Devatā देवता

Agni

Ṛṣi ऋषि

Vasuśruta Ātreya

Chandas छन्दस्

Paṅkti

1. Ṛk 1

   अ॒ग्निं तं म॑न्ये॒ यो वसु॒रस्तं॒ यं यंति॑ धे॒नवः॑ ।
   अस्त॒मर्वं॑त आ॒शवोऽस्तं॒ नित्या॑सो वा॒जिन॒ इषं॑ स्तो॒तृभ्य॒ आ भ॑र ॥

   अग्निं तम् मन्ये यो वसुर् अस्तं यं यन्ति धेनवः |
   अस्तम् अर्वन्त आशवो ऽस्तं नित्यासो वाजिन इषं स्तोतृभ्य आ भर ||

   agním tám manye yó vásurástam yám yánti dhenávaḥ ǀ
   ástamárvanta āśávó’stam nítyāso vājína íṣam stotṛ́bhya ā́ bhara ǁ

   agniṃ tam manye yo vasur astaṃ yaṃ yanti dhenavaḥ |
   astam arvanta āśavo 'staṃ nityāso vājina iṣaṃ stotṛbhya ā bhara ||

   अ॒ग्निम् । तम् । म॒न्ये॒ । यः । वसुः॑ । अस्त॑म् । यम् । यन्ति॑ । धे॒नवः॑ ।
   अस्त॑म् । अर्व॑न्तः । आ॒शवः॑ । अस्त॑म् । नित्या॑सः । वा॒जिनः॑ । इष॑म् । स्तो॒तृऽभ्यः॑ । आ । भ॒र॒ ॥

   अग्निम् । तम् । मन्ये । यः । वसुः । अस्तम् । यम् । यन्ति । धेनवः ।
   अस्तम् । अर्वन्तः । आशवः । अस्तम् । नित्यासः । वाजिनः । इषम् । स्तोतृऽभ्यः । आ । भर ॥

   agním ǀ tám ǀ manye ǀ yáḥ ǀ vásuḥ ǀ ástam ǀ yám ǀ yánti ǀ dhenávaḥ ǀ
   ástam ǀ árvantaḥ ǀ āśávaḥ ǀ ástam ǀ nítyāsaḥ ǀ vājínaḥ ǀ íṣam ǀ stotṛ́-bhyaḥ ǀ ā́ ǀ bhara ǁ

   agnim ǀ tam ǀ manye ǀ yaḥ ǀ vasuḥ ǀ astam ǀ yam ǀ yanti ǀ dhenavaḥ ǀ
   astam ǀ arvantaḥ ǀ āśavaḥ ǀ astam ǀ nityāsaḥ ǀ vājinaḥ ǀ iṣam ǀ stotṛ-bhyaḥ ǀ ā ǀ bhara ǁ

   5.6.1 Aṣṭaka 3.8.22.1Anuvāka 5.1.59Interpretations

2. Ṛk 2

   सो अ॒ग्निर्यो वसु॑र्गृ॒णे सं यमा॒यंति॑ धे॒नवः॑ ।
   समर्वं॑तो रघु॒द्रुवः॒ सं सु॑जा॒तासः॑ सू॒रय॒ इषं॑ स्तो॒तृभ्य॒ आ भ॑र ॥

   सो अग्निर् यो वसुर् गृणे सं यम् आयन्ति धेनवः |
   सम् अर्वन्तो रघुद्रुवः सं सुजातासः सूरय इषं स्तोतृभ्य आ भर ||

   só agníryó vásurgṛṇé sám yámāyánti dhenávaḥ ǀ
   sámárvanto raghudrúvaḥ sám sujātā́saḥ sūráya íṣam stotṛ́bhya ā́ bhara ǁ

   so agnir yo vasur gṛṇe saṃ yam āyanti dhenavaḥ |
   sam arvanto raghudruvaḥ saṃ sujātāsaḥ sūraya iṣaṃ stotṛbhya ā bhara ||

