अथातो दूतादिविज्ञानीयं शारीरं व्याख्यास्यामः । (१।१)

इति ह स्माहुर् आत्रेयादयो महर्षयः । (१।२)

पाषण्डाश्रमवर्णानां सवर्णाः कर्मसिद्धये । (१।३)

त एव विपरीताः स्युर् दूताः कर्मविपत्तये ॥ (१।४)

दीनं भीतं द्रुतं त्रस्तं रूक्षामङ्गलवादिनम् । (२।१)

शस्त्रिणं दण्डिनं षण्ढं मुण्डश्मश्रुजटाधरम् ॥ (२।२)

अमङ्गलाह्वयं क्रूरकर्माणं मलिनं स्त्रियम् । (३।१)

अनेकं व्याधितं व्यङ्गं रक्तमाल्यानुलेपनम् ॥ (३।२)

तैलपङ्काङ्कितं जीर्णविवर्णार्द्रैकवाससम् । (४।१)

खरोष्ट्रमहिषारूढं काष्ठलोष्टादिमर्दिनम् ॥ (४।२)

नानुगच्छेद् भिषग् दूतम् आह्वयन्तं च दूरतः । (५।१)

अशस्तचिन्तावचने नग्ने छिन्दति भिन्दति ॥ (५।२)

जुह्वाने पावकं पिण्डान् पितृभ्यो निर्वपत्यपि । (६।१)

सुप्ते मुक्तकचे ऽभ्यक्ते रुदत्यप्रयते तथा ॥ (६।२)

वैद्ये दूता मनुष्याणाम् आगच्छन्ति मुमूर्षताम् । (७।१)

विकारसामान्यगुणे देशे काले ऽथवा भिषक् ॥ (७।२)

दूतम् अभ्यागतं दृष्ट्वा नातुरं तम् उपाचरेत् । (८।१)

स्पृशन्तो नाभिनासास्यकेशरोमनखद्विजान् ॥ (८।२)

गुह्यपृष्ठस्तनग्रीवाजठरानामिकाङ्गुलीः । (९।१)

कार्पासबुससीसास्थिकपालमुसलोपलम् ॥ (९।२)

मार्जनीशूर्पचैलान्तभस्माङ्गारदशातुषान् । (१०।१)

रज्जूपानत्तुलापाशम् अन्यद् वा भग्नविच्युतम् ॥ (१०।२)

तत्पूर्वदर्शने दूता व्याहरन्ति मरिष्यताम् । (११।१)

तथार्धरात्रे मध्याह्ने संध्ययोः पर्ववासरे ॥ (११।२)

षष्ठीचतुर्थीनवमीराहुकेतूदयादिषु । (१२।१)

भरणीकृत्तिकाश्लेषापूर्वार्द्रापैत्र्यनैरृते ॥ (१२।२)

यस्मिंश्च दूते ब्रुवति वाक्यम् आतुरसंश्रयम् । (१३।१)

पश्येन् निमित्तम् अशुभं तं च नानुव्रजेद् भिषक् ॥ (१३।२)

तद् यथा विकलः प्रेतः प्रेतालङ्कार एव वा । (१४।१)

छिन्नं दग्धं विनष्टं वा तद्वादीनि वचांसि वा ॥ (१४।२)

रसो वा कटुकस् तीव्रो गन्धो वा कौणपो महान् । (१५।१)

स्पर्शो वा विपुलः क्रूरो यद् वान्यद् अपि तादृशम् ॥ (१५।२)

तत् सर्वम् अभितो वाक्यं वाक्यकाले ऽथवा पुनः । (१६।१)

दूतम् अभ्यागतं दृष्ट्वा नातुरं तम् उपाचरेत् ॥ (१६।२)

हाहाक्रन्दितम् उत्क्रुष्टम् आक्रुष्टं स्खलनं क्षुतम् । (१७।१)

वस्त्रातपत्रपादत्रव्यसनं व्यसनीक्षणम् ॥ (१७।२)

चैत्यध्वजानां पात्राणां पूर्णानां च निमज्जनम् । (१८।१)

