श्रीभगवान् उवाच । (१।१)

जितेन्द्रियस्य युक्तस्य जितश्वासस्य योगिनः । (१।२)

मयि धारयतश् चेत उपतिष्ठन्ति सिद्धयः ॥ (१।३)

श्रीउद्धव उवाच । (२।१)

कया धारणया का स्वित् कथं वा सिद्धिर् अच्युत । (२।२)

कति वा सिद्धयो ब्रूहि योगिनां सिद्धिदो भवान् ॥ (२।३)

श्रीभगवान् उवाच । (३।१)

सिद्धयो ऽष्टादश प्रोक्ता धारणा योगपारगैः । (३।२)

तासाम् अष्टौ मत्प्रधाना दशैव गुणहेतवः ॥ (३।३)

अणिमा महिमा मूर्तेर् लघिमा प्राप्तिर् इन्द्रियैः । (४।१)

प्राकाम्यं श्रुतदृष्टेषु शक्तिप्रेरणम् ईशिता ॥ (४।२)

गुणेष्व् असङ्गो वशिता यत्कामस् तद् अवस्यति । (५।१)

एता मे सिद्धयः सौम्य अष्टाव् औत्पत्तिका मताः ॥ (५।२)

अनूर्मिमत्त्वं देहे ऽस्मिन् दूरश्रवणदर्शनम् । (६।१)

मनोजवः कामरूपं परकायप्रवेशनम् ॥ (६।२)

स्वच्छन्दमृत्युर् देवानां सहक्रीडानुदर्शनम् । (७।१)

यथासंकल्पसंसिद्धिर् आज्ञाप्रतिहता गतिः ॥ (७।२)

त्रिकालज्ञत्वम् अद्वंद्वं परचित्ताद्यभिज्ञता । (८।१)

अग्न्यर्काम्बुविषादीनां प्रतिष्टम्भो ऽपराजयः ॥ (८।२)

एताश् चोद्देशतः प्रोक्ता योगधारणसिद्धयः । (९।१)

यया धारणया या स्याद् यथा वा स्यान् निबोध मे ॥ (९।२)

भूतसूक्ष्मात्मनि मयि तन्मात्रं धारयेन् मनः । (१०।१)

अणिमानम् अवाप्नोति तन्मात्रोपासको मम ॥ (१०।२)

महत्तत्त्वात्मनि मयि यथासंस्थं मनो दधत् । (११।१)

महिमानम् अवाप्नोति भूतानां च पृथक् पृथक् ॥ (११।२)

परमाणुमये चित्तं भूतानां मयि रञ्जयन् । (१२।१)

कालसूक्ष्मार्थतां योगी लघिमानम् अवाप्नुयात् ॥ (१२।२)

धारयन् मय्य् अहंतत्त्वे मनो वैकारिके ऽखिलम् । (१३।१)

सर्वेन्द्रियाणाम् आत्मत्वं प्राप्तिं प्राप्नोति मन्मनाः ॥ (१३।२)

महत्य् आत्मनि यः सूत्रे धारयेन् मयि मानसम् । (१४।१)

प्राकाम्यं पारमेष्ठ्यं मे विन्दते ऽव्यक्तजन्मनः ॥ (१४।२)

विष्णौ त्र्यधीश्वरे चित्तं धारयेत् कालविग्रहे । (१५।१)

स ईशित्वम् अवाप्नोति क्षेत्रज्ञक्षेत्रचोदनाम् ॥ (१५।२)

नारायणे तुरीयाख्ये भगवच्छब्दशब्दिते । (१६।१)

मनो मय्य् आदधद् योगी मद्धर्मा वशिताम् इयात् ॥ (१६।२)

निर्गुणे ब्रह्मणि मयि धारयन् विशदं मनः । (१७।१)

परमानन्दम् आप्नोति यत्र कामो ऽवसीयते ॥ (१७।२)

श्वेतद्वीपपतौ चित्तं शुद्धे धर्ममये मयि । (१८।१)

धारयञ्छ्वेततां याति षडूर्मिरहितो नरः ॥ (१८।२)

