रक्तो महान् सकलमस् तूर्णकः शकुनाहृतः । (१।१)

सारामुखो दीर्घशूको लोध्रशूकः सुगन्धिकः ॥ (१।२)

पुण्ड्रः पाण्डुः पुण्डरीकः प्रमोदो गौरसारिवौ । (२।१)

काञ्चनो महिषः शूकः दूषकः कुसुमाण्डकः ॥ (२।२)

लाङ्गला लोहवालाख्याः कर्दमाः शीतभीरुकाः । (३।१)

पतङ्गास् तपनीयाश् च ये चान्ये शालयः शुभाः ॥ (३।२)

स्वादुपाकरसाः स्निग्धा वृष्या बद्धाल्पवर्चसः । (४।१)

कषायानुरसाः पथ्या लघवो मूत्रला हिमाः ॥ (४।२)

शूकजेषु वरस् तत्र रक्तस् तृष्णात्रिदोषहा । (५।१)

महांस् तम् अनु कलमस् तं चाप्य् अनु ततः परे ॥ (५।२)

यवका हायनाः पांसुबाष्पनैषधकादयः । (६।१)

स्वादूष्णा गुरवः स्निग्धाः पाके ऽम्लाः श्लेष्मपित्तलाः ॥ (६।२)

सृष्टमूत्रपुरीषाश् च पूर्वं पूर्वं च निन्दिताः । (७।१)

स्निग्धो ग्राही लघुः स्वादुस् त्रिदोषघ्नः स्थिरो हिमः ॥ (७।२)

षष्टिको व्रीहिषु श्रेष्ठो गौरश् चासितगौरतः । (८।१)

ततः क्रमान् महाव्रीहिकृष्णव्रीहिजतूमुखाः ॥ (८।२)

वरकोद्दालकोज्ज्वालचीनशारददर्दुराः ॥ (९।२)

गन्धनाः कुरुविन्दाश् च गुणैर् अल्पान्तराः स्मृताः । (१०।१)

स्वादुर् अम्लविपाको ऽन्यो व्रीहिः पित्तकरो गुरुः ॥ (१०।२)

बहुमूत्रपुरीषोष्मा त्रिदोषस् त्व् एव पाटलः । (११।१)

कङ्गुकोद्रवनीवारश्यामाकादि हिमं लघु ॥ (११।२)

तृणधान्यं पवनकृल् लेखनं कफपित्तहृत् । (१२।१)

भग्नसंधानकृत् तत्र प्रियङ्गुर् बृंहणी गुरुः ॥ (१२।२)

कोरदूषः परं ग्राही स्पर्शः शीतो विषापहः । (१३।१)

रूक्षः शीतो गुरुः स्वादुः सरो विड्वातकृद् यवः ॥ (१३।२)

वृष्यः स्थैर्यकरो मूत्रमेदःपित्तकफाञ् जयेत् । (१४।१)

पीनसश्वासकासोरुस्तम्भकण्ठत्वगामयान् ॥ (१४।२)

न्यूनो यवाद् अनुयवो रूक्षोष्णो वंशजो यवः । (१५।१)

वृष्यः शीतो गुरुः स्निग्धो जीवनो वातपित्तहा ॥ (१५।२)

संधानकारी मधुरो गोधूमः स्थैर्यकृत् सरः । (१६।१)

पथ्या नन्दीमुखी शीता कषायमधुरा लघुः ॥ (१६।२)

मुद्गाढकीमसूरादि शिम्बीधान्यं विबन्धकृत् । (१७।१)

कषायं स्वादु संग्राहि कटुपाकं हिमं लघु ॥ (१७।२)

मेदःश्लेष्मास्रपित्तेषु हितं लेपोपसेकयोः । (१८।१)

वरो ऽत्र मुद्गो ऽल्पचलः कलायस् त्व् अतिवातलः ॥ (१८।२)

