राजोवाच । (१।१)

ब्रह्मणा चोदितो ब्रह्मन् गुणाख्याने ऽगुणस्य च । (१।२)

यस्मै यस्मै यथा प्राह नारदो देवदर्शनः ॥ (१।३)

एतद्वेदितुम् इच्छामि तत्त्वं तत्त्वविदां वर । (२।१)

हरेरद्भुतवीर्यस्य कथा लोकसुमङ्गलाः ॥ (२।२)

कथयस्व महाभाग यथाहम् अखिलात्मनि । (३।१)

कृष्णे निवेश्य निःसङ्गं मनस्त्यक्ष्ये कलेवरम् ॥ (३।२)

शृण्वतः श्रद्धया नित्यं गृणतश्च स्वचेष्टितम् । (४।१)

कालेन नातिदीर्घेण भगवान् विशते हृदि ॥ (४।२)

प्रविष्टः कर्णरन्ध्रेण स्वानां भावसरोरुहम् । (५।१)

धुनोति शमलं कृष्णः सलिलस्य यथा शरत् ॥ (५।२)

धौतात्मा पुरुषः कृष्णपादमूलं न मुञ्चति । (६।१)

मुक्तसर्वपरिक्लेशः पान्थः स्वशरणं यथा ॥ (६।२)

यदधातुमतो ब्रह्मन् देहारम्भो ऽस्य धातुभिः । (७।१)

यदृच्छया हेतुना वा भवन्तो जानते यथा ॥ (७।२)

आसीद्यदुदरात् पद्मं लोकसंस्थानलक्षणम् । (८।१)

यावान् अयं वै पुरुष इयत्तावयवैः पृथक् । (८।२)

तावान् असाविति प्रोक्तः संस्थावयववान् इव ॥ (८।३)

अजः सृजति भूतानि भूतात्मा यदनुग्रहात् । (९।१)

ददृशे येन तद्रूपं नाभिपद्मसमुद्भवः ॥ (९।२)

स चापि यत्र पुरुषो विश्वस्थित्युद्भवाप्ययः । (१०।१)

मुक्त्वात्ममायां मायेशः शेते सर्वगुहाशयः ॥ (१०।२)

पुरुषावयवैर्लोकाः सपालाः पूर्वकल्पिताः । (११।१)

लोकैरमुष्यावयवाः सपालैरिति शुश्रुम ॥ (११।२)

यावान् कल्पो विकल्पो वा यथा कालो ऽनुमीयते । (१२।१)

भूतभव्यभवच्छब्द आयुर्मानं च यत् सतः ॥ (१२।२)

कालस्यानुगतिर्या तु लक्ष्यते ऽण्वी बृहत्यपि । (१३।१)

यावत्यः कर्मगतयो यादृशीर्द्विजसत्तम ॥ (१३।२)

यस्मिन् कर्मसमावायो यथा येनोपगृह्यते । (१४।१)

गुणानां गुणिनां चैव परिणामम् अभीप्सताम् ॥ (१४।२)

भूपातालककुब्व्योमग्रहनक्षत्रभूभृताम् । (१५।१)

सरित्समुद्रद्वीपानां सम्भवश्चैतदोकसाम् ॥ (१५।२)

प्रमाणम् अण्डकोशस्य बाह्याभ्यन्तरभेदतः । (१६।१)

महतां चानुचरितं वर्णाश्रमविनिश्चयः ॥ (१६।२)

युगानि युगमानं च धर्मो यश्च युगे युगे । (१७।१)

अवतारानुचरितं यदाश्चर्यतमं हरेः ॥ (१७।२)

नृणां साधारणो धर्मः सविशेषश्च यादृशः । (१८।१)

श्रेणीनां राजर्षीणां च धर्मः कृच्छ्रेषु जीवताम् ॥ (१८।२)

तत्त्वानां परिसङ्ख्यानं लक्षणं हेतुलक्षणम् । (१९।१)

पुरुषाराधनविधिर्योगस्याध्यात्मिकस्य च ॥ (१९।२)

योगेश्वरैश्वर्यगतिर्लिङ्गभङ्गस्तु योगिनाम् । (२०।१)

वेदोपवेदधर्माणाम् इतिहासपुराणयोः ॥ (२०।२)

सम्प्लवः सर्वभूतानां विक्रमः प्रतिसङ्क्रमः । (२१।१)

इष्टापूर्तस्य काम्यानां त्रिवर्गस्य च यो विधिः ॥ (२१।२)

यो वानुशायिनां सर्गः पाषण्डस्य च सम्भवः । (२२।१)

आत्मनो बन्धमोक्षौ च व्यवस्थानं स्वरूपतः ॥ (२२।२)

यथात्मतन्त्रो भगवान् विक्रीडत्यात्ममायया । (२३।१)

विसृज्य वा यथा मायाम् उदास्ते साक्षिवद्विभुः ॥ (२३।२)

सर्वम् एतच्च भगवन् पृच्छतो मे ऽनुपूर्वशः । (२४।१)

तत्त्वतो ऽर्हस्युदाहर्तुं प्रपन्नाय महामुने ॥ (२४।२)

अत्र प्रमाणं हि भवान् परमेष्ठी यथात्मभूः । (२५।१)

अपरे चानुतिष्ठन्ति पूर्वेषां पूर्वजैः कृतम् ॥ (२५।२)

न मे ऽसवः परायन्ति ब्रह्मन्न् अनशनादमी । (२६।१)

पिबतो ऽच्युतपीयूषम् तद्वाक्याब्धिविनिःसृतम् ॥ (२६।२)

सूत उवाच । (२७।१)

स उपामन्त्रितो राज्ञा कथायाम् इति सत्पतेः । (२७।२)

ब्रह्मरातो भृशं प्रीतो विष्णुरातेन संसदि ॥ (२७।३)

प्राह भागवतं नाम पुराणं ब्रह्मसंमितम् । (२८।१)

ब्रह्मणे भगवत्प्रोक्तं ब्रह्मकल्प उपागते ॥ (२८।२)

यद्यत् परीक्षिदृषभः पाण्डूनाम् अनुपृच्छति । (२९।१)

आनुपूर्व्येण तत् सर्वम् आख्यातुम् उपचक्रमे ॥ (२९।२)