Devatā देवता

1: Liṅgoktadevatāḥ; 2-6: Bhaga; 7: Uṣas

Ṛṣi ऋषि

Vasiṣṭha Maitrāvaruṇi

Chandas छन्दस्

Triṣṭubh, Jagatī

1. Ṛk 1

   प्रा॒तर॒ग्निं प्रा॒तरिंद्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
   प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं हु॑वेम ॥

   प्रातर् अग्निम् प्रातर् इन्द्रं हवामहे प्रातर् मित्रावरुणा प्रातर् अश्विना |
   प्रातर् भगम् पूषणम् ब्रह्मणस् पतिम् प्रातः सोमम् उत रुद्रं हुवेम ||

   prātáragním prātáríndram havāmahe prātármitrā́váruṇā prātáraśvínā ǀ
   prātárbhágam pūṣáṇam bráhmaṇaspátim prātáḥ sómamutá rudrám huvema ǁ

   prātar agnim prātar indraṃ havāmahe prātar mitrāvaruṇā prātar aśvinā |
   prātar bhagam pūṣaṇam brahmaṇas patim prātaḥ somam uta rudraṃ huvema ||

   प्रा॒तः । अ॒ग्निम् । प्र॒तः । इन्द्र॑म् । ह॒वा॒म॒हे॒ । प्र॒तः । मि॒त्रावरु॑णा । प्रा॒तः । अ॒श्विना॑ ।
   प्र॒तः । भग॑म् । पू॒षण॑म् । ब्रह्म॑णः । पति॑म् । प्र॒तः । सोम॑म् । उ॒त । रु॒द्रम् । हु॒वे॒म॒ ॥

   प्रातः । अग्निम् । प्रतः । इन्द्रम् । हवामहे । प्रतः । मित्रावरुणा । प्रातः । अश्विना ।
   प्रतः । भगम् । पूषणम् । ब्रह्मणः । पतिम् । प्रतः । सोमम् । उत । रुद्रम् । हुवेम ॥

   prātáḥ ǀ agním ǀ pratáḥ ǀ índram ǀ havāmahe ǀ pratáḥ ǀ mitrā́váruṇā ǀ prātáḥ ǀ aśvínā ǀ
   pratáḥ ǀ bhágam ǀ pūṣáṇam ǀ bráhmaṇaḥ ǀ pátim ǀ pratáḥ ǀ sómam ǀ utá ǀ rudrám ǀ huvema ǁ

   prātaḥ ǀ agnim ǀ prataḥ ǀ indram ǀ havāmahe ǀ prataḥ ǀ mitrāvaruṇā ǀ prātaḥ ǀ aśvinā ǀ
   prataḥ ǀ bhagam ǀ pūṣaṇam ǀ brahmaṇaḥ ǀ patim ǀ prataḥ ǀ somam ǀ uta ǀ rudram ǀ huvema ǁ

   7.41.1 Aṣṭaka 5.4.8.1Anuvāka 7.3.80Interpretations

2. Ṛk 2

   प्रा॒त॒र्जितं॒ भग॑मु॒ग्रं हु॑वेम व॒यं पु॒त्रमदि॑ते॒र्यो वि॑ध॒र्ता ।
   आ॒ध्रश्चि॒द्यं मन्य॑मानस्तु॒रश्चि॒द्राजा॑ चि॒द्यं भगं॑ भ॒क्षीत्याह॑ ॥

   प्रातर्जितम् भगम् उग्रं हुवेम वयम् पुत्रम् अदितेर् यो विधर्ता |
   आध्रश् चिद् यम् मन्यमानस् तुरश् चिद् राजा चिद् यम् भगम् भक्षीत्य् आह ||

   prātarjítam bhágamugrám huvema vayám putrámáditeryó vidhartā́ ǀ
   ādhráścidyám mányamānasturáścidrā́jā cidyám bhágam bhakṣī́tyā́ha ǁ

   prātarjitam bhagam ugraṃ huvema vayam putram aditer yo vidhartā |
   ādhraś cid yam manyamānas turaś cid rājā cid yam bhagam bhakṣīty āha ||