   सः । अ॒ग्निः । यः । वसुः॑ । गृ॒णे । सम् । यम् । आ॒ऽयन्ति॑ । धे॒नवः॑ ।
   सम् । अर्व॑न्तः । र॒घु॒ऽद्रुवः॑ । सम् । सु॒ऽजा॒तासः॑ । सू॒रयः॑ । इष॑म् । स्तो॒तृऽभ्यः॑ । आ । भ॒र॒ ॥

   सः । अग्निः । यः । वसुः । गृणे । सम् । यम् । आऽयन्ति । धेनवः ।
   सम् । अर्वन्तः । रघुऽद्रुवः । सम् । सुऽजातासः । सूरयः । इषम् । स्तोतृऽभ्यः । आ । भर ॥

   sáḥ ǀ agníḥ ǀ yáḥ ǀ vásuḥ ǀ gṛṇé ǀ sám ǀ yám ǀ ā-yánti ǀ dhenávaḥ ǀ
   sám ǀ árvantaḥ ǀ raghu-drúvaḥ ǀ sám ǀ su-jātā́saḥ ǀ sūráyaḥ ǀ íṣam ǀ stotṛ́-bhyaḥ ǀ ā́ ǀ bhara ǁ

   saḥ ǀ agniḥ ǀ yaḥ ǀ vasuḥ ǀ gṛṇe ǀ sam ǀ yam ǀ ā-yanti ǀ dhenavaḥ ǀ
   sam ǀ arvantaḥ ǀ raghu-druvaḥ ǀ sam ǀ su-jātāsaḥ ǀ sūrayaḥ ǀ iṣam ǀ stotṛ-bhyaḥ ǀ ā ǀ bhara ǁ

   5.6.2 Aṣṭaka 3.8.22.2Anuvāka 5.1.60Interpretations

3. Ṛk 3

   अ॒ग्निर्हि वा॒जिनं॑ वि॒शे ददा॑ति वि॒श्वच॑र्षणिः ।
   अ॒ग्नी रा॒ये स्वा॒भुवं॒ स प्री॒तो या॑ति॒ वार्य॒मिषं॑ स्तो॒तृभ्य॒ आ भ॑र ॥

   अग्निर् हि वाजिनं विशे ददाति विश्वचर्षणिः |
   अग्नी राये स्वाभुवं स प्रीतो याति वार्यम् इषं स्तोतृभ्य आ भर ||

   agnírhí vājínam viśé dádāti viśvácarṣaṇiḥ ǀ
   agnī́ rāyé svābhúvam sá prītó yāti vā́ryamíṣam stotṛ́bhya ā́ bhara ǁ

   agnir hi vājinaṃ viśe dadāti viśvacarṣaṇiḥ |
   agnī rāye svābhuvaṃ sa prīto yāti vāryam iṣaṃ stotṛbhya ā bhara ||

   अ॒ग्निः । हि । वा॒जिन॑म् । वि॒शे । ददा॑ति । वि॒श्वऽच॑र्षणिः ।
   अ॒ग्निः । रा॒ये । सु॒ऽआ॒भुव॑म् । सः । प्री॒तः । या॒ति॒ । वार्य॑म् । इष॑म् । स्तो॒तृऽभ्यः॑ । आ । भ॒र॒ ॥

   अग्निः । हि । वाजिनम् । विशे । ददाति । विश्वऽचर्षणिः ।
   अग्निः । राये । सुऽआभुवम् । सः । प्रीतः । याति । वार्यम् । इषम् । स्तोतृऽभ्यः । आ । भर ॥

   agníḥ ǀ hí ǀ vājínam ǀ viśé ǀ dádāti ǀ viśvá-carṣaṇiḥ ǀ
   agníḥ ǀ rāyé ǀ su-ābhúvam ǀ sáḥ ǀ prītáḥ ǀ yāti ǀ vā́ryam ǀ íṣam ǀ stotṛ́-bhyaḥ ǀ ā́ ǀ bhara ǁ

   agniḥ ǀ hi ǀ vājinam ǀ viśe ǀ dadāti ǀ viśva-carṣaṇiḥ ǀ
   agniḥ ǀ rāye ǀ su-ābhuvam ǀ saḥ ǀ prītaḥ ǀ yāti ǀ vāryam ǀ iṣam ǀ stotṛ-bhyaḥ ǀ ā ǀ bhara ǁ