राजमाषो ऽनिलकरो रूक्षो बहुशकृद् गुरुः । (१९।१)

उष्णाः कुलत्थाः पाके ऽम्लाः शुक्राश्मश्वासपीनसान् ॥ (१९।२)

कासार्शःकफवातांश् च घ्नन्ति पित्तास्रदाः परम् । (२०।१)

निष्पावो वातपित्तास्रस्तन्यमूत्रकरो गुरुः ॥ (२०।२)

सरो विदाही दृक्शुक्रकफशोफविषापहः । (२१।१)

माषः स्निग्धो बलश्लेष्ममलपित्तकरः सरः ॥ (२१।२)

गुरूष्णो ऽनिलहा स्वादुः शुक्रवृद्धिविरेककृत् । (२२।१)

फलानि माषवद् विद्यात् काकाण्डोलात्मगुप्तयोः ॥ (२२।२)

उष्णस् त्वच्यो हिमः स्पर्शे केश्यो बल्यस् तिलो गुरुः । (२३।१)

अल्पमूत्रः कटुः पाके मेधाग्निकफपित्तकृत् ॥ (२३।२)

स्निग्धोमा स्वादुतिक्तोष्णा कफपित्तकरी गुरुः । (२४।१)

दृक्शुक्रहृत् कटुः पाके तद्वद् बीजं कुसुम्भजम् ॥ (२४।२)

माषो ऽत्र सर्वेष्व् अवरो यवकः शूकजेषु च । (२५।१)

नवं धान्यम् अभिष्यन्दि लघु संवत्सरोषितम् ॥ (२५।२)

शीघ्रजन्म तथा सूप्यं निस्तुषं युक्तिभर्जितम् । (२६।१)

मण्डपेयाविलेपीनाम् ओदनस्य च लाघवम् ॥ (२६।२)

यथापूर्वं शिवस् तत्र मण्डो वातानुलोमनः । (२७।१)

तृड्ग्लानिदोषशेषघ्नः पाचनो धातुसाम्यकृत् ॥ (२७।२)

स्रोतोमार्दवकृत् स्वेदी संधुक्षयति चानलम् । (२८।१)

क्षुत्तृष्णाग्लानिदौर्बल्यकुक्षिरोगज्वरापहा ॥ (२८।२)

मलानुलोमनी पथ्या पेया दीपनपाचनी । (२९।१)

विलेपी ग्राहिणी हृद्या तृष्णाघ्नी दीपनी हिता ॥ (२९।२)

सुधौतः प्रस्रुतः स्विन्नो ऽत्यक्तोष्मा चौदनो लघुः ॥ (३०।२)

यश् चाग्नेयौषधक्वाथसाधितो भृष्टतण्डुलः । (३१।१)

विपरीतो गुरुः क्षीरमांसाद्यैर् यश् च साधितः ॥ (३१।२)

इति द्रव्यक्रियायोगमानाद्यैः सर्वम् आदिशेत् । (३२।१)

बृंहणः प्रीणनो वृष्यश् चक्षुष्यो व्रणहा रसः ॥ (३२।२)

मौद्गस् तु पथ्यः संशुद्धव्रणकण्ठाक्षिरोगिणाम् । (३३।१)

वातानुलोमी कौलत्थो गुल्मतूणीप्रतूणिजित् ॥ (३३।२)

तिलपिण्याकविकृतिः शुष्कशाकं विरूढकम् । (३४।१)

शाण्डाकीवटकं दृग्घ्नं दोषलं ग्लपनं गुरु ॥ (३४।२)

रसाला बृंहणी वृष्या स्निग्धा बल्या रुचिप्रदा । (३५।१)

श्रमक्षुत्तृट्क्लमहरं पानकं प्रीणनं गुरु ॥ (३५।२)

विष्टम्भि मूत्रलं हृद्यं यथाद्रव्यगुणं च तत् । (३६।१)

लाजास् तृट्छर्द्यतीसारमेहमेदःकफच्छिदः ॥ (३६।२)

