Devatā देवता

Agni

Ṛṣi ऋषि

Vasuśruta Ātreya

Chandas छन्दस्

Triṣṭubh

1. Ṛk 1

   त्वम॑ग्ने॒ वरु॑णो॒ जाय॑से॒ यत्त्वं मि॒त्रो भ॑वसि॒ यत्समि॑द्धः ।
   त्वे विश्वे॑ सहसस्पुत्र दे॒वास्त्वमिंद्रो॑ दा॒शुषे॒ मर्त्या॑य ॥

   त्वम् अग्ने वरुणो जायसे यत् त्वम् मित्रो भवसि यत् समिद्धः |
   त्वे विश्वे सहसस् पुत्र देवास् त्वम् इन्द्रो दाशुषे मर्त्याय ||

   tvámagne váruṇo jā́yase yáttvám mitró bhavasi yátsámiddhaḥ ǀ
   tvé víśve sahasasputra devā́stvámíndro dāśúṣe mártyāya ǁ

   tvam agne varuṇo jāyase yat tvam mitro bhavasi yat samiddhaḥ |
   tve viśve sahasas putra devās tvam indro dāśuṣe martyāya ||

   त्वम् । अ॒ग्ने॒ । वरु॑णः । जाय॑से । यत् । त्वम् । मि॒त्रः । भ॒व॒सि॒ । यत् । सम्ऽइ॑द्धः ।
   त्वे इति॑ । विश्वे॑ । स॒ह॒सः॒ । पु॒त्र॒ । दे॒वाः । त्वम् । इन्द्रः॑ । दा॒शुषे॑ । मर्त्या॑य ॥

   त्वम् । अग्ने । वरुणः । जायसे । यत् । त्वम् । मित्रः । भवसि । यत् । सम्ऽइद्धः ।
   त्वे इति । विश्वे । सहसः । पुत्र । देवाः । त्वम् । इन्द्रः । दाशुषे । मर्त्याय ॥

   tvám ǀ agne ǀ váruṇaḥ ǀ jā́yase ǀ yát ǀ tvám ǀ mitráḥ ǀ bhavasi ǀ yát ǀ sám-iddhaḥ ǀ
   tvé íti ǀ víśve ǀ sahasaḥ ǀ putra ǀ devā́ḥ ǀ tvám ǀ índraḥ ǀ dāśúṣe ǀ mártyāya ǁ

   tvam ǀ agne ǀ varuṇaḥ ǀ jāyase ǀ yat ǀ tvam ǀ mitraḥ ǀ bhavasi ǀ yat ǀ sam-iddhaḥ ǀ
   tve iti ǀ viśve ǀ sahasaḥ ǀ putra ǀ devāḥ ǀ tvam ǀ indraḥ ǀ dāśuṣe ǀ martyāya ǁ

   5.3.1 Aṣṭaka 3.8.16.1Anuvāka 5.1.25Interpretations

2. Ṛk 2

   त्वम॑र्य॒मा भ॑वसि॒ यत्क॒नीनां॒ नाम॑ स्वधाव॒न्गुह्यं॑ बिभर्षि ।
   अं॒जंति॑ मि॒त्रं सुधि॑तं॒ न गोभि॒र्यद्दंप॑ती॒ सम॑नसा कृ॒णोषि॑ ॥

   त्वम् अर्यमा भवसि यत् कनीनां नाम स्वधावन् गुह्यम् बिभर्षि |
   अञ्जन्ति मित्रं सुधितं न गोभिर् यद् दम्पती समनसा कृणोषि ||

   tvámaryamā́ bhavasi yátkanī́nām nā́ma svadhāvangúhyam bibharṣi ǀ
   añjánti mitrám súdhitam ná góbhiryáddámpatī sámanasā kṛṇóṣi ǁ

   tvam aryamā bhavasi yat kanīnāṃ nāma svadhāvan guhyam bibharṣi |
   añjanti mitraṃ sudhitaṃ na gobhir yad dampatī samanasā kṛṇoṣi ||

