Devatā देवता

Soma Pavamāna

Ṛṣi ऋषि

Reṇu Vaiśvāmitra

Chandas छन्दस्

Jagatī, Triṣṭubh

1. Ṛk 1

   त्रिर॑स्मै स॒प्त धे॒नवो॑ दुदुह्रे स॒त्यामा॒शिरं॑ पू॒र्व्ये व्यो॑मनि ।
   च॒त्वार्य॒न्या भुव॑नानि नि॒र्णिजे॒ चारू॑णि चक्रे॒ यदृ॒तैरव॑र्धत ॥

   त्रिर् अस्मै सप्त धेनवो दुदुह्रे सत्याम् आशिरम् पूर्व्ये व्योमनि |
   चत्वार्य् अन्या भुवनानि निर्णिजे चारूणि चक्रे यद् ऋतैर् अवर्धत ||

   trírasmai saptá dhenávo duduhre satyā́māśíram pūrvyé vyómani ǀ
   catvā́ryanyā́ bhúvanāni nirṇíje cā́rūṇi cakre yádṛtáirávardhata ǁ

   trir asmai sapta dhenavo duduhre satyām āśiram pūrvye vyomani |
   catvāry anyā bhuvanāni nirṇije cārūṇi cakre yad ṛtair avardhata ||

   त्रिः । अ॒स्मै॒ । स॒प्त । धे॒नवः॑ । दु॒दु॒ह्रे॒ । स॒त्याम् । आ॒ऽशिर॑म् । पू॒र्व्ये । विऽओ॑मनि ।
   च॒त्वारि॑ । अ॒न्या । भुव॑नानि । निः॒ऽनिजे॑ । चारू॑णि । च॒क्रे॒ । यत् । ऋ॒तैः । अव॑र्धत ॥

   त्रिः । अस्मै । सप्त । धेनवः । दुदुह्रे । सत्याम् । आऽशिरम् । पूर्व्ये । विऽओमनि ।
   चत्वारि । अन्या । भुवनानि । निःऽनिजे । चारूणि । चक्रे । यत् । ऋतैः । अवर्धत ॥

   tríḥ ǀ asmai ǀ saptá ǀ dhenávaḥ ǀ duduhre ǀ satyā́m ǀ ā-śíram ǀ pūrvyé ǀ ví-omani ǀ
   catvā́ri ǀ anyā́ ǀ bhúvanāni ǀ niḥ-níje ǀ cā́rūṇi ǀ cakre ǀ yát ǀ ṛtáiḥ ǀ ávardhata ǁ

   triḥ ǀ asmai ǀ sapta ǀ dhenavaḥ ǀ duduhre ǀ satyām ǀ ā-śiram ǀ pūrvye ǀ vi-omani ǀ
   catvāri ǀ anyā ǀ bhuvanāni ǀ niḥ-nije ǀ cārūṇi ǀ cakre ǀ yat ǀ ṛtaiḥ ǀ avardhata ǁ

   9.70.1 Aṣṭaka 7.2.23.1Anuvāka 9.4.21Interpretations

2. Ṛk 2

   स भिक्ष॑माणो अ॒मृत॑स्य॒ चारु॑ण उ॒भे द्यावा॒ काव्ये॑ना॒ वि श॑श्रथे ।
   तेजि॑ष्ठा अ॒पो मं॒हना॒ परि॑ व्यत॒ यदी॑ दे॒वस्य॒ श्रव॑सा॒ सदो॑ वि॒दुः ॥

   स भिक्षमाणो अमृतस्य चारुण उभे द्यावा काव्येना वि शश्रथे |
   तेजिष्ठा अपो मंहना परि व्यत यदी देवस्य श्रवसा सदो विदुः ||

   sá bhíkṣamāṇo amṛ́tasya cā́ruṇa ubhé dyā́vā kā́vyenā ví śaśrathe ǀ
   téjiṣṭhā apó maṃhánā pári vyata yádī devásya śrávasā sádo vidúḥ ǁ

   sa bhikṣamāṇo amṛtasya cāruṇa ubhe dyāvā kāvyenā vi śaśrathe |
   tejiṣṭhā apo maṃhanā pari vyata yadī devasya śravasā sado viduḥ ||