कासपित्तोपशमना दीपना लघवो हिमाः । (३७।१)

पृथुका गुरवो बल्याः कफविष्टम्भकारिणः ॥ (३७।२)

धाना विष्टम्भिनी रूक्षा तर्पणी लेखनी गुरुः । (३८।१)

सक्तवो लघवः क्षुत्तृट्श्रमनेत्रामयव्रणान् ॥ (३८।२)

घ्नन्ति संतर्पणाः पानात् सद्य एव बलप्रदाः । (३९।१)

नोदकान्तरितान् न द्विर् न निशायां न केवलान् ॥ (३९।२)

न भुक्त्वा न द्विजैश् छित्त्वा सक्तून् अद्यान् न वा बहून् । (४०।१)

पिण्याको ग्लपनो रूक्षो विष्टम्भी दृष्टिदूषणः ॥ (४०।२)

वेसवारो गुरुः स्निग्धो बलोपचयवर्धनः । (४१।१)

मुद्गादिजास् तु गुरवो यथाद्रव्यगुणानुगाः ॥ (४१।२)

एकयोनीं लघून् विद्याद् अपूपान् उत्तरोत्तरम् ॥ (४२।२)

हरिणैणकुरङ्गर्क्षगोकर्णमृगमातृकाः । (४३।१)

शशशम्बरचारुष्कशरभाद्या मृगाः स्मृताः ॥ (४३।२)

लाववार्तीकवर्तीररक्तवर्त्मककुक्कुभाः । (४४।१)

वर्तको वर्तिका चैव तित्तिरिः क्रकरः शिखी । (४५।१)

तथा शारपदेन्द्राभवरटाद्याश् च विष्किराः । (४६।१)

जीवञ्जीवकदात्यूहभृङ्गाह्वशुकसारिकाः ॥ (४६।२)

लट्वाकोकिलहारीतकपोतचटकादयः । (४७।१)

प्रतुदा भेकगोधाहिश्वाविदाद्या बिलेशयाः ॥ (४७।२)

मार्जारमूषकव्याघ्रवृकबभ्रुतरक्षवः ॥ (४८।२)

लोपाकजम्बुकश्येनचाषवान्तादवायसाः । (४९।१)

शशघ्नीभासकुररगृध्रोलूककुलिङ्गकाः ॥ (४९।२)

धूमिका मधुहा चेति प्रसहा मृगपक्षिणः । (५०।१)

वराहमहिषन्यङ्कुरुरुरोहितवारणाः ॥ (५०।२)

सृमरश् चमरः खड्गो गवयश् च महामृगाः । (५१।१)

बलाकोत्क्रोशचक्राह्वमद्गुक्रौञ्चादयो ऽप्चराः । (५२।१)

मत्स्या रोहितपाठीनकूर्मकुम्भीरकर्कटाः ॥ (५२।२)

शुक्तिशङ्खोद्रशम्बूकशफरीवर्मिचन्द्रिकाः । (५३।१)

राजीचिलिचिमाद्याश् च मांसम् इत्य् आहुर् अष्टधा । (५४।१)

योनिष्व् अजावी व्यामिश्रगोचरत्वाद् अनिश्चिते ॥ (५४।२)

आद्यान्त्या जाङ्गलानूपा मध्यौ साधारणौ स्मृतौ । (५५।१)

तत्र बद्धमलाः शीता लघवो जाङ्गला हिताः ॥ (५५।२)

पत्तूरो दीपनस् तिक्तः प्लीहार्शःकफवातजित् । (१००।१)

कृमिकासकफोत्क्लेदान् कासमर्दो जयेत् सरः ॥ (१००।२)

रूक्षोष्णम् अम्लं कौसुम्भं गुरु पित्तकरं सरम् । (१०१।१)

गुरूष्णं सार्षपं बद्धविण्मूत्रं सर्वदोषकृत् ॥ (१०१।२)

