Devatā देवता

Agni

Ṛṣi ऋषि

Nābhāka Kāṇva

Chandas छन्दस्

Mahāpaṅkti

1. Ṛk 1

   अ॒ग्निम॑स्तोष्यृ॒ग्मिय॑म॒ग्निमी॒ळा य॒जध्यै॑ ।
   अ॒ग्निर्दे॒वाँ अ॑नक्तु न उ॒भे हि वि॒दथे॑ क॒विरं॒तश्चर॑ति दू॒त्यं१॒॑ नभं॑तामन्य॒के स॑मे ॥

   अग्निम् अस्तोष्य् ऋग्मियम् अग्निम् ईऌआ यजध्यै |
   अग्निर् देवां अनक्तु न उभे हि विदथे कविर् अन्तश् चरति दूत्यं नभन्ताम् अन्यके समे ||

   agnímastoṣyṛgmíyamagnímīḷā́ yajádhyai ǀ
   agnírdevā́m̐ anaktu na ubhé hí vidáthe kavírantáścárati dūtyám nábhantāmanyaké same ǁ

   agnim astoṣy ṛgmiyam agnim īḷā yajadhyai |
   agnir devāṃ anaktu na ubhe hi vidathe kavir antaś carati dūtyaṃ nabhantām anyake same ||

   अ॒ग्निम् । अ॒स्तो॒षि॒ । ऋ॒ग्मिय॑म् । अ॒ग्निम् । ई॒ळा । य॒जध्यै॑ ।
   अ॒ग्निः । दे॒वान् । अ॒न॒क्तु॒ । नः॒ । उ॒भे इति॑ । हि । वि॒दथे॒ इति॑ । क॒विः । अ॒न्तरिति॑ । चर॑ति । दू॒त्य॑म् । नभ॑न्ताम् । अ॒न्य॒के । स॒मे॒ ॥

   अग्निम् । अस्तोषि । ऋग्मियम् । अग्निम् । ईळा । यजध्यै ।
   अग्निः । देवान् । अनक्तु । नः । उभे इति । हि । विदथे इति । कविः । अन्तरिति । चरति । दूत्यम् । नभन्ताम् । अन्यके । समे ॥

   agním ǀ astoṣi ǀ ṛgmíyam ǀ agním ǀ īḷā́ ǀ yajádhyai ǀ
   agníḥ ǀ devā́n ǀ anaktu ǀ naḥ ǀ ubhé íti ǀ hí ǀ vidáthe íti ǀ kavíḥ ǀ antáríti ǀ cárati ǀ dūtyám ǀ nábhantām ǀ anyaké ǀ same ǁ

   agnim ǀ astoṣi ǀ ṛgmiyam ǀ agnim ǀ īḷā ǀ yajadhyai ǀ
   agniḥ ǀ devān ǀ anaktu ǀ naḥ ǀ ubhe iti ǀ hi ǀ vidathe iti ǀ kaviḥ ǀ antariti ǀ carati ǀ dūtyam ǀ nabhantām ǀ anyake ǀ same ǁ

   8.39.1 Aṣṭaka 6.3.22.1Anuvāka 8.5.134Interpretations

2. Ṛk 2

   न्य॑ग्ने॒ नव्य॑सा॒ वच॑स्त॒नूषु॒ शंस॑मेषां ।
   न्यरा॑ती॒ ररा॑व्णां॒ विश्वा॑ अ॒र्यो अरा॑तीरि॒तो यु॑च्छंत्वा॒मुरो॒ नभं॑तामन्य॒के स॑मे ॥

   न्य् अग्ने नव्यसा वचस् तनूषु शंसम् एषाम् |
   न्य् अराती रराव्णां विश्वा अर्यो अरातीर् इतो युच्छन्त्व् आमुरो नभन्ताम् अन्यके समे ||

   nyágne návyasā vácastanū́ṣu śáṃsameṣām ǀ
   nyárātī rárāvṇām víśvā aryó árātīritó yucchantvāmúro nábhantāmanyaké same ǁ

   ny agne navyasā vacas tanūṣu śaṃsam eṣām |
   ny arātī rarāvṇāṃ viśvā aryo arātīr ito yucchantv āmuro nabhantām anyake same ||