   त्वम् । अ॒र्य॒मा । भ॒व॒सि॒ । यत् । क॒नीना॑म् । नाम॑ । स्व॒धा॒ऽव॒न् । गुह्य॑म् । बि॒भ॒र्षि॒ ।
   अ॒ञ्जन्ति॑ । मि॒त्रम् । सुऽधि॑तम् । न । गोभिः॑ । यत् । दम्प॑ती॒ इति॒ दम्ऽप॑ती । सऽम॑नसा । कृ॒णोषि॑ ॥

   त्वम् । अर्यमा । भवसि । यत् । कनीनाम् । नाम । स्वधाऽवन् । गुह्यम् । बिभर्षि ।
   अञ्जन्ति । मित्रम् । सुऽधितम् । न । गोभिः । यत् । दम्पती इति दम्ऽपती । सऽमनसा । कृणोषि ॥

   tvám ǀ aryamā́ ǀ bhavasi ǀ yát ǀ kanī́nām ǀ nā́ma ǀ svadhā-van ǀ gúhyam ǀ bibharṣi ǀ
   añjánti ǀ mitrám ǀ sú-dhitam ǀ ná ǀ góbhiḥ ǀ yát ǀ dámpatī íti dám-patī ǀ sá-manasā ǀ kṛṇóṣi ǁ

   tvam ǀ aryamā ǀ bhavasi ǀ yat ǀ kanīnām ǀ nāma ǀ svadhā-van ǀ guhyam ǀ bibharṣi ǀ
   añjanti ǀ mitram ǀ su-dhitam ǀ na ǀ gobhiḥ ǀ yat ǀ dampatī iti dam-patī ǀ sa-manasā ǀ kṛṇoṣi ǁ

   5.3.2 Aṣṭaka 3.8.16.2Anuvāka 5.1.26Interpretations

3. Ṛk 3

   तव॑ श्रि॒ये म॒रुतो॑ मर्जयंत॒ रुद्र॒ यत्ते॒ जनि॑म॒ चारु॑ चि॒त्रं ।
   प॒दं यद्विष्णो॑रुप॒मं नि॒धायि॒ तेन॑ पासि॒ गुह्यं॒ नाम॒ गोनां॑ ॥

   तव श्रिये मरुतो मर्जयन्त रुद्र यत् ते जनिम चारु चित्रम् |
   पदं यद् विष्णोर् उपमं निधायि तेन पासि गुह्यं नाम गोनाम् ||

   táva śriyé marúto marjayanta rúdra yátte jánima cā́ru citrám ǀ
   padám yádvíṣṇorupamám nidhā́yi téna pāsi gúhyam nā́ma gónām ǁ

   tava śriye maruto marjayanta rudra yat te janima cāru citram |
   padaṃ yad viṣṇor upamaṃ nidhāyi tena pāsi guhyaṃ nāma gonām ||

   तव॑ । श्रि॒ये । म॒रुतः॑ । म॒र्ज॒य॒न्त॒ । रुद्र॑ । यत् । ते॒ । जनि॑म । चारु॑ । चि॒त्रम् ।
   प॒दम् । यत् । विष्णोः॑ । उ॒प॒ऽमम् । नि॒ऽधायि॑ । तेन॑ । पा॒सि॒ । गुह्य॑म् । नाम॑ । गोना॑म् ॥

   तव । श्रिये । मरुतः । मर्जयन्त । रुद्र । यत् । ते । जनिम । चारु । चित्रम् ।
   पदम् । यत् । विष्णोः । उपऽमम् । निऽधायि । तेन । पासि । गुह्यम् । नाम । गोनाम् ॥

   táva ǀ śriyé ǀ marútaḥ ǀ marjayanta ǀ rúdra ǀ yát ǀ te ǀ jánima ǀ cā́ru ǀ citrám ǀ
   padám ǀ yát ǀ víṣṇoḥ ǀ upa-mám ǀ ni-dhā́yi ǀ téna ǀ pāsi ǀ gúhyam ǀ nā́ma ǀ gónām ǁ

   tava ǀ śriye ǀ marutaḥ ǀ marjayanta ǀ rudra ǀ yat ǀ te ǀ janima ǀ cāru ǀ citram ǀ
   padam ǀ yat ǀ viṣṇoḥ ǀ upa-mam ǀ ni-dhāyi ǀ tena ǀ pāsi ǀ guhyam ǀ nāma ǀ gonām ǁ

