सूत उवाच । (१।१)

वैयासकेरिति वचस्तत्त्वनिश्चयम् आत्मनः । (१।२)

उपधार्य मतिं कृष्णे औत्तरेयः सतीं व्यधात् ॥ (१।३)

आत्मजायासुतागारपशुद्रविणबन्धुषु । (२।१)

राज्ये चाविकले नित्यं विरूढां ममतां जहौ ॥ (२।२)

पप्रच्छ चेमम् एवार्थं यन् मां पृच्छथ सत्तमाः । (३।१)

कृष्णानुभावश्रवणे श्रद्दधानो महामनाः ॥ (३।२)

संस्थां विज्ञाय संन्यस्य कर्म त्रैवर्गिकं च यत् । (४।१)

वासुदेवे भगवति आत्मभावं दृढं गतः ॥ (४।२)

राजोवाच । (५।१)

समीचीनं वचो ब्रह्मन् सर्वज्ञस्य तवानघ । (५।२)

तमो विशीर्यते मह्यं हरेः कथयतः कथाम् ॥ (५।३)

भूय एव विवित्सामि भगवान् आत्ममायया । (६।१)

यथेदं सृजते विश्वं दुर्विभाव्यम् अधीश्वरैः ॥ (६।२)

यथा गोपायति विभुर्यथा संयच्छते पुनः । (७।१)

यां यां शक्तिम् उपाश्रित्य पुरुशक्तिः परः पुमान् । (७।२)

आत्मानं क्रीडयन् क्रीडन् करोति विकरोति च ॥ (७।३)

नूनं भगवतो ब्रह्मन् हरेरद्भुतकर्मणः । (८।१)

दुर्विभाव्यम् इवाभाति कविभिश्चापि चेष्टितम् ॥ (८।२)

यथा गुणांस्तु प्रकृतेर्युगपत् क्रमशो ऽपि वा । (९।१)

बिभर्ति भूरिशस्त्वेकः कुर्वन् कर्माणि जन्मभिः ॥ (९।२)

विचिकित्सितम् एतन् मे ब्रवीतु भगवान् यथा । (१०।१)

शाब्दे ब्रह्मणि निष्णातः परस्मिंश्च भवान् खलु ॥ (१०।२)

सूत उवाच । (११।१)

इत्युपामन्त्रितो राज्ञा गुणानुकथने हरेः । (११।२)

हृषीकेशम् अनुस्मृत्य प्रतिवक्तुं प्रचक्रमे ॥ (११।३)

श्रीशुक उवाच । (१२।१)

नमः परस्मै पुरुषाय भूयसे सदुद्भवस्थाननिरोधलीलया । (१२।२)

गृहीतशक्तित्रितयाय देहिनाम् अन्तर्भवायानुपलक्ष्यवर्त्मने ॥ (१२।३)

भूयो नमः सद्वृजिनच्छिदे ऽसताम् असम्भवायाखिलसत्त्वमूर्तये । (१३।१)

पुंसां पुनः पारमहंस्य आश्रमे व्यवस्थितानाम् अनुमृग्यदाशुषे ॥ (१३।२)

नमो नमस्ते ऽस्त्वृषभाय सात्वतां विदूरकाष्ठाय मुहुः कुयोगिनाम् । (१४।१)

निरस्तसाम्यातिशयेन राधसा स्वधामनि ब्रह्मणि रंस्यते नमः ॥ (१४।२)

यत्कीर्तनं यत्स्मरणं यदीक्षणं यद्वन्दनं यच्छ्रवणं यदर्हणम् । (१५।१)

लोकस्य सद्यो विधुनोति कल्मषं तस्मै सुभद्रश्रवसे नमो नमः ॥ (१५।२)

विचक्षणा यच्चरणोपसादनात् सङ्गं व्युदस्योभयतो ऽन्तरात्मनः । (१६।१)

विन्दन्ति हि ब्रह्मगतिं गतक्लमास्तस्मै सुभद्रश्रवसे नमो नमः ॥ (१६।२)

तपस्विनो दानपरा यशस्विनो मनस्विनो मन्त्रविदः सुमङ्गलाः । (१७।१)

क्षेमं न विन्दन्ति विना यदर्पणं तस्मै सुभद्रश्रवसे नमो नमः ॥ (१७।२)

किरातहूणान्ध्रपुलिन्दपुल्कशा आभीरशुम्भा यवनाः खसादयः । (१८।१)

ये ऽन्ये च पापा यदपाश्रयाश्रयाः शुध्यन्ति तस्मै प्रभविष्णवे नमः ॥ (१८।२)

स एष आत्मात्मवताम् अधीश्वरस्त्रयीमयो धर्ममयस्तपोमयः । (१९।१)

गतव्यलीकैरजशङ्करादिभिर्वितर्क्यलिङ्गो भगवान् प्रसीदताम् ॥ (१९।२)

श्रियः पतिर्यज्ञपतिः प्रजापतिर्धियां पतिर्लोकपतिर्धरापतिः । (२०।१)

पतिर्गतिश्चान्धकवृष्णिसात्वतां प्रसीदतां मे भगवान् सतां पतिः ॥ (२०।२)

यदङ्घ्र्यभिध्यानसमाधिधौतया धियानुपश्यन्ति हि तत्त्वम् आत्मनः । (२१।१)

वदन्ति चैतत् कवयो यथारुचं स मे मुकुन्दो भगवान् प्रसीदताम् ॥ (२१।२)

प्रचोदिता येन पुरा सरस्वती वितन्वताजस्य सतीं स्मृतिं हृदि । (२२।१)

स्वलक्षणा प्रादुरभूत् किलास्यतः स मे ऋषीणाम् ऋषभः प्रसीदताम् ॥ (२२।२)

भूतैर्महद्भिर्य इमाः पुरो विभुर्निर्माय शेते यदमूषु पूरुषः । (२३।१)

भुङ्क्ते गुणान् षोडश षोडशात्मकः सो ऽलंकृषीष्ट भगवान् वचांसि मे ॥ (२३।२)

नमस्तस्मै भगवते वासुदेवाय वेधसे । (२४।१)

पपुर्ज्ञानमयं सौम्या यन्मुखाम्बुरुहासवम् ॥ (२४।२)

एतदेवात्मभू राजन् नारदाय विपृच्छते । (२५।१)

वेदगर्भो ऽभ्यधात् साक्षाद्यदाह हरिरात्मनः ॥ (२५।२)