हतानिष्टप्रवादाश्च दूषणं भस्मपांसुभिः ॥ (१८।२)

पथश्छेदो ऽहिमार्जारगोधासरटवानरैः । (१९।१)

दीप्तां प्रति दिशं वाचः क्रूराणां मृगपक्षिणाम् ॥ (१९।२)

कृष्णधान्यगुडोदश्विल्लवणासवचर्मणाम् । (२०।१)

सर्षपाणां वसातैलतृणपङ्केन्धनस्य च ॥ (२०।२)

क्लीबक्रूरश्वपाकानां जालवागुरयोरपि । (२१।१)

छर्दितस्य पुरीषस्य पूतिदुर्दर्शनस्य च ॥ (२१।२)

निःसारस्य व्यवायस्य कार्पासादेररेरपि । (२२।१)

शयनासनयानानाम् उत्तानानां तु दर्शनम् ॥ (२२।२)

न्युब्जानाम् इतरेषां च पात्रादीनाम् अशोभनम् । (२३।१)

पुंसंज्ञाः पक्षिणो वामाः स्त्रीसंज्ञा दक्षिणाः शुभाः ॥ (२३।२)

प्रदक्षिणं खगमृगा यान्तो नैवं श्वजम्बुकाः । (२४।१)

अयुग्माश्च मृगाः शस्ताः शस्ता नित्यं च दर्शने ॥ (२४।२)

चाषभासभरद्वाजनकुलच्छागबर्हिणः । (२५।१)

अशुभं सर्वथोलूकबिडालसरटेक्षणम् ॥ (२५।२)

प्रशस्ताः कीर्तने कोलगोधाहिशशजाहकाः । (२६।१)

न दर्शने न विरुते वानरर्क्षावतो ऽन्यथा ॥ (२६।२)

धनुरैन्द्रं च लालाटम् अशुभं शुभम् अन्यतः । (२७।१)

अग्निपूर्णानि पात्राणि भिन्नानि विशिखानि च ॥ (२७।२)

दध्यक्षतादि निर्गच्छद् वक्ष्यमाणं च मङ्गलम् । (२८।१)

वैद्यो मरिष्यतां वेश्म प्रविशन्न् एव पश्यति ॥ (२८।२)

दूताद्यसाधु दृष्ट्वैवं त्यजेद् आर्तम् अतो ऽन्यथा । (२९।१)

करुणाशुद्धसंतानो यत्नतस् तम् उपाचरेत् ॥ (२९।२)

दध्यक्षतेक्षुनिष्पावप्रियङ्गुमधुसर्पिषाम् । (३०।१)

यावकाञ्जनभृङ्गारघण्टादीपसरोरुहाम् ॥ (३०।२)

दूर्वार्द्रमत्स्यमांसानां लाजानां फलभक्षयोः । (३१।१)

रत्नेभपूर्णकुम्भानां कन्यायाः स्यन्दनस्य च ॥ (३१।२)

नरस्य वर्धमानस्य देवतानां नृपस्य च । (३२।१)

शुक्लानां सुमनोवालचामराम्बरवाजिनाम् ॥ (३२।२)

शङ्खसाधुद्विजोष्णीषतोरणस्वस्तिकस्य च । (३३।१)

भूमेः समुद्धतायाश्च वह्नेः प्रज्वलितस्य च ॥ (३३।२)

मनोज्ञस्यान्नपानस्य पूर्णस्य शकटस्य च । (३४।१)

नृभिर् धेन्वाः सवत्साया वडबायाः स्त्रिया अपि ॥ (३४।२)

जीवञ्जीवकसारङ्गसारसप्रियवादिनाम् । (३५।१)

हंसानां शतपत्त्राणां बद्धस्यैकपशोस् तथा ॥ (३५।२)

रुचकादर्शसिद्धार्थरोचनानां च दर्शनम् । (३६।१)

गन्धः सुसुरभिर् वर्णः सुशुक्लो मधुरो रसः ॥ (३६।२)

गोपतेरनुकूलस्य स्वनस् तद्वद् गवाम् अपि । (३७।१)

मृगपक्षिनराणां च शोभिनां शोभना गिरः ॥ (३७।२)

