀ cit ǀ okasi ǀ sve ǀ vṛṣā ǀ samat-su ǀ dāsasya ǀ nāma ǀ cit ǁ

   5.33.4 Aṣṭaka 4.2.1.4Anuvāka 5.3.4Interpretations

5. Ṛk 5

   व॒यं ते त॑ इंद्र॒ ये च॒ नरः॒ शर्धो॑ जज्ञा॒ना या॒ताश्च॒ रथाः॑ ।
   आस्मांज॑गम्यादहिशुष्म॒ सत्वा॒ भगो॒ न हव्यः॑ प्रभृ॒थेषु॒ चारुः॑ ॥

   वयं ते त इन्द्र ये च नरः शर्धो जज्ञाना याताश् च रथाः |
   आस्माञ् जगम्याद् अहिशुष्म सत्वा भगो न हव्यः प्रभृथेषु चारुः ||

   vayám té ta indra yé ca náraḥ śárdho jajñānā́ yātā́śca ráthāḥ ǀ
   ā́smā́ñjagamyādahiśuṣma sátvā bhágo ná hávyaḥ prabhṛthéṣu cā́ruḥ ǁ

   vayaṃ te ta indra ye ca naraḥ śardho jajñānā yātāś ca rathāḥ |
   āsmāñ jagamyād ahiśuṣma satvā bhago na havyaḥ prabhṛtheṣu cāruḥ ||

   व॒यम् । ते । ते॒ । इ॒न्द्र॒ । ये । च॒ । नरः॑ । शर्धः॑ । ज॒ज्ञा॒नाः । या॒ताः । च॒ । रथाः॑ ।
   आ । अ॒स्मान् । ज॒ग॒म्या॒त् । अ॒हि॒ऽशु॒ष्म॒ । सत्वा॑ । भगः॑ । न । हव्यः॑ । प्र॒ऽभृ॒थेषु॑ । चारुः॑ ॥

   वयम् । ते । ते । इन्द्र । ये । च । नरः । शर्धः । जज्ञानाः । याताः । च । रथाः ।
   आ । अस्मान् । जगम्यात् । अहिऽशुष्म । सत्वा । भगः । न । हव्यः । प्रऽभृथेषु । चारुः ॥

   vayám ǀ té ǀ te ǀ indra ǀ yé ǀ ca ǀ náraḥ ǀ śárdhaḥ ǀ jajñānā́ḥ ǀ yātā́ḥ ǀ ca ǀ ráthāḥ ǀ
   ā́ ǀ asmā́n ǀ jagamyāt ǀ ahi-śuṣma ǀ sátvā ǀ bhágaḥ ǀ ná ǀ hávyaḥ ǀ pra-bhṛthéṣu ǀ cā́ruḥ ǁ

   vayam ǀ te ǀ te ǀ indra ǀ ye ǀ ca ǀ naraḥ ǀ śardhaḥ ǀ jajñānāḥ ǀ yātāḥ ǀ ca ǀ rathāḥ ǀ
   ā ǀ asmān ǀ jagamyāt ǀ ahi-śuṣma ǀ satvā ǀ bhagaḥ ǀ na ǀ havyaḥ ǀ pra-bhṛtheṣu ǀ cāruḥ ǁ

   5.33.5 Aṣṭaka 4.2.1.5Anuvāka 5.3.5Interpretations

6. Ṛk 6

   प॒पृ॒क्षेण्य॑मिंद्र॒ त्वे ह्योजो॑ नृ॒म्णानि॑ च नृ॒तमा॑नो॒ अम॑र्तः ।
   स न॒ एनीं॑ वसवानो र॒यिं दाः॒ प्रार्यः स्तु॑षे तुविम॒घस्य॒ दानं॑ ॥

   पपृक्षेण्यम् इन्द्र त्वे ह्य् ओजो नृम्णानि च नृतमानो अमर्तः |
   स न एनीं वसवानो रयिं दाः प्रार्य स्तुषे तुविमघस्य दानम् ||

   papṛkṣéṇyamindra tvé hyójo nṛmṇā́ni ca nṛtámāno ámartaḥ ǀ
   sá na énīm vasavāno rayím dāḥ prā́ryáḥ stuṣe tuvimaghásya dā́nam ǁ

   papṛkṣeṇyam indra tve hy ojo nṛmṇāni ca nṛtamāno amartaḥ |
   sa na enīṃ vasavāno rayiṃ dāḥ prārya stuṣe tuvimaghasya dānam ||

