जन्माद्यस्य यतो ऽन्वयादितरतश् चार्थेष्व् अभिज्ञः स्वराट् । (१।१)

तेने ब्रह्म हृदा य आदिकवये मुह्यन्ति यत् सूरयः । (१।२)

तेजोवारिमृदां यथा विनिमयो यत्र त्रिसर्गो ऽमृषा । (१।३)

धाम्ना स्वेन सदा निरस्तकुहकं सत्यं परं धीमहि ॥ (१।४)

धर्मः प्रोज्झितकैतवो ऽत्र परमो निर्मत्सराणां सताम् । (२।१)

वेद्यं वास्तवम् अत्र वस्तु शिवदं तापत्रयोन्मूलनम् । (२।२)

श्रीमद्भागवते महामुनिकृते किं वा परैर् ईश्वरः । (२।३)

सद्यो हृद्य् अवरुध्यते ऽत्र कृतिभिः शुश्रूषुभिस् तत्क्षणात् ॥ (२।४)

निगमकल्पतरोर्गलितं फलम् । (३।१)

शुकमुखाद् अमृतद्रवसंयुतम् । (३।२)

पिबत भागवतं रसम् आलयम् । (३।३)

मुहुरहो रसिका भुवि भावुकाः ॥ (३।४)

नैमिषे ऽनिमिषक्षेत्रे ईशयः शौनकादयः । (४।१)

सत्त्रं स्वर्गाय लोकाय सहस्रसमम् आसत ॥ (४।२)

त एकदा तु मुनयः प्रातर्हुतहुताग्नयः । (५।१)

सत्कृतं सूतम् आसीनं पप्रच्छुर् इदम् आदरात् ॥ (५।२)

ऋषय ऊचुः । (६।१)

त्वया खलु पुराणानि सेतिहासानि चानघ । (६।२)

आख्यातान्य् अप्य् अधीतानि धर्मशास्त्राणि यान्य् उत ॥ (६।३)

यानि वेदविदां श्रेष्ठो भगवान् बादरायणः । (७।१)

अन्ये च मुनयः सूत परावरविदो विदुः ॥ (७।२)

वेत्थ त्वं सौम्य तत् सर्वं तत्त्वतस् तदनुग्रहात् । (८।१)

ब्रूयुः स्निग्धस्य शिष्यस्य गुरवो गुह्यम् अप्युत ॥ (८।२)

तत्र तत्राञ्जसायुष्मन् भवता यद्विनिश्चितम् । (९।१)

पुंसाम् एकान्ततः श्रेयस्तन् नः शंसितुम् अर्हसि ॥ (९।२)

प्रायेणाल्पायुषः सभ्य कलाव् अस्मिन् युगे जनाः । (१०।१)

मन्दाः सुमन्दमतयो मन्दभाग्या ह्य् उपद्रुताः ॥ (१०।२)

भूरीणि भूरिकर्माणि श्रोतव्यानि विभागशः । (११।१)

अतः साधो ऽत्र यत् सारं समुद्धृत्य मनीषया । (११।२)

ब्रूहि भद्राय भूतानां येनात्मा सुप्रसीदति ॥ (११।३)

सूत जानासि भद्रं ते भगवान् सात्वतां पतिः । (१२।१)

देवक्यां वसुदेवस्य जातो यस्य चिकीर्षया ॥ (१२।२)

तन् नः शुश्रूषमाणानाम् अर्हस्य् अङ्गानुवर्णितुम् । (१३।१)

यस्यावतारो भूतानां क्षेमाय च भवाय च ॥ (१३।२)

आपन्नः संसृतिं घोरां यन् नाम विवशो गृणन् । (१४।१)

ततः सद्यो विमुच्येत यद्बिभेति स्वयं भयम् ॥ (१४।२)

यत्पादसंश्रयाः सूत मुनयः प्रशमायनाः । (१५।१)

सद्यः पुनन्त्य् उपस्पृष्टाः स्वर्धुन्यापो ऽनुसेवया ॥ (१५।२)

को वा भगवतस्तस्य पुण्यश्लोकेड्यकर्मणः । (१६।१)

शुद्धिकामो न शृणुयाद्यशः कलिमलापहम् ॥ (१६।२)

तस्य कर्माण्युदाराणि परिगीतानि सूरिभिः । (१७।१)

ब्रूहि नः श्रद्दधानानां लीलया दधतः कलाः ॥ (१७।२)

अथाख्याहि हरेर्धीमन्न् अवतारकथाः शुभाः । (१८।१)

ईला विदधतः स्वैरम् ईश्वरस्यात्ममायया ॥ (१८।२)

वयं तु न वितृप्याम उत्तमश्लोकविक्रमे । (१९।१)

यच्छृण्वतां रसज्ञानां स्वादु स्वादु पदे पदे ॥ (१९।२)

कृतवान् किल कर्माणि सह रामेण केशवः । (२०।१)

अतिमर्त्यानि भगवान् गूढः कपटमानुषः ॥ (२०।२)

कलिम् आगतम् आज्ञाय क्षेत्रे ऽस्मिन् वैष्णवे वयम् । (२१।१)

आसीना दीर्घसत्त्रेण कथायां सक्षणा हरेः ॥ (२१।२)

त्वं नः संदर्शितो धात्रा दुस्तरं निस्तितीर्षताम् । (२२।१)

कलिं सत्त्वहरं पुंसां कर्णधार इवार्णवम् ॥ (२२।२)

ब्रूहि योगेश्वरे कृष्णे ब्रह्मण्ये धर्मवर्मणि । (२३।१)

स्वां काष्ठाम् अधुनोपेते धर्मः कं शरणं गतः ॥ (२३।२)