Devatā देवता

1: Liṅgoktadevatāḥ; 2-5: Dadhikrā

Ṛṣi ऋषि

Vasiṣṭha Maitrāvaruṇi

Chandas छन्दस्

Triṣṭubh, Jagatī

1. Ṛk 1

   द॒धि॒क्रां वः॑ प्रथ॒मम॒श्विनो॒षस॑म॒ग्निं समि॑द्धं॒ भग॑मू॒तये॑ हुवे ।
   इंद्रं॒ विष्णुं॑ पू॒षणं॒ ब्रह्म॑ण॒स्पति॑मादि॒त्यांद्यावा॑पृथि॒वी अ॒पः स्वः॑ ॥

   दधिक्रां वः प्रथमम् अश्विनोषसम् अग्निं समिद्धम् भगम् ऊतये हुवे |
   इन्द्रं विष्णुम् पूषणम् ब्रह्मणस् पतिम् आदित्यान् द्यावापृथिवी अपः स्वः ||

   dadhikrā́m vaḥ prathamámaśvínoṣásamagním sámiddham bhágamūtáye huve ǀ
   índram víṣṇum pūṣáṇam bráhmaṇaspátimādityā́ndyā́vāpṛthivī́ apáḥ sváḥ ǁ

   dadhikrāṃ vaḥ prathamam aśvinoṣasam agniṃ samiddham bhagam ūtaye huve |
   indraṃ viṣṇum pūṣaṇam brahmaṇas patim ādityān dyāvāpṛthivī apaḥ svaḥ ||

   द॒धि॒ऽक्राम् । वः॒ । प्र॒थ॒मम् । अ॒श्विना॑ । उ॒षस॑म् । अ॒ग्निम् । सम्ऽइ॑द्धम् । भग॑म् । ऊ॒तये॑ । हु॒वे॒ ।
   इन्द्र॑म् । विष्णु॑म् । पू॒षण॑म् । ब्रह्म॑णः । पति॑म् । आ॒दि॒त्यान् । द्यावा॑पृथि॒वी इति॑ । अ॒पः । स्वः॑ ॥

   दधिऽक्राम् । वः । प्रथमम् । अश्विना । उषसम् । अग्निम् । सम्ऽइद्धम् । भगम् । ऊतये । हुवे ।
   इन्द्रम् । विष्णुम् । पूषणम् । ब्रह्मणः । पतिम् । आदित्यान् । द्यावापृथिवी इति । अपः । स्वः ॥

   dadhi-krā́m ǀ vaḥ ǀ prathamám ǀ aśvínā ǀ uṣásam ǀ agním ǀ sám-iddham ǀ bhágam ǀ ūtáye ǀ huve ǀ
   índram ǀ víṣṇum ǀ pūṣáṇam ǀ bráhmaṇaḥ ǀ pátim ǀ ādityā́n ǀ dyā́vāpṛthivī́ íti ǀ apáḥ ǀ sváḥ ǁ

   dadhi-krām ǀ vaḥ ǀ prathamam ǀ aśvinā ǀ uṣasam ǀ agnim ǀ sam-iddham ǀ bhagam ǀ ūtaye ǀ huve ǀ
   indram ǀ viṣṇum ǀ pūṣaṇam ǀ brahmaṇaḥ ǀ patim ǀ ādityān ǀ dyāvāpṛthivī iti ǀ apaḥ ǀ svaḥ ǁ

   7.44.1 Aṣṭaka 5.4.11.1Anuvāka 7.3.98Interpretations

2. Ṛk 2

   द॒धि॒क्रामु॒ नम॑सा बो॒धयं॑त उ॒दीरा॑णा य॒ज्ञमु॑पप्र॒यंतः॑ ।
   इळां॑ दे॒वीं ब॒र्हिषि॑ सा॒दयं॑तो॒ऽश्विना॒ विप्रा॑ सु॒हवा॑ हुवेम ॥

   दधिक्राम् उ नमसा बोधयन्त उदीराणा यज्ञम् उपप्रयन्तः |
   इऌआं देवीम् बर्हिषि सादयन्तो ऽश्विना विप्रा सुहवा हुवेम ||

   dadhikrā́mu námasā bodháyanta udī́rāṇā yajñámupaprayántaḥ ǀ
   íḷām devī́m barhíṣi sādáyanto’śvínā víprā suhávā huvema ǁ

   dadhikrām u namasā bodhayanta udīrāṇā yajñam upaprayantaḥ |
   iḷāṃ devīm barhiṣi sādayanto 'śvinā viprā suhavā huvema ||

   द॒धि॒ऽक्राम् । ऊं॒ इति॑ । नम॑सा । बो॒धय॑न्तः । उ॒त्ऽईरा॑णाः । य॒ज्ञम् । उ॒प॒ऽप्र॒यन्तः॑ ।
   इळा॑म् । दे॒वीम् । ब॒र्हिषि॑ । सा॒दय॑न्तः । अ॒श्विना॑ । विप्राः॑ । सु॒ऽहवा॑ । हु॒वे॒म॒ ॥

