श्रीभगवान् उवाच । (१।१)

न रोधयति मां योगो न सांख्यं धर्म एव च । (१।२)

न स्वाध्यायस् तपस् त्यागो नेष्टापूर्तं न दक्षिणा ॥ (१।३)

व्रतानि यज्ञश् छन्दांसि तीर्थानि नियमा यमाः । (२।१)

यथावरुन्धे सत्सङ्गः सर्वसङ्गापहो हि माम् ॥ (२।२)

सत्सङ्गेन हि दैतेया यातुधाना मृगाः खगाः । (३।१)

गन्धर्वाप्सरसो नागाः सिद्धाश् चारणगुह्यकाः ॥ (३।२)

विद्याधरा मनुष्येषु वैश्याः शूद्राः स्त्रियो ऽन्त्यजाः । (४।१)

रजस्तमःप्रकृतयस् तस्मिंस् तस्मिन् युगे युगे ॥ (४।२)

बहवो मत्पदं प्राप्तास् त्वाष्ट्रकायाधवादयः । (५।१)

वृषपर्वा बलिर् बाणो मयश् चाथ विभीषणः ॥ (५।२)

सुग्रीवो हनुमान् ऋक्षो गजो गृध्रो वणिक्पथः । (६।१)

व्याधः कुब्जा व्रजे गोप्यो यज्ञपत्न्यस् तथापरे ॥ (६।२)

ते नाधीतश्रुतिगणा नोपासितमहत्तमाः । (७।१)

अव्रतातप्ततपसः मत्सङ्गान् माम् उपागताः ॥ (७।२)

केवलेन हि भावेन गोप्यो गावो नगा मृगाः । (८।१)

ये ऽन्ये मूढधियो नागाः सिद्धा माम् ईयुर् अञ्जसा ॥ (८।२)

यं न योगेन सांख्येन दानव्रततपोऽध्वरैः । (९।१)

व्याख्यास्वाध्यायसंन्यासैः प्राप्नुयाद् यत्नवान् अपि ॥ (९।२)

रामेण सार्धं मथुरां प्रणीते श्वाफल्किना मय्य् अनुरक्तचित्ताः । (१०।१)

विगाढभावेन न मे वियोगतीव्राधयो ऽन्यं ददृशुः सुखाय ॥ (१०।२)

तास् ताः क्षपाः प्रेष्ठतमेन नीता मयैव वृन्दावनगोचरेण । (११।१)

क्षणार्धवत् ताः पुनर् अङ्ग तासां हीना मया कल्पसमा बभूवुः ॥ (११।२)

ता नाविदन् मय्य् अनुषङ्गबद्धधियः स्वम् आत्मानम् अदस् तथेदम् । (१२।१)

यथा समाधौ मुनयो ऽब्धितोये नद्यः प्रविष्टा इव नामरूपे ॥ (१२।२)

मत्कामा रमणं जारम् अस्वरूपविदो ऽबलाः । (१३।१)

ब्रह्म मां परमं प्रापुः सङ्गाच् छतसहस्रशः ॥ (१३।२)

तस्मात् त्वम् उद्धवोत्सृज्य चोदनां प्रतिचोदनाम् । (१४।१)

प्रवृत्तिं च निवृत्तिं च श्रोतव्यं श्रुतम् एव च ॥ (१४।२)

माम् एकम् एव शरणम् आत्मानं सर्वदेहिनाम् । (१५।१)

याहि सर्वात्मभावेन मया स्या ह्य् अकुतोभयः ॥ (१५।२)

श्रीउद्धव उवाच । (१६।१)

संशयः शृण्वतो वाचं तव योगेश्वरेश्वर । (१६।२)

न निवर्तत आत्मस्थो येन भ्राम्यति मे मनः ॥ (१६।३)

श्रीभगवान् उवाच । (१७।१)

स एष जीवो विवरप्रसूतिः प्राणेन घोषेण गुहां प्रविष्टः । (१७।२)

मनोमयं सूक्ष्मम् उपेत्य रूपं मात्रा स्वरो वर्ण इति स्थविष्ठः ॥ (१७।३)

यथानलः खे ऽनिलबन्धुर् उष्मा बलेन दारुण्य् अधिमथ्यमानः । (१८।१)

अणुः प्रजातो हविषा समेधते तथैव मे व्यक्तिर् इयं हि वाणी ॥ (१८।२)

एवं गदिः कर्म गतिर् विसर्गो घ्राणो रसो दृक् स्पर्शः श्रुतिश् च । (१९।१)

संकल्पविज्ञानम् अथाभिमानः सूत्रं रजःसत्त्वतमोविकारः ॥ (१९।२)

अयं हि जीवस् त्रिवृद् अब्जयोनिर् अव्यक्त एको वयसा स आद्यः । (२०।१)

विश्लिष्टशक्तिर् बहुधेव भाति बीजानि योनिं प्रतिपद्य यद्वत् ॥ (२०।२)

यस्मिन्न् इदं प्रोतम् अशेषम् ओतं पटो यथा तन्तुवितानसंस्थः । (२१।१)

य एष संसारतरुः पुराणः कर्मात्मकः पुष्पफले प्रसूते ॥ (२१।२)

द्वे अस्य बीजे शतमूलस् त्रिनालः पञ्चस्कन्धः पञ्चरसप्रसूतिः । (२२।१)

दशैकशाखो द्विसुपर्णनीडस् त्रिवल्कलो द्विफलो ऽर्कं प्रविष्टः ॥ (२२।२)

अदन्ति चैकं फलम् अस्य गृध्रा ग्रामेचरा एकम् अरण्यवासाः । (२३।१)

हंसा य एकं बहुरूपम् इज्यैर् मायामयं वेद स वेद वेदम् ॥ (२३।२)

एवं गुरूपासनयैकभक्त्या विद्याकुठारेण शितेन धीरः । (२४।१)

विवृश्च्य जीवाशयम् अप्रमत्तः सम्पद्य चात्मानम् अथ त्यजास्त्रम् ॥ (२४।२)