   सः । भिक्ष॑माणः । अ॒मृत॑स्य । चारु॑णः । उ॒भे इति॑ । द्यावा॑ । काव्ये॑न । वि । श॒श्र॒थे॒ ।
   तेजि॑ष्ठाः । अ॒पः । मं॒हना॑ । परि॑ । व्य॒त॒ । यदि॑ । दे॒वस्य॑ । श्रव॑सा । सदः॑ । वि॒दुः ॥

   सः । भिक्षमाणः । अमृतस्य । चारुणः । उभे इति । द्यावा । काव्येन । वि । शश्रथे ।
   तेजिष्ठाः । अपः । मंहना । परि । व्यत । यदि । देवस्य । श्रवसा । सदः । विदुः ॥

   sáḥ ǀ bhíkṣamāṇaḥ ǀ amṛ́tasya ǀ cā́ruṇaḥ ǀ ubhé íti ǀ dyā́vā ǀ kā́vyena ǀ ví ǀ śaśrathe ǀ
   téjiṣṭhāḥ ǀ apáḥ ǀ maṃhánā ǀ pári ǀ vyata ǀ yádi ǀ devásya ǀ śrávasā ǀ sádaḥ ǀ vidúḥ ǁ

   saḥ ǀ bhikṣamāṇaḥ ǀ amṛtasya ǀ cāruṇaḥ ǀ ubhe iti ǀ dyāvā ǀ kāvyena ǀ vi ǀ śaśrathe ǀ
   tejiṣṭhāḥ ǀ apaḥ ǀ maṃhanā ǀ pari ǀ vyata ǀ yadi ǀ devasya ǀ śravasā ǀ sadaḥ ǀ viduḥ ǁ

   9.70.2 Aṣṭaka 7.2.23.2Anuvāka 9.4.22Interpretations

3. Ṛk 3

   ते अ॑स्य संतु के॒तवोऽमृ॑त्य॒वोऽदा॑भ्यासो ज॒नुषी॑ उ॒भे अनु॑ ।
   येभि॑र्नृ॒म्णा च॑ दे॒व्या॑ च पुन॒त आदिद्राजा॑नं म॒नना॑ अगृभ्णत ॥

   ते अस्य सन्तु केतवो ऽमृत्यवो ऽदाभ्यासो जनुषी उभे अनु |
   येभिर् नृम्णा च देव्या च पुनत आद् इद् राजानम् मनना अगृभ्णत ||

   té asya santu ketávó’mṛtyavó’dābhyāso janúṣī ubhé ánu ǀ
   yébhirnṛmṇā́ ca devyā́ ca punatá ā́dídrā́jānam manánā agṛbhṇata ǁ

   te asya santu ketavo 'mṛtyavo 'dābhyāso januṣī ubhe anu |
   yebhir nṛmṇā ca devyā ca punata ād id rājānam mananā agṛbhṇata ||

   ते । अ॒स्य॒ । स॒न्तु॒ । के॒तवः॑ । अमृ॑त्यवः । अदा॑भ्यासः । ज॒नुषी॒ इति॑ । उ॒भे इति॑ । अनु॑ ।
   येभिः॑ । नृ॒म्णा । च॒ । दे॒व्या॑ । च॒ । पु॒न॒ते । आत् । इत् । राजा॑नम् । म॒ननाः॑ । अ॒गृ॒भ्ण॒त॒ ॥

   ते । अस्य । सन्तु । केतवः । अमृत्यवः । अदाभ्यासः । जनुषी इति । उभे इति । अनु ।
   येभिः । नृम्णा । च । देव्या । च । पुनते । आत् । इत् । राजानम् । मननाः । अगृभ्णत ॥

   té ǀ asya ǀ santu ǀ ketávaḥ ǀ ámṛtyavaḥ ǀ ádābhyāsaḥ ǀ janúṣī íti ǀ ubhé íti ǀ ánu ǀ
   yébhiḥ ǀ nṛmṇā́ ǀ ca ǀ devyā́ ǀ ca ǀ punaté ǀ ā́t ǀ ít ǀ rā́jānam ǀ manánāḥ ǀ agṛbhṇata ǁ

   te ǀ asya ǀ santu ǀ ketavaḥ ǀ amṛtyavaḥ ǀ adābhyāsaḥ ǀ januṣī iti ǀ ubhe iti ǀ anu ǀ
   yebhiḥ ǀ nṛmṇā ǀ ca ǀ devyā ǀ ca ǀ punate ǀ āt ǀ it ǀ rājānam ǀ mananāḥ ǀ agṛbhṇata ǁ