   दधिऽक्राम् । ऊं इति । नमसा । बोधयन्तः । उत्ऽईराणाः । यज्ञम् । उपऽप्रयन्तः ।
   इळाम् । देवीम् । बर्हिषि । सादयन्तः । अश्विना । विप्राः । सुऽहवा । हुवेम ॥

   dadhi-krā́m ǀ ūṃ íti ǀ námasā ǀ bodháyantaḥ ǀ ut-ī́rāṇāḥ ǀ yajñám ǀ upa-prayántaḥ ǀ
   íḷām ǀ devī́m ǀ barhíṣi ǀ sādáyantaḥ ǀ aśvínā ǀ víprāḥ ǀ su-hávā ǀ huvema ǁ

   dadhi-krām ǀ ūṃ iti ǀ namasā ǀ bodhayantaḥ ǀ ut-īrāṇāḥ ǀ yajñam ǀ upa-prayantaḥ ǀ
   iḷām ǀ devīm ǀ barhiṣi ǀ sādayantaḥ ǀ aśvinā ǀ viprāḥ ǀ su-havā ǀ huvema ǁ

   7.44.2 Aṣṭaka 5.4.11.2Anuvāka 7.3.99Interpretations

3. Ṛk 3

   द॒धि॒क्रावा॑णं बुबुधा॒नो अ॒ग्निमुप॑ ब्रुव उ॒षसं॒ सूर्यं॒ गां ।
   ब्र॒ध्नं मां॑श्च॒तोर्वरु॑णस्य ब॒भ्रुं ते विश्वा॒स्मद्दु॑रि॒ता या॑वयंतु ॥

   दधिक्रावाणम् बुबुधानो अग्निम् उप ब्रुव उषसं सूर्यं गाम् |
   ब्रध्नम् मांश्चतोर् वरुणस्य बभ्रुं ते विश्वास्मद् दुरिता यावयन्तु ||

   dadhikrā́vāṇam bubudhānó agnímúpa bruva uṣásam sū́ryam gā́m ǀ
   bradhnám māṃścatórváruṇasya babhrúm té víśvāsmádduritā́ yāvayantu ǁ

   dadhikrāvāṇam bubudhāno agnim upa bruva uṣasaṃ sūryaṃ gām |
   bradhnam māṃścator varuṇasya babhruṃ te viśvāsmad duritā yāvayantu ||

   द॒धि॒ऽक्रावा॑णम् । बु॒बु॒धा॒नः । अ॒ग्निम् । उप॑ । ब्रु॒वे॒ । उ॒षस॑म् । सूर्य॑म् । गाम् ।
   ब्र॒ध्नम् । मं॒श्च॒तोः । वरु॑णस्य । ब॒भ्रुम् । ते । विश्वा॑ । अ॒स्मत् । दुः॒ऽइ॒ता । य॒व॒य॒न्तु॒ ॥

   दधिऽक्रावाणम् । बुबुधानः । अग्निम् । उप । ब्रुवे । उषसम् । सूर्यम् । गाम् ।
   ब्रध्नम् । मंश्चतोः । वरुणस्य । बभ्रुम् । ते । विश्वा । अस्मत् । दुःऽइता । यवयन्तु ॥

   dadhi-krā́vāṇam ǀ bubudhānáḥ ǀ agním ǀ úpa ǀ bruve ǀ uṣásam ǀ sū́ryam ǀ gā́m ǀ
   bradhnám ǀ máṃścatóḥ ǀ váruṇasya ǀ babhrúm ǀ té ǀ víśvā ǀ asmát ǀ duḥ-itā́ ǀ yavayantu ǁ

   dadhi-krāvāṇam ǀ bubudhānaḥ ǀ agnim ǀ upa ǀ bruve ǀ uṣasam ǀ sūryam ǀ gām ǀ
   bradhnam ǀ maṃścatoḥ ǀ varuṇasya ǀ babhrum ǀ te ǀ viśvā ǀ asmat ǀ duḥ-itā ǀ yavayantu ǁ

   7.44.3 Aṣṭaka 5.4.11.3Anuvāka 7.3.100Interpretations

4. Ṛk 4

   द॒धि॒क्रावा॑ प्रथ॒मो वा॒ज्यर्वाग्रे॒ रथा॑नां भवति प्रजा॒नन् ।
   सं॒वि॒दा॒न उ॒षसा॒ सूर्ये॑णादि॒त्येभि॒र्वसु॑भि॒रंगि॑रोभिः ॥

   दधिक्रावा प्रथमो वाज्य् अर्वाग्रे रथानाम् भवति प्रजानन् |
   संविदान उषसा सूर्येणादित्येभिर् वसुभिर् अङ्गिरोभिः ||

   dadhikrā́vā prathamó vājyárvā́gre ráthānām bhavati prajānán ǀ
   saṃvidāná uṣásā sū́ryeṇādityébhirvásubhiráṅgirobhiḥ ǁ

   dadhikrāvā prathamo vājy arvāgre rathānām bhavati prajānan |
   saṃvidāna uṣasā sūryeṇādityebhir vasubhir aṅgirobhiḥ ||