   5.3.3 Aṣṭaka 3.8.16.3Anuvāka 5.1.27Interpretations

4. Ṛk 4

   तव॑ श्रि॒या सु॒दृशो॑ देव दे॒वाः पु॒रू दधा॑ना अ॒मृतं॑ सपंत ।
   होता॑रम॒ग्निं मनु॑षो॒ नि षे॑दुर्दश॒स्यंत॑ उ॒शिजः॒ शंस॑मा॒योः ॥

   तव श्रिया सुदृशो देव देवाः पुरू दधाना अमृतं सपन्त |
   होतारम् अग्निम् मनुषो नि षेदुर् दशस्यन्त उशिजः शंसम् आयोः ||

   táva śriyā́ sudṛ́śo deva devā́ḥ purū́ dádhānā amṛ́tam sapanta ǀ
   hótāramagním mánuṣo ní ṣedurdaśasyánta uśíjaḥ śáṃsamāyóḥ ǁ

   tava śriyā sudṛśo deva devāḥ purū dadhānā amṛtaṃ sapanta |
   hotāram agnim manuṣo ni ṣedur daśasyanta uśijaḥ śaṃsam āyoḥ ||

   तव॑ । श्रि॒या । सु॒ऽदृशः॑ । दे॒व॒ । दे॒वाः । पु॒रु । दधा॑नाः । अ॒मृत॑म् । स॒प॒न्त॒ ।
   होता॑रम् । अ॒ग्निम् । मनु॑षः । नि । से॒दुः॒ । द॒श॒स्यन्तः॑ । उ॒शिजः॑ । शंस॑म् । आ॒योः ॥

   तव । श्रिया । सुऽदृशः । देव । देवाः । पुरु । दधानाः । अमृतम् । सपन्त ।
   होतारम् । अग्निम् । मनुषः । नि । सेदुः । दशस्यन्तः । उशिजः । शंसम् । आयोः ॥

   táva ǀ śriyā́ ǀ su-dṛ́śaḥ ǀ deva ǀ devā́ḥ ǀ purú ǀ dádhānāḥ ǀ amṛ́tam ǀ sapanta ǀ
   hótāram ǀ agním ǀ mánuṣaḥ ǀ ní ǀ seduḥ ǀ daśasyántaḥ ǀ uśíjaḥ ǀ śáṃsam ǀ āyóḥ ǁ

   tava ǀ śriyā ǀ su-dṛśaḥ ǀ deva ǀ devāḥ ǀ puru ǀ dadhānāḥ ǀ amṛtam ǀ sapanta ǀ
   hotāram ǀ agnim ǀ manuṣaḥ ǀ ni ǀ seduḥ ǀ daśasyantaḥ ǀ uśijaḥ ǀ śaṃsam ǀ āyoḥ ǁ

   5.3.4 Aṣṭaka 3.8.16.4Anuvāka 5.1.28Interpretations

5. Ṛk 5

   न त्वद्धोता॒ पूर्वो॑ अग्ने॒ यजी॑या॒न्न काव्यैः॑ प॒रो अ॑स्ति स्वधावः ।
   वि॒शश्च॒ यस्या॒ अति॑थि॒र्भवा॑सि॒ स य॒ज्ञेन॑ वनवद्देव॒ मर्ता॑न् ॥

   न त्वद् धोता पूर्वो अग्ने यजीयान् न काव्यैः परो अस्ति स्वधावः |
   विशश् च यस्या अतिथिर् भवासि स यज्ञेन वनवद् देव मर्तान् ||

   ná tváddhótā pū́rvo agne yájīyānná kā́vyaiḥ paró asti svadhāvaḥ ǀ
   viśáśca yásyā átithirbhávāsi sá yajñéna vanavaddeva mártān ǁ

   na tvad dhotā pūrvo agne yajīyān na kāvyaiḥ paro asti svadhāvaḥ |
   viśaś ca yasyā atithir bhavāsi sa yajñena vanavad deva martān ||