यद् बालम् अव्यक्तरसं किंचित् क्षारं सतिक्तकम् । (१०२।१)

तन् मूलकं दोषहरं लघु सोष्णं नियच्छति ॥ (१०२।२)

गुल्मकासक्षयश्वासव्रणनेत्रगलामयान् । (१०३।१)

स्वराग्निसादोदावर्तपीनसांश् च महत् पुनः ॥ (१०३।२)

रसे पाके च कटुकम् उष्णवीर्यं त्रिदोषकृत् । (१०४।१)

गुर्व् अभिष्यन्दि च स्निग्धसिद्धं तद् अपि वातजित् ॥ (१०४।२)

वातश्लेष्महरं शुष्कं सर्वम् आमं तु दोषलम् । (१०५।१)

कटूष्णो वातकफहा पिण्डालुः पित्तवर्धनः ॥ (१०५।२)

कुठेरशिग्रुसुरससुमुखासुरिभूस्तृणम् । (१०६।१)

फणिज्जार्जकजम्बीरप्रभृति ग्राहि शालनम् ॥ (१०६।२)

विदाहि कटु रूक्षोष्णं हृद्यं दीपनरोचनम् । (१०७।१)

दृक्शुक्रकृमिहृत् तीक्ष्णं दोषोत्क्लेशकरं लघु ॥ (१०७।२)

सुरसः सुमुखो नातिविदाही गरशोफहा ॥ (१०८।२)

आर्द्रिका तिक्तमधुरा मूत्रला न च पित्तकृत् । (१०९।१)

लशुनो भृशतीक्ष्णोष्णः कटुपाकरसः सरः ॥ (१०९।२)

हृद्यः केश्यो गुरुर् वृष्यः स्निग्धो रोचनदीपनः । (११०।१)

भग्नसंधानकृद् बल्यो रक्तपित्तप्रदूषणः ॥ (११०।२)

किलासकुष्ठगुल्मार्शोमेहकृमिकफानिलान् । (१११।१)

सहिध्मापीनसश्वासकासान् हन्ति रसायनम् ॥ (१११।२)

पलाण्डुस् तद्गुणन्यूनः श्लेष्मलो नातिपित्तलः । (११२।१)

कफवातार्शसां पथ्यः स्वेदे ऽभ्यवहृतौ तथा ॥ (११२।२)

तीक्ष्णो गृञ्जनको ग्राही पित्तिनां हितकृन् न सः । (११३।१)

दीपनः शूरणो रुच्यः कफघ्नो विशदो लघुः ॥ (११३।२)

विशेषाद् अर्शसां पथ्यो भूकन्दस् त्व् अतिदोषलः । (११४।१)

पत्त्रे पुष्पे फले नाले कन्दे च गुरुता क्रमात् ॥ (११४।२)

वरा शाकेषु जीवन्ती सार्षपं त्व् अवरं परम् । (११५।१)

द्राक्षा फलोत्तमा वृष्या चक्षुष्या सृष्टमूत्रविट् ॥ (११५।२)

स्वादुपाकरसा स्निग्धा सकषाया हिमा गुरुः । (११६।१)

निहन्त्य् अनिलपित्तास्रतिक्तास्यत्वमदात्ययान् ॥ (११६।२)

तृष्णाकासश्रमश्वासस्वरभेदक्षतक्षयान् । (११७।१)

उद्रिक्तपित्ताञ् जयति त्रीन् दोषान् स्वादु दाडिमम् ॥ (११७।२)

पित्ताविरोधि नात्युष्णम् अम्लं वातकफापहम् । (११८।१)

सर्वं हृद्यं लघु स्निग्धं ग्राहि रोचनदीपनम् ॥ (११८।२)

मोचखर्जूरपनसनारिकेलपरूषकम् । (११९।१)

सौवीरबदराङ्कोल्लफल्गुश्लेष्मातकोद्भवम् । (१२०।१)