मय्य् आकाशात्मनि प्राणे मनसा घोषम् उद्वहन् । (१९।१)

तत्रोपलब्धा भूतानां हंसो वाचः शृणोत्य् असौ ॥ (१९।२)

चक्षुस् त्वष्टरि संयोज्य त्वष्टारम् अपि चक्षुषि । (२०।१)

मां तत्र मनसा ध्यायन् विश्वं पश्यति दूरतः ॥ (२०।२)

मनो मयि सुसंयोज्य देहं तदनुवायुना । (२१।१)

मद्धारणानुभावेन तत्रात्मा यत्र वै मनः ॥ (२१।२)

यदा मन उपादाय यद् यद् रूपं बुभूषति । (२२।१)

तत् तद् भवेन् मनोरूपं मद्योगबलम् आश्रयः ॥ (२२।२)

परकायं विशन् सिद्ध आत्मानं तत्र भावयेत् । (२३।१)

पिण्डं हित्वा विशेत् प्राणो वायुभूतः षडङ्घ्रिवत् ॥ (२३।२)

पार्ष्ण्यापीड्य गुदं प्राणं हृदुरःकण्ठमूर्धसु । (२४।१)

आरोप्य ब्रह्मरन्ध्रेण ब्रह्म नीत्वोत्सृजेत् तनुम् ॥ (२४।२)

विहरिष्यन् सुराक्रीडे मत्स्थं सत्त्वं विभावयेत् । (२५।१)

विमानेनोपतिष्ठन्ति सत्त्ववृत्तीः सुरस्त्रियः ॥ (२५।२)

यथा संकल्पयेद् बुद्ध्या यदा वा मत्परः पुमान् । (२६।१)

मयि सत्ये मनो युञ्जंस् तथा तत् समुपाश्नुते ॥ (२६।२)

यो वै मद्भावम् आपन्न ईशितुर् वशितुः पुमान् । (२७।१)

कुतश्चिन् न विहन्येत तस्य चाज्ञा यथा मम ॥ (२७।२)

मद्भक्त्या शुद्धसत्त्वस्य योगिनो धारणाविदः । (२८।१)

तस्य त्रैकालिकी बुद्धिर् जन्ममृत्यूपबृंहिता ॥ (२८।२)

अग्न्यादिभिर् न हन्येत मुनेर् योगमयं वपुः । (२९।१)

मद्योगशान्तचित्तस्य यादसाम् उदकं यथा ॥ (२९।२)

मद्विभूतीर् अभिध्यायन् श्रीवत्सास्त्रविभूषिताः । (३०।१)

ध्वजातपत्रव्यजनैः स भवेद् अपराजितः ॥ (३०।२)

उपासकस्य माम् एवं योगधारणया मुनेः । (३१।१)

सिद्धयः पूर्वकथिता उपतिष्ठन्त्य् अशेषतः ॥ (३१।२)

जितेन्द्रियस्य दान्तस्य जितश्वासात्मनो मुनेः । (३२।१)

मद्धारणां धारयतः का सा सिद्धिः सुदुर्लभा ॥ (३२।२)

अन्तरायान् वदन्त्य् एता युञ्जतो योगम् उत्तमम् । (३३।१)

मया सम्पद्यमानस्य कालक्षपणहेतवः ॥ (३३।२)

जन्मौषधितपोमन्त्रैर् यावतीर् इह सिद्धयः । (३४।१)

योगेनाप्नोति ताः सर्वा नान्यैर् योगगतिं व्रजेत् ॥ (३४।२)

सर्वासाम् अपि सिद्धीनां हेतुः पतिर् अहं प्रभुः । (३५।१)

अहं योगस्य सांख्यस्य धर्मस्य ब्रह्मवादिनाम् ॥ (३५।२)

अहम् आत्मान्तरो बाह्यो ऽनावृतः सर्वदेहिनाम् । (३६।१)

यथा भूतानि भूतेषु बहिर् अन्तः स्वयं तथा ॥ (३६।२)