छत्त्रध्वजपताकानाम् उत्क्षेपणम् अभिष्टुतिः । (३८।१)

भेरीमृदङ्गशङ्खानां शब्दाः पुण्याहनिःस्वनाः ॥ (३८।२)

वेदाध्ययनशब्दाश्च सुखो वायुः प्रदक्षिणः । (३९।१)

पथि वेश्मप्रवेशे च विद्याद् आरोग्यलक्षणम् ॥ (३९।२)

इत्युक्तं दूतशकुनं स्वप्नान् ऊर्ध्वं प्रचक्षते । (४०।१)

स्वप्ने मद्यं सह प्रेतैर् यः पिबन् कृष्यते शुना ॥ (४०।२)

स मर्त्यो मृत्युना शीघ्रं ज्वररूपेण नीयते । (४१।१)

रक्तमाल्यवपुर्वस्त्रो यो हसन् ह्रियते स्त्रिया ॥ (४१।२)

सो ऽस्रपित्तेन महिषश्ववराहोष्ट्रगर्दभैः । (४२।१)

यः प्रयाति दिशं याम्यां मरणं तस्य यक्ष्मणा ॥ (४२।२)

लता कण्टकिनी वंशस् तालो वा हृदि जायते । (४३।१)

यस्य तस्याशु गुल्मेन यस्य वह्निम् अनर्चिषम् ॥ (४३।२)

जुह्वतो घृतसिक्तस्य नग्नस्योरसि जायते । (४४।१)

पद्मं स नश्येत् कुष्ठेन चण्डालैः सह यः पिबेत् ॥ (४४।२)

स्नेहं बहुविधं स्वप्ने स प्रमेहेण नश्यति । (४५।१)

उन्मादेन जले मज्जेद् यो नृत्यन् राक्षसैः सह ॥ (४५।२)

अपस्मारेण यो मर्त्यो नृत्यन् प्रेतेन नीयते । (४६।१)

यानं खरोष्ट्रमार्जारकपिशार्दूलशूकरैः ॥ (४६।२)

यस्य प्रेतैः शृगालैर् वा स मृत्योर् वर्तते मुखे । (४७।१)

अपूपशष्कुलीर् जग्ध्वा विबुद्धस् तद्विधं वमन् ॥ (४७।२)

न जीवत्यक्षिरोगाय सूर्येन्दुग्रहणेक्षणम् । (४८।१)

सूर्याचन्द्रमसोः पातदर्शनं दृग्विनाशनम् ॥ (४८।२)

मूर्ध्नि वंशलतादीनां संभवो वयसां तथा । (४९।१)

निलयो मुण्डता काकगृध्राद्यैः परिवारणम् ॥ (४९।२)

तथा प्रेतपिशाचस्त्रीद्रविडान्ध्रगवाशनैः । (५०।१)

सङ्गो वेत्रलतावंशतृणकण्टकसंकटे ॥ (५०।२)

श्वभ्रश्मशानशयनं पतनं पांसुभस्मनोः । (५१।१)

मज्जनं जलपङ्कादौ शीघ्रेण स्रोतसा हृतिः ॥ (५१।२)

नृत्यवादित्रगीतानि रक्तस्रग्वस्त्रधारणम् । (५२।१)

वयोऽङ्गवृद्धिरभ्यङ्गो विवाहः श्मश्रुकर्म च ॥ (५२।२)

पक्वान्नस्नेहमद्याशः प्रच्छर्दनविरेचने । (५३।१)

हिरण्यलोहयोर् लाभः कलिर् बन्धपराजयौ ॥ (५३।२)

उपानद्युगनाशश्च प्रपातः पादचर्मणोः । (५४।१)

हर्षो भृशं प्रकुपितैः पितृभिश्चावभर्त्सनम् ॥ (५४।२)

प्रदीपग्रहनक्षत्रदन्तदैवतचक्षुषाम् । (५५।१)

पतनं वा विनाशो वा भेदनं पर्वतस्य च ॥ (५५।२)

कानने रक्तकुसुमे पापकर्मनिवेशने । (५६।१)