   प्रा॒तः॒ऽजित॑म् । भग॑म् । उ॒ग्रम् । हु॒वे॒म॒ । व॒यम् । पु॒त्रम् । अदि॑तेः । यः । वि॒ऽध॒र्ता ।
   आ॒ध्रः । चि॒त् । यम् । मन्य॑मानः । तु॒रः । चि॒त् । राजा॑ । चि॒त् । यम् । भग॑म् । भ॒क्षि॒ । इति॑ । आह॑ ॥

   प्रातःऽजितम् । भगम् । उग्रम् । हुवेम । वयम् । पुत्रम् । अदितेः । यः । विऽधर्ता ।
   आध्रः । चित् । यम् । मन्यमानः । तुरः । चित् । राजा । चित् । यम् । भगम् । भक्षि । इति । आह ॥

   prātaḥ-jítam ǀ bhágam ǀ ugrám ǀ huvema ǀ vayám ǀ putrám ǀ áditeḥ ǀ yáḥ ǀ vi-dhartā́ ǀ
   ādhráḥ ǀ cit ǀ yám ǀ mányamānaḥ ǀ turáḥ ǀ cit ǀ rā́jā ǀ cit ǀ yám ǀ bhágam ǀ bhakṣi ǀ íti ǀ ā́ha ǁ

   prātaḥ-jitam ǀ bhagam ǀ ugram ǀ huvema ǀ vayam ǀ putram ǀ aditeḥ ǀ yaḥ ǀ vi-dhartā ǀ
   ādhraḥ ǀ cit ǀ yam ǀ manyamānaḥ ǀ turaḥ ǀ cit ǀ rājā ǀ cit ǀ yam ǀ bhagam ǀ bhakṣi ǀ iti ǀ āha ǁ

   7.41.2 Aṣṭaka 5.4.8.2Anuvāka 7.3.81Interpretations

3. Ṛk 3

   भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।
   भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वंतः॑ स्याम ॥

   भग प्रणेतर् भग सत्यराधो भगेमां धियम् उद् अवा ददन् नः |
   भग प्र णो जनय गोभिर् अश्वैर् भग प्र नृभिर् नृवन्तः स्याम ||

   bhága práṇetarbhága sátyarādho bhágemā́m dhíyamúdavā dádannaḥ ǀ
   bhága prá ṇo janaya góbhiráśvairbhága prá nṛ́bhirnṛvántaḥ syāma ǁ

   bhaga praṇetar bhaga satyarādho bhagemāṃ dhiyam ud avā dadan naḥ |
   bhaga pra ṇo janaya gobhir aśvair bhaga pra nṛbhir nṛvantaḥ syāma ||

   भग॑ । प्रने॑त॒रिति॒ प्रऽने॑तः । भग॑ । सत्य॑ऽराधः । भग॑ । इ॒माम् । धिय॑म् । उत् । अ॒व॒ । दद॑त् । नः॒ ।
   भग॑ । प्र । नः॒ । ज॒न॒य॒ । गोभिः॑ । अश्वैः॑ । भग॑ । प्र । नृऽभिः॑ । नृ॒ऽवन्तः॑ । स्या॒म॒ ॥

   भग । प्रनेतरिति प्रऽनेतः । भग । सत्यऽराधः । भग । इमाम् । धियम् । उत् । अव । ददत् । नः ।
   भग । प्र । नः । जनय । गोभिः । अश्वैः । भग । प्र । नृऽभिः । नृऽवन्तः । स्याम ॥

   bhága ǀ pránetaríti prá-netaḥ ǀ bhága ǀ sátya-rādhaḥ ǀ bhága ǀ imā́m ǀ dhíyam ǀ út ǀ ava ǀ dádat ǀ naḥ ǀ
   bhága ǀ prá ǀ naḥ ǀ janaya ǀ góbhiḥ ǀ áśvaiḥ ǀ bhága ǀ prá ǀ nṛ́-bhiḥ ǀ nṛ-vántaḥ ǀ syāma ǁ