   9.70.3 Aṣṭaka 7.2.23.3Anuvāka 9.4.23Interpretations

4. Ṛk 4

   स मृ॒ज्यमा॑नो द॒शभिः॑ सु॒कर्म॑भिः॒ प्र म॑ध्य॒मासु॑ मा॒तृषु॑ प्र॒मे सचा॑ ।
   व्र॒तानि॑ पा॒नो अ॒मृत॑स्य॒ चारु॑ण उ॒भे नृ॒चक्षा॒ अनु॑ पश्यते॒ विशौ॑ ॥

   स मृज्यमानो दशभिः सुकर्मभिः प्र मध्यमासु मातृषु प्रमे सचा |
   व्रतानि पानो अमृतस्य चारुण उभे नृचक्षा अनु पश्यते विशौ ||

   sá mṛjyámāno daśábhiḥ sukármabhiḥ prá madhyamā́su mātṛ́ṣu pramé sácā ǀ
   vratā́ni pānó amṛ́tasya cā́ruṇa ubhé nṛcákṣā ánu paśyate víśau ǁ

   sa mṛjyamāno daśabhiḥ sukarmabhiḥ pra madhyamāsu mātṛṣu prame sacā |
   vratāni pāno amṛtasya cāruṇa ubhe nṛcakṣā anu paśyate viśau ||

   सः । मृ॒ज्यमा॑नः । द॒शऽभिः॑ । सु॒कर्म॑ऽभिः । प्र । म॒ध्य॒मासु॑ । मा॒तृषु॑ । प्र॒ऽमे । सचा॑ ।
   व्र॒तानि॑ । पा॒नः । अ॒मृत॑स्य । चारु॑णः । उ॒भे इति॑ । नृ॒ऽचक्षाः॑ । अनु॑ । प॒श्य॒ते॒ । विशौ॑ ॥

   सः । मृज्यमानः । दशऽभिः । सुकर्मऽभिः । प्र । मध्यमासु । मातृषु । प्रऽमे । सचा ।
   व्रतानि । पानः । अमृतस्य । चारुणः । उभे इति । नृऽचक्षाः । अनु । पश्यते । विशौ ॥

   sáḥ ǀ mṛjyámānaḥ ǀ daśá-bhiḥ ǀ sukárma-bhiḥ ǀ prá ǀ madhyamā́su ǀ mātṛ́ṣu ǀ pra-mé ǀ sácā ǀ
   vratā́ni ǀ pānáḥ ǀ amṛ́tasya ǀ cā́ruṇaḥ ǀ ubhé íti ǀ nṛ-cákṣāḥ ǀ ánu ǀ paśyate ǀ víśau ǁ

   saḥ ǀ mṛjyamānaḥ ǀ daśa-bhiḥ ǀ sukarma-bhiḥ ǀ pra ǀ madhyamāsu ǀ mātṛṣu ǀ pra-me ǀ sacā ǀ
   vratāni ǀ pānaḥ ǀ amṛtasya ǀ cāruṇaḥ ǀ ubhe iti ǀ nṛ-cakṣāḥ ǀ anu ǀ paśyate ǀ viśau ǁ

   9.70.4 Aṣṭaka 7.2.23.4Anuvāka 9.4.24Interpretations

5. Ṛk 5

   स म॑र्मृजा॒न इं॑द्रि॒याय॒ धाय॑स॒ ओभे अं॒ता रोद॑सी हर्षते हि॒तः ।
   वृषा॒ शुष्मे॑ण बाधते॒ वि दु॑र्म॒तीरा॒देदि॑शानः शर्य॒हेव॑ शु॒रुधः॑ ॥

   स मर्मृजान इन्द्रियाय धायस ओभे अन्ता रोदसी हर्षते हितः |
   वृषा शुष्मेण बाधते वि दुर्मतीर् आदेदिशानः शर्यहेव शुरुधः ||

   sá marmṛjāná indriyā́ya dhā́yasa óbhé antā́ ródasī harṣate hitáḥ ǀ
   vṛ́ṣā śúṣmeṇa bādhate ví durmatī́rādédiśānaḥ śaryahéva śurúdhaḥ ǁ

   sa marmṛjāna indriyāya dhāyasa obhe antā rodasī harṣate hitaḥ |
   vṛṣā śuṣmeṇa bādhate vi durmatīr ādediśānaḥ śaryaheva śurudhaḥ ||