   न । त्वत् । होता॑ । पूर्वः॑ । अ॒ग्ने॒ । यजी॑यान् । न । काव्यैः॑ । प॒रः । अ॒स्ति॒ । स्व॒धा॒ऽवः॒ ।
   वि॒शः । च॒ । यस्याः॑ । अति॑थिः । भवा॑सि । सः । य॒ज्ञेन॑ । व॒न॒व॒त् । दे॒व॒ । मर्ता॑न् ॥

   न । त्वत् । होता । पूर्वः । अग्ने । यजीयान् । न । काव्यैः । परः । अस्ति । स्वधाऽवः ।
   विशः । च । यस्याः । अतिथिः । भवासि । सः । यज्ञेन । वनवत् । देव । मर्तान् ॥

   ná ǀ tvát ǀ hótā ǀ pū́rvaḥ ǀ agne ǀ yájīyān ǀ ná ǀ kā́vyaiḥ ǀ paráḥ ǀ asti ǀ svadhā-vaḥ ǀ
   viśáḥ ǀ ca ǀ yásyāḥ ǀ átithiḥ ǀ bhávāsi ǀ sáḥ ǀ yajñéna ǀ vanavat ǀ deva ǀ mártān ǁ

   na ǀ tvat ǀ hotā ǀ pūrvaḥ ǀ agne ǀ yajīyān ǀ na ǀ kāvyaiḥ ǀ paraḥ ǀ asti ǀ svadhā-vaḥ ǀ
   viśaḥ ǀ ca ǀ yasyāḥ ǀ atithiḥ ǀ bhavāsi ǀ saḥ ǀ yajñena ǀ vanavat ǀ deva ǀ martān ǁ

   5.3.5 Aṣṭaka 3.8.16.5Anuvāka 5.1.29Interpretations

6. Ṛk 6

   व॒यम॑ग्ने वनुयाम॒ त्वोता॑ वसू॒यवो॑ ह॒विषा॒ बुध्य॑मानाः ।
   व॒यं स॑म॒र्ये वि॒दथे॒ष्वह्नां॑ व॒यं रा॒या स॑हसस्पुत्र॒ मर्ता॑न् ॥

   वयम् अग्ने वनुयाम त्वोता वसूयवो हविषा बुध्यमानाः |
   वयं समर्ये विदथेष्व् अह्नां वयं राया सहसस् पुत्र मर्तान् ||

   vayámagne vanuyāma tvótā vasūyávo havíṣā búdhyamānāḥ ǀ
   vayám samaryé vidátheṣváhnām vayám rāyā́ sahasasputra mártān ǁ

   vayam agne vanuyāma tvotā vasūyavo haviṣā budhyamānāḥ |
   vayaṃ samarye vidatheṣv ahnāṃ vayaṃ rāyā sahasas putra martān ||

   व॒यम् । अ॒ग्ने॒ । व॒नु॒या॒म॒ । त्वाऽऊ॑ताः । व॒सु॒ऽयवः॑ । ह॒विषा॑ । बुध्य॑मानाः ।
   व॒यम् । स॒ऽम॒र्ये । वि॒दथे॑षु । अह्ना॑म् । व॒यम् । रा॒या । स॒ह॒सः॒ । पु॒त्र॒ । मर्ता॑न् ॥

   वयम् । अग्ने । वनुयाम । त्वाऽऊताः । वसुऽयवः । हविषा । बुध्यमानाः ।
   वयम् । सऽमर्ये । विदथेषु । अह्नाम् । वयम् । राया । सहसः । पुत्र । मर्तान् ॥

   vayám ǀ agne ǀ vanuyāma ǀ tvā́-ūtāḥ ǀ vasu-yávaḥ ǀ havíṣā ǀ búdhyamānāḥ ǀ
   vayám ǀ sa-maryé ǀ vidátheṣu ǀ áhnām ǀ vayám ǀ rāyā́ ǀ sahasaḥ ǀ putra ǀ mártān ǁ

   vayam ǀ agne ǀ vanuyāma ǀ tvā-ūtāḥ ǀ vasu-yavaḥ ǀ haviṣā ǀ budhyamānāḥ ǀ
   vayam ǀ sa-marye ǀ vidatheṣu ǀ ahnām ǀ vayam ǀ rāyā ǀ sahasaḥ ǀ putra ǀ martān ǁ