   नि । अ॒ग्ने॒ । नव्य॑सा । वचः॑ । त॒नूषु॑ । शंस॑म् । ए॒षा॒म् ।
   नि । अरा॑तीः । ररा॑व्णाम् । विश्वाः॑ । अ॒र्यः । अरा॑तीः । इ॒तः । यु॒च्छ॒न्तु॒ । आ॒ऽमुरः॑ । नभ॑न्ताम् । अ॒न्य॒के । स॒मे॒ ॥

   नि । अग्ने । नव्यसा । वचः । तनूषु । शंसम् । एषाम् ।
   नि । अरातीः । रराव्णाम् । विश्वाः । अर्यः । अरातीः । इतः । युच्छन्तु । आऽमुरः । नभन्ताम् । अन्यके । समे ॥

   ní ǀ agne ǀ návyasā ǀ vácaḥ ǀ tanū́ṣu ǀ śáṃsam ǀ eṣām ǀ
   ní ǀ árātīḥ ǀ rárāvṇām ǀ víśvāḥ ǀ aryáḥ ǀ árātīḥ ǀ itáḥ ǀ yucchantu ǀ ā-múraḥ ǀ nábhantām ǀ anyaké ǀ same ǁ

   ni ǀ agne ǀ navyasā ǀ vacaḥ ǀ tanūṣu ǀ śaṃsam ǀ eṣām ǀ
   ni ǀ arātīḥ ǀ rarāvṇām ǀ viśvāḥ ǀ aryaḥ ǀ arātīḥ ǀ itaḥ ǀ yucchantu ǀ ā-muraḥ ǀ nabhantām ǀ anyake ǀ same ǁ

   8.39.2 Aṣṭaka 6.3.22.2Anuvāka 8.5.135Interpretations

3. Ṛk 3

   अग्ने॒ मन्मा॑नि॒ तुभ्यं॒ कं घृ॒तं न जु॑ह्व आ॒सनि॑ ।
   स दे॒वेषु॒ प्र चि॑किद्धि॒ त्वं ह्यसि॑ पू॒र्व्यः शि॒वो दू॒तो वि॒वस्व॑तो॒ नभं॑तामन्य॒के स॑मे ॥

   अग्ने मन्मानि तुभ्यं कं घृतं न जुह्व आसनि |
   स देवेषु प्र चिकिद्धि त्वं ह्य् असि पूर्व्यः शिवो दूतो विवस्वतो नभन्ताम् अन्यके समे ||

   ágne mánmāni túbhyam kám ghṛtám ná juhva āsáni ǀ
   sá devéṣu prá cikiddhi tvám hyási pūrvyáḥ śivó dūtó vivásvato nábhantāmanyaké same ǁ

   agne manmāni tubhyaṃ kaṃ ghṛtaṃ na juhva āsani |
   sa deveṣu pra cikiddhi tvaṃ hy asi pūrvyaḥ śivo dūto vivasvato nabhantām anyake same ||

   अग्ने॑ । मन्मा॑नि । तुभ्य॑म् । कम् । घृ॒तम् । न । जु॒ह्वे॒ । आ॒सनि॑ ।
   सः । दे॒वेषु॑ । प्र । चि॒कि॒द्धि॒ । त्वम् । हि । असि॑ । पू॒र्व्यः । शि॒वः । दू॒तः । वि॒वस्व॑तः । नभ॑न्ताम् । अ॒न्य॒के । स॒मे॒ ॥

   अग्ने । मन्मानि । तुभ्यम् । कम् । घृतम् । न । जुह्वे । आसनि ।
   सः । देवेषु । प्र । चिकिद्धि । त्वम् । हि । असि । पूर्व्यः । शिवः । दूतः । विवस्वतः । नभन्ताम् । अन्यके । समे ॥

   ágne ǀ mánmāni ǀ túbhyam ǀ kám ǀ ghṛtám ǀ ná ǀ juhve ǀ āsáni ǀ
   sáḥ ǀ devéṣu ǀ prá ǀ cikiddhi ǀ tvám ǀ hí ǀ ási ǀ pūrvyáḥ ǀ śiváḥ ǀ dūtáḥ ǀ vivásvataḥ ǀ nábhantām ǀ anyaké ǀ same ǁ

   agne ǀ manmāni ǀ tubhyam ǀ kam ǀ ghṛtam ǀ na ǀ juhve ǀ āsani ǀ
   saḥ ǀ deveṣu ǀ pra ǀ cikiddhi ǀ tvam ǀ hi ǀ asi ǀ pūrvyaḥ ǀ śivaḥ ǀ dūtaḥ ǀ vivasvataḥ ǀ nabhantām ǀ anyake ǀ same ǁ

