श्रीउद्धव उवाच । (१।१)

त्वं ब्रह्म परमं साक्षाद् अनाद्यन्तम् अपावृतम् । (१।२)

सर्वेषाम् अपि भावानां त्राणस्थित्यप्ययोद्भवः ॥ (१।३)

उच्चावचेषु भूतेषु दुर्ज्ञेयम् अकृतात्मभिः । (२।१)

उपासते त्वां भगवन् याथातथ्येन ब्राह्मणाः ॥ (२।२)

येषु येषु च भूतेषु भक्त्या त्वां परमर्षयः । (३।१)

उपासीनाः प्रपद्यन्ते संसिद्धिं तद् वदस्व मे ॥ (३।२)

गूढश् चरसि भूतात्मा भूतानां भूतभावन । (४।१)

न त्वां पश्यन्ति भूतानि पश्यन्तं मोहितानि ते ॥ (४।२)

याः काश् च भूमौ दिवि वै रसायां विभूतयो दिक्षु महाविभूते । (५।१)

ता मह्यम् आख्याह्य् अनुभावितास् ते नमामि ते तीर्थपदाङ्घ्रिपद्मम् ॥ (५।२)

श्रीभगवान् उवाच । (६।१)

एवम् एतद् अहं पृष्टः प्रश्नं प्रश्नविदां वर । (६।२)

युयुत्सुना विनशने सपत्नैर् अर्जुनेन वै ॥ (६।३)

ज्ञात्वा ज्ञातिवधं गर्ह्यम् अधर्मं राज्यहेतुकम् । (७।१)

ततो निवृत्तो हन्ताहं हतो ऽयम् इति लौकिकः ॥ (७।२)

स तदा पुरुषव्याघ्रो युक्त्या मे प्रतिबोधितः । (८।१)

अभ्यभाषत माम् एवं यथा त्वं रणमूर्धनि ॥ (८।२)

अहम् आत्मोद्धवामीषां भूतानां सुहृद् ईश्वरः । (९।१)

अहं सर्वाणि भूतानि तेषां स्थित्युद्भवाप्ययः ॥ (९।२)

अहं गतिर् गतिमतां कालः कलयताम् अहम् । (१०।१)

गुणाणां चाप्य् अहं साम्यं गुणिन्य् औत्पत्तिको गुणः ॥ (१०।२)

गुणिनाम् अप्य् अहं सूत्रं महतां च महान् अहम् । (११।१)

सूक्ष्माणाम् अप्य् अहं जीवो दुर्जयानाम् अहं मनः ॥ (११।२)

हिरण्यगर्भो वेदानां मन्त्राणां प्रणवस् त्रिवृत् । (१२।१)

अक्षराणाम् अकारो ऽस्मि पदानि छन्दसाम् अहम् ॥ (१२।२)

इन्द्रो ऽहं सर्वदेवानां वसूनाम् अस्मि हव्यवाट् । (१३।१)

आदित्यानाम् अहं विष्णू रुद्राणां नीललोहितः ॥ (१३।२)

ब्रह्मर्षीणां भृगुर् अहं राजर्षीणाम् अहं मनुः । (१४।१)

देवर्षीणां नारदो ऽहं हविर्धान्य् अस्मि धेनुषु ॥ (१४।२)

सिद्धेश्वराणां कपिलः सुपर्णो ऽहं पतत्रिणाम् । (१५।१)

प्रजापतीनां दक्षो ऽहं पितॄणाम् अहम् अर्यमा ॥ (१५।२)

मां विद्ध्य् उद्धव दैत्यानां प्रह्लादम् असुरेश्वरम् । (१६।१)

सोमं नक्षत्रौषधीनां धनेशं यक्षरक्षसाम् ॥ (१६।२)

ऐरावतं गजेन्द्राणां यादसां वरुणं प्रभुम् । (१७।१)

तपतां द्युमतां सूर्यं मनुष्याणां च भूपतिम् ॥ (१७।२)

उच्चैःश्रवास् तुरंगाणां धातूनाम् अस्मि काञ्चनम् । (१८।१)

यमः संयमतां चाहम् सर्पाणाम् अस्मि वासुकिः ॥ (१८।२)

नागेन्द्राणाम् अनन्तो ऽहं मृगेन्द्रः शृङ्गिदंष्ट्रिणाम् । (१९।१)

आश्रमाणाम् अहं तुर्यो वर्णानां प्रथमो ऽनघ ॥ (१९।२)

तीर्थानां स्रोतसां गङ्गा समुद्रः सरसाम् अहम् । (२०।१)

आयुधानां धनुर् अहं त्रिपुरघ्नो धनुष्मताम् ॥ (२०।२)

धिष्ण्यानाम् अस्म्य् अहं मेरुर् गहनानां हिमालयः । (२१।१)

वनस्पतीनाम् अश्वत्थ ओषधीनाम् अहं यवः ॥ (२१।२)

पुरोधसां वसिष्ठो ऽहं ब्रह्मिष्ठानां बृहस्पतिः । (२२।१)

स्कन्दो ऽहं सर्वसेनान्याम् अग्रण्यां भगवान् अजः ॥ (२२।२)