   सः । म॒र्मृ॒जा॒नः । इ॒न्द्रि॒याय॑ । धाय॑से । आ । उ॒भे इति॑ । अ॒न्तरिति॑ । रोद॑सी॒ इति॑ । ह॒र्ष॒ते॒ । हि॒तः ।
   वृषा॑ । शुष्मे॑ण । बा॒ध॒ते॒ । वि । दुः॒ऽम॒तीः । आ॒देदि॑शानः । श॒र्य॒हाऽइ॑व । शु॒रुधः॑ ॥

   सः । मर्मृजानः । इन्द्रियाय । धायसे । आ । उभे इति । अन्तरिति । रोदसी इति । हर्षते । हितः ।
   वृषा । शुष्मेण । बाधते । वि । दुःऽमतीः । आदेदिशानः । शर्यहाऽइव । शुरुधः ॥

   sáḥ ǀ marmṛjānáḥ ǀ indriyā́ya ǀ dhā́yase ǀ ā́ ǀ ubhé íti ǀ antáríti ǀ ródasī íti ǀ harṣate ǀ hitáḥ ǀ
   vṛ́ṣā ǀ śúṣmeṇa ǀ bādhate ǀ ví ǀ duḥ-matī́ḥ ǀ ādédiśānaḥ ǀ śaryahā́-iva ǀ śurúdhaḥ ǁ

   saḥ ǀ marmṛjānaḥ ǀ indriyāya ǀ dhāyase ǀ ā ǀ ubhe iti ǀ antariti ǀ rodasī iti ǀ harṣate ǀ hitaḥ ǀ
   vṛṣā ǀ śuṣmeṇa ǀ bādhate ǀ vi ǀ duḥ-matīḥ ǀ ādediśānaḥ ǀ śaryahā-iva ǀ śurudhaḥ ǁ

   9.70.5 Aṣṭaka 7.2.23.5Anuvāka 9.4.25Interpretations

6. Ṛk 6

   स मा॒तरा॒ न ददृ॑शान उ॒स्रियो॒ नान॑ददेति म॒रुता॑मिव स्व॒नः ।
   जा॒नन्नृ॒तं प्र॑थ॒मं यत्स्व॑र्णरं॒ प्रश॑स्तये॒ कम॑वृणीत सु॒क्रतुः॑ ॥

   स मातरा न ददृशान उस्रियो नानदद् एति मरुताम् इव स्वनः |
   जानन्न् ऋतम् प्रथमं यत् स्वर्णरम् प्रशस्तये कम् अवृणीत सुक्रतुः ||

   sá mātárā ná dádṛśāna usríyo nā́nadadeti marútāmiva svanáḥ ǀ
   jānánnṛtám prathamám yátsvárṇaram práśastaye kámavṛṇīta sukrátuḥ ǁ

   sa mātarā na dadṛśāna usriyo nānadad eti marutām iva svanaḥ |
   jānann ṛtam prathamaṃ yat svarṇaram praśastaye kam avṛṇīta sukratuḥ ||

   सः । मा॒तरा॑ । न । ददृ॑शानः । उ॒स्रियः॑ । नान॑दत् । ए॒ति॒ । म॒रुता॑म्ऽइव । स्व॒नः ।
   जा॒नन् । ऋ॒तम् । प्र॒थ॒मम् । यत् । स्वः॑ऽनरम् । प्रऽश॑स्तये । कम् । अ॒वृ॒णी॒त॒ । सु॒ऽक्रतुः॑ ॥