   द॒धि॒ऽक्रावा॑ । प्र॒थ॒मः । वा॒जी । अर्वा॑ । अग्रे॑ । रथा॑नाम् । भ॒व॒ति॒ । प्र॒ऽजा॒नन् ।
   स॒म्ऽवि॒दा॒नः । उ॒षसा॑ । सूर्ये॑ण । आ॒दि॒त्येभिः॑ । वसु॑ऽभिः । अङ्गि॑रःऽभिः ॥

   दधिऽक्रावा । प्रथमः । वाजी । अर्वा । अग्रे । रथानाम् । भवति । प्रऽजानन् ।
   सम्ऽविदानः । उषसा । सूर्येण । आदित्येभिः । वसुऽभिः । अङ्गिरःऽभिः ॥

   dadhi-krā́vā ǀ prathamáḥ ǀ vājī́ ǀ árvā ǀ ágre ǀ ráthānām ǀ bhavati ǀ pra-jānán ǀ
   sam-vidānáḥ ǀ uṣásā ǀ sū́ryeṇa ǀ ādityébhiḥ ǀ vásu-bhiḥ ǀ áṅgiraḥ-bhiḥ ǁ

   dadhi-krāvā ǀ prathamaḥ ǀ vājī ǀ arvā ǀ agre ǀ rathānām ǀ bhavati ǀ pra-jānan ǀ
   sam-vidānaḥ ǀ uṣasā ǀ sūryeṇa ǀ ādityebhiḥ ǀ vasu-bhiḥ ǀ aṅgiraḥ-bhiḥ ǁ

   7.44.4 Aṣṭaka 5.4.11.4Anuvāka 7.3.101Interpretations

5. Ṛk 5

   आ नो॑ दधि॒क्राः प॒थ्या॑मनक्त्वृ॒तस्य॒ पंथा॒मन्वे॑त॒वा उ॑ ।
   शृ॒णोतु॑ नो॒ दैव्यं॒ शर्धो॑ अ॒ग्निः शृ॒ण्वंतु॒ विश्वे॑ महि॒षा अमू॑राः ॥

   आ नो दधिक्राः पथ्याम् अनक्त्व् ऋतस्य पन्थाम् अन्वेतवा उ |
   शृणोतु नो दैव्यं शर्धो अग्निः शृण्वन्तु विश्वे महिषा अमूराः ||

   ā́ no dadhikrā́ḥ pathyā́manaktvṛtásya pánthāmánvetavā́ u ǀ
   śṛṇótu no dáivyam śárdho agníḥ śṛṇvántu víśve mahiṣā́ ámūrāḥ ǁ

   ā no dadhikrāḥ pathyām anaktv ṛtasya panthām anvetavā u |
   śṛṇotu no daivyaṃ śardho agniḥ śṛṇvantu viśve mahiṣā amūrāḥ ||

   आ । नः॒ । द॒धि॒ऽक्राः । प॒थ्या॑म् । अ॒न॒क्तु॒ । ऋ॒तस्य॑ । पन्था॑म् । अनु॑ऽए॒त॒वै । ऊं॒ इति॑ ।
   शृ॒णोतु॑ । नः॒ । दैव्य॑म् । शर्धः॑ । अ॒ग्निः । शृ॒ण्वन्तु॑ । विश्वे॑ । म॒हि॒षाः । अमू॑राः ॥

   आ । नः । दधिऽक्राः । पथ्याम् । अनक्तु । ऋतस्य । पन्थाम् । अनुऽएतवै । ऊं इति ।
   शृणोतु । नः । दैव्यम् । शर्धः । अग्निः । शृण्वन्तु । विश्वे । महिषाः । अमूराः ॥

   ā́ ǀ naḥ ǀ dadhi-krā́ḥ ǀ pathyā́m ǀ anaktu ǀ ṛtásya ǀ pánthām ǀ ánu-etavái ǀ ūṃ íti ǀ
   śṛṇótu ǀ naḥ ǀ dáivyam ǀ śárdhaḥ ǀ agníḥ ǀ śṛṇvántu ǀ víśve ǀ mahiṣā́ḥ ǀ ámūrāḥ ǁ

   ā ǀ naḥ ǀ dadhi-krāḥ ǀ pathyām ǀ anaktu ǀ ṛtasya ǀ panthām ǀ anu-etavai ǀ ūṃ iti ǀ
   śṛṇotu ǀ naḥ ǀ daivyam ǀ śardhaḥ ǀ agniḥ ǀ śṛṇvantu ǀ viśve ǀ mahiṣāḥ ǀ amūrāḥ ǁ

   7.44.5 Aṣṭaka 5.4.11.5Anuvāka 7.3.102Interpretations

Text, recitation and interpretations from the Ṛgveda database of theveda.org.in.