   5.6.3 Aṣṭaka 3.8.22.3Anuvāka 5.1.61Interpretations

4. Ṛk 4

   आ ते॑ अग्न इधीमहि द्यु॒मंतं॑ देवा॒जरं॑ ।
   यद्ध॒ स्या ते॒ पनी॑यसी स॒मिद्दी॒दय॑ति॒ द्यवीषं॑ स्तो॒तृभ्य॒ आ भ॑र ॥

   आ ते अग्न इधीमहि द्युमन्तं देवाजरम् |
   यद् ध स्या ते पनीयसी समिद् दीदयति द्यवीषं स्तोतृभ्य आ भर ||

   ā́ te agna idhīmahi dyumántam devājáram ǀ
   yáddha syā́ te pánīyasī samíddīdáyati dyávī́ṣam stotṛ́bhya ā́ bhara ǁ

   ā te agna idhīmahi dyumantaṃ devājaram |
   yad dha syā te panīyasī samid dīdayati dyavīṣaṃ stotṛbhya ā bhara ||

   आ । ते॒ । अ॒ग्ने॒ । इ॒धी॒म॒हि॒ । द्यु॒ऽमन्त॑म् । दे॒व॒ । अ॒जर॑म् ।
   यत् । ह॒ । स्या । ते॒ । पनी॑यसी । स॒म्ऽइत् । दी॒दय॑ति । द्यवि॑ । इष॑म् । स्तो॒तृऽभ्यः॑ । आ । भ॒र॒ ॥

   आ । ते । अग्ने । इधीमहि । द्युऽमन्तम् । देव । अजरम् ।
   यत् । ह । स्या । ते । पनीयसी । सम्ऽइत् । दीदयति । द्यवि । इषम् । स्तोतृऽभ्यः । आ । भर ॥

   ā́ ǀ te ǀ agne ǀ idhīmahi ǀ dyu-mántam ǀ deva ǀ ajáram ǀ
   yát ǀ ha ǀ syā́ ǀ te ǀ pánīyasī ǀ sam-ít ǀ dīdáyati ǀ dyávi ǀ íṣam ǀ stotṛ́-bhyaḥ ǀ ā́ ǀ bhara ǁ

   ā ǀ te ǀ agne ǀ idhīmahi ǀ dyu-mantam ǀ deva ǀ ajaram ǀ
   yat ǀ ha ǀ syā ǀ te ǀ panīyasī ǀ sam-it ǀ dīdayati ǀ dyavi ǀ iṣam ǀ stotṛ-bhyaḥ ǀ ā ǀ bhara ǁ

   5.6.4 Aṣṭaka 3.8.22.4Anuvāka 5.1.62Interpretations

5. Ṛk 5

   आ ते॑ अग्न ऋ॒चा ह॒विः शुक्र॑स्य शोचिषस्पते ।
   सुश्चं॑द्र॒ दस्म॒ विश्प॑ते॒ हव्य॑वा॒ट् तुभ्यं॑ हूयत॒ इषं॑ स्तो॒तृभ्य॒ आ भ॑र ॥

   आ ते अग्न ऋचा हविः शुक्रस्य शोचिषस् पते |
   सुश्चन्द्र दस्म विश्पते हव्यवाट् तुभ्यं हूयत इषं स्तोतृभ्य आ भर ||

   ā́ te agna ṛcā́ havíḥ śúkrasya śociṣaspate ǀ
   súścandra dásma víśpate hávyavāṭ túbhyam hūyata íṣam stotṛ́bhya ā́ bhara ǁ