   5.3.6 Aṣṭaka 3.8.16.6Anuvāka 5.1.30Interpretations

7. Ṛk 7

   यो न॒ आगो॑ अ॒भ्येनो॒ भरा॒त्यधीद॒घम॒घशं॑से दधात ।
   ज॒ही चि॑कित्वो अ॒भिश॑स्तिमे॒तामग्ने॒ यो नो॑ म॒र्चय॑ति द्व॒येन॑ ॥

   यो न आगो अभ्य् एनो भरात्य् अधीद् अघम् अघशंसे दधात |
   जही चिकित्वो अभिशस्तिम् एताम् अग्ने यो नो मर्चयति द्वयेन ||

   yó na ā́go abhyéno bhárātyádhī́daghámagháśaṃse dadhāta ǀ
   jahī́ cikitvo abhíśastimetā́mágne yó no marcáyati dvayéna ǁ

   yo na āgo abhy eno bharāty adhīd agham aghaśaṃse dadhāta |
   jahī cikitvo abhiśastim etām agne yo no marcayati dvayena ||

   यः । नः॒ । आगः॑ । अ॒भि । एनः॑ । भरा॑ति । अधि॑ । इत् । अ॒घम् । अ॒घऽशं॑से । द॒धा॒त॒ ।
   ज॒हि । चि॒कि॒त्वः॒ । अ॒भिऽश॑स्तिम् । ए॒ताम् । अ॒ग्ने॒ । यः । नः॒ । म॒र्चय॑ति । द्व॒येन॑ ॥

   यः । नः । आगः । अभि । एनः । भराति । अधि । इत् । अघम् । अघऽशंसे । दधात ।
   जहि । चिकित्वः । अभिऽशस्तिम् । एताम् । अग्ने । यः । नः । मर्चयति । द्वयेन ॥

   yáḥ ǀ naḥ ǀ ā́gaḥ ǀ abhí ǀ énaḥ ǀ bhárāti ǀ ádhi ǀ ít ǀ aghám ǀ aghá-śaṃse ǀ dadhāta ǀ
   jahí ǀ cikitvaḥ ǀ abhí-śastim ǀ etā́m ǀ agne ǀ yáḥ ǀ naḥ ǀ marcáyati ǀ dvayéna ǁ

   yaḥ ǀ naḥ ǀ āgaḥ ǀ abhi ǀ enaḥ ǀ bharāti ǀ adhi ǀ it ǀ agham ǀ agha-śaṃse ǀ dadhāta ǀ
   jahi ǀ cikitvaḥ ǀ abhi-śastim ǀ etām ǀ agne ǀ yaḥ ǀ naḥ ǀ marcayati ǀ dvayena ǁ

   5.3.7 Aṣṭaka 3.8.17.1Anuvāka 5.1.31Interpretations

8. Ṛk 8

   त्वाम॒स्या व्युषि॑ देव॒ पूर्वे॑ दू॒तं कृ॑ण्वा॒ना अ॑यजंत ह॒व्यैः ।
   सं॒स्थे यद॑ग्न॒ ईय॑से रयी॒णां दे॒वो मर्तै॒र्वसु॑भिरि॒ध्यमा॑नः ॥

   त्वाम् अस्या व्युषि देव पूर्वे दूतं कृण्वाना अयजन्त हव्यैः |
   संस्थे यद् अग्न ईयसे रयीणां देवो मर्तैर् वसुभिर् इध्यमानः ||

   tvā́masyā́ vyúṣi deva pū́rve dūtám kṛṇvānā́ ayajanta havyáiḥ ǀ
   saṃsthé yádagna ī́yase rayīṇā́m devó mártairvásubhiridhyámānaḥ ǁ

   tvām asyā vyuṣi deva pūrve dūtaṃ kṛṇvānā ayajanta havyaiḥ |
   saṃsthe yad agna īyase rayīṇāṃ devo martair vasubhir idhyamānaḥ ||

   त्वाम् । अ॒स्याः । वि॒ऽउषि॑ । दे॒व॒ । पूर्वे॑ । दू॒तम् । कृ॒ण्वा॒नाः । अ॒य॒ज॒न्त॒ । ह॒व्यैः ।
   स॒म्ऽस्थे । यत् । अ॒ग्ने॒ । ईय॑से । र॒यी॒णाम् । दे॒वः । मर्तैः॑ । वसु॑ऽभिः । इ॒ध्यमा॑नः ॥

