जत्रूर्ध्वकफवातोत्थविकाराणाम् अजन्मने । (१।१)

उच्छेदाय च जातानां पिबेद् धूमं सदात्मवान् ॥ (१।२)

स्निग्धो मध्यः स तीक्ष्णश्च वाते वातकफे कफे । (२।१)

योज्यो न रक्तपित्तार्तिविरिक्तोदरमेहिषु ॥ (२।२)

तिमिरोर्ध्वानिलाध्मानरोहिणीदत्तवस्तिषु । (३।१)

मत्स्यमद्यदधिक्षीरक्षौद्रस्नेहविषाशिषु ॥ (३।२)

शिरस्यभिहते पाण्डुरोगे जागरिते निशि । (४।१)

रक्तपित्तान्ध्यबाधिर्यतृण्मूर्छामदमोहकृत् ॥ (४।२)

धूमो ऽकाले ऽतिपीतो वा तत्र शीतो विधिर् हितः । (५।१)

क्षुतजृम्भितविण्मूत्रस्त्रीसेवाशस्त्रकर्मणाम् ॥ (५।२)

हासस्य दन्तकाष्ठस्य धूमम् अन्ते पिबेन् मृदुम् । (६।१)

कालेष्वेषु निशाहारनावनान्ते च मध्यमम् ॥ (६।२)

निद्रानस्याञ्जनस्नानच्छर्दितान्ते विरेचनम् । (७।१)

वस्तिनेत्रसमद्रव्यं त्रिकोशं कारयेद् ऋजु ॥ (७।२)

मूलाग्रे ऽङ्गुष्ठकोलास्थिप्रवेशं धूमनेत्रकम् । (८।१)

तीक्ष्णस्नेहनमध्येषु त्रीणि चत्वारि पञ्च च ॥ (८।२)

अङ्गुलानां क्रमात् पातुः प्रमाणेनाष्टकानि तत् । (९।१)

ऋजूपविष्टस् तच्चेता विवृतास्यस् त्रिपर्ययम् ॥ (९।२)

पिधाय छिद्रम् एकैकं धूमं नासिकया पिबेत् । (१०।१)

प्राक् पिबेन् नासयोत्क्लिष्टे दोषे घ्राणशिरोगते ॥ (१०।२)

उत्क्लेशनार्थं वक्त्रेण विपरीतं तु कण्ठगे । (११।१)

मुखेनैवोद्वमेद् धूमं नासया दृग्विघातकृत् ॥ (११।२)

आक्षेपमोक्षैः पातव्यो धूमस् तु त्रिस् त्रिभिस् त्रिभिः । (१२।१)

अह्नः पिबेत् सकृत् स्निग्धं द्विर् मध्यं शोधनं परम् ॥ (१२।२)

त्रिश्चतुर् वा मृदौ तत्र द्रव्याण्यगुरु गुग्गुलु । (१३।१)

मुस्तस्थौणेयशैलेयनलदोशीरवालकम् ॥ (१३।२)

वराङ्गकौन्तीमधुकबिल्वमज्जैलवालुकम् । (१४।१)

श्रीवेष्टकं सर्जरसो ध्यामकं मदनं प्लवम् ॥ (१४।२)

शल्लकी कुङ्कुमं माषा यवाः कुन्दुरुकस् तिलाः । (१५।१)

स्नेहः फलानां साराणां मेदो मज्जा वसा घृतम् ॥ (१५।२)

शमने शल्लकी लाक्षा पृथ्वीका कमलोत्पलम् । (१६।१)

न्यग्रोधोदुम्बराश्वत्थप्लक्षलोध्रत्वचः सिता ॥ (१६।२)

यष्टीमधु सुवर्णत्वक् पद्मकं रक्तयष्टिका । (१७।१)

गन्धाश् चाकुष्ठतगरास् तीक्ष्णे ज्योतिष्मती निशा ॥ (१७।२)

दशमूलमनोह्वालं लाक्षा श्वेता फलत्रयम् । (१८।१)

गन्धद्रव्याणि तीक्ष्णानि गणो मूर्धविरेचनः ॥ (१८।२)

जले स्थिताम् अहोरात्रम् इषीकां द्वादशाङ्गुलाम् । (१९।१)

पिष्टैर् धूमौषधैर् एवं पञ्चकृत्वः प्रलेपयेत् ॥ (१९।२)

वर्तिर् अङ्गुष्ठकस्थूला यवमध्या यथा भवेत् । (२०।१)

छायाशुष्कां विगर्भां तां स्नेहाभ्यक्तां यथायथम् ॥ (२०।२)

धूमनेत्रार्पितां पातुम् अग्निप्लुष्टां प्रयोजयेत् । (२१।१)

शरावसम्पुटच्छिद्रे नाडीं न्यस्य दशाङ्गुलाम् ॥ (२१।२)

कासः श्वासः पीनसो विस्वरत्वं पूतिर् गन्धः पाण्डुता केशदोषः । (२२।१)

कर्णास्याक्षिस्रावकण्ड्वर्तिजाड्यं तन्द्रा हिध्मा धूमपं न स्पृशन्ति ॥ (२२।२)