   ā te agna ṛcā haviḥ śukrasya śociṣas pate |
   suścandra dasma viśpate havyavāṭ tubhyaṃ hūyata iṣaṃ stotṛbhya ā bhara ||

   आ । ते॒ । अ॒ग्ने॒ । ऋ॒चा । ह॒विः । शुक्र॑स्य । शो॒चि॒षः॒ । प॒ते॒ ।
   सुऽच॑न्द्र । दस्म॑ । विश्प॑ते । हव्य॑ऽवाट् । तुभ्य॑म् । हू॒य॒ते॒ । इष॑म् । स्तो॒तृऽभ्यः॑ । आ । भ॒र॒ ॥

   आ । ते । अग्ने । ऋचा । हविः । शुक्रस्य । शोचिषः । पते ।
   सुऽचन्द्र । दस्म । विश्पते । हव्यऽवाट् । तुभ्यम् । हूयते । इषम् । स्तोतृऽभ्यः । आ । भर ॥

   ā́ ǀ te ǀ agne ǀ ṛcā́ ǀ havíḥ ǀ śúkrasya ǀ śociṣaḥ ǀ pate ǀ
   sú-candra ǀ dásma ǀ víśpate ǀ hávya-vāṭ ǀ túbhyam ǀ hūyate ǀ íṣam ǀ stotṛ́-bhyaḥ ǀ ā́ ǀ bhara ǁ

   ā ǀ te ǀ agne ǀ ṛcā ǀ haviḥ ǀ śukrasya ǀ śociṣaḥ ǀ pate ǀ
   su-candra ǀ dasma ǀ viśpate ǀ havya-vāṭ ǀ tubhyam ǀ hūyate ǀ iṣam ǀ stotṛ-bhyaḥ ǀ ā ǀ bhara ǁ

   5.6.5 Aṣṭaka 3.8.22.5Anuvāka 5.1.63Interpretations

6. Ṛk 6

   प्रो त्ये अ॒ग्नयो॒ऽग्निषु॒ विश्वं॑ पुष्यंति॒ वार्यं॑ ।
   ते हि॑न्विरे॒ त इ॑न्विरे॒ त इ॑षण्यंत्यानु॒षगिषं॑ स्तो॒तृभ्य॒ आ भ॑र ॥

   प्रो त्ये अग्नयो ऽग्निषु विश्वम् पुष्यन्ति वार्यम् |
   ते हिन्विरे त इन्विरे त इषण्यन्त्य् आनुषग् इषं स्तोतृभ्य आ भर ||

   pró tyé agnáyo’gníṣu víśvam puṣyanti vā́ryam ǀ
   té hinvire tá invire tá iṣaṇyantyānuṣágíṣam stotṛ́bhya ā́ bhara ǁ

   pro tye agnayo 'gniṣu viśvam puṣyanti vāryam |
   te hinvire ta invire ta iṣaṇyanty ānuṣag iṣaṃ stotṛbhya ā bhara ||

   प्रो इति॑ । त्ये । अ॒ग्नयः॑ । अ॒ग्निषु॑ । विश्व॑म् । पु॒ष्य॒न्ति॒ । वार्य॑म् ।
   ते । हि॒न्वि॒रे॒ । ते । इ॒न्वि॒रे॒ । ते । इ॒ष॒ण्य॒न्ति॒ । आ॒नु॒षक् । इष॑म् । स्तो॒तृऽभ्यः॑ । आ । भ॒र॒ ॥