   त्वाम् । अस्याः । विऽउषि । देव । पूर्वे । दूतम् । कृण्वानाः । अयजन्त । हव्यैः ।
   सम्ऽस्थे । यत् । अग्ने । ईयसे । रयीणाम् । देवः । मर्तैः । वसुऽभिः । इध्यमानः ॥

   tvā́m ǀ asyā́ḥ ǀ vi-úṣi ǀ deva ǀ pū́rve ǀ dūtám ǀ kṛṇvānā́ḥ ǀ ayajanta ǀ havyáiḥ ǀ
   sam-sthé ǀ yát ǀ agne ǀ ī́yase ǀ rayīṇā́m ǀ deváḥ ǀ mártaiḥ ǀ vásu-bhiḥ ǀ idhyámānaḥ ǁ

   tvām ǀ asyāḥ ǀ vi-uṣi ǀ deva ǀ pūrve ǀ dūtam ǀ kṛṇvānāḥ ǀ ayajanta ǀ havyaiḥ ǀ
   sam-sthe ǀ yat ǀ agne ǀ īyase ǀ rayīṇām ǀ devaḥ ǀ martaiḥ ǀ vasu-bhiḥ ǀ idhyamānaḥ ǁ

   5.3.8 Aṣṭaka 3.8.17.2Anuvāka 5.1.32Interpretations

9. Ṛk 9

   अव॑ स्पृधि पि॒तरं॒ योधि॑ वि॒द्वान्पु॒त्रो यस्ते॑ सहसः सून ऊ॒हे ।
   क॒दा चि॑कित्वो अ॒भि च॑क्षसे॒ नोऽग्ने॑ क॒दाँ ऋ॑त॒चिद्या॑तयासे ॥

   अव स्पृधि पितरं योधि विद्वान् पुत्रो यस् ते सहसः सून ऊहे |
   कदा चिकित्वो अभि चक्षसे नो ऽग्ने कदां ऋतचिद् यातयासे ||

   áva spṛdhi pitáram yódhi vidvā́nputró yáste sahasaḥ sūna ūhé ǀ
   kadā́ cikitvo abhí cakṣase nó’gne kadā́m̐ ṛtacídyātayāse ǁ

   ava spṛdhi pitaraṃ yodhi vidvān putro yas te sahasaḥ sūna ūhe |
   kadā cikitvo abhi cakṣase no 'gne kadāṃ ṛtacid yātayāse ||

   अव॑ । स्पृ॒धि॒ । पि॒तर॑म् । योधि॑ । वि॒द्वान् । पु॒त्रः । यः । ते॒ । स॒ह॒सः॒ । सू॒नो॒ इति॑ । ऊ॒हे ।
   क॒दा । चि॒कि॒त्वः॒ । अ॒भि । च॒क्ष॒से॒ । नः॒ । अ॒ग्ने॒ । क॒दा । ऋ॒त॒ऽचित् । या॒त॒या॒से॒ ॥

   अव । स्पृधि । पितरम् । योधि । विद्वान् । पुत्रः । यः । ते । सहसः । सूनो इति । ऊहे ।
   कदा । चिकित्वः । अभि । चक्षसे । नः । अग्ने । कदा । ऋतऽचित् । यातयासे ॥

   áva ǀ spṛdhi ǀ pitáram ǀ yódhi ǀ vidvā́n ǀ putráḥ ǀ yáḥ ǀ te ǀ sahasaḥ ǀ sūno íti ǀ ūhé ǀ
   kadā́ ǀ cikitvaḥ ǀ abhí ǀ cakṣase ǀ naḥ ǀ agne ǀ kadā́ ǀ ṛta-cít ǀ yātayāse ǁ

   ava ǀ spṛdhi ǀ pitaram ǀ yodhi ǀ vidvān ǀ putraḥ ǀ yaḥ ǀ te ǀ sahasaḥ ǀ sūno iti ǀ ūhe ǀ
   kadā ǀ cikitvaḥ ǀ abhi ǀ cakṣase ǀ naḥ ǀ agne ǀ kadā ǀ ṛta-cit ǀ yātayāse ǁ