   bhaga ǀ pranetariti pra-netaḥ ǀ bhaga ǀ satya-rādhaḥ ǀ bhaga ǀ imām ǀ dhiyam ǀ ut ǀ ava ǀ dadat ǀ naḥ ǀ
   bhaga ǀ pra ǀ naḥ ǀ janaya ǀ gobhiḥ ǀ aśvaiḥ ǀ bhaga ǀ pra ǀ nṛ-bhiḥ ǀ nṛ-vantaḥ ǀ syāma ǁ

   7.41.3 Aṣṭaka 5.4.8.3Anuvāka 7.3.82Interpretations

4. Ṛk 4

   उ॒तेदानीं॒ भग॑वंतः स्यामो॒त प्र॑पि॒त्व उ॒त मध्ये॒ अह्नां॑ ।
   उ॒तोदि॑ता मघव॒न्त्सूर्य॑स्य व॒यं दे॒वानां॑ सुम॒तौ स्या॑म ॥

   उतेदानीम् भगवन्तः स्यामोत प्रपित्व उत मध्ये अह्नाम् |
   उतोदिता मघवन् सूर्यस्य वयं देवानां सुमतौ स्याम ||

   utédā́nīm bhágavantaḥ syāmotá prapitvá utá mádhye áhnām ǀ
   utóditā maghavantsū́ryasya vayám devā́nām sumatáu syāma ǁ

   utedānīm bhagavantaḥ syāmota prapitva uta madhye ahnām |
   utoditā maghavan sūryasya vayaṃ devānāṃ sumatau syāma ||

   उ॒त । इ॒दानी॑म् । भग॑ऽवन्तः । स्या॒म॒ । उ॒त । प्र॒ऽपि॒त्वे । उ॒त । मध्ये॑ । अह्ना॑म् ।
   उ॒त । उत्ऽइ॑ता । म॒घ॒ऽव॒न् । सूर्य॑स्य । व॒यम् । दे॒वाना॑म् । सु॒ऽम॒तौ । स्या॒म॒ ॥

   उत । इदानीम् । भगऽवन्तः । स्याम । उत । प्रऽपित्वे । उत । मध्ये । अह्नाम् ।
   उत । उत्ऽइता । मघऽवन् । सूर्यस्य । वयम् । देवानाम् । सुऽमतौ । स्याम ॥

   utá ǀ idā́nīm ǀ bhága-vantaḥ ǀ syāma ǀ utá ǀ pra-pitvé ǀ utá ǀ mádhye ǀ áhnām ǀ
   utá ǀ út-itā ǀ magha-van ǀ sū́ryasya ǀ vayám ǀ devā́nām ǀ su-matáu ǀ syāma ǁ

   uta ǀ idānīm ǀ bhaga-vantaḥ ǀ syāma ǀ uta ǀ pra-pitve ǀ uta ǀ madhye ǀ ahnām ǀ
   uta ǀ ut-itā ǀ magha-van ǀ sūryasya ǀ vayam ǀ devānām ǀ su-matau ǀ syāma ǁ

   7.41.4 Aṣṭaka 5.4.8.4Anuvāka 7.3.83Interpretations

5. Ṛk 5

   भग॑ ए॒व भग॑वाँ अस्तु देवा॒स्तेन॑ व॒यं भग॑वंतः स्याम ।
   तं त्वा॑ भग॒ सर्व॒ इज्जो॑हवीति॒ स नो॑ भग पुरए॒ता भ॑वे॒ह ॥