   प्रो इति । त्ये । अग्नयः । अग्निषु । विश्वम् । पुष्यन्ति । वार्यम् ।
   ते । हिन्विरे । ते । इन्विरे । ते । इषण्यन्ति । आनुषक् । इषम् । स्तोतृऽभ्यः । आ । भर ॥

   pró íti ǀ tyé ǀ agnáyaḥ ǀ agníṣu ǀ víśvam ǀ puṣyanti ǀ vā́ryam ǀ
   té ǀ hinvire ǀ té ǀ invire ǀ té ǀ iṣaṇyanti ǀ ānuṣák ǀ íṣam ǀ stotṛ́-bhyaḥ ǀ ā́ ǀ bhara ǁ

   pro iti ǀ tye ǀ agnayaḥ ǀ agniṣu ǀ viśvam ǀ puṣyanti ǀ vāryam ǀ
   te ǀ hinvire ǀ te ǀ invire ǀ te ǀ iṣaṇyanti ǀ ānuṣak ǀ iṣam ǀ stotṛ-bhyaḥ ǀ ā ǀ bhara ǁ

   5.6.6 Aṣṭaka 3.8.23.1Anuvāka 5.1.64Interpretations

7. Ṛk 7

   तव॒ त्ये अ॑ग्ने अ॒र्चयो॒ महि॑ व्राधंत वा॒जिनः॑ ।
   ये पत्व॑भिः श॒फानां॑ व्र॒जा भु॒रंत॒ गोना॒मिषं॑ स्तो॒तृभ्य॒ आ भ॑र ॥

   तव त्ये अग्ने अर्चयो महि व्राधन्त वाजिनः |
   ये पत्वभिः शफानां व्रजा भुरन्त गोनाम् इषं स्तोतृभ्य आ भर ||

   táva tyé agne arcáyo máhi vrādhanta vājínaḥ ǀ
   yé pátvabhiḥ śaphā́nām vrajā́ bhuránta gónāmíṣam stotṛ́bhya ā́ bhara ǁ

   tava tye agne arcayo mahi vrādhanta vājinaḥ |
   ye patvabhiḥ śaphānāṃ vrajā bhuranta gonām iṣaṃ stotṛbhya ā bhara ||

   तव॑ । त्ये । अ॒ग्ने॒ । अ॒र्चयः॑ । महि॑ । व्रा॒ध॒न्त॒ । वा॒जिनः॑ ।
   ये । पत्व॑ऽभिः । श॒फाना॑म् । व्र॒जा । भु॒रन्त॑ । गोना॑म् । इष॑म् । स्तो॒तृऽभ्यः॑ । आ । भ॒र॒ ॥

   तव । त्ये । अग्ने । अर्चयः । महि । व्राधन्त । वाजिनः ।
   ये । पत्वऽभिः । शफानाम् । व्रजा । भुरन्त । गोनाम् । इषम् । स्तोतृऽभ्यः । आ । भर ॥

   táva ǀ tyé ǀ agne ǀ arcáyaḥ ǀ máhi ǀ vrādhanta ǀ vājínaḥ ǀ
   yé ǀ pátva-bhiḥ ǀ śaphā́nām ǀ vrajā́ ǀ bhuránta ǀ gónām ǀ íṣam ǀ stotṛ́-bhyaḥ ǀ ā́ ǀ bhara ǁ

   tava ǀ tye ǀ agne ǀ arcayaḥ ǀ mahi ǀ vrādhanta ǀ vājinaḥ ǀ
   ye ǀ patva-bhiḥ ǀ śaphānām ǀ vrajā ǀ bhuranta ǀ gonām ǀ iṣam ǀ stotṛ-bhyaḥ ǀ ā ǀ bhara ǁ

   5.6.7 Aṣṭaka 3.8.23.2Anuvāka 5.1.65Interpretations

8. Ṛk 8

   नवा॑ नो अग्न॒ आ भ॑र स्तो॒तृभ्यः॑ सुक्षि॒तीरिषः॑ ।
   ते स्या॑म॒ य आ॑नृ॒चुस्त्वादू॑तासो॒ दमे॑दम॒ इषं॑ स्तो॒तृभ्य॒ आ भ॑र ॥