यज्ञानां ब्रह्मयज्ञो ऽहं व्रतानाम् अविहिंसनम् । (२३।१)

वाय्वग्न्यर्काम्बुवागात्मा शुचीनाम् अप्य् अहं शुचिः ॥ (२३।२)

योगानाम् आत्मसंरोधो मन्त्रो ऽस्मि विजिगीषताम् । (२४।१)

आन्वीक्षिकी कौशलानां विकल्पः ख्यातिवादिनाम् ॥ (२४।२)

स्त्रीणां तु शतरूपाहं पुंसां स्वायम्भुवो मनुः । (२५।१)

नारायणो मुनीनां च कुमारो ब्रह्मचारिणाम् ॥ (२५।२)

धर्माणाम् अस्मि संन्यासः क्षेमाणाम् अबहिर्मतिः । (२६।१)

गुह्यानां सूनृतं मौनं मिथुनानाम् अजस् त्व् अहम् ॥ (२६।२)

संवत्सरो ऽस्म्य् अनिमिषाम् ऋतूनां मधुमाधवौ । (२७।१)

मासानां मार्गशीर्षो ऽहं नक्षत्राणां तथाभिजित् ॥ (२७।२)

अहं युगानां च कृतं धीराणां देवलो ऽसितः । (२८।१)

द्वैपायनो ऽस्मि व्यासानां कवीनां काव्य आत्मवान् ॥ (२८।२)

वासुदेवो भगवतां त्वं तु भागवतेष्व् अहम् । (२९।१)

किम्पुरुषानां हनुमान् विद्याध्राणां सुदर्शनः ॥ (२९।२)

रत्नानां पद्मरागो ऽस्मि पद्मकोशः सुपेशसाम् । (३०।१)

कुशो ऽस्मि दर्भजातीनां गव्यम् आज्यं हविःष्व् अहम् ॥ (३०।२)

व्यवसायिनाम् अहं लक्ष्मीः कितवानां छलग्रहः । (३१।१)

तितिक्षास्मि तितिक्षूणां सत्त्वं सत्त्ववताम् अहम् ॥ (३१।२)

ओजः सहो बलवतां कर्माहं विद्धि सात्वताम् । (३२।१)

सात्वतां नवमूर्तीनाम् आदिमूर्तिर् अहं परा ॥ (३२।२)

विश्वावसुः पूर्वचित्तिर् गन्धर्वाप्सरसाम् अहम् । (३३।१)

भूधराणाम् अहं स्थैर्यं गन्धमात्रम् अहं भुवः ॥ (३३।२)

अपां रसश् च परमस् तेजिष्ठानां विभावसुः । (३४।१)

प्रभा सूर्येन्दुताराणां शब्दो ऽहं नभसः परः ॥ (३४।२)

ब्रह्मण्यानां बलिर् अहं वीराणाम् अहम् अर्जुनः । (३५।१)

भूतानां स्थितिर् उत्पत्तिर् अहं वै प्रतिसंक्रमः ॥ (३५।२)

गत्युक्त्युत्सर्गोपादानम् आनन्दस्पर्शलक्षणम् । (३६।१)

आस्वादश्रुत्यवघ्राणम् अहं सर्वेन्द्रियेन्द्रियम् ॥ (३६।२)

पृथिवी वायुर् आकाश आपो ज्योतिर् अहं महान् । (३७।१)

विकारः पुरुषो ऽव्यक्तं रजः सत्त्वं तमः परम् । (३७।२)

अहम् एतत् प्रसंख्यानं ज्ञानं तत्त्वविनिश्चयः ॥ (३७।३)

मयेश्वरेण जीवेन गुणेन गुणिना विना । (३८।१)

सर्वात्मनापि सर्वेण न भावो विद्यते क्वचित् ॥ (३८।२)

संख्यानं परमाणूनां कालेन क्रियते मया । (३९।१)

न तथा मे विभूतीनां सृजतो ऽण्डानि कोटिशः ॥ (३९।२)

तेजः श्रीः कीर्तिर् ऐश्वर्यं ह्रीस् त्यागः सौभगं भगः । (४०।१)

वीर्यं तितिक्षा विज्ञानं यत्र यत्र स मे ऽंशकः ॥ (४०।२)

एतास् ते कीर्तिताः सर्वाः संक्षेपेण विभूतयः । (४१।१)

मनोविकारा एवैते यथा वाचाभिधीयते ॥ (४१।२)

वाचं यच्छ मनो यच्छ प्राणान् यच्छेन्द्रियाणि च । (४२।१)

आत्मानम् आत्मना यच्छ न भूयः कल्पसे ऽध्वने ॥ (४२।२)

यो वै वाङ्मनसी सम्यग् असंयच्छन् धिया यतिः । (४३।१)

तस्य व्रतं तपो दानं स्रवत्य् आमघटाम्बुवत् ॥ (४३।२)

तस्माद् वचो मनः प्राणान् नियच्छेन् मत्परायणः । (४४।१)

मद्भक्तियुक्तया बुद्ध्या ततः परिसमाप्यते ॥ (४४।२)