वातामाभिषुकाक्षोटमुकूलकनिकोचकम् ॥ (१२०।२)

उरुमाणं प्रियालं च बृंहणं गुरु शीतलम् । (१२१।१)

दाहक्षतक्षयहरं रक्तपित्तप्रसादनम् ॥ (१२१।२)

स्वादुपाकरसं स्निग्धं विष्टम्भि कफशुक्रकृत् । (१२२।१)

फलं तु पित्तलं तालं सरं काश्मर्यजं हिमम् ॥ (१२२।२)

शकृन्मूत्रविबन्धघ्नं केश्यं मेध्यं रसायनम् । (१२३।१)

वातामाद्य् उष्णवीर्यं तु कफपित्तकरं सरम् ॥ (१२३।२)

परं वातहरं स्निग्धम् अनुष्णं तु प्रियालजम् । (१२४।१)

प्रियालमज्जा मधुरो वृष्यः पित्तानिलापहः ॥ (१२४।२)

कोलमज्जा गुणैस् तद्वत् तृट्छर्दिकासजिच् च सः । (१२५।१)

पक्वं सुदुर्जरं बिल्वं दोषलं पूतिमारुतम् ॥ (१२५।२)

दीपनं कफवातघ्नं बालं ग्राह्य् उभयं च तत् । (१२६।१)

कपित्थम् आमं कण्ठघ्नं दोषलं दोषघाति तु ॥ (१२६।२)

पक्वं हिध्मावमथुजित् सर्वं ग्राहि विषापहम् । (१२७।१)

जाम्बवं गुरु विष्टम्भि शीतलं भृशवातलम् ॥ (१२७।२)

संग्राहि मूत्रशकृतोर् अकण्ठ्यं कफपित्तजित् । (१२८।१)

वातपित्तास्रकृद् बालं बद्धास्थि कफपित्तकृत् ॥ (१२८।२)

गुर्व् आम्रं वातजित् पक्वं स्वाद्व् अम्लं कफशुक्रकृत् । (१२९।१)

वृक्षाम्लं ग्राहि रूक्षोष्णं वातश्लेष्महरं लघु ॥ (१२९।२)

शम्या गुरूष्णं केशघ्नं रूक्षं पीलु तु पित्तलम् । (१३०।१)

कफवातहरं भेदि प्लीहार्शःकृमिगुल्मनुत् ॥ (१३०।२)

सतिक्तं स्वादु यत् पीलु नात्युष्णं तत् त्रिदोषजित् । (१३१।१)

त्वक् तिक्तकटुका स्निग्धा मातुलुङ्गस्य वातजित् ॥ (१३१।२)

बृंहणं मधुरं मांसं वातपित्तहरं गुरु । (१३२।१)

लघु तत्केसरं कासश्वासहिध्मामदात्ययान् ॥ (१३२।२)

आस्यशोषानिलश्लेष्मविबन्धच्छर्द्यरोचकान् । (१३३।१)

गुल्मोदरार्शःशूलानि मन्दाग्नित्वं च नाशयेत् ॥ (१३३।२)

भल्लातकस्य त्वङ्मांसं बृंहणं स्वादु शीतलम् । (१३४।१)

तदस्थ्यग्निसमं मेध्यं कफवातहरं परम् ॥ (१३४।२)

स्वाद्व् अम्लं शीतम् उष्णं च द्विधा पालेवतं गुरु । (१३५।१)

रुच्यम् अत्यग्निशमनं रुच्यं मधुरम् आरुकम् ॥ (१३५।२)

पक्वम् आशु जरां याति नात्युष्णगुरुदोषलम् । (१३६।१)

द्राक्षापरूषकं चार्द्रम् अम्लं पित्तकफप्रदम् ॥ (१३६।२)

गुरूष्णवीर्यं वातघ्नं सरं सकरमर्दकम् । (१३७।१)