   8.39.3 Aṣṭaka 6.3.22.3Anuvāka 8.5.136Interpretations

4. Ṛk 4

   तत्त॑द॒ग्निर्वयो॑ दधे॒ यथा॑यथा कृप॒ण्यति॑ ।
   ऊ॒र्जाहु॑ति॒र्वसू॑नां॒ शं च॒ योश्च॒ मयो॑ दधे॒ विश्व॑स्यै दे॒वहू॑त्यै॒ नभं॑तामन्य॒के स॑मे ॥

   तत्-तद् अग्निर् वयो दधे यथा-यथा कृपण्यति |
   ऊर्जाहुतिर् वसूनां शं च योश् च मयो दधे विश्वस्यै देवहूत्यै नभन्ताम् अन्यके समे ||

   táttadagnírváyo dadhe yáthāyathā kṛpaṇyáti ǀ
   ūrjā́hutirvásūnām śám ca yóśca máyo dadhe víśvasyai deváhūtyai nábhantāmanyaké same ǁ

   tat-tad agnir vayo dadhe yathā-yathā kṛpaṇyati |
   ūrjāhutir vasūnāṃ śaṃ ca yoś ca mayo dadhe viśvasyai devahūtyai nabhantām anyake same ||

   तत्ऽत॑त् । अ॒ग्निः । वयः॑ । द॒धे॒ । यथा॑ऽयथा । कृ॒प॒ण्यति॑ ।
   ऊ॒र्जाऽआ॑हुतिः । वसू॑नाम् । शम् । च॒ । योः । च॒ । मयः॑ । द॒धे॒ । विश्व॑स्यै । दे॒वऽहू॑त्यै । नभ॑न्ताम् । अ॒न्य॒के । स॒मे॒ ॥

   तत्ऽतत् । अग्निः । वयः । दधे । यथाऽयथा । कृपण्यति ।
   ऊर्जाऽआहुतिः । वसूनाम् । शम् । च । योः । च । मयः । दधे । विश्वस्यै । देवऽहूत्यै । नभन्ताम् । अन्यके । समे ॥

   tát-tat ǀ agníḥ ǀ váyaḥ ǀ dadhe ǀ yáthā-yathā ǀ kṛpaṇyáti ǀ
   ūrjā́-āhutiḥ ǀ vásūnām ǀ śám ǀ ca ǀ yóḥ ǀ ca ǀ máyaḥ ǀ dadhe ǀ víśvasyai ǀ devá-hūtyai ǀ nábhantām ǀ anyaké ǀ same ǁ

   tat-tat ǀ agniḥ ǀ vayaḥ ǀ dadhe ǀ yathā-yathā ǀ kṛpaṇyati ǀ
   ūrjā-āhutiḥ ǀ vasūnām ǀ śam ǀ ca ǀ yoḥ ǀ ca ǀ mayaḥ ǀ dadhe ǀ viśvasyai ǀ deva-hūtyai ǀ nabhantām ǀ anyake ǀ same ǁ

   8.39.4 Aṣṭaka 6.3.22.4Anuvāka 8.5.137Interpretations

5. Ṛk 5

   स चि॑केत॒ सही॑यसा॒ग्निश्चि॒त्रेण॒ कर्म॑णा ।
   स होता॒ शश्व॑तीनां॒ दक्षि॑णाभिर॒भीवृ॑त इ॒नोति॑ च प्रती॒व्यं१॒॑ नभं॑तामन्य॒के स॑मे ॥

   स चिकेत सहीयसाग्निश् चित्रेण कर्मणा |
   स होता शश्वतीनां दक्षिणाभिर् अभीवृत इनोति च प्रतीव्यं नभन्ताम् अन्यके समे ||

   sá ciketa sáhīyasāgníścitréṇa kármaṇā ǀ
   sá hótā śáśvatīnām dákṣiṇābhirabhī́vṛta inóti ca pratīvyám nábhantāmanyaké same ǁ

   sa ciketa sahīyasāgniś citreṇa karmaṇā |
   sa hotā śaśvatīnāṃ dakṣiṇābhir abhīvṛta inoti ca pratīvyaṃ nabhantām anyake same ||