   नवा नो अग्न आ भर स्तोतृभ्यः सुक्षितीर् इषः |
   ते स्याम य आनृचुस् त्वादूतासो दमे-दम इषं स्तोतृभ्य आ भर ||

   návā no agna ā́ bhara stotṛ́bhyaḥ sukṣitī́ríṣaḥ ǀ
   té syāma yá ānṛcústvā́dūtāso dámedama íṣam stotṛ́bhya ā́ bhara ǁ

   navā no agna ā bhara stotṛbhyaḥ sukṣitīr iṣaḥ |
   te syāma ya ānṛcus tvādūtāso dame-dama iṣaṃ stotṛbhya ā bhara ||

   नवाः॑ । नः॒ । अ॒ग्ने॒ । आ । भ॒र॒ । स्तो॒तृऽभ्यः॑ । सु॒ऽक्षि॒तीः । इषः॑ ।
   ते । स्या॒म॒ । ये । आ॒नृ॒चुः । त्वाऽदू॑तासः । दमे॑ऽदमे । इष॑म् । स्तो॒तृऽभ्यः॑ । आ । भ॒र॒ ॥

   नवाः । नः । अग्ने । आ । भर । स्तोतृऽभ्यः । सुऽक्षितीः । इषः ।
   ते । स्याम । ये । आनृचुः । त्वाऽदूतासः । दमेऽदमे । इषम् । स्तोतृऽभ्यः । आ । भर ॥

   návāḥ ǀ naḥ ǀ agne ǀ ā́ ǀ bhara ǀ stotṛ́-bhyaḥ ǀ su-kṣitī́ḥ ǀ íṣaḥ ǀ
   té ǀ syāma ǀ yé ǀ ānṛcúḥ ǀ tvā́-dūtāsaḥ ǀ dáme-dame ǀ íṣam ǀ stotṛ́-bhyaḥ ǀ ā́ ǀ bhara ǁ

   navāḥ ǀ naḥ ǀ agne ǀ ā ǀ bhara ǀ stotṛ-bhyaḥ ǀ su-kṣitīḥ ǀ iṣaḥ ǀ
   te ǀ syāma ǀ ye ǀ ānṛcuḥ ǀ tvā-dūtāsaḥ ǀ dame-dame ǀ iṣam ǀ stotṛ-bhyaḥ ǀ ā ǀ bhara ǁ

   5.6.8 Aṣṭaka 3.8.23.3Anuvāka 5.1.66Interpretations

9. Ṛk 9

   उ॒भे सु॑श्चंद्र स॒र्पिषो॒ दर्वी॑ श्रीणीष आ॒सनि॑ ।
   उ॒तो न॒ उत्पु॑पूर्या उ॒क्थेषु॑ शवसस्पत॒ इषं॑ स्तो॒तृभ्य॒ आ भ॑र ॥

   उभे सुश्चन्द्र सर्पिषो दर्वी श्रीणीष आसनि |
   उतो न उत् पुपूर्या उक्थेषु शवसस् पत इषं स्तोतृभ्य आ भर ||

   ubhé suścandra sarpíṣo dárvī śrīṇīṣa āsáni ǀ
   utó na útpupūryā ukthéṣu śavasaspata íṣam stotṛ́bhya ā́ bhara ǁ

   ubhe suścandra sarpiṣo darvī śrīṇīṣa āsani |
   uto na ut pupūryā uktheṣu śavasas pata iṣaṃ stotṛbhya ā bhara ||

   उ॒भे इति॑ । सु॒ऽच॒न्द्र॒ । स॒र्पिषः॑ । दर्वी॒ इति॑ । श्री॒णी॒षे॒ । आ॒सनि॑ ।
   उ॒तो इति॑ । नः॒ । उत् । पु॒पू॒र्याः॒ । उ॒क्थेषु॑ । श॒व॒सः॒ । प॒ते॒ । इष॑म् । स्तो॒तृऽभ्यः॑ । आ । भ॒र॒ ॥