तथाम्लं कोलकर्कन्धुलिकुचाम्रातकारुकम् ॥ (१३७।२)

ऐरावतं दन्तशठं सतूदं मृगलिण्डिकम् । (१३८।१)

नातिपित्तकरं पक्वं शुष्कं च करमर्दकम् ॥ (१३८।२)

दीपनं भेदनं शुष्कम् अम्लीकाकोलयोः फलम् । (१३९।१)

तृष्णाश्रमक्लमच्छेदि लघ्व् इष्टं कफवातयोः ॥ (१३९।२)

फलानाम् अवरं तत्र लिकुचं सर्वदोषकृत् । (१४०।१)

हिमानलोष्णदुर्वातव्याललालादिदूषितम् ॥ (१४०।२)

जन्तुजुष्टं जले मग्नम् अभूमिजम् अनार्तवम् । (१४१।१)

अन्यधान्ययुतं हीनवीर्यं जीर्णतयाति च ॥ (१४१।२)

धान्यं त्यजेत् तथा शाकं रूक्षसिद्धम् अकोमलम् । (१४२।१)

असंजातरसं तद्वच् छुष्कं चान्यत्र मूलकात् ॥ (१४२।२)

प्रायेण फलम् अप्य् एवं तथामं बिल्ववर्जितम् । (१४३।१)

विष्यन्दि लवणं सर्वं सूक्ष्मं सृष्टमलं विदुः ॥ (१४३।२)

वातघ्नं पाकि तीक्ष्णोष्णं रोचनं कफपित्तकृत् । (१४४।१)

सैन्धवं तत्र सस्वादु वृष्यं हृद्यं त्रिदोषनुत् ॥ (१४४।२)

लघ्व् अनुष्णं दृशः पथ्यम् अविदाह्य् अग्निदीपनम् । (१४५।१)

लघु सौवर्चलं हृद्यं सुगन्ध्य् उद्गारशोधनम् ॥ (१४५।२)

कटुपाकं विबन्धघ्नं दीपनीयं रुचिप्रदम् । (१४६।१)

ऊर्ध्वाधःकफवातानुलोमनं दीपनं विडम् ॥ (१४६।२)

विबन्धानाहविष्टम्भशूलगौरवनाशनम् । (१४७।१)

विपाके स्वादु सामुद्रं गुरु श्लेष्मविवर्धनम् ॥ (१४७।२)

सतिक्तकटुकक्षारं तीक्ष्णम् उत्क्लेदि चौद्भिदम् । (१४८।१)

कृष्णे सौवर्चलगुणा लवणे गन्धवर्जिताः ॥ (१४८।२)

रोमकं लघु पांसूत्थं सक्षारं श्लेष्मलं गुरु । (१४९।१)

लवणानां प्रयोगे तु सैन्धवादि प्रयोजयेत् ॥ (१४९।२)

गुल्महृद्ग्रहणीपाण्डुप्लीहानाहगलामयान् । (१५०।१)

श्वासार्शःकफकासांश् च शमयेद् यवशूकजः ॥ (१५०।२)

क्षारः सर्वश् च परमं तीक्ष्णोष्णः कृमिजिल् लघुः । (१५१।१)

पित्तासृग्दूषणः पाकी छेद्य् अहृद्यो विदारणः ॥ (१५१।२)

अपथ्यः कटुलावण्याच् छुक्रौजःकेशचक्षुषाम् । (१५२।१)

हिङ्गु वातकफानाहशूलघ्नं पित्तकोपनम् ॥ (१५२।२)

कटुपाकरसं रुच्यं दीपनं पाचनं लघु । (१५३।१)

कषाया मधुरा पाके रूक्षा विलवणी लघुः ॥ (१५३।२)

दीपनी पाचनी मेध्या वयसः स्थापनी परम् । (१५४।१)

उष्णवीर्या सरायुष्या बुद्धीन्द्रियबलप्रदा ॥ (१५४।२)

