अथातो भूतप्रतिषेधं व्याख्यास्यामः । (१।१)

इति ह स्माहुर् आत्रेयादयो महर्षयः । (१।२)

भूतं जयेद् अहिंसेच्छं जपहोमबलिव्रतैः । (१।३)

तपःशीलसमाधानदानज्ञानदयादिभिः ॥ (१।४)

हिङ्गुव्योषालनेपालीलशुनार्कजटाजटाः । (२।१)

अजलोमी सगोलोमी भूतकेशी वचा लता ॥ (२।२)

कुक्कुटी सर्पगन्धाख्या तिलाः काणविकाणिके । (३।१)

वज्रप्रोक्ता वयःस्था च शृङ्गी मोहनवल्ल्यपि ॥ (३।२)

स्रोतोजाञ्जनरक्षोघ्नं रक्षोघ्नं चान्यद् औषधम् । (४।१)

खराश्वश्वाविदुष्ट्रर्क्षगोधानकुलशल्यकात् ॥ (४।२)

द्वीपिमार्जारगोसिंहव्याघ्रसामुद्रसत्त्वतः । (५।१)

चर्मपित्तद्विजनखा वर्गे ऽस्मिन् साधयेद् घृतम् ॥ (५।२)

पुराणम् अथवा तैलं नवं तत् पाननस्ययोः । (६।१)

अभ्यङ्गे च प्रयोक्तव्यम् एषां चूर्णं च धूपने ॥ (६।२)

एभिश्च गुटिकां युञ्ज्याद् अञ्जने सावपीडने । (७।१)

प्रलेपे कल्कम् एतेषां क्वाथं च परिषेचने ॥ (७।२)

प्रयोगो ऽयं ग्रहोन्मादान् सापस्माराञ्छमं नयेत् । (८।१)

गजाह्वापिप्पलीमूलव्योषामलकसर्षपान् ॥ (८।२)

गोधानकुलमार्जारझषपित्तप्रपेषितान् । (९।१)

नावनाभ्यङ्गसेकेषु विदधीत ग्रहापहान् ॥ (९।२)

सिद्धार्थकवचाहिङ्गुप्रियङ्गुरजनीद्वयम् । (१०।१)

मञ्जिष्ठा श्वेतकटभी वरा श्वेताद्रिकर्णिका ॥ (१०।२)

निम्बस्य पत्त्रं बीजं तु नक्तमालशिरीषयोः । (११।१)

सुराह्वं त्र्यूषणं सर्पिर् गोमूत्रे तैश्चतुर्गुणे ॥ (११।२)

सिद्धं सिद्धार्थकं नाम पाने नस्ये च योजितम् । (१२।१)

ग्रहान् सर्वान् निहन्त्याशु विशेषाद् आसुरान् ग्रहान् ॥ (१२।२)

कृत्यालक्ष्मीविषोन्मादज्वरापस्मारपाप्म च । (१३।१)

एभिरेवौषधैर् बस्तवारिणा कल्पितो ऽगदः ॥ (१३।२)

पाननस्याञ्जनालेपस्नानोद्घर्षणयोजितः । (१४।१)

गुणैः पूर्ववद् उद्दिष्टो राजद्वारे च सिद्धिकृत् ॥ (१४।२)

सिद्धार्थकव्योषवचाश्वगन्धा निशाद्वयं हिङ्गुपलाण्डुकन्दः । (१५।१)

बीजं करञ्जात् कुसुमं शिरीषात् फलं च वल्कं च कपित्थवृक्षात् ॥ (१५।२)

समाणिमन्थं सनतं सकुष्ठं श्योणाकमूलं किणिही सिता च । (१६।१)

बस्तस्य मूत्रेण सुभावितं तत् पित्तेन गव्येन गुडान् विदध्यात् ॥ (१६।२)

दुष्टव्रणोन्मादतमोनिशान्धान् उद्बन्धकान् वारिनिमग्नदेहान् । (१७।१)

दिग्धाहतान् दर्पितसर्पदष्टांस् ते साधयन्त्यञ्जननस्यलेपैः ॥ (१७।२)

कार्पासास्थिमयूरपत्त्रबृहतीनिर्माल्यपिण्डीतकत्वङ्मांसीवृषदंशविट्तुषवचाकेशाहिनिर्मोककैः । (१८।१)

नागेन्द्रद्विजशृङ्गहिङ्गुमरिचैस् तुल्यैः कृतं धूपनं । (१८।२)