   उभे इति । सुऽचन्द्र । सर्पिषः । दर्वी इति । श्रीणीषे । आसनि ।
   उतो इति । नः । उत् । पुपूर्याः । उक्थेषु । शवसः । पते । इषम् । स्तोतृऽभ्यः । आ । भर ॥

   ubhé íti ǀ su-candra ǀ sarpíṣaḥ ǀ dárvī íti ǀ śrīṇīṣe ǀ āsáni ǀ
   utó íti ǀ naḥ ǀ út ǀ pupūryāḥ ǀ ukthéṣu ǀ śavasaḥ ǀ pate ǀ íṣam ǀ stotṛ́-bhyaḥ ǀ ā́ ǀ bhara ǁ

   ubhe iti ǀ su-candra ǀ sarpiṣaḥ ǀ darvī iti ǀ śrīṇīṣe ǀ āsani ǀ
   uto iti ǀ naḥ ǀ ut ǀ pupūryāḥ ǀ uktheṣu ǀ śavasaḥ ǀ pate ǀ iṣam ǀ stotṛ-bhyaḥ ǀ ā ǀ bhara ǁ

   5.6.9 Aṣṭaka 3.8.23.4Anuvāka 5.1.67Interpretations

10. Ṛk 10

    ए॒वाँ अ॒ग्निम॑जुर्यमुर्गी॒र्भिर्य॒ज्ञेभि॑रानु॒षक् ।
    दध॑द॒स्मे सु॒वीर्य॑मु॒त त्यदा॒श्वश्व्य॒मिषं॑ स्तो॒तृभ्य॒ आ भ॑र ॥

    एवां अग्निम् अजुर्यमुर् गीर्भिर् यज्ञेभिर् आनुषक् |
    दधद् अस्मे सुवीर्यम् उत त्यद् आश्वश्व्यम् इषं स्तोतृभ्य आ भर ||

    evā́m̐ agnímajuryamurgīrbhíryajñébhirānuṣák ǀ
    dádhadasmé suvī́ryamutá tyádāśváśvyamíṣam stotṛ́bhya ā́ bhara ǁ

    evāṃ agnim ajuryamur gīrbhir yajñebhir ānuṣak |
    dadhad asme suvīryam uta tyad āśvaśvyam iṣaṃ stotṛbhya ā bhara ||

    ए॒व । अ॒ग्निम् । अ॒जु॒र्य॒मुः॒ । गीः॒ऽभिः । य॒ज्ञेभिः॑ । आ॒नु॒षक् ।
    दध॑त् । अ॒स्मे इति॑ । सु॒ऽवीर्य॑म् । उ॒त । त्यत् । आ॒शु॒ऽअश्व्य॑म् । इष॑म् । स्तो॒तृऽभ्यः॑ । आ । भ॒र॒ ॥

    एव । अग्निम् । अजुर्यमुः । गीःऽभिः । यज्ञेभिः । आनुषक् ।
    दधत् । अस्मे इति । सुऽवीर्यम् । उत । त्यत् । आशुऽअश्व्यम् । इषम् । स्तोतृऽभ्यः । आ । भर ॥

    evá ǀ agním ǀ ajuryamuḥ ǀ gīḥ-bhíḥ ǀ yajñébhiḥ ǀ ānuṣák ǀ
    dádhat ǀ asmé íti ǀ su-vī́ryam ǀ utá ǀ tyát ǀ āśu-áśvyam ǀ íṣam ǀ stotṛ́-bhyaḥ ǀ ā́ ǀ bhara ǁ

    eva ǀ agnim ǀ ajuryamuḥ ǀ gīḥ-bhiḥ ǀ yajñebhiḥ ǀ ānuṣak ǀ
    dadhat ǀ asme iti ǀ su-vīryam ǀ uta ǀ tyat ǀ āśu-aśvyam ǀ iṣam ǀ stotṛ-bhyaḥ ǀ ā ǀ bhara ǁ

    5.6.10 Aṣṭaka 3.8.23.5Anuvāka 5.1.68Interpretations

Text, recitation and interpretations from the Ṛgveda database of theveda.org.in.