   भग एव भगवां अस्तु देवास् तेन वयम् भगवन्तः स्याम |
   तं त्वा भग सर्व इज् जोहवीति स नो भग पुरएता भवेह ||

   bhága evá bhágavām̐ astu devāsténa vayám bhágavantaḥ syāma ǀ
   tám tvā bhaga sárva íjjohavīti sá no bhaga puraetā́ bhavehá ǁ

   bhaga eva bhagavāṃ astu devās tena vayam bhagavantaḥ syāma |
   taṃ tvā bhaga sarva ij johavīti sa no bhaga puraetā bhaveha ||

   भगः॑ । ए॒व । भग॑ऽवान् । अ॒स्तु॒ । दे॒वाः॒ । तेन॑ । व॒यम् । भग॑ऽवन्तः । स्या॒म॒ ।
   तम् । त्वा॒ । भ॒ग॒ । सर्वः॑ । इत् । जो॒ह॒वी॒ति॒ । सः । नः॒ । भ॒ग॒ । पु॒रः॒ऽए॒ता । भ॒व॒ । इ॒ह ॥

   भगः । एव । भगऽवान् । अस्तु । देवाः । तेन । वयम् । भगऽवन्तः । स्याम ।
   तम् । त्वा । भग । सर्वः । इत् । जोहवीति । सः । नः । भग । पुरःऽएता । भव । इह ॥

   bhágaḥ ǀ evá ǀ bhága-vān ǀ astu ǀ devāḥ ǀ téna ǀ vayám ǀ bhága-vantaḥ ǀ syāma ǀ
   tám ǀ tvā ǀ bhaga ǀ sárvaḥ ǀ ít ǀ johavīti ǀ sáḥ ǀ naḥ ǀ bhaga ǀ puraḥ-etā́ ǀ bhava ǀ ihá ǁ

   bhagaḥ ǀ eva ǀ bhaga-vān ǀ astu ǀ devāḥ ǀ tena ǀ vayam ǀ bhaga-vantaḥ ǀ syāma ǀ
   tam ǀ tvā ǀ bhaga ǀ sarvaḥ ǀ it ǀ johavīti ǀ saḥ ǀ naḥ ǀ bhaga ǀ puraḥ-etā ǀ bhava ǀ iha ǁ

   7.41.5 Aṣṭaka 5.4.8.5Anuvāka 7.3.84Interpretations

6. Ṛk 6

   सम॑ध्व॒रायो॒षसो॑ नमंत दधि॒क्रावे॑व॒ शुच॑ये प॒दाय॑ ।
   अ॒र्वा॒ची॒नं व॑सु॒विदं॒ भगं॑ नो॒ रथ॑मि॒वाश्वा॑ वा॒जिन॒ आ व॑हंतु ॥

   सम् अध्वरायोषसो नमन्त दधिक्रावेव शुचये पदाय |
   अर्वाचीनं वसुविदम् भगं नो रथम् इवाश्वा वाजिन आ वहन्तु ||

   sámadhvarā́yoṣáso namanta dadhikrā́veva śúcaye padā́ya ǀ
   arvācīnám vasuvídam bhágam no ráthamivā́śvā vājína ā́ vahantu ǁ

   sam adhvarāyoṣaso namanta dadhikrāveva śucaye padāya |
   arvācīnaṃ vasuvidam bhagaṃ no ratham ivāśvā vājina ā vahantu ||

   सम् । अ॒ध्व॒राय॑ । उ॒षसः॑ । न॒म॒न्त॒ । द॒धि॒क्रावा॑ऽइव । शुच॑ये । प॒दाय॑ ।
   अ॒र्वा॒ची॒नम् । व॒सु॒ऽविद॑म् । भग॑म् । नः॒ । रथ॑म्ऽइव । अश्वाः॑ । वा॒जिनः॑ । आ । व॒ह॒न्तु॒ ॥

