Devatā देवता

Uṣas

Ṛṣi ऋषि

Vasiṣṭha Maitrāvaruṇi

Chandas छन्दस्

Triṣṭubh

1. Ṛk 1

   व्यु१॒॑षा आ॑वो दिवि॒जा ऋ॒तेना॑विष्कृण्वा॒ना म॑हि॒मान॒मागा॑त् ।
   अप॒ द्रुह॒स्तम॑ आव॒रजु॑ष्ट॒मंगि॑रस्तमा प॒थ्या॑ अजीगः ॥

   व्य् उषा आवो दिविजा ऋतेनाविष्कृण्वाना महिमानम् आगात् |
   अप द्रुहस् तम आवर् अजुष्टम् अङ्गिरस्तमा पथ्या अजीगः ||

   vyúṣā́ āvo divijā́ ṛténāviṣkṛṇvānā́ mahimā́namā́gāt ǀ
   ápa drúhastáma āvarájuṣṭamáṅgirastamā pathyā́ ajīgaḥ ǁ

   vy uṣā āvo divijā ṛtenāviṣkṛṇvānā mahimānam āgāt |
   apa druhas tama āvar ajuṣṭam aṅgirastamā pathyā ajīgaḥ ||

   वि । उ॒षाः । आ॒वः॒ । दि॒वि॒ऽजाः । ऋ॒तेन॑ । आ॒विः॒ऽकृ॒ण्वा॒ना । म॒हि॒मान॑म् । आ । अ॒गा॒त् ।
   अप॑ । द्रुहः॑ । तमः॑ । आ॒वः॒ । अजु॑ष्टम् । अङ्गि॑रःऽतमा । प॒थ्याः॑ । अ॒जी॒ग॒रिति॑ ॥

   वि । उषाः । आवः । दिविऽजाः । ऋतेन । आविःऽकृण्वाना । महिमानम् । आ । अगात् ।
   अप । द्रुहः । तमः । आवः । अजुष्टम् । अङ्गिरःऽतमा । पथ्याः । अजीगरिति ॥

   ví ǀ uṣā́ḥ ǀ āvaḥ ǀ divi-jā́ḥ ǀ ṛténa ǀ āviḥ-kṛṇvānā́ ǀ mahimā́nam ǀ ā́ ǀ agāt ǀ
   ápa ǀ drúhaḥ ǀ támaḥ ǀ āvaḥ ǀ ájuṣṭam ǀ áṅgiraḥ-tamā ǀ pathyā́ḥ ǀ ajīgaríti ǁ

   vi ǀ uṣāḥ ǀ āvaḥ ǀ divi-jāḥ ǀ ṛtena ǀ āviḥ-kṛṇvānā ǀ mahimānam ǀ ā ǀ agāt ǀ
   apa ǀ druhaḥ ǀ tamaḥ ǀ āvaḥ ǀ ajuṣṭam ǀ aṅgiraḥ-tamā ǀ pathyāḥ ǀ ajīgariti ǁ

   7.75.1 Aṣṭaka 5.5.22.1Anuvāka 7.5.23Interpretations

2. Ṛk 2

   म॒हे नो॑ अ॒द्य सु॑वि॒ताय॑ बो॒ध्युषो॑ म॒हे सौभ॑गाय॒ प्र यं॑धि ।
   चि॒त्रं र॒यिं य॒शसं॑ धेह्य॒स्मे देवि॒ मर्ते॑षु मानुषि श्रव॒स्युं ॥

   महे नो अद्य सुविताय बोध्य् उषो महे सौभगाय प्र यन्धि |
   चित्रं रयिं यशसं धेह्य् अस्मे देवि मर्तेषु मानुषि श्रवस्युम् ||

   mahé no adyá suvitā́ya bodhyúṣo mahé sáubhagāya prá yandhi ǀ
   citrám rayím yaśásam dhehyasmé dévi márteṣu mānuṣi śravasyúm ǁ

   mahe no adya suvitāya bodhy uṣo mahe saubhagāya pra yandhi |
   citraṃ rayiṃ yaśasaṃ dhehy asme devi marteṣu mānuṣi śravasyum ||

   म॒हे । नः॒ । अ॒द्य । सु॒वि॒ताय॑ । बो॒धि॒ । उषः॑ । म॒हे । सौभ॑गाय । प्र । य॒न्धि॒ ।
   चि॒त्रम् । र॒यिम् । य॒शस॑म् । धे॒हि॒ । अ॒स्मे इति॑ । देवि॑ । मर्ते॑षु । मा॒नु॒षि॒ । श्र॒व॒स्युम् ॥