   प॒पृ॒क्षेण्य॑म् । इ॒न्द्र॒ । त्वे इति॑ । हि । ओजः॑ । नृ॒म्णानि॑ । च॒ । नृ॒तमा॑नः । अम॑र्तः ।
   सः । नः॒ । एनी॑म् । व॒स॒वा॒नः॒ । र॒यिम् । दाः॒ । प्र । अ॒र्यः । स्तु॒षे॒ । तु॒वि॒ऽम॒घस्य॑ । दान॑म् ॥

   पपृक्षेण्यम् । इन्द्र । त्वे इति । हि । ओजः । नृम्णानि । च । नृतमानः । अमर्तः ।
   सः । नः । एनीम् । वसवानः । रयिम् । दाः । प्र । अर्यः । स्तुषे । तुविऽमघस्य । दानम् ॥

   papṛkṣéṇyam ǀ indra ǀ tvé íti ǀ hí ǀ ójaḥ ǀ nṛmṇā́ni ǀ ca ǀ nṛtámānaḥ ǀ ámartaḥ ǀ
   sáḥ ǀ naḥ ǀ énīm ǀ vasavānaḥ ǀ rayím ǀ dāḥ ǀ prá ǀ aryáḥ ǀ stuṣe ǀ tuvi-maghásya ǀ dā́nam ǁ

   papṛkṣeṇyam ǀ indra ǀ tve iti ǀ hi ǀ ojaḥ ǀ nṛmṇāni ǀ ca ǀ nṛtamānaḥ ǀ amartaḥ ǀ
   saḥ ǀ naḥ ǀ enīm ǀ vasavānaḥ ǀ rayim ǀ dāḥ ǀ pra ǀ aryaḥ ǀ stuṣe ǀ tuvi-maghasya ǀ dānam ǁ

   5.33.6 Aṣṭaka 4.2.2.1Anuvāka 5.3.6Interpretations

7. Ṛk 7

   ए॒वा न॑ इंद्रो॒तिभि॑रव पा॒हि गृ॑ण॒तः शू॑र का॒रून् ।
   उ॒त त्वचं॒ दद॑तो॒ वाज॑सातौ पिप्री॒हि मध्वः॒ सुषु॑तस्य॒ चारोः॑ ॥

   एवा न इन्द्रोतिभिर् अव पाहि गृणतः शूर कारून् |
   उत त्वचं ददतो वाजसातौ पिप्रीहि मध्वः सुषुतस्य चारोः ||

   evā́ na indrotíbhirava pāhí gṛṇatáḥ śūra kārū́n ǀ
   utá tvácam dádato vā́jasātau piprīhí mádhvaḥ súṣutasya cā́roḥ ǁ

   evā na indrotibhir ava pāhi gṛṇataḥ śūra kārūn |
   uta tvacaṃ dadato vājasātau piprīhi madhvaḥ suṣutasya cāroḥ ||

   ए॒व । नः॒ । इ॒न्द्र॒ । ऊ॒तिऽभिः॑ । अ॒व॒ । पा॒हि । गृ॒ण॒तः । शू॒र॒ । का॒रून् ।
   उ॒त । त्वच॑म् । दद॑तः । वाज॑ऽसातौ । पि॒प्री॒हि । मध्वः॑ । सुऽसु॑तस्य । चारोः॑ ॥

   एव । नः । इन्द्र । ऊतिऽभिः । अव । पाहि । गृणतः । शूर । कारून् ।
   उत । त्वचम् । ददतः । वाजऽसातौ । पिप्रीहि । मध्वः । सुऽसुतस्य । चारोः ॥

   evá ǀ naḥ ǀ indra ǀ ūtí-bhiḥ ǀ ava ǀ pāhí ǀ gṛṇatáḥ ǀ śūra ǀ kārū́n ǀ
   utá ǀ tvácam ǀ dádataḥ ǀ vā́ja-sātau ǀ piprīhí ǀ mádhvaḥ ǀ sú-sutasya ǀ cā́roḥ ǁ

   eva ǀ naḥ ǀ indra ǀ ūti-bhiḥ ǀ ava ǀ pāhi ǀ gṛṇataḥ ǀ śūra ǀ kārūn ǀ
   uta ǀ tvacam ǀ dadataḥ ǀ vāja-sātau ǀ piprīhi ǀ madhvaḥ ǀ su-sutasya ǀ cāroḥ ǁ