   सः । चि॒के॒त॒ । सही॑यसा । अ॒ग्निः । चि॒त्रेण॑ । कर्म॑णा ।
   सः । होता॑ । शश्व॑तीनाम् । दक्षि॑णाभिः । अ॒भिऽवृ॑तः । इ॒नोति॑ । च॒ । प्र॒ती॒व्य॑म् । नभ॑न्ताम् । अ॒न्य॒के । स॒मे॒ ॥

   सः । चिकेत । सहीयसा । अग्निः । चित्रेण । कर्मणा ।
   सः । होता । शश्वतीनाम् । दक्षिणाभिः । अभिऽवृतः । इनोति । च । प्रतीव्यम् । नभन्ताम् । अन्यके । समे ॥

   sáḥ ǀ ciketa ǀ sáhīyasā ǀ agníḥ ǀ citréṇa ǀ kármaṇā ǀ
   sáḥ ǀ hótā ǀ śáśvatīnām ǀ dákṣiṇābhiḥ ǀ abhí-vṛtaḥ ǀ inóti ǀ ca ǀ pratīvyám ǀ nábhantām ǀ anyaké ǀ same ǁ

   saḥ ǀ ciketa ǀ sahīyasā ǀ agniḥ ǀ citreṇa ǀ karmaṇā ǀ
   saḥ ǀ hotā ǀ śaśvatīnām ǀ dakṣiṇābhiḥ ǀ abhi-vṛtaḥ ǀ inoti ǀ ca ǀ pratīvyam ǀ nabhantām ǀ anyake ǀ same ǁ

   8.39.5 Aṣṭaka 6.3.22.5Anuvāka 8.5.138Interpretations

6. Ṛk 6

   अ॒ग्निर्जा॒ता दे॒वाना॑म॒ग्निर्वे॑द॒ मर्ता॑नामपी॒च्यं॑ ।
   अ॒ग्निः स द्र॑विणो॒दा अ॒ग्निर्द्वारा॒ व्यू॑र्णुते॒ स्वा॑हुतो॒ नवी॑यसा॒ नभं॑तामन्य॒के स॑मे ॥

   अग्निर् जाता देवानाम् अग्निर् वेद मर्तानाम् अपीच्यम् |
   अग्निः स द्रविणोदा अग्निर् द्वारा व्य् ऊर्णुते स्वाहुतो नवीयसा नभन्ताम् अन्यके समे ||

   agnírjātā́ devā́nāmagnírveda mártānāmapīcyám ǀ
   agníḥ sá draviṇodā́ agnírdvā́rā vyū́rṇute svā́huto návīyasā nábhantāmanyaké same ǁ

   agnir jātā devānām agnir veda martānām apīcyam |
   agniḥ sa draviṇodā agnir dvārā vy ūrṇute svāhuto navīyasā nabhantām anyake same ||

   अ॒ग्निः । जा॒ता । दे॒वाना॑म् । अ॒ग्निः । वे॒द॒ । मर्ता॑नाम् । अ॒पी॒च्य॑म् ।
   अ॒ग्निः । सः । द्र॒वि॒णः॒ऽदाः । अ॒ग्निः । द्वारा॑ । वि । ऊ॒र्णु॒ते॒ । सुऽआ॑हुतः । नवी॑यसा । नभ॑न्ताम् । अ॒न्य॒के । स॒मे॒ ॥

   अग्निः । जाता । देवानाम् । अग्निः । वेद । मर्तानाम् । अपीच्यम् ।
   अग्निः । सः । द्रविणःऽदाः । अग्निः । द्वारा । वि । ऊर्णुते । सुऽआहुतः । नवीयसा । नभन्ताम् । अन्यके । समे ॥

   agníḥ ǀ jātā́ ǀ devā́nām ǀ agníḥ ǀ veda ǀ mártānām ǀ apīcyám ǀ
   agníḥ ǀ sáḥ ǀ draviṇaḥ-dā́ḥ ǀ agníḥ ǀ dvā́rā ǀ ví ǀ ūrṇute ǀ sú-āhutaḥ ǀ návīyasā ǀ nábhantām ǀ anyaké ǀ same ǁ

   agniḥ ǀ jātā ǀ devānām ǀ agniḥ ǀ veda ǀ martānām ǀ apīcyam ǀ
   agniḥ ǀ saḥ ǀ draviṇaḥ-dāḥ ǀ agniḥ ǀ dvārā ǀ vi ǀ ūrṇute ǀ su-āhutaḥ ǀ navīyasā ǀ nabhantām ǀ anyake ǀ same ǁ

   8.39.6 Aṣṭaka 6.3.23.1Anuvāka 8.5.139Interpretations

7. Ṛk 7

   अ॒ग्निर्दे॒वेषु॒ संव॑सुः॒ स वि॒क्षु य॒ज्ञिया॒स्वा ।
   स मु॒दा काव्या॑ पु॒रु विश्वं॒ भूमे॑व पुष्यति दे॒वो दे॒वेषु॑ य॒ज्ञियो॒ नभं॑तामन्य॒के स॑मे ॥

   अग्निर् देवेषु संवसुः स विक्षु यज्ञियास्व् आ |
   स मुदा काव्या पुरु विश्वम् भूमेव पुष्यति देवो देवेषु यज्ञियो नभन्ताम् अन्यके समे ||

   agnírdevéṣu sáṃvasuḥ sá vikṣú yajñíyāsvā́ ǀ
   sá mudā́ kā́vyā purú víśvam bhū́meva puṣyati devó devéṣu yajñíyo nábhantāmanyaké same ǁ

   agnir deveṣu saṃvasuḥ sa vikṣu yajñiyāsv ā |
   sa mudā kāvyā puru viśvam bhūmeva puṣyati devo deveṣu yajñiyo nabhantām anyake same ||

   अ॒ग्निः । दे॒वेषु॑ । सम्ऽव॑सुः । सः । वि॒क्षु । य॒ज्ञिया॑सु । आ ।
   सः । मु॒दा । काव्या॑ । पु॒रु । विश्व॑म् । भूम॑ऽइव । पु॒ष्य॒ति॒ । दे॒वः । दे॒वेषु॑ । य॒ज्ञियः॑ । नभ॑न्ताम् । अ॒न्य॒के । स॒मे॒ ॥

   अग्निः । देवेषु । सम्ऽवसुः । सः । विक्षु । यज्ञियासु । आ ।
   सः । मुदा । काव्या । पुरु । विश्वम् । भूमऽइव । पुष्यति । देवः । देवेषु । यज्ञियः । नभन्ताम् । अन्यके । समे ॥

   agníḥ ǀ devéṣu ǀ sám-vasuḥ ǀ sáḥ ǀ vikṣú ǀ yajñíyāsu ǀ ā́ ǀ
   sáḥ ǀ mudā́ ǀ kā́vyā ǀ purú ǀ víśvam ǀ bhū́ma-iva ǀ puṣyati ǀ deváḥ ǀ devéṣu ǀ yajñíyaḥ ǀ nábhantām ǀ anyaké ǀ same ǁ

   agniḥ ǀ deveṣu ǀ sam-vasuḥ ǀ saḥ ǀ vikṣu ǀ yajñiyāsu ǀ ā ǀ
   saḥ ǀ mudā ǀ kāvyā ǀ puru ǀ viśvam ǀ bhūma-iva ǀ puṣyati ǀ devaḥ ǀ deveṣu ǀ yajñiyaḥ ǀ nabhantām ǀ anyake ǀ same ǁ

   8.39.7 Aṣṭaka 6.3.23.2Anuvāka 8.5.140Interpretations

8. Ṛk 8

   यो अ॒ग्निः स॒प्तमा॑नुषः श्रि॒तो विश्वे॑षु॒ सिंधु॑षु ।
   तमाग॑न्म त्रिप॒स्त्यं मं॑धा॒तुर्द॑स्यु॒हंत॑मम॒ग्निं य॒ज्ञेषु॑ पू॒र्व्यं नभं॑तामन्य॒के स॑मे ॥

   यो अग्निः सप्तमानुषः श्रितो विश्वेषु सिन्धुषु |
   तम् आगन्म त्रिपस्त्यम् मन्धातुर् दस्युहन्तमम् अग्निं यज्ञेषु पूर्व्यं नभन्ताम् अन्यके समे ||

   yó agníḥ saptámānuṣaḥ śritó víśveṣu síndhuṣu ǀ
   támā́ganma tripastyám mandhātúrdasyuhántamamagním yajñéṣu pūrvyám nábhantāmanyaké same ǁ

   yo agniḥ saptamānuṣaḥ śrito viśveṣu sindhuṣu |
   tam āganma tripastyam mandhātur dasyuhantamam agniṃ yajñeṣu pūrvyaṃ nabhantām anyake same ||

   यः । अ॒ग्निः । स॒प्तऽमा॑नुषः । श्रि॒तः । विश्वे॑षु । सिन्धु॑षु ।
   तम् । आ । अ॒ग॒न्म॒ । त्रि॒ऽप॒स्त्यम् । म॒न्धा॒तुः । द॒स्यु॒हन्ऽत॑मम् । अ॒ग्निम् । य॒ज्ञेषु॑ । पू॒र्व्यम् । नभ॑न्ताम् । अ॒न्य॒के । स॒मे॒ ॥

   यः । अग्निः । सप्तऽमानुषः । श्रितः । विश्वेषु । सिन्धुषु ।
   तम् । आ । अगन्म । त्रिऽपस्त्यम् । मन्धातुः । दस्युहन्ऽतमम् । अग्निम् । यज्ञेषु । पूर्व्यम् । नभन्ताम् । अन्यके । समे ॥

   yáḥ ǀ agníḥ ǀ saptá-mānuṣaḥ ǀ śritáḥ ǀ víśveṣu ǀ síndhuṣu ǀ
   tám ǀ ā́ ǀ aganma ǀ tri-pastyám ǀ mandhātúḥ ǀ dasyuhán-tamam ǀ agním ǀ yajñéṣu ǀ pūrvyám ǀ nábhantām ǀ anyaké ǀ same ǁ

   yaḥ ǀ agniḥ ǀ sapta-mānuṣaḥ ǀ śritaḥ ǀ viśveṣu ǀ sindhuṣu ǀ
   tam ǀ ā ǀ aganma ǀ tri-pastyam ǀ mandhātuḥ ǀ dasyuhan-tamam ǀ agnim ǀ yajñeṣu ǀ pūrvyam ǀ nabhantām ǀ anyake ǀ same ǁ

   8.39.8 Aṣṭaka 6.3.23.3Anuvāka 8.5.141Interpretations

9. Ṛk 9

   अ॒ग्निस्त्रीणि॑ त्रि॒धातू॒न्या क्षे॑ति वि॒दथा॑ क॒विः ।
   स त्रीँरे॑काद॒शाँ इ॒ह यक्ष॑च्च पि॒प्रय॑च्च नो॒ विप्रो॑ दू॒तः परि॑ष्कृतो॒ नभं॑तामन्य॒के स॑मे ॥

   अग्निस् त्रीणि त्रिधातून्य् आ क्षेति विदथा कविः |
   स त्रींर् एकादशां इह यक्षच् च पिप्रयच् च नो विप्रो दूतः परिष्कृतो नभन्ताम् अन्यके समे ||

   agnístrī́ṇi tridhā́tūnyā́ kṣeti vidáthā kavíḥ ǀ
   sá trī́m̐rekādaśā́m̐ ihá yákṣacca pipráyacca no vípro dūtáḥ páriṣkṛto nábhantāmanyaké same ǁ

   agnis trīṇi tridhātūny ā kṣeti vidathā kaviḥ |
   sa trīṃr ekādaśāṃ iha yakṣac ca piprayac ca no vipro dūtaḥ pariṣkṛto nabhantām anyake same ||

   अ॒ग्निः । त्रीणि॑ । त्रि॒ऽधातू॑नि । आ । क्षे॒ति॒ । वि॒दथा॑ । क॒विः ।
   सः । त्रीन् । ए॒का॒द॒शान् । इ॒ह । यक्ष॑त् । च॒ । पि॒प्रय॑त् । च॒ । नः॒ । विप्रः॑ । दू॒तः । परि॑ऽकृतः । नभ॑न्ताम् । अ॒न्य॒के । स॒मे॒ ॥

   अग्निः । त्रीणि । त्रिऽधातूनि । आ । क्षेति । विदथा । कविः ।
   सः । त्रीन् । एकादशान् । इह । यक्षत् । च । पिप्रयत् । च । नः । विप्रः । दूतः । परिऽकृतः । नभन्ताम् । अन्यके । समे ॥

   agníḥ ǀ trī́ṇi ǀ tri-dhā́tūni ǀ ā́ ǀ kṣeti ǀ vidáthā ǀ kavíḥ ǀ
   sáḥ ǀ trī́n ǀ ekādaśā́n ǀ ihá ǀ yákṣat ǀ ca ǀ pipráyat ǀ ca ǀ naḥ ǀ vípraḥ ǀ dūtáḥ ǀ pári-kṛtaḥ ǀ nábhantām ǀ anyaké ǀ same ǁ

   agniḥ ǀ trīṇi ǀ tri-dhātūni ǀ ā ǀ kṣeti ǀ vidathā ǀ kaviḥ ǀ
   saḥ ǀ trīn ǀ ekādaśān ǀ iha ǀ yakṣat ǀ ca ǀ piprayat ǀ ca ǀ naḥ ǀ vipraḥ ǀ dūtaḥ ǀ pari-kṛtaḥ ǀ nabhantām ǀ anyake ǀ same ǁ

   8.39.9 Aṣṭaka 6.3.23.4Anuvāka 8.5.142Interpretations

10. Ṛk 10

    त्वं नो॑ अग्न आ॒युषु॒ त्वं दे॒वेषु॑ पूर्व्य॒ वस्व॒ एक॑ इरज्यसि ।
    त्वामापः॑ परि॒स्रुतः॒ परि॑ यंति॒ स्वसे॑तवो॒ नभं॑तामन्य॒के स॑मे ॥

    त्वं नो अग्न आयुषु त्वं देवेषु पूर्व्य वस्व एक इरज्यसि |
    त्वाम् आपः परिस्रुतः परि यन्ति स्वसेतवो नभन्ताम् अन्यके समे ||

    tvám no agna āyúṣu tvám devéṣu pūrvya vásva éka irajyasi ǀ
    tvā́mā́paḥ parisrútaḥ pári yanti svásetavo nábhantāmanyaké same ǁ

    tvaṃ no agna āyuṣu tvaṃ deveṣu pūrvya vasva eka irajyasi |
    tvām āpaḥ parisrutaḥ pari yanti svasetavo nabhantām anyake same ||

    त्वम् । नः॒ । अ॒ग्ने॒ । आ॒युषु॑ । त्वम् । दे॒वेषु॑ । पू॒र्व्य॒ । वस्वः॑ । एकः॑ । इ॒र॒ज्य॒सि॒ ।
    त्वाम् । आपः॑ । प॒रि॒ऽस्रुतः॑ । परि॑ । य॒न्ति॒ । स्वऽसे॑तवः । नभ॑न्ताम् । अ॒न्य॒के । स॒मे॒ ॥

    त्वम् । नः । अग्ने । आयुषु । त्वम् । देवेषु । पूर्व्य । वस्वः । एकः । इरज्यसि ।
    त्वाम् । आपः । परिऽस्रुतः । परि । यन्ति । स्वऽसेतवः । नभन्ताम् । अन्यके । समे ॥

    tvám ǀ naḥ ǀ agne ǀ āyúṣu ǀ tvám ǀ devéṣu ǀ pūrvya ǀ vásvaḥ ǀ ékaḥ ǀ irajyasi ǀ
    tvā́m ǀ ā́paḥ ǀ pari-srútaḥ ǀ pári ǀ yanti ǀ svá-setavaḥ ǀ nábhantām ǀ anyaké ǀ same ǁ

    tvam ǀ naḥ ǀ agne ǀ āyuṣu ǀ tvam ǀ deveṣu ǀ pūrvya ǀ vasvaḥ ǀ ekaḥ ǀ irajyasi ǀ
    tvām ǀ āpaḥ ǀ pari-srutaḥ ǀ pari ǀ yanti ǀ sva-setavaḥ ǀ nabhantām ǀ anyake ǀ same ǁ

    8.39.10 Aṣṭaka 6.3.23.5Anuvāka 8.5.143Interpretations

Text, recitation and interpretations from the Ṛgveda database of theveda.org.in.