कुष्ठवैवर्ण्यवैस्वर्यपुराणविषमज्वरान् । (१५५।१)

शिरोऽक्षिपाण्डुहृद्रोगकामलाग्रहणीगदान् ॥ (१५५।२)

सशोषशोफातीसारमेदमोहवमिकृमीन् । (१५६।१)

विबन्धं स्रोतसां गुल्मम् ऊरुस्तम्भम् अरोचकम् । (१५७।१)

हरीतकी जयेद् व्याधींस् तांस् तांश् च कफवातजान् ॥ (१५७।२)

तद्वद् आमलकं शीतम् अम्लं पित्तकफापहम् । (१५८।१)

कटु पाके हिमं केश्यम् अक्षम् ईषच् च तद्गुणम् ॥ (१५८।२)

इयं रसायनवरा त्रिफलाक्ष्यामयापहा । (१५९।१)

रोपणी त्वग् गदक्लेदमेदोमेहकफास्रजित् ॥ (१५९।२)

सकेसरं चतुर्जातं त्वक्पत्त्रैलं त्रिजातकम् । (१६०।१)

पित्तप्रकोपि तीक्ष्णोष्णं रूक्षं रोचनदीपनम् ॥ (१६०।२)

रसे पाके च कटुकं कफघ्नं मरिचं लघु । (१६१।१)

श्लेष्मला स्वादुशीतार्द्रा गुर्वी स्निग्धा च पिप्पली ॥ (१६१।२)

सा शुष्का विपरीतातः स्निग्धा वृष्या रसे कटुः । (१६२।१)

स्वादुपाकानिलश्लेष्मश्वासकासापहा सरा ॥ (१६२।२)

न ताम् अत्य् उपयुञ्जीत रसायनविधिं विना । (१६३।१)

नागरं दीपनं वृष्यं ग्राहि हृद्यं विबन्धनुत् ॥ (१६३।२)

रुच्यं लघु स्वादुपाकं स्निग्धोष्णं कफवातजित् । (१६४।१)

तद्वद् आर्द्रकम् एतच् च त्रयं त्रिकटुकं जयेत् ॥ (१६४।२)

स्थौल्याग्निसदनश्वासकासश्लीपदपीनसान् । (१६५।१)

चविकापिप्पलीमूलं मरिचाल्पान्तरं गुणैः ॥ (१६५।२)

चित्रको ऽग्निसमः पाके शोफार्शःकृमिकुष्ठहा । (१६६।१)

पञ्चकोलकम् एतच् च मरिचेन विना स्मृतम् ॥ (१६६।२)

गुल्मप्लीहोदरानाहशूलघ्नं दीपनं परम् । (१६७।१)

बिल्वकाश्मर्यतर्कारीपाटलीटुण्टुकैर् महत् ॥ (१६७।२)

जयेत् कषायतिक्तोष्णं पञ्चमूलं कफानिलौ । (१६८।१)

ह्रस्वं बृहत्यंशुमतीद्वयगोक्षुरकैः स्मृतम् ॥ (१६८।२)

स्वादुपाकरसं नातिशीतोष्णं सर्वदोषजित् । (१६९।१)

बलापुनर्नवैरण्डशूर्पपर्णीद्वयेन तु ॥ (१६९।२)

मध्यमं कफवातघ्नं नातिपित्तकरं सरम् । (१७०।१)

अभीरुवीराजीवन्तीजीवकर्षभकैः स्मृतम् ॥ (१७०।२)

जीवनाख्यं तु चक्षुष्यं वृष्यं पित्तानिलापहम् । (१७१।१)

तृणाख्यं पित्तजिद् दर्भकाशेक्षुशरशालिभिः ॥ (१७१।२)

शूकशिम्बीजपक्वान्नमांसशाकफलौषधैः । (१७२।१)

वर्गितैर् अन्नलेशो ऽयम् उक्तो नित्योपयोगिकः ॥ (१७२।२)