   5.3.9 Aṣṭaka 3.8.17.3Anuvāka 5.1.33Interpretations

10. Ṛk 10

    भूरि॒ नाम॒ वंद॑मानो दधाति पि॒ता व॑सो॒ यदि॒ तज्जो॒षया॑से ।
    कु॒विद्दे॒वस्य॒ सह॑सा चका॒नः सु॒म्नम॒ग्निर्व॑नते वावृधा॒नः ॥

    भूरि नाम वन्दमानो दधाति पिता वसो यदि तज् जोषयासे |
    कुविद् देवस्य सहसा चकानः सुम्नम् अग्निर् वनते वावृधानः ||

    bhū́ri nā́ma vándamāno dadhāti pitā́ vaso yádi tájjoṣáyāse ǀ
    kuvíddevásya sáhasā cakānáḥ sumnámagnírvanate vāvṛdhānáḥ ǁ

    bhūri nāma vandamāno dadhāti pitā vaso yadi taj joṣayāse |
    kuvid devasya sahasā cakānaḥ sumnam agnir vanate vāvṛdhānaḥ ||

    भूरि॑ । नाम॑ । वन्द॑मानः । द॒धा॒ति॒ । पि॒ता । व॒सो॒ इति॑ । यदि॑ । तत् । जो॒षया॑से ।
    कु॒वित् । दे॒वस्य॑ । सह॑सा । च॒का॒नः । सु॒म्नम् । अ॒ग्निः । व॒न॒ते॒ । व॒वृ॒धा॒नः ॥

    भूरि । नाम । वन्दमानः । दधाति । पिता । वसो इति । यदि । तत् । जोषयासे ।
    कुवित् । देवस्य । सहसा । चकानः । सुम्नम् । अग्निः । वनते । ववृधानः ॥

    bhū́ri ǀ nā́ma ǀ vándamānaḥ ǀ dadhāti ǀ pitā́ ǀ vaso íti ǀ yádi ǀ tát ǀ joṣáyāse ǀ
    kuvít ǀ devásya ǀ sáhasā ǀ cakānáḥ ǀ sumnám ǀ agníḥ ǀ vanate ǀ vavṛdhānáḥ ǁ

    bhūri ǀ nāma ǀ vandamānaḥ ǀ dadhāti ǀ pitā ǀ vaso iti ǀ yadi ǀ tat ǀ joṣayāse ǀ
    kuvit ǀ devasya ǀ sahasā ǀ cakānaḥ ǀ sumnam ǀ agniḥ ǀ vanate ǀ vavṛdhānaḥ ǁ

    5.3.10 Aṣṭaka 3.8.17.4Anuvāka 5.1.34Interpretations

11. Ṛk 11

    त्वमं॒ग ज॑रि॒तारं॑ यविष्ठ॒ विश्वा॑न्यग्ने दुरि॒ताति॑ पर्षि ।
    स्ते॒ना अ॑दृश्रन्रि॒पवो॒ जना॒सोऽज्ञा॑तकेता वृजि॒ना अ॑भूवन् ॥

    त्वम् अङ्ग जरितारं यविष्ठ विश्वान्य् अग्ने दुरिताति पर्षि |
    स्तेना अदृश्रन् रिपवो जनासो ऽज्ञातकेता वृजिना अभूवन् ||

    tvámaṅgá jaritā́ram yaviṣṭha víśvānyagne duritā́ti parṣi ǀ
    stenā́ adṛśranripávo jánāsó’jñātaketā vṛjinā́ abhūvan ǁ

    tvam aṅga jaritāraṃ yaviṣṭha viśvāny agne duritāti parṣi |
    stenā adṛśran ripavo janāso 'jñātaketā vṛjinā abhūvan ||

    त्वम् । अ॒ङ्ग । ज॒रि॒तार॑म् । य॒वि॒ष्ठ॒ । विश्वा॑नि । अ॒ग्ने॒ । दुः॒ऽइ॒ता । अति॑ । प॒र्षि॒ ।
    स्ते॒नाः । अ॒दृ॒श्र॒न् । रि॒पवः॑ । जना॑सः । अज्ञा॑तऽकेताः । वृ॒जि॒नाः । अ॒भू॒व॒न् ॥