   सः । मातरा । न । ददृशानः । उस्रियः । नानदत् । एति । मरुताम्ऽइव । स्वनः ।
   जानन् । ऋतम् । प्रथमम् । यत् । स्वःऽनरम् । प्रऽशस्तये । कम् । अवृणीत । सुऽक्रतुः ॥

   sáḥ ǀ mātárā ǀ ná ǀ dádṛśānaḥ ǀ usríyaḥ ǀ nā́nadat ǀ eti ǀ marútām-iva ǀ svanáḥ ǀ
   jānán ǀ ṛtám ǀ prathamám ǀ yát ǀ sváḥ-naram ǀ prá-śastaye ǀ kám ǀ avṛṇīta ǀ su-krátuḥ ǁ

   saḥ ǀ mātarā ǀ na ǀ dadṛśānaḥ ǀ usriyaḥ ǀ nānadat ǀ eti ǀ marutām-iva ǀ svanaḥ ǀ
   jānan ǀ ṛtam ǀ prathamam ǀ yat ǀ svaḥ-naram ǀ pra-śastaye ǀ kam ǀ avṛṇīta ǀ su-kratuḥ ǁ

   9.70.6 Aṣṭaka 7.2.24.1Anuvāka 9.4.26Interpretations

7. Ṛk 7

   रु॒वति॑ भी॒मो वृ॑ष॒भस्त॑वि॒ष्यया॒ शृंगे॒ शिशा॑नो॒ हरि॑णी विचक्ष॒णः ।
   आ योनिं॒ सोमः॒ सुकृ॑तं॒ नि षी॑दति ग॒व्ययी॒ त्वग्भ॑वति नि॒र्णिग॒व्ययी॑ ॥

   रुवति भीमो वृषभस् तविष्यया शृङ्गे शिशानो हरिणी विचक्षणः |
   आ योनिं सोमः सुकृतं नि षीदति गव्ययी त्वग् भवति निर्णिग् अव्ययी ||

   ruváti bhīmó vṛṣabhástaviṣyáyā śṛ́ṅge śíśāno háriṇī vicakṣaṇáḥ ǀ
   ā́ yónim sómaḥ súkṛtam ní ṣīdati gavyáyī tvágbhavati nirṇígavyáyī ǁ

   ruvati bhīmo vṛṣabhas taviṣyayā śṛṅge śiśāno hariṇī vicakṣaṇaḥ |
   ā yoniṃ somaḥ sukṛtaṃ ni ṣīdati gavyayī tvag bhavati nirṇig avyayī ||

   रु॒वति॑ । भी॒मः । वृ॒ष॒भः । त॒वि॒ष्यया॑ । शृङ्गे॒ इति॑ । शिशा॑नः । हरि॑णी॒ इति॑ । वि॒ऽच॒क्ष॒णः ।
   आ । योनि॑म् । सोमः॑ । सुऽकृ॑तम् । नि । सी॒द॒ति॒ । ग॒व्ययी॑ । त्वक् । भ॒व॒ति॒ । निः॒ऽनिक् । अ॒व्ययी॑ ॥

   रुवति । भीमः । वृषभः । तविष्यया । शृङ्गे इति । शिशानः । हरिणी इति । विऽचक्षणः ।
   आ । योनिम् । सोमः । सुऽकृतम् । नि । सीदति । गव्ययी । त्वक् । भवति । निःऽनिक् । अव्ययी ॥

   ruváti ǀ bhīmáḥ ǀ vṛṣabháḥ ǀ taviṣyáyā ǀ śṛ́ṅge íti ǀ śíśānaḥ ǀ háriṇī íti ǀ vi-cakṣaṇáḥ ǀ
   ā́ ǀ yónim ǀ sómaḥ ǀ sú-kṛtam ǀ ní ǀ sīdati ǀ gavyáyī ǀ tvák ǀ bhavati ǀ niḥ-ník ǀ avyáyī ǁ

   ruvati ǀ bhīmaḥ ǀ vṛṣabhaḥ ǀ taviṣyayā ǀ śṛṅge iti ǀ śiśānaḥ ǀ hariṇī iti ǀ vi-cakṣaṇaḥ ǀ
   ā ǀ yonim ǀ somaḥ ǀ su-kṛtam ǀ ni ǀ sīdati ǀ gavyayī ǀ tvak ǀ bhavati ǀ niḥ-nik ǀ avyayī ǁ

   9.70.7 Aṣṭaka 7.2.24.2Anuvāka 9.4.27Interpretations

8. Ṛk 8

   शुचिः॑ पुना॒नस्त॒न्व॑मरे॒पस॒मव्ये॒ हरि॒र्न्य॑धाविष्ट॒ सान॑वि ।
   जुष्टो॑ मि॒त्राय॒ वरु॑णाय वा॒यवे॑ त्रि॒धातु॒ मधु॑ क्रियते सु॒कर्म॑भिः ॥

