अथातो भूतविज्ञानीयम् अध्यायं व्याख्यास्यामः । (१।१)

इति ह स्माहुर् आत्रेयादयो महर्षयः । (१।२)

लक्षयेज् ज्ञानविज्ञानवाक्चेष्टाबलपौरुषम् । (१।३)

पुरुषे ऽपौरुषं यत्र तत्र भूतग्रहं वदेत् ॥ (१।४)

भूतस्य रूपप्रकृतिभाषागत्यादिचेष्टितैः । (२।१)

यस्यानुकारं कुरुते तेनाविष्टं तम् आदिशेत् ॥ (२।२)

सो ऽष्टादशविधो देवदानवादिविभेदतः । (३।१)

हेतुस् तदनुषक्तौ तु सद्यः पूर्वकृतो ऽथवा ॥ (३।२)

प्रज्ञापराधः सुतरां तेन कामादिजन्मना । (४।१)

लुप्तधर्मव्रताचारः पूज्यान् अप्य् अतिवर्तते ॥ (४।२)

तं तथा भिन्नमर्यादं पापम् आत्मोपघातिनम् । (५।१)

देवादयो ऽप्य् अनुघ्नन्ति ग्रहाश् छिद्रप्रहारिणः ॥ (५।२)

छिद्रं पापक्रियारम्भः पाको ऽनिष्टस्य कर्मणः । (६।१)

एकस्य शून्ये ऽवस्थानं श्मशानादिषु वा निशि ॥ (६।२)

दिग्वासस्त्वं गुरोर् निन्दा रतेर् अविधिसेवनम् । (७।१)

अशुचेर् देवतार्चादि परसूतकसंकरः ॥ (७।२)

होममन्त्रबलीज्यानां विगुणं परिकर्म च । (८।१)

समासाद् दिनचर्यादिप्रोक्ताचारव्यतिक्रमः ॥ (८।२)

गृह्णन्ति शुक्लप्रतिपत्त्रयोदश्योः सुरा नरम् । (९।१)

शुक्लत्रयोदशीकृष्णद्वादश्योर् दानवा ग्रहाः ॥ (९।२)

गन्धर्वास् तु चतुर्दश्यां द्वादश्यां चोरगाः पुनः । (१०।१)

पञ्चम्यां शुक्लसप्तम्येकादश्योस् तु धनेश्वराः ॥ (१०।२)

शुक्लाष्टपञ्चमीपौर्णमासीषु ब्रह्मराक्षसाः । (११।१)

कृष्णे रक्षःपिशाचाद्या नवद्वादशपर्वसु ॥ (११।२)

दशामावास्ययोर् अष्टनवम्योः पितरो ऽपरे । (१२।१)

गुरुवृद्धादयः प्रायः कालं संध्यासु लक्षयेत् ॥ (१२।२)

देवाःफुल्लपद्मोपममुखं सौम्यदृष्टिम् अकोपनम् । (१३।१)

अल्पवाक्स्वेदविण्मूत्रं भोजनानभिलाषिणम् ॥ (१३।२)

देवद्विजातिपरमं शुचिं संस्कृतवादिनम् । (१४।१)

मीलयन्तं चिरान् नेत्रे सुरभिं वरदायिनम् ॥ (१४।२)

शुक्लमाल्याम्बरसरिच्छैलोच्चभवनप्रियम् । (१५।१)

अनिद्रम् अप्रधृष्यं च विद्याद् देववशीकृतम् ॥ (१५।२)

दैत्याःजिह्मदृष्टिं दुरात्मानं गुरुदेवद्विजद्विषम् । (१६।१)

निर्भयं मानिनं शूरं क्रोधनं व्यवसायिनम् ॥ (१६।२)

रुद्रः स्कन्दो विशाखो ऽहम् इन्द्रो ऽहम् इति वादिनम् । (१७।१)

सुरामांसरुचिं विद्याद् दैत्यग्रहगृहीतकम् ॥ (१७।२)

गन्धर्वाःस्वाचारं सुरभिं हृष्टं गीतनर्तनकारिणम् । (१८।१)

स्नानोद्यानरुचिं रक्तवस्त्रमाल्यानुलेपनम् ॥ (१८।२)

शृङ्गारलीलाभिरतं गन्धर्वाध्युषितं वदेत् । (१९।१)

रक्ताक्षं क्रोधनं स्तब्धदृष्टिं वक्रगतिं चलम् ॥ (१९।२)

श्वसन्तम् अनिशं जिह्वालोलिनं सृक्किणीलिहम् । (२०।१)

प्रियदुग्धगुडस्नानम् अधोवदनशायिनम् ॥ (२०।२)

उरगाधिष्ठितं विद्यात् त्रस्यन्तं चातपत्रतः । (२१।१)

विप्लुतत्रस्तरक्ताक्षं शुभगन्धं सुतेजसम् ॥ (२१।२)

यक्षाःप्रियनृत्यकथागीतस्नानमाल्यानुलेपनम् । (२२।१)