   5.33.7 Aṣṭaka 4.2.2.2Anuvāka 5.3.7Interpretations

8. Ṛk 8

   उ॒त त्ये मा॑ पौरुकु॒त्स्यस्य॑ सू॒रेस्त्र॒सद॑स्योर्हिर॒णिनो॒ ररा॑णाः ।
   वहं॑तु मा॒ दश॒ श्येता॑सो अस्य गैरिक्षि॒तस्य॒ क्रतु॑भि॒र्नु स॑श्चे ॥

   उत त्ये मा पौरुकुत्स्यस्य सूरेस् त्रसदस्योर् हिरणिनो रराणाः |
   वहन्तु मा दश श्येतासो अस्य गैरिक्षितस्य क्रतुभिर् नु सश्चे ||

   utá tyé mā paurukutsyásya sūréstrasádasyorhiraṇíno rárāṇāḥ ǀ
   váhantu mā dáśa śyétāso asya gairikṣitásya krátubhirnú saśce ǁ

   uta tye mā paurukutsyasya sūres trasadasyor hiraṇino rarāṇāḥ |
   vahantu mā daśa śyetāso asya gairikṣitasya kratubhir nu saśce ||

   उ॒त । त्ये । मा॒ । पौ॒रु॒ऽकु॒त्स्यस्य॑ । सू॒रेः । त्र॒सद॑स्योः । हि॒र॒णिनः॑ । ररा॑णाः ।
   वह॑न्तु । मा॒ । दश॑ । श्येता॑सः । अ॒स्य॒ । गै॒रि॒ऽक्षि॒तस्य॑ । क्रतु॑ऽभिः । नु । स॒श्चे॒ ॥

   उत । त्ये । मा । पौरुऽकुत्स्यस्य । सूरेः । त्रसदस्योः । हिरणिनः । रराणाः ।
   वहन्तु । मा । दश । श्येतासः । अस्य । गैरिऽक्षितस्य । क्रतुऽभिः । नु । सश्चे ॥

   utá ǀ tyé ǀ mā ǀ pauru-kutsyásya ǀ sūréḥ ǀ trasádasyoḥ ǀ hiraṇínaḥ ǀ rárāṇāḥ ǀ
   váhantu ǀ mā ǀ dáśa ǀ śyétāsaḥ ǀ asya ǀ gairi-kṣitásya ǀ krátu-bhiḥ ǀ nú ǀ saśce ǁ

   uta ǀ tye ǀ mā ǀ pauru-kutsyasya ǀ sūreḥ ǀ trasadasyoḥ ǀ hiraṇinaḥ ǀ rarāṇāḥ ǀ
   vahantu ǀ mā ǀ daśa ǀ śyetāsaḥ ǀ asya ǀ gairi-kṣitasya ǀ kratu-bhiḥ ǀ nu ǀ saśce ǁ

   5.33.8 Aṣṭaka 4.2.2.3Anuvāka 5.3.8Interpretations

9. Ṛk 9

   उ॒त त्ये मा॑ मारु॒ताश्व॑स्य॒ शोणाः॒ क्रत्वा॑मघासो वि॒दथ॑स्य रा॒तौ ।
   स॒हस्रा॑ मे॒ च्यव॑तानो॒ ददा॑न आनू॒कम॒र्यो वपु॑षे॒ नार्च॑त् ॥

   उत त्ये मा मारुताश्वस्य शोणाः क्रत्वामघासो विदथस्य रातौ |
   सहस्रा मे च्यवतानो ददान आनूकम् अर्यो वपुषे नार्चत् ||

   utá tyé mā mārutā́śvasya śóṇāḥ krátvāmaghāso vidáthasya rātáu ǀ
   sahásrā me cyávatāno dádāna ānūkámaryó vápuṣe nā́rcat ǁ

   uta tye mā mārutāśvasya śoṇāḥ kratvāmaghāso vidathasya rātau |
   sahasrā me cyavatāno dadāna ānūkam aryo vapuṣe nārcat ||

   उ॒त । त्ये । मा॒ । मा॒रु॒तऽअ॑श्वस्य । शोणाः॑ । क्रत्वा॑ऽमघासः । वि॒दथ॑स्य । रा॒तौ ।
   स॒हस्रा॑ । मे॒ । च्यव॑तानः । ददा॑नः । आ॒नू॒कम् । अ॒र्यः । वपु॑षे । न । आ॒र्च॒त् ॥