स्कन्दोन्मादपिशाचराक्षससुरावेशज्वरघ्नं परम् ॥ (१८।३)

त्रिकटुकदलकुङ्कुमग्रन्थिकक्षारसिंहीनिशादारुसिद्धार्थयुग्माम्बुशक्राह्वयैः । (१९।१)

सितलशुनफलत्रयोशीरतिक्तावचातुत्थयष्टीबलालोहितैलाशिलापद्मकैः । (१९।२)

दधितगरमधूकसारप्रियाह्वाविषाख्याविषातार्क्ष्यशैलैः सचव्यामयैः कल्कितैः । (१९।३)

घृतम् अनवम् अशेषमूत्रांशसिद्धं मतं भूतरावाह्वयं पानतस् तद् ग्रहघ्नं परम् ॥ (१९।४)

नतमधुककरञ्जलाक्षापटोलीसमङ्गावचापाटलीहिङ्गुसिद्धार्थसिंहीनिशायुग्लतारोहिणी । (२०।१)

गदशुकतरुपुष्पबीजोग्रयष्ट्यद्रिकर्णीनिकुम्भाग्निबिल्वैः समैः कल्कितैर् मूत्रवर्गेण सिद्धं घृतं । (२०।३)

विधिविनिहितम् आशु सर्वैः क्रमैर् योजितं हन्ति सर्वग्रहोन्मादकुष्ठज्वरांस् तन् महाभूतरावं स्मृतम् ॥ (२०।४)

ग्रहा गृह्णन्ति ये येषु तेषां तेषु विशेषतः । (२१।१)

दिनेषु बलिहोमादीन् प्रयुञ्जीत चिकित्सकः ॥ (२१।२)

स्नानवस्त्रवसामांसमद्यक्षीरगुडादि च । (२२।१)

रोचते यद् यदा येभ्यस् तत् तेषाम् आहरेत् तदा ॥ (२२।२)

रत्नानि गन्धमाल्यानि बीजानि मधुसर्पिषी । (२३।१)

भक्ष्याश्च सर्वे सर्वेषां सामान्यो विधिरित्ययम् ॥ (२३।२)

सुरर्षिगुरुवृद्धेभ्यः सिद्धेभ्यश्च सुरालये । (२४।१)

दिश्युत्तरस्यां तत्रापि देवायोपहरेद् बलिम् ॥ (२४।२)

पश्चिमायां यथाकालं दैत्यभूताय चत्वरे । (२५।१)

गन्धर्वाय गवां मार्गे सवस्त्राभरणं बलिम् ॥ (२५।२)

पितृनागग्रहे नद्यां नागेभ्यः पूर्वदक्षिणे । (२६।१)

यक्षाय यक्षायतने सरितोर् वा समागमे ॥ (२६।२)

चतुष्पथे राक्षसाय भीमेषु गहनेषु च । (२७।१)

रक्षसां दक्षिणस्यां तु पूर्वस्यां ब्रह्मरक्षसाम् ॥ (२७।२)

शून्यालये पिशाचाय पश्चिमां दिशम् आस्थिते । (२८।१)

शुचिशुक्लानि माल्यानि गन्धाः क्षैरेयम् ओदनम् ॥ (२८।२)

दधि छत्त्रं च धवलं देवानां बलिरिष्यते । (२९।१)

हिङ्गुसर्षपषड्ग्रन्थाव्योषैरर्धपलोन्मितैः ॥ (२९।२)

चतुर्गुणे गवां मूत्रे घृतप्रस्थं विपाचयेत् । (३०।१)

तत्पाननावनाभ्यङ्गैर् देवग्रहविमोक्षणम् ॥ (३०।२)

नस्याञ्जनं वचाहिङ्गुलशुनं बस्तवारिणा । (३१।१)

दैत्ये बलिर् बहुफलः सोशीरकमलोत्पलः ॥ (३१।२)

नागानां सुमनोलाजगुडापूपगुडौदनैः । (३२।१)

परमान्नमधुक्षीरकृष्णमृन्नागकेसरैः ॥ (३२।२)

वचापद्मपुरोशीररक्तोत्पलदलैर् बलिः । (३३।१)

श्वेतपत्त्रं च लोध्रं च तगरं नागसर्षपाः ॥ (३३।२)

शीतेन वारिणा पिष्टं नावनाञ्जनयोर् हितम् । (३४।१)