चितान्धकारसंबाधे जनन्यां च प्रवेशनम् ॥ (५६।२)

पातः प्रासादशैलादेर् मत्स्येन ग्रसनं तथा । (५७।१)

काषायिणाम् असौम्यानां नग्नानां दण्डधारिणाम् ॥ (५७।२)

रक्ताक्षाणां च कृष्णानां दर्शनं जातु नेष्यते । (५८।१)

कृष्णा पापाननाचारा दीर्घकेशनखस्तनी ॥ (५८।२)

विरागमाल्यवसना स्वप्ने कालनिशा मता । (५९।१)

एन्त्स्तेहुन्ग् वोन् त्र्￤उमेन्मनोवहानां पूर्णत्वात् स्रोतसां प्रबलैर् मलैः ॥ (५९।२)

दृश्यन्ते दारुणाः स्वप्ना रोगी यैर् याति पञ्चताम् । (६०।१)

अरोगः संशयं प्राप्य कश्चिद् एव विमुच्यते ॥ (६०।२)

दृष्टः श्रुतो ऽनुभूतश्च प्रार्थितः कल्पितस् तथा । (६१।१)

भाविको दोषजश्चेति स्वप्नः सप्तविधो मतः ॥ (६१।२)

Wइर्कुन्ग् वेर्स्छ्। त्रौम्क्लस्सेन्तेष्वाद्या निष्फलाः पञ्च यथास्वप्रकृतिर् दिवा । (६२।१)

विस्मृतो दीर्घह्रस्वो ऽति पूर्वरात्रे चिरात् फलम् ॥ (६२।२)

दृष्टः करोति तुच्छं च गोसर्गे तदहर् महत् । (६३।१)

निद्रया वानुपहतः प्रतीपैर् वचनैस् तथा ॥ (६३।२)

याति पापो ऽल्पफलतां दानहोमजपादिभिः । (६४।१)

अकल्याणम् अपि स्वप्नं दृष्ट्वा तत्रैव यः पुनः ॥ (६४।२)

पश्येत् सौम्यं शुभं तस्य शुभम् एव फलं भवेत् । (६५।१)

देवान् द्विजान् गोवृषभान् जीवतः सुहृदो नृपान् ॥ (६५।२)

साधून् यशस्विनो वह्निम् इद्धं स्वच्छान् जलाशयान् । (६६।१)

कन्याः कुमारकान् गौरान् शुक्लवस्त्रान् सुतेजसः ॥ (६६।२)

नराशनं दीप्ततनुं समन्ताद् रुधिरोक्षितम् । (६७।१)

यः पश्येल् लभते यो वा छत्त्रादर्शविषामिषम् ॥ (६७।२)

शुक्लाः सुमनसो वस्त्रम् अमेध्यालेपनं फलम् । (६८।१)

शैलप्रासादसफलवृक्षसिंहनरद्विपान् ॥ (६८।२)

आरोहेद् गोऽश्वयानं च तरेन् नदह्रदोदधीन् । (६९।१)

पूर्वोत्तरेण गमनम् अगम्यागमनं मृतम् ॥ (६९।२)

संबाधान् निःसृतिर् देवैः पितृभिश्चाभिनन्दनम् । (७०।१)

रोदनं पतितोत्थानं द्विषतां चावमर्दनम् ॥ (७०।२)

यस्य स्याद् आयुरारोग्यं वित्तं बहु च सो ऽश्नुते । (७१।१)

मङ्गलाचारसम्पन्नः परिवारस् तथातुरः ॥ (७१।२)

श्रद्दधानो ऽनुकूलश्च प्रभूतद्रव्यसंग्रहः । (७२।१)

सत्त्वलक्षणसंयोगो भक्तिर् वैद्यद्विजातिषु ॥ (७२।२)

चिकित्सायाम् अनिर्वेदस् तद् आरोग्यस्य लक्षणम् । (७३।१)

इत्यत्र जन्ममरणं यतः सम्यग् उदाहृतम् ॥ (७३।२)

शरीरस्य ततः स्थानं शारीरम् इदम् उच्यते ॥ (७४।१)