   शुचिः पुनानस् तन्वम् अरेपसम् अव्ये हरिर् न्य् अधाविष्ट सानवि |
   जुष्टो मित्राय वरुणाय वायवे त्रिधातु मधु क्रियते सुकर्मभिः ||

   śúciḥ punānástanvámarepásamávye hárirnyádhāviṣṭa sā́navi ǀ
   júṣṭo mitrā́ya váruṇāya vāyáve tridhā́tu mádhu kriyate sukármabhiḥ ǁ

   śuciḥ punānas tanvam arepasam avye harir ny adhāviṣṭa sānavi |
   juṣṭo mitrāya varuṇāya vāyave tridhātu madhu kriyate sukarmabhiḥ ||

   शुचिः॑ । पु॒ना॒नः । त॒न्व॑म् । अ॒रे॒पस॑म् । अव्ये॑ । हरिः॑ । नि । अ॒धा॒वि॒ष्ट॒ । सान॑वि ।
   जुष्टः॑ । मि॒त्राय॑ । वरु॑णाय । वा॒यवे॑ । त्रि॒ऽधातु॑ । मधु॑ । क्रि॒य॒ते॒ । सु॒कर्म॑ऽभिः ॥

   शुचिः । पुनानः । तन्वम् । अरेपसम् । अव्ये । हरिः । नि । अधाविष्ट । सानवि ।
   जुष्टः । मित्राय । वरुणाय । वायवे । त्रिऽधातु । मधु । क्रियते । सुकर्मऽभिः ॥

   śúciḥ ǀ punānáḥ ǀ tanvám ǀ arepásam ǀ ávye ǀ háriḥ ǀ ní ǀ adhāviṣṭa ǀ sā́navi ǀ
   júṣṭaḥ ǀ mitrā́ya ǀ váruṇāya ǀ vāyáve ǀ tri-dhā́tu ǀ mádhu ǀ kriyate ǀ sukárma-bhiḥ ǁ

   śuciḥ ǀ punānaḥ ǀ tanvam ǀ arepasam ǀ avye ǀ hariḥ ǀ ni ǀ adhāviṣṭa ǀ sānavi ǀ
   juṣṭaḥ ǀ mitrāya ǀ varuṇāya ǀ vāyave ǀ tri-dhātu ǀ madhu ǀ kriyate ǀ sukarma-bhiḥ ǁ

   9.70.8 Aṣṭaka 7.2.24.3Anuvāka 9.4.28Interpretations

9. Ṛk 9

   पव॑स्व सोम दे॒ववी॑तये॒ वृषेंद्र॑स्य॒ हार्दि॑ सोम॒धान॒मा वि॑श ।
   पु॒रा नो॑ बा॒धाद्दु॑रि॒ताति॑ पारय क्षेत्र॒विद्धि दिश॒ आहा॑ विपृच्छ॒ते ॥

   पवस्व सोम देववीतये वृषेन्द्रस्य हार्दि सोमधानम् आ विश |
   पुरा नो बाधाद् दुरिताति पारय क्षेत्रविद् धि दिश आहा विपृच्छते ||

   pávasva soma devávītaye vṛ́ṣéndrasya hā́rdi somadhā́namā́ viśa ǀ
   purā́ no bādhā́dduritā́ti pāraya kṣetravíddhí díśa ā́hā vipṛcchaté ǁ

   pavasva soma devavītaye vṛṣendrasya hārdi somadhānam ā viśa |
   purā no bādhād duritāti pāraya kṣetravid dhi diśa āhā vipṛcchate ||

   पव॑स्व । सो॒म॒ । दे॒वऽवी॑तये । वृषा॑ । इन्द्र॑स्य । हार्दि॑ । सो॒म॒ऽधान॑म् । आ । वि॒श॒ ।
   पु॒रा । नः॒ । बा॒धात् । दुः॒ऽइ॒ता । अति॑ । पा॒र॒य॒ । क्षे॒त्र॒ऽवित् । हि । दिशः॑ । आह॑ । वि॒ऽपृ॒च्छ॒ते ॥