यक्षाणां क्षीरदध्याज्यमिश्रकौदनगुग्गुलु ॥ (३४।२)

देवदारूत्पलं पद्मं उशीरं वस्त्रकाञ्चनम् । (३५।१)

हिरण्यं च बलिर् योज्यो मूत्राज्यक्षीरम् एकतः ॥ (३५।२)

सिद्धं समोन्मितं पाननावनाभ्यञ्जने हितम् । (३६।१)

हरीतकी हरिद्रे द्वे लशुनो मरिचं वचा ॥ (३६।२)

निम्बपत्त्रं च बस्ताम्बुकल्कितं नावनाञ्जनम् । (३७।१)

ब्रह्मरक्षोबलिः सिद्धं यवानां पूर्णम् आढकम् ॥ (३७।२)

तोयस्य कुम्भः पललं छत्त्रं वस्त्रम् विलेपनम् । (३८।१)

गायत्रीविंशतिपलक्वाथे ऽर्धपलिकैः पचेत् ॥ (३८।२)

त्र्यूषणत्रिफलाहिङ्गुषड्ग्रन्थामिशिसर्षपैः । (३९।१)

सनिम्बपत्त्रलशुनैः कुडवान् सप्त सर्पिषः ॥ (३९।२)

गोमूत्रे त्रिगुणे पाननस्याभ्यङ्गेषु तद्धितम् । (४०।१)

रक्षसां पललं शुक्लं कुसुमं मिश्रकौदनम् ॥ (४०।२)

बलिः पक्वाममांसानि निष्पावा रुधिरोक्षिताः । (४१।१)

नक्तमालशिरीषत्वङ्मूलपुष्पफलानि च ॥ (४१।२)

तद्वच्च कृष्णपाटल्या बिल्वमूलं कटुत्रिकम् । (४२।१)

हिङ्ग्विन्द्रयवसिद्धार्थलशुनामलकीफलम् ॥ (४२।२)

नावनाञ्जनयोर् योज्यो बस्तमूत्रयुतो ऽगदः । (४३।१)

एभिरेव घृतं सिद्धं गवां मूत्रे चतुर्गुणे ॥ (४३।२)

रक्षोग्रहान् वारयते पानाभ्यञ्जननावनैः । (४४।१)

पिशाचानां बलिः सीधुः पिण्याकः पललं दधि ॥ (४४।२)

मूलकं लवणं सर्पिः सभूतौदनयावकम् । (४५।१)

हरिद्राद्वयमञ्जिष्ठामिशिसैन्धवनागरम् ॥ (४५।२)

हिङ्गुप्रियङ्गुत्रिकटुलशुनत्रिफला वचा । (४६।१)

पाटलीश्वेतकटभीशिरीषकुसुमैर् घृतम् ॥ (४६।२)

गोमूत्रपादिकं सिद्धं पानाभ्यञ्जनयोर् हितम् । (४७।१)

बस्ताम्बुपिष्टैस् तैरेव योज्यम् अञ्जननावनम् ॥ (४७।२)

देवर्षिपितृगन्धर्वे तीक्ष्णं नस्यादि वर्जयेत् । (४८।१)

सर्पिःपानादि मृद्वस्मिन् भैषज्यम् अवचारयेत् ॥ (४८।२)

ऋते पिशाचात् सर्वेषु प्रतिकूलं च नाचरेत् । (४९।१)

सवैद्यम् आतुरं घ्नन्ति क्रुद्धास् ते हि महौजसः ॥ (४९।२)

ईश्वरं द्वादशभुजं नाथम् आर्यावलोकितम् । (५०।१)

सर्वव्याधिचिकित्सां च जपन् सर्वग्रहान् जयेत् ॥ (५०।२)

तथोन्मादान् अपस्मारान् अन्यं वा चित्तविप्लवम् । (५१।१)

महाविद्यां च मायूरीं शुचिं तं श्रावयेत् सदा ॥ (५१।२)

भूतेशं पूजयेत् स्थाणुं प्रमथाख्यांश्च तद्गणान् । (५२।१)

जपन् सिद्धांश्च तन्मन्त्रान् ग्रहान् सर्वान् अपोहति ॥ (५२।२)

यच्चानन्तरयोः किंचिद् वक्ष्यते ऽध्याययोर् हितम् । (५३।१)

यच्चोक्तम् इह तत् सर्वं प्रयुञ्जीत परस्परम् ॥ (५३।२)