    त्वम् । अङ्ग । जरितारम् । यविष्ठ । विश्वानि । अग्ने । दुःऽइता । अति । पर्षि ।
    स्तेनाः । अदृश्रन् । रिपवः । जनासः । अज्ञातऽकेताः । वृजिनाः । अभूवन् ॥

    tvám ǀ aṅgá ǀ jaritā́ram ǀ yaviṣṭha ǀ víśvāni ǀ agne ǀ duḥ-itā́ ǀ áti ǀ parṣi ǀ
    stenā́ḥ ǀ adṛśran ǀ ripávaḥ ǀ jánāsaḥ ǀ ájñāta-ketāḥ ǀ vṛjinā́ḥ ǀ abhūvan ǁ

    tvam ǀ aṅga ǀ jaritāram ǀ yaviṣṭha ǀ viśvāni ǀ agne ǀ duḥ-itā ǀ ati ǀ parṣi ǀ
    stenāḥ ǀ adṛśran ǀ ripavaḥ ǀ janāsaḥ ǀ ajñāta-ketāḥ ǀ vṛjināḥ ǀ abhūvan ǁ

    5.3.11 Aṣṭaka 3.8.17.5Anuvāka 5.1.35Interpretations

12. Ṛk 12

    इ॒मे यामा॑सस्त्व॒द्रिग॑भूव॒न्वस॑वे वा॒ तदिदागो॑ अवाचि ।
    नाहा॒यम॒ग्निर॒भिश॑स्तये नो॒ न रीष॑ते वावृधा॒नः परा॑ दात् ॥

    इमे यामासस् त्वद्रिग् अभूवन् वसवे वा तद् इद् आगो अवाचि |
    नाहायम् अग्निर् अभिशस्तये नो न रीषते वावृधानः परा दात् ||

    imé yā́māsastvadrígabhūvanvásave vā tádídā́go avāci ǀ
    nā́hāyámagnírabhíśastaye no ná rī́ṣate vāvṛdhānáḥ párā dāt ǁ

    ime yāmāsas tvadrig abhūvan vasave vā tad id āgo avāci |
    nāhāyam agnir abhiśastaye no na rīṣate vāvṛdhānaḥ parā dāt ||

    इ॒मे । यामा॑सः । त्व॒द्रिक् । अ॒भू॒व॒न् । वस॑वे । वा॒ । तत् । इत् । आगः॑ । अ॒वा॒चि॒ ।
    न । अह॑ । अ॒यम् । अ॒ग्निः । अ॒भिऽश॑स्तये । नः॒ । न । रिष॑ते । व॒वृ॒धा॒नः । परा॑ । दा॒त् ॥

    इमे । यामासः । त्वद्रिक् । अभूवन् । वसवे । वा । तत् । इत् । आगः । अवाचि ।
    न । अह । अयम् । अग्निः । अभिऽशस्तये । नः । न । रिषते । ववृधानः । परा । दात् ॥

    imé ǀ yā́māsaḥ ǀ tvadrík ǀ abhūvan ǀ vásave ǀ vā ǀ tát ǀ ít ǀ ā́gaḥ ǀ avāci ǀ
    ná ǀ áha ǀ ayám ǀ agníḥ ǀ abhí-śastaye ǀ naḥ ǀ ná ǀ ríṣate ǀ vavṛdhānáḥ ǀ párā ǀ dāt ǁ

    ime ǀ yāmāsaḥ ǀ tvadrik ǀ abhūvan ǀ vasave ǀ vā ǀ tat ǀ it ǀ āgaḥ ǀ avāci ǀ
    na ǀ aha ǀ ayam ǀ agniḥ ǀ abhi-śastaye ǀ naḥ ǀ na ǀ riṣate ǀ vavṛdhānaḥ ǀ parā ǀ dāt ǁ

    5.3.12 Aṣṭaka 3.8.17.6Anuvāka 5.1.36Interpretations

Text, recitation and interpretations from the Ṛgveda database of theveda.org.in.