   सम् । अध्वराय । उषसः । नमन्त । दधिक्रावाऽइव । शुचये । पदाय ।
   अर्वाचीनम् । वसुऽविदम् । भगम् । नः । रथम्ऽइव । अश्वाः । वाजिनः । आ । वहन्तु ॥

   sám ǀ adhvarā́ya ǀ uṣásaḥ ǀ namanta ǀ dadhikrā́vā-iva ǀ śúcaye ǀ padā́ya ǀ
   arvācīnám ǀ vasu-vídam ǀ bhágam ǀ naḥ ǀ rátham-iva ǀ áśvāḥ ǀ vājínaḥ ǀ ā́ ǀ vahantu ǁ

   sam ǀ adhvarāya ǀ uṣasaḥ ǀ namanta ǀ dadhikrāvā-iva ǀ śucaye ǀ padāya ǀ
   arvācīnam ǀ vasu-vidam ǀ bhagam ǀ naḥ ǀ ratham-iva ǀ aśvāḥ ǀ vājinaḥ ǀ ā ǀ vahantu ǁ

   7.41.6 Aṣṭaka 5.4.8.6Anuvāka 7.3.85Interpretations

7. Ṛk 7

   अश्वा॑वती॒र्गोम॑तीर्न उ॒षासो॑ वी॒रव॑तीः॒ सद॑मुच्छंतु भ॒द्राः ।
   घृ॒तं दुहा॑ना वि॒श्वतः॒ प्रपी॑ता यू॒यं पा॑त स्व॒स्तिभिः॒ सदा॑ नः ॥

   अश्वावतीर् गोमतीर् न उषासो वीरवतीः सदम् उच्छन्तु भद्राः |
   घृतं दुहाना विश्वतः प्रपीता यूयम् पात स्वस्तिभिः सदा नः ||

   áśvāvatīrgómatīrna uṣā́so vīrávatīḥ sádamucchantu bhadrā́ḥ ǀ
   ghṛtám dúhānā viśvátaḥ prápītā yūyám pāta svastíbhiḥ sádā naḥ ǁ

   aśvāvatīr gomatīr na uṣāso vīravatīḥ sadam ucchantu bhadrāḥ |
   ghṛtaṃ duhānā viśvataḥ prapītā yūyam pāta svastibhiḥ sadā naḥ ||

   अश्व॑ऽवतीः । गोऽम॑तीः । नः॒ । उ॒षसः॑ । वी॒रऽव॑तीः । सद॑म् । उ॒च्छ॒न्तु॒ । भ॒द्राः ।
   घृ॒तम् । दुहा॑नाः । वि॒श्वतः॑ । प्रऽपी॑ताः । यू॒यम् । पा॒त॒ । स्व॒स्तिऽभिः॑ । सदा॑ । नः॒ ॥

   अश्वऽवतीः । गोऽमतीः । नः । उषसः । वीरऽवतीः । सदम् । उच्छन्तु । भद्राः ।
   घृतम् । दुहानाः । विश्वतः । प्रऽपीताः । यूयम् । पात । स्वस्तिऽभिः । सदा । नः ॥

   áśva-vatīḥ ǀ gó-matīḥ ǀ naḥ ǀ uṣásaḥ ǀ vīrá-vatīḥ ǀ sádam ǀ ucchantu ǀ bhadrā́ḥ ǀ
   ghṛtám ǀ dúhānāḥ ǀ viśvátaḥ ǀ prá-pītāḥ ǀ yūyám ǀ pāta ǀ svastí-bhiḥ ǀ sádā ǀ naḥ ǁ

   aśva-vatīḥ ǀ go-matīḥ ǀ naḥ ǀ uṣasaḥ ǀ vīra-vatīḥ ǀ sadam ǀ ucchantu ǀ bhadrāḥ ǀ
   ghṛtam ǀ duhānāḥ ǀ viśvataḥ ǀ pra-pītāḥ ǀ yūyam ǀ pāta ǀ svasti-bhiḥ ǀ sadā ǀ naḥ ǁ

   7.41.7 Aṣṭaka 5.4.8.7Anuvāka 7.3.86Interpretations

Text, recitation and interpretations from the Ṛgveda database of theveda.org.in.