   महे । नः । अद्य । सुविताय । बोधि । उषः । महे । सौभगाय । प्र । यन्धि ।
   चित्रम् । रयिम् । यशसम् । धेहि । अस्मे इति । देवि । मर्तेषु । मानुषि । श्रवस्युम् ॥

   mahé ǀ naḥ ǀ adyá ǀ suvitā́ya ǀ bodhi ǀ úṣaḥ ǀ mahé ǀ sáubhagāya ǀ prá ǀ yandhi ǀ
   citrám ǀ rayím ǀ yaśásam ǀ dhehi ǀ asmé íti ǀ dévi ǀ márteṣu ǀ mānuṣi ǀ śravasyúm ǁ

   mahe ǀ naḥ ǀ adya ǀ suvitāya ǀ bodhi ǀ uṣaḥ ǀ mahe ǀ saubhagāya ǀ pra ǀ yandhi ǀ
   citram ǀ rayim ǀ yaśasam ǀ dhehi ǀ asme iti ǀ devi ǀ marteṣu ǀ mānuṣi ǀ śravasyum ǁ

   7.75.2 Aṣṭaka 5.5.22.2Anuvāka 7.5.24Interpretations

3. Ṛk 3

   ए॒ते त्ये भा॒नवो॑ दर्श॒ताया॑श्चि॒त्रा उ॒षसो॑ अ॒मृता॑स॒ आगुः॑ ।
   ज॒नयं॑तो॒ दैव्या॑नि व्र॒तान्या॑पृ॒णंतो॑ अं॒तरि॑क्षा॒ व्य॑स्थुः ॥

   एते त्ये भानवो दर्शतायाश् चित्रा उषसो अमृतास आगुः |
   जनयन्तो दैव्यानि व्रतान्य् आपृणन्तो अन्तरिक्षा व्य् अस्थुः ||

   eté tyé bhānávo darśatā́yāścitrā́ uṣáso amṛ́tāsa ā́guḥ ǀ
   janáyanto dáivyāni vratā́nyāpṛṇánto antárikṣā vyásthuḥ ǁ

   ete tye bhānavo darśatāyāś citrā uṣaso amṛtāsa āguḥ |
   janayanto daivyāni vratāny āpṛṇanto antarikṣā vy asthuḥ ||

   ए॒ते । त्ये । भा॒नवः॑ । द॒र्श॒तायाः॑ । चि॒त्राः । उ॒षसः॑ । अ॒मृता॑सः । आ । अ॒गुः॒ ।
   ज॒नय॑न्तः । दैव्या॑नि । व्र॒तानि॑ । आ॒ऽपृ॒णन्तः॑ । अ॒न्तरि॑क्षा । वि । अ॒स्थुः॒ ॥

   एते । त्ये । भानवः । दर्शतायाः । चित्राः । उषसः । अमृतासः । आ । अगुः ।
   जनयन्तः । दैव्यानि । व्रतानि । आऽपृणन्तः । अन्तरिक्षा । वि । अस्थुः ॥

   eté ǀ tyé ǀ bhānávaḥ ǀ darśatā́yāḥ ǀ citrā́ḥ ǀ uṣásaḥ ǀ amṛ́tāsaḥ ǀ ā́ ǀ aguḥ ǀ
   janáyantaḥ ǀ dáivyāni ǀ vratā́ni ǀ ā-pṛṇántaḥ ǀ antárikṣā ǀ ví ǀ asthuḥ ǁ

   ete ǀ tye ǀ bhānavaḥ ǀ darśatāyāḥ ǀ citrāḥ ǀ uṣasaḥ ǀ amṛtāsaḥ ǀ ā ǀ aguḥ ǀ
   janayantaḥ ǀ daivyāni ǀ vratāni ǀ ā-pṛṇantaḥ ǀ antarikṣā ǀ vi ǀ asthuḥ ǁ

   7.75.3 Aṣṭaka 5.5.22.3Anuvāka 7.5.25Interpretations

4. Ṛk 4

   ए॒षा स्या यु॑जा॒ना प॑रा॒कात्पंच॑ क्षि॒तीः परि॑ स॒द्यो जि॑गाति ।
   अ॒भि॒पश्यं॑ती व॒युना॒ जना॑नां दि॒वो दु॑हि॒ता भुव॑नस्य॒ पत्नी॑ ॥