   उत । त्ये । मा । मारुतऽअश्वस्य । शोणाः । क्रत्वाऽमघासः । विदथस्य । रातौ ।
   सहस्रा । मे । च्यवतानः । ददानः । आनूकम् । अर्यः । वपुषे । न । आर्चत् ॥

   utá ǀ tyé ǀ mā ǀ mārutá-aśvasya ǀ śóṇāḥ ǀ krátvā-maghāsaḥ ǀ vidáthasya ǀ rātáu ǀ
   sahásrā ǀ me ǀ cyávatānaḥ ǀ dádānaḥ ǀ ānūkám ǀ aryáḥ ǀ vápuṣe ǀ ná ǀ ārcat ǁ

   uta ǀ tye ǀ mā ǀ māruta-aśvasya ǀ śoṇāḥ ǀ kratvā-maghāsaḥ ǀ vidathasya ǀ rātau ǀ
   sahasrā ǀ me ǀ cyavatānaḥ ǀ dadānaḥ ǀ ānūkam ǀ aryaḥ ǀ vapuṣe ǀ na ǀ ārcat ǁ

   5.33.9 Aṣṭaka 4.2.2.4Anuvāka 5.3.9Interpretations

10. Ṛk 10

    उ॒त त्ये मा॑ ध्व॒न्य॑स्य॒ जुष्टा॑ लक्ष्म॒ण्य॑स्य सु॒रुचो॒ यता॑नाः ।
    म॒ह्ना रा॒यः सं॒वर॑णस्य॒ ऋषे॑र्व्र॒जं न गावः॒ प्रय॑ता॒ अपि॑ ग्मन् ॥

    उत त्ये मा ध्वन्यस्य जुष्टा लक्ष्मण्यस्य सुरुचो यतानाः |
    मह्ना रायः संवरणस्य ऋषेर् व्रजं न गावः प्रयता अपि ग्मन् ||

    utá tyé mā dhvanyásya júṣṭā lakṣmaṇyásya surúco yátānāḥ ǀ
    mahnā́ rāyáḥ saṃváraṇasya ṛ́ṣervrajám ná gā́vaḥ práyatā ápi gman ǁ

    uta tye mā dhvanyasya juṣṭā lakṣmaṇyasya suruco yatānāḥ |
    mahnā rāyaḥ saṃvaraṇasya ṛṣer vrajaṃ na gāvaḥ prayatā api gman ||

    उ॒त । त्ये । मा॒ । ध्व॒न्य॑स्य । जुष्टाः॑ । ल॒क्ष्म॒ण्य॑स्य । सु॒ऽरुचः॑ । यता॑नाः ।
    म॒ह्ना । रा॒यः । स॒म्ऽवर॑णस्य । ऋषेः॑ । व्र॒जम् । न । गावः॑ । प्रऽय॑ताः । अपि॑ । ग्म॒न् ॥

    उत । त्ये । मा । ध्वन्यस्य । जुष्टाः । लक्ष्मण्यस्य । सुऽरुचः । यतानाः ।
    मह्ना । रायः । सम्ऽवरणस्य । ऋषेः । व्रजम् । न । गावः । प्रऽयताः । अपि । ग्मन् ॥

    utá ǀ tyé ǀ mā ǀ dhvanyásya ǀ júṣṭāḥ ǀ lakṣmaṇyásya ǀ su-rúcaḥ ǀ yátānāḥ ǀ
    mahnā́ ǀ rāyáḥ ǀ sam-váraṇasya ǀ ṛ́ṣeḥ ǀ vrajám ǀ ná ǀ gā́vaḥ ǀ prá-yatāḥ ǀ ápi ǀ gman ǁ

    uta ǀ tye ǀ mā ǀ dhvanyasya ǀ juṣṭāḥ ǀ lakṣmaṇyasya ǀ su-rucaḥ ǀ yatānāḥ ǀ
    mahnā ǀ rāyaḥ ǀ sam-varaṇasya ǀ ṛṣeḥ ǀ vrajam ǀ na ǀ gāvaḥ ǀ pra-yatāḥ ǀ api ǀ gman ǁ

    5.33.10 Aṣṭaka 4.2.2.5Anuvāka 5.3.10Interpretations

Text, recitation and interpretations from the Ṛgveda database of theveda.org.in.