   पवस्व । सोम । देवऽवीतये । वृषा । इन्द्रस्य । हार्दि । सोमऽधानम् । आ । विश ।
   पुरा । नः । बाधात् । दुःऽइता । अति । पारय । क्षेत्रऽवित् । हि । दिशः । आह । विऽपृच्छते ॥

   pávasva ǀ soma ǀ devá-vītaye ǀ vṛ́ṣā ǀ índrasya ǀ hā́rdi ǀ soma-dhā́nam ǀ ā́ ǀ viśa ǀ
   purā́ ǀ naḥ ǀ bādhā́t ǀ duḥ-itā́ ǀ áti ǀ pāraya ǀ kṣetra-vít ǀ hí ǀ díśaḥ ǀ ā́ha ǀ vi-pṛcchaté ǁ

   pavasva ǀ soma ǀ deva-vītaye ǀ vṛṣā ǀ indrasya ǀ hārdi ǀ soma-dhānam ǀ ā ǀ viśa ǀ
   purā ǀ naḥ ǀ bādhāt ǀ duḥ-itā ǀ ati ǀ pāraya ǀ kṣetra-vit ǀ hi ǀ diśaḥ ǀ āha ǀ vi-pṛcchate ǁ

   9.70.9 Aṣṭaka 7.2.24.4Anuvāka 9.4.29Interpretations

10. Ṛk 10

    हि॒तो न सप्ति॑र॒भि वाज॑म॒र्षेंद्र॑स्येंदो ज॒ठर॒मा प॑वस्व ।
    ना॒वा न सिंधु॒मति॑ पर्षि वि॒द्वांछूरो॒ न युध्य॒न्नव॑ नो नि॒दः स्पः॑ ॥

    हितो न सप्तिर् अभि वाजम् अर्षेन्द्रस्येन्दो जठरम् आ पवस्व |
    नावा न सिन्धुम् अति पर्षि विद्वाञ् छूरो न युध्यन्न् अव नो निद स्पः ||

    hitó ná sáptirabhí vā́jamarṣéndrasyendo jaṭháramā́ pavasva ǀ
    nāvā́ ná síndhumáti parṣi vidvā́ñchū́ro ná yúdhyannáva no nidáḥ spaḥ ǁ

    hito na saptir abhi vājam arṣendrasyendo jaṭharam ā pavasva |
    nāvā na sindhum ati parṣi vidvāñ chūro na yudhyann ava no nida spaḥ ||

    हि॒तः । न । सप्तिः॑ । अ॒भि । वाज॑म् । अ॒र्ष॒ । इन्द्र॑स्य । इ॒न्दो॒ इति॑ । ज॒ठर॑म् । आ । प॒व॒स्व॒ ।
    ना॒वा । न । सिन्धु॑म् । अति॑ । प॒र्षि॒ । वि॒द्वान् । शूरः॑ । न । युध्य॑न् । अव॑ । नः॒ । नि॒दः । स्प॒रिति॑ स्पः ॥

    हितः । न । सप्तिः । अभि । वाजम् । अर्ष । इन्द्रस्य । इन्दो इति । जठरम् । आ । पवस्व ।
    नावा । न । सिन्धुम् । अति । पर्षि । विद्वान् । शूरः । न । युध्यन् । अव । नः । निदः । स्परिति स्पः ॥

    hitáḥ ǀ ná ǀ sáptiḥ ǀ abhí ǀ vā́jam ǀ arṣa ǀ índrasya ǀ indo íti ǀ jaṭháram ǀ ā́ ǀ pavasva ǀ
    nāvā́ ǀ ná ǀ síndhum ǀ áti ǀ parṣi ǀ vidvā́n ǀ śū́raḥ ǀ ná ǀ yúdhyan ǀ áva ǀ naḥ ǀ nidáḥ ǀ sparíti spaḥ ǁ

    hitaḥ ǀ na ǀ saptiḥ ǀ abhi ǀ vājam ǀ arṣa ǀ indrasya ǀ indo iti ǀ jaṭharam ǀ ā ǀ pavasva ǀ
    nāvā ǀ na ǀ sindhum ǀ ati ǀ parṣi ǀ vidvān ǀ śūraḥ ǀ na ǀ yudhyan ǀ ava ǀ naḥ ǀ nidaḥ ǀ spariti spaḥ ǁ

    9.70.10 Aṣṭaka 7.2.24.5Anuvāka 9.4.30Interpretations

Text, recitation and interpretations from the Ṛgveda database of theveda.org.in.