   एषा स्या युजाना पराकात् पञ्च क्षितीः परि सद्यो जिगाति |
   अभिपश्यन्ती वयुना जनानां दिवो दुहिता भुवनस्य पत्नी ||

   eṣā́ syā́ yujānā́ parākā́tpáñca kṣitī́ḥ pári sadyó jigāti ǀ
   abhipáśyantī vayúnā jánānām divó duhitā́ bhúvanasya pátnī ǁ

   eṣā syā yujānā parākāt pañca kṣitīḥ pari sadyo jigāti |
   abhipaśyantī vayunā janānāṃ divo duhitā bhuvanasya patnī ||

   ए॒षा । स्या । यु॒जा॒ना । प॒रा॒कात् । पञ्च॑ । क्षि॒तीः । परि॑ । स॒द्यः । जि॒गा॒ति॒ ।
   अ॒भि॒ऽपश्य॑न्ती । व॒युना॑ । जना॑नाम् । दि॒वः । दु॒हि॒ता । भुव॑नस्य । पत्नी॑ ॥

   एषा । स्या । युजाना । पराकात् । पञ्च । क्षितीः । परि । सद्यः । जिगाति ।
   अभिऽपश्यन्ती । वयुना । जनानाम् । दिवः । दुहिता । भुवनस्य । पत्नी ॥

   eṣā́ ǀ syā́ ǀ yujānā́ ǀ parākā́t ǀ páñca ǀ kṣitī́ḥ ǀ pári ǀ sadyáḥ ǀ jigāti ǀ
   abhi-páśyantī ǀ vayúnā ǀ jánānām ǀ diváḥ ǀ duhitā́ ǀ bhúvanasya ǀ pátnī ǁ

   eṣā ǀ syā ǀ yujānā ǀ parākāt ǀ pañca ǀ kṣitīḥ ǀ pari ǀ sadyaḥ ǀ jigāti ǀ
   abhi-paśyantī ǀ vayunā ǀ janānām ǀ divaḥ ǀ duhitā ǀ bhuvanasya ǀ patnī ǁ

   7.75.4 Aṣṭaka 5.5.22.4Anuvāka 7.5.26Interpretations

5. Ṛk 5

   वा॒जिनी॑वती॒ सूर्य॑स्य॒ योषा॑ चि॒त्राम॑घा रा॒य ई॑शे॒ वसू॑नां ।
   ऋषि॑ष्टुता ज॒रयं॑ती म॒घोन्यु॒षा उ॑च्छति॒ वह्नि॑भिर्गृणा॒ना ॥

   वाजिनीवती सूर्यस्य योषा चित्रामघा राय ईशे वसूनाम् |
   ऋषिष्टुता जरयन्ती मघोन्य् उषा उच्छति वह्निभिर् गृणाना ||

   vājínīvatī sū́ryasya yóṣā citrā́maghā rāyá īśe vásūnām ǀ
   ṛ́ṣiṣṭutā jaráyantī maghónyuṣā́ ucchati váhnibhirgṛṇānā́ ǁ

   vājinīvatī sūryasya yoṣā citrāmaghā rāya īśe vasūnām |
   ṛṣiṣṭutā jarayantī maghony uṣā ucchati vahnibhir gṛṇānā ||

   वा॒जिनी॑ऽवती । सूर्य॑स्य । योषा॑ । चि॒त्रऽम॑घा । रा॒यः । ई॒शे॒ । वसू॑नाम् ।
   ऋषि॑ऽस्तुता । ज॒रय॑न्ती । म॒घोनी॑ । उ॒षाः । उ॒च्छ॒ति॒ । वह्नि॑ऽभिः । गृ॒णा॒ना ॥

   वाजिनीऽवती । सूर्यस्य । योषा । चित्रऽमघा । रायः । ईशे । वसूनाम् ।
   ऋषिऽस्तुता । जरयन्ती । मघोनी । उषाः । उच्छति । वह्निऽभिः । गृणाना ॥

   vājínī-vatī ǀ sū́ryasya ǀ yóṣā ǀ citrá-maghā ǀ rāyáḥ ǀ īśe ǀ vásūnām ǀ
   ṛ́ṣi-stutā ǀ jaráyantī ǀ maghónī ǀ uṣā́ḥ ǀ ucchati ǀ váhni-bhiḥ ǀ gṛṇānā́ ǁ

   vājinī-vatī ǀ sūryasya ǀ yoṣā ǀ citra-maghā ǀ rāyaḥ ǀ īśe ǀ vasūnām ǀ
   ṛṣi-stutā ǀ jarayantī ǀ maghonī ǀ uṣāḥ ǀ ucchati ǀ vahni-bhiḥ ǀ gṛṇānā ǁ

   7.75.5 Aṣṭaka 5.5.22.5Anuvāka 7.5.27Interpretations

6. Ṛk 6

   प्रति॑ द्युता॒नाम॑रु॒षासो॒ अश्वा॑श्चि॒त्रा अ॑दृश्रन्नु॒षसं॒ वहं॑तः ।
   याति॑ शु॒भ्रा वि॑श्व॒पिशा॒ रथे॑न॒ दधा॑ति॒ रत्नं॑ विध॒ते जना॑य ॥

   प्रति द्युतानाम् अरुषासो अश्वाश् चित्रा अदृश्रन्न् उषसं वहन्तः |
   याति शुभ्रा विश्वपिशा रथेन दधाति रत्नं विधते जनाय ||

   práti dyutānā́maruṣā́so áśvāścitrā́ adṛśrannuṣásam váhantaḥ ǀ
   yā́ti śubhrā́ viśvapíśā ráthena dádhāti rátnam vidhaté jánāya ǁ

   prati dyutānām aruṣāso aśvāś citrā adṛśrann uṣasaṃ vahantaḥ |
   yāti śubhrā viśvapiśā rathena dadhāti ratnaṃ vidhate janāya ||

   प्रति॑ । द्यु॒ता॒नाम् । अ॒रु॒षासः॑ । अश्वाः॑ । चि॒त्राः । अ॒दृ॒श्र॒न् । उ॒षस॑म् । वह॑न्तः ।
   याति॑ । शु॒भ्रा । वि॒श्व॒ऽपिशा॑ । रथे॑न । दधा॑ति । रत्न॑म् । वि॒ध॒ते । जना॑य ॥

   प्रति । द्युतानाम् । अरुषासः । अश्वाः । चित्राः । अदृश्रन् । उषसम् । वहन्तः ।
   याति । शुभ्रा । विश्वऽपिशा । रथेन । दधाति । रत्नम् । विधते । जनाय ॥

   práti ǀ dyutānā́m ǀ aruṣā́saḥ ǀ áśvāḥ ǀ citrā́ḥ ǀ adṛśran ǀ uṣásam ǀ váhantaḥ ǀ
   yā́ti ǀ śubhrā́ ǀ viśva-píśā ǀ ráthena ǀ dádhāti ǀ rátnam ǀ vidhaté ǀ jánāya ǁ

   prati ǀ dyutānām ǀ aruṣāsaḥ ǀ aśvāḥ ǀ citrāḥ ǀ adṛśran ǀ uṣasam ǀ vahantaḥ ǀ
   yāti ǀ śubhrā ǀ viśva-piśā ǀ rathena ǀ dadhāti ǀ ratnam ǀ vidhate ǀ janāya ǁ

   7.75.6 Aṣṭaka 5.5.22.6Anuvāka 7.5.28Interpretations

7. Ṛk 7

   स॒त्या स॒त्येभि॑र्मह॒ती म॒हद्भि॑र्दे॒वी दे॒वेभि॑र्यज॒ता यज॑त्रैः ।
   रु॒जद्दृ॒ळ्हानि॒ दद॑दु॒स्रिया॑णां॒ प्रति॒ गाव॑ उ॒षसं॑ वावशंत ॥

   सत्या सत्येभिर् महती महद्भिर् देवी देवेभिर् यजता यजत्रैः |
   रुजद् दृऌहानि ददद् उस्रियाणाम् प्रति गाव उषसं वावशन्त ||

   satyā́ satyébhirmahatī́ mahádbhirdevī́ devébhiryajatā́ yájatraiḥ ǀ
   rujáddṛḷhā́ni dádadusríyāṇām práti gā́va uṣásam vāvaśanta ǁ

   satyā satyebhir mahatī mahadbhir devī devebhir yajatā yajatraiḥ |
   rujad dṛḷhāni dadad usriyāṇām prati gāva uṣasaṃ vāvaśanta ||

   स॒त्या । स॒त्येभिः॑ । म॒ह॒ती । म॒हत्ऽभिः॑ । दे॒वी । दे॒वेभिः॑ । य॒ज॒ता । यज॑त्रैः ।
   रु॒जत् । दृ॒ळ्हानि॑ । दद॑त् । उ॒स्रिया॑णाम् । प्रति॑ । गावः॑ । उ॒षस॑म् । वा॒व॒श॒न्त॒ ॥

   सत्या । सत्येभिः । महती । महत्ऽभिः । देवी । देवेभिः । यजता । यजत्रैः ।
   रुजत् । दृळ्हानि । ददत् । उस्रियाणाम् । प्रति । गावः । उषसम् । वावशन्त ॥

   satyā́ ǀ satyébhiḥ ǀ mahatī́ ǀ mahát-bhiḥ ǀ devī́ ǀ devébhiḥ ǀ yajatā́ ǀ yájatraiḥ ǀ
   ruját ǀ dṛḷhā́ni ǀ dádat ǀ usríyāṇām ǀ práti ǀ gā́vaḥ ǀ uṣásam ǀ vāvaśanta ǁ

   satyā ǀ satyebhiḥ ǀ mahatī ǀ mahat-bhiḥ ǀ devī ǀ devebhiḥ ǀ yajatā ǀ yajatraiḥ ǀ
   rujat ǀ dṛḷhāni ǀ dadat ǀ usriyāṇām ǀ prati ǀ gāvaḥ ǀ uṣasam ǀ vāvaśanta ǁ

   7.75.7 Aṣṭaka 5.5.22.7Anuvāka 7.5.29Interpretations

8. Ṛk 8

   नू नो॒ गोम॑द्वी॒रव॑द्धेहि॒ रत्न॒मुषो॒ अश्वा॑वत्पुरु॒भोजो॑ अ॒स्मे ।
   मा नो॑ ब॒र्हिः पु॑रु॒षता॑ नि॒दे क॑र्यू॒यं पा॑त स्व॒स्तिभिः॒ सदा॑ नः ॥

   नू नो गोमद् वीरवद् धेहि रत्नम् उषो अश्वावत् पुरुभोजो अस्मे |
   मा नो बर्हिः पुरुषता निदे कर् यूयम् पात स्वस्तिभिः सदा नः ||

   nū́ no gómadvīrávaddhehi rátnamúṣo áśvāvatpurubhójo asmé ǀ
   mā́ no barhíḥ puruṣátā nidé karyūyám pāta svastíbhiḥ sádā naḥ ǁ

   nū no gomad vīravad dhehi ratnam uṣo aśvāvat purubhojo asme |
   mā no barhiḥ puruṣatā nide kar yūyam pāta svastibhiḥ sadā naḥ ||

   नु । नः॒ । गोऽम॑त् । वी॒रऽव॑त् । धे॒हि॒ । रत्न॑म् । उषः॑ । अश्व॑ऽवत् । पु॒रु॒ऽभोजः॑ । अ॒स्मे इति॑ ।
   मा । नः॒ । ब॒र्हिः । पु॒रु॒षता॑ । नि॒दे । कः॒ । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥

   नु । नः । गोऽमत् । वीरऽवत् । धेहि । रत्नम् । उषः । अश्वऽवत् । पुरुऽभोजः । अस्मे इति ।
   मा । नः । बर्हिः । पुरुषता । निदे । कः । यूयम् । पात । स्वस्तिऽभिः । सदा । नः ॥

   nú ǀ naḥ ǀ gó-mat ǀ vīrá-vat ǀ dhehi ǀ rátnam ǀ úṣaḥ ǀ áśva-vat ǀ puru-bhójaḥ ǀ asmé íti ǀ
   mā́ ǀ naḥ ǀ barhíḥ ǀ puruṣátā ǀ nidé ǀ kaḥ ǀ yūyám ǀ pāta ǀ svastí-bhiḥ ǀ sádā ǀ naḥ ǁ

   nu ǀ naḥ ǀ go-mat ǀ vīra-vat ǀ dhehi ǀ ratnam ǀ uṣaḥ ǀ aśva-vat ǀ puru-bhojaḥ ǀ asme iti ǀ
   mā ǀ naḥ ǀ barhiḥ ǀ puruṣatā ǀ nide ǀ kaḥ ǀ yūyam ǀ pāta ǀ svasti-bhiḥ ǀ sadā ǀ naḥ ǁ

   7.75.8 Aṣṭaka 5.5.22.8Anuvāka 7.5.30Interpretations

Text, recitation and interpretations from the Ṛgveda database of theveda.org.in.