स्वेदस् तापोपनाहोष्मद्रवभेदाच् चतुर्विधः । (१।१)

तापो ऽग्नितप्तवसनफालहस्ततलादिभिः ॥ (१।२)

उपनाहो वचाकिण्वशताह्वादेवदारुभिः । (२।१)

धान्यैः समस्तैर् गन्धैश् च रास्नैरण्डजटामिषैः ॥ (२।२)

उद्रिक्तलवणैः स्नेहचुक्रतक्रपयःप्लुतैः । (३।१)

केवले पवने श्लेष्मसंसृष्टे सुरसादिभिः ॥ (३।२)

पित्तेन पद्मकाद्यैस् तु शाल्वणाख्यैः पुनः पुनः । (४।१)

स्निग्धोष्णवीर्यैर् मृदुभिश् चर्मपट्टैर् अपूतिभिः ॥ (४।२)

अलाभे वातजित्पत्त्रकौशेयाविकशाटकैः । (५।१)

बद्धं रात्रौ दिवा मुञ्चेन् मुञ्चेद् रात्रौ दिवाकृतम् ॥ (५।२)

ऊष्मा तूत्कारिकालोष्टकपालोपलपांसुभिः । (६।१)

पत्त्रभङ्गेन धान्येन करीषसिकतातुषैः ॥ (६।२)

अनेकोपायसंतप्तैः प्रयोज्यो देशकालतः । (७।१)

शिग्रुवारणकैरण्डकरञ्जसुरसार्जकात् ॥ (७।२)

शिरीषवासावंशार्कमालतीदीर्घवृन्ततः । (८।१)

पत्त्रभङ्गैर् वचाद्यैश् च मांसैश् चानूपवारिजैः ॥ (८।२)

दशमूलेन च पृथक् सहितैर् वा यथामलम् । (९।१)

स्नेहवद्भिः सुराशुक्तवारिक्षीरादिसाधितैः ॥ (९।२)

कुम्भीर् गलन्तीर् नाडीर् वा पूरयित्वा रुजार्दितम् । (१०।१)

वाससाच्छादितं गात्रं स्निग्धं सिञ्चेद् यथासुखम् ॥ (१०।२)

तैर् एव वा द्रवैः पूर्णं कुण्डं सर्वाङ्गगे ऽनिले । (११।१)

अवगाह्यातुरस् तिष्ठेद् अर्शःकृच्छ्रादिरुक्षु च ॥ (११।२)

निवाते ऽन्तर्बहिःस्निग्धो जीर्णान्नः स्वेदम् आचरेत् । (१२।१)

व्याधिव्याधितदेशर्तुवशान् मध्यवरावरम् ॥ (१२।२)

कफार्तो रूक्षणं रूक्षो रूक्षः स्निग्धं कफानिले । (१३।१)

आमाशयगते वायौ कफे पक्वाशयाश्रिते ॥ (१३।२)

रूक्षपूर्वं तथा स्नेहपूर्वं स्थानानुरोधतः । (१४।१)

अल्पं वङ्क्षणयोः स्वल्पं दृङ्मुष्कहृदये न वा ॥ (१४।२)

शीतशूलक्षये स्विन्नो जाते ऽङ्गानां च मार्दवे । (१५।१)

स्याच् छनैर् मृदितः स्नातस् ततः स्नेहविधिं भजेत् ॥ (१५।२)

पित्तास्रकोपतृण्मूर्छास्वराङ्गसदनभ्रमाः । (१६।१)

संधिपीडा ज्वरः श्यावरक्तमण्डलदर्शनम् ॥ (१६।२)

स्वेदातियोगाच् छर्दिश् च तत्र स्तम्भनम् औषधम् । (१७।१)

विषक्षाराग्न्यतीसारच्छर्दिमोहातुरेषु च ॥ (१७।२)

स्वेदनं गुरु तीक्ष्णोष्णं प्रायः स्तम्भनम् अन्यथा । (१८।१)

द्रवस्थिरसरस्निग्धरूक्षसूक्ष्मं च भेषजम् ॥ (१८।२)

स्वेदनं स्तम्भनं श्लक्ष्णं रूक्षसूक्ष्मसरद्रवम् । (१९।१)

प्रायस् तिक्तं कषायं च मधुरं च समासतः ॥ (१९।२)

स्तम्भितः स्याद् बले लब्धे यथोक्तामयसंक्षयात् । (२०।१)

स्तम्भत्वक्स्नायुसंकोचकम्पहृद्वाग्घनुग्रहैः ॥ (२०।२)

पादौष्ठत्वक्करैः श्यावैर् अतिस्तम्भितम् आदिशेत् । (२१।१)

न स्वेदयेद् अतिस्थूलरूक्षदुर्बलमूर्छितान् ॥ (२१।२)

स्तम्भनीयक्षतक्षीणक्षाममद्यविकारिणः । (२२।१)

तिमिरोदरवीसर्पकुष्ठशोषाढ्यरोगिणः ॥ (२२।२)

पीतदुग्धदधिस्नेहमधून् कृतविरेचनान् । (२३।१)

भ्रष्टदग्धगुदग्लानिक्रोधशोकभयार्दितान् ॥ (२३।२)

क्षुत्तृष्णाकामलापाण्डुमेहिनः पित्तपीडितान् । (२४।१)

गर्भिणीं पुष्पितां सूतां मृदु चात्ययिके गदे ॥ (२४।२)

स्वरभेदानिलव्याधिश्लेष्मामस्तम्भगौरवे ॥ (२५।२)

अङ्गमर्दकटीपार्श्वपृष्ठकुक्षिहनुग्रहे । (२६।१)

महत्त्वे मुष्कयोः खल्याम् आयामे वातकण्टके ॥ (२६।२)

मूत्रकृच्छ्रार्बुदग्रन्थिशुक्राघाताढ्यमारुते । (२७।१)

स्वेदं यथायथं कुर्यात् तदौषधविभागतः ॥ (२७।२)

स्वेदो हितस् त्व् अनाग्नेयो वाते मेदःकफावृते । (२८।१)

निवातं गृहम् आयासो गुरुप्रावरणं भयम् ॥ (२८।२)

स्नेहक्लिन्नाः कोष्ठगा धातुगा वा स्रोतोलीना ये च शाखास्थिसंस्थाः । (२९।१)

दोषाः स्वेदैस् ते द्रवीकृत्य कोष्ठं नीताः सम्यक् शुद्धिभिर् निर्ह्रियन्ते ॥ (२९।२)