मत्स्यमांसरुचिं हृष्टं तुष्टं बलिनम् अव्यथम् ॥ (२२।२)

चलिताग्रकरं कस्मै किं ददामीति वादिनम् । (२३।१)

रहस्यभाषिणं वैद्यद्विजातिपरिभाविनम् ॥ (२३।२)

अल्परोषं द्रुतगतिं विद्याद् यक्षगृहीतकम् । (२४।१)

ब्रह्मराक्षसहास्यनृत्यप्रियं रौद्रचेष्टं छिद्रप्रहारिणम् ॥ (२४।२)

आक्रोशिनं शीघ्रगतिं देवद्विजभिषग्द्विषम् । (२५।१)

आत्मानं काष्ठशस्त्राद्यैर् घ्नन्तं भोःशब्दवादिनम् ॥ (२५।२)

शास्त्रवेदपठं विद्याद् गृहीतं ब्रह्मराक्षसैः । (२६।१)

राक्षससक्रोधदृष्टिं भ्रूकुटीम् उद्वहन्तं ससंभ्रमम् ॥ (२६।२)

प्रहरन्तं प्रधावन्तं शब्दन्तं भैरवाननम् । (२७।१)

अन्नाद् विनापि बलिनं नष्टनिद्रं निशाचरम् ॥ (२७।२)

निर्लज्जम् अशुचिं शूरं क्रूरं परुषभाषिणम् । (२८।१)

रोषणं रक्तमाल्यस्त्रीरक्तमद्यामिषप्रियम् ॥ (२८।२)

दृष्ट्वा च रक्तं मांसं वालिहानं दशनच्छदौ । (२९।१)

हसन्तम् अन्नकाले च राक्षसाधिष्ठितं वदेत् ॥ (२९।२)

पिशाचअस्वस्थचित्तं नैकत्र तिष्ठन्तं परिधाविनम् । (३०।१)

उच्छिष्टनृत्यगन्धर्वहासमद्यामिषप्रियम् ॥ (३०।२)

निर्भर्त्सनाद् दीनमुखं रुदन्तम् अनिमित्ततः । (३१।१)

नखैर् लिखन्तम् आत्मानं रूक्षध्वस्तवपुःस्वरम् ॥ (३१।२)

आवेदयन्तम् दुःखादि सम्बद्धाबद्धभाषिणम् । (३२।१)

नष्टस्मृतिं शून्यरतिं लोलं नग्नं मलीमसम् ॥ (३२।२)

रथ्याचैलपरीधानं तृणमालाविभूषणम् । (३३।१)

आरोहन्तं च काष्ठाश्वं तथा संकरकूटकम् ॥ (३३।२)

बह्वाशिनं पिशाचेन विजानीयाद् अधिष्ठितम् । (३४।१)

प्रेतप्रेताकृतिक्रियागन्धं भीतम् आहारविद्विषम् ॥ (३४।२)

तृणच्छिदं च प्रेतेन गृहीतं नरम् आदिशेत् । (३५।१)

कुष्माण्डबहुप्रलापं कृष्णास्यं प्रविलम्बितयायिनम् ॥ (३५।२)

शूनप्रलम्बवृषणं कूष्माण्डाधिष्ठितं वदेत् । (३६।१)

निषादगृहीत्वा काष्ठलोष्टादि भ्रमन्तं चीरवाससम् ॥ (३६।२)

नग्नं धावन्तम् उत्त्रस्तदृष्टिं तृणविभूषणम् । (३७।१)

श्मशानशून्यायतनरथ्यैकद्रुमसेविनम् ॥ (३७।२)

तिलान्नमद्यमांसेषु सततं सक्तलोचनम् । (३८।१)

निषादाधिष्ठितं विद्याद् वदन्तं परुषाणि च ॥ (३८।२)

औकिरणयाचन्तम् उदकं चान्नं त्रस्तलोहितलोचनम् । (३९।१)

उग्रवाक्यं च जानीयान् नरम् औकिरणार्दितम् ॥ (३९।२)

वेतालगन्धमाल्यरतिं सत्यवादिनं परिवेपिनम् । (४०।१)

बहुनिद्रं च जानीयाद् वेतालेन वशीकृतम् ॥ (४०।२)

पितृअप्रसन्नदृशं दीनवदनं शुष्कतालुकम् । (४१।१)

चलन्नयनपक्ष्माणं निद्रालुं मन्दपावकम् ॥ (४१।२)

अपसव्यपरीधानं तिलमांसगुडप्रियम् । (४२।१)

स्खलद्वाचं च जानीयात् पितृग्रहवशीकृतम् ॥ (४२।२)

गुरुवृद्धर्षिसिद्धाभिशापचिन्तानुरूपतः । (४३।१)

व्याहाराहारचेष्टाभिर् यथास्वं तद् ग्रहं वदेत् ॥ (४३।२)

कुमारवृन्दानुगतं नग्नम् उद्धतमूर्धजम् । (४४।१)

अस्वस्थमनसं दैर्घ्यकालिकं सग्रहं त्यजेत् ॥ (४४।२)