Devatā देवता

Soma Pavamāna

Ṛṣi ऋषि

Hiraṇyastūpa Āṅgirasa

Chandas छन्दस्

Jagatī, Triṣṭubh

1. Ṛk 1

   इषु॒र्न धन्व॒न्प्रति॑ धीयते म॒तिर्व॒त्सो न मा॒तुरुप॑ स॒र्ज्यूध॑नि ।
   उ॒रुधा॑रेव दुहे॒ अग्र॑ आय॒त्यस्य॑ व्र॒तेष्वपि॒ सोम॑ इष्यते ॥

   इषुर् न धन्वन् प्रति धीयते मतिर् वत्सो न मातुर् उप सर्ज्य् ऊधनि |
   उरुधारेव दुहे अग्र आयत्य् अस्य व्रतेष्व् अपि सोम इष्यते ||

   íṣurná dhánvanpráti dhīyate matírvatsó ná mātúrúpa sarjyū́dhani ǀ
   urúdhāreva duhe ágra āyatyásya vratéṣvápi sóma iṣyate ǁ

   iṣur na dhanvan prati dhīyate matir vatso na mātur upa sarjy ūdhani |
   urudhāreva duhe agra āyaty asya vrateṣv api soma iṣyate ||

   इषुः॑ । न । धन्व॑न् । प्रति॑ । धी॒य॒ते॒ । म॒तिः । व॒त्सः । न । मा॒तुः । उप॑ । स॒र्जि॒ । ऊध॑नि ।
   उ॒रुधा॑राऽइव । दु॒हे॒ । अग्रे॑ । आ॒ऽय॒ती । अस्य॑ । व्र॒तेषु॑ । अपि॑ । सोमः॑ । इ॒ष्य॒ते॒ ॥

   इषुः । न । धन्वन् । प्रति । धीयते । मतिः । वत्सः । न । मातुः । उप । सर्जि । ऊधनि ।
   उरुधाराऽइव । दुहे । अग्रे । आऽयती । अस्य । व्रतेषु । अपि । सोमः । इष्यते ॥

   íṣuḥ ǀ ná ǀ dhánvan ǀ práti ǀ dhīyate ǀ matíḥ ǀ vatsáḥ ǀ ná ǀ mātúḥ ǀ úpa ǀ sarji ǀ ū́dhani ǀ
   urúdhārā-iva ǀ duhe ǀ ágre ǀ ā-yatī́ ǀ ásya ǀ vratéṣu ǀ ápi ǀ sómaḥ ǀ iṣyate ǁ

   iṣuḥ ǀ na ǀ dhanvan ǀ prati ǀ dhīyate ǀ matiḥ ǀ vatsaḥ ǀ na ǀ mātuḥ ǀ upa ǀ sarji ǀ ūdhani ǀ
   urudhārā-iva ǀ duhe ǀ agre ǀ ā-yatī ǀ asya ǀ vrateṣu ǀ api ǀ somaḥ ǀ iṣyate ǁ

   9.69.1 Aṣṭaka 7.2.21.1Anuvāka 9.4.11Interpretations

2. Ṛk 2

   उपो॑ म॒तिः पृ॒च्यते॑ सि॒च्यते॒ मधु॑ मं॒द्राज॑नी चोदते अं॒तरा॒सनि॑ ।
   पव॑मानः संत॒निः प्र॑घ्न॒तामि॑व॒ मधु॑मांद्र॒प्सः परि॒ वार॑मर्षति ॥

   उपो मतिः पृच्यते सिच्यते मधु मन्द्राजनी चोदते अन्तर् आसनि |
   पवमानः संतनिः प्रघ्नताम् इव मधुमान् द्रप्सः परि वारम् अर्षति ||

   úpo matíḥ pṛcyáte sicyáte mádhu mandrā́janī codate antárāsáni ǀ
   pávamānaḥ saṃtaníḥ praghnatā́miva mádhumāndrapsáḥ pári vā́ramarṣati ǁ

   upo matiḥ pṛcyate sicyate madhu mandrājanī codate antar āsani |
   pavamānaḥ saṃtaniḥ praghnatām iva madhumān drapsaḥ pari vāram arṣati ||

   उपो॒ इति॑ । म॒तिः । पृ॒च्यते॑ । सि॒च्यते॑ । मधु॑ । म॒न्द्र॒ऽअज॑नी । चो॒द॒ते॒ । अ॒न्तः । आ॒सनि॑ ।
   पव॑मानः । स॒म्ऽत॒निः । प्र॒घ्न॒ताम्ऽइ॑व । मधु॑ऽमान् । द्र॒प्सः । परि॑ । वार॑म् । अ॒र्ष॒ति॒ ॥

   उपो इति । मतिः । पृच्यते । सिच्यते । मधु । मन्द्रऽअजनी । चोदते । अन्तः । आसनि ।
   पवमानः । सम्ऽतनिः । प्रघ्नताम्ऽइव । मधुऽमान् । द्रप्सः । परि । वारम् । अर्षति ॥

   úpo íti ǀ matíḥ ǀ pṛcyáte ǀ sicyáte ǀ mádhu ǀ mandra-ájanī ǀ codate ǀ antáḥ ǀ āsáni ǀ
   pávamānaḥ ǀ sam-taníḥ ǀ praghnatā́m-iva ǀ mádhu-mān ǀ drapsáḥ ǀ pári ǀ vā́ram ǀ arṣati ǁ

   upo iti ǀ matiḥ ǀ pṛcyate ǀ sicyate ǀ madhu ǀ mandra-ajanī ǀ codate ǀ antaḥ ǀ āsani ǀ
   pavamānaḥ ǀ sam-taniḥ ǀ praghnatām-iva ǀ madhu-mān ǀ drapsaḥ ǀ pari ǀ vāram ǀ arṣati ǁ

   9.69.2 Aṣṭaka 7.2.21.2Anuvāka 9.4.12Interpretations

3. Ṛk 3

   अव्ये॑ वधू॒युः प॑वते॒ परि॑ त्व॒चि श्र॑थ्नी॒ते न॒प्तीरदि॑तेर्ऋ॒तं य॒ते ।
   हरि॑रक्रान्यज॒तः सं॑य॒तो मदो॑ नृ॒म्णा शिशा॑नो महि॒षो न शो॑भते ॥

   अव्ये वधूयुः पवते परि त्वचि श्रथ्नीते नप्तीर् अदितेर् ऋतं यते |
   हरिर् अक्रान् यजतः संयतो मदो नृम्णा शिशानो महिषो न शोभते ||

   ávye vadhūyúḥ pavate pári tvací śrathnīté naptī́ráditerṛtám yaté ǀ
   hárirakrānyajatáḥ saṃyató mádo nṛmṇā́ śíśāno mahiṣó ná śobhate ǁ

   avye vadhūyuḥ pavate pari tvaci śrathnīte naptīr aditer ṛtaṃ yate |
   harir akrān yajataḥ saṃyato mado nṛmṇā śiśāno mahiṣo na śobhate ||

   अव्ये॑ । व॒धू॒ऽयुः । प॒व॒ते॒ । परि॑ । त्व॒चि । श्र॒थ्नी॒ते । न॒प्तीः । अदि॑तेः । ऋ॒तम् । य॒ते ।
   हरिः॑ । अ॒क्रा॒न् । य॒ज॒तः । स॒म्ऽय॒तः । मदः॑ । नृ॒म्णा । शिशा॑नः । म॒हि॒षः । न । शो॒भ॒ते॒ ॥

   अव्ये । वधूऽयुः । पवते । परि । त्वचि । श्रथ्नीते । नप्तीः । अदितेः । ऋतम् । यते ।
   हरिः । अक्रान् । यजतः । सम्ऽयतः । मदः । नृम्णा । शिशानः । महिषः । न । शोभते ॥

   ávye ǀ vadhū-yúḥ ǀ pavate ǀ pári ǀ tvací ǀ śrathnīté ǀ naptī́ḥ ǀ áditeḥ ǀ ṛtám ǀ yaté ǀ
   háriḥ ǀ akrān ǀ yajatáḥ ǀ sam-yatáḥ ǀ mádaḥ ǀ nṛmṇā́ ǀ śíśānaḥ ǀ mahiṣáḥ ǀ ná ǀ śobhate ǁ

   avye ǀ vadhū-yuḥ ǀ pavate ǀ pari ǀ tvaci ǀ śrathnīte ǀ naptīḥ ǀ aditeḥ ǀ ṛtam ǀ yate ǀ
   hariḥ ǀ akrān ǀ yajataḥ ǀ sam-yataḥ ǀ madaḥ ǀ nṛmṇā ǀ śiśānaḥ ǀ mahiṣaḥ ǀ na ǀ śobhate ǁ

   9.69.3 Aṣṭaka 7.2.21.3Anuvāka 9.4.13Interpretations

4. Ṛk 4

   उ॒क्षा मि॑माति॒ प्रति॑ यंति धे॒नवो॑ दे॒वस्य॑ दे॒वीरुप॑ यंति निष्कृ॒तं ।
   अत्य॑क्रमी॒दर्जु॑नं॒ वार॑म॒व्यय॒मत्कं॒ न नि॒क्तं परि॒ सोमो॑ अव्यत ॥

   उक्षा मिमाति प्रति यन्ति धेनवो देवस्य देवीर् उप यन्ति निष्कृतम् |
   अत्य् अक्रमीद् अर्जुनं वारम् अव्ययम् अत्कं न निक्तम् परि सोमो अव्यत ||

   ukṣā́ mimāti práti yanti dhenávo devásya devī́rúpa yanti niṣkṛtám ǀ
   átyakramīdárjunam vā́ramavyáyamátkam ná niktám pári sómo avyata ǁ

   ukṣā mimāti prati yanti dhenavo devasya devīr upa yanti niṣkṛtam |
   aty akramīd arjunaṃ vāram avyayam atkaṃ na niktam pari somo avyata ||

   उ॒क्षा । मि॒मा॒ति॒ । प्रति॑ । य॒न्ति॒ । धे॒नवः॑ । दे॒वस्य॑ । दे॒वीः । उप॑ । य॒न्ति॒ । निः॒ऽकृ॒तम् ।
   अति॑ । अ॒क्र॒मी॒त् । अर्जु॑नम् । वार॑म् । अ॒व्यय॑म् । अत्क॑म् । न । नि॒क्तम् । परि॑ । सोमः॑ । अ॒व्य॒त॒ ॥

   उक्षा । मिमाति । प्रति । यन्ति । धेनवः । देवस्य । देवीः । उप । यन्ति । निःऽकृतम् ।
   अति । अक्रमीत् । अर्जुनम् । वारम् । अव्ययम् । अत्कम् । न । निक्तम् । परि । सोमः । अव्यत ॥

   ukṣā́ ǀ mimāti ǀ práti ǀ yanti ǀ dhenávaḥ ǀ devásya ǀ devī́ḥ ǀ úpa ǀ yanti ǀ niḥ-kṛtám ǀ
   áti ǀ akramīt ǀ árjunam ǀ vā́ram ǀ avyáyam ǀ átkam ǀ ná ǀ niktám ǀ pári ǀ sómaḥ ǀ avyata ǁ

   ukṣā ǀ mimāti ǀ prati ǀ yanti ǀ dhenavaḥ ǀ devasya ǀ devīḥ ǀ upa ǀ yanti ǀ niḥ-kṛtam ǀ
   ati ǀ akramīt ǀ arjunam ǀ vāram ǀ avyayam ǀ atkam ǀ na ǀ niktam ǀ pari ǀ somaḥ ǀ avyata ǁ

   9.69.4 Aṣṭaka 7.2.21.4Anuvāka 9.4.14Interpretations

5. Ṛk 5

   अमृ॑क्तेन॒ रुश॑ता॒ वास॑सा॒ हरि॒रम॑र्त्यो निर्णिजा॒नः परि॑ व्यत ।
   दि॒वस्पृ॒ष्ठं ब॒र्हणा॑ नि॒र्णिजे॑ कृतोप॒स्तर॑णं च॒म्वो॑र्नभ॒स्मयं॑ ॥

   अमृक्तेन रुशता वाससा हरिर् अमर्त्यो निर्णिजानः परि व्यत |
   दिवस् पृष्ठम् बर्हणा निर्णिजे कृतोपस्तरणं चम्वोर् नभस्मयम् ||

   ámṛktena rúśatā vā́sasā hárirámartyo nirṇijānáḥ pári vyata ǀ
   diváspṛṣṭhám barháṇā nirṇíje kṛtopastáraṇam camvórnabhasmáyam ǁ

   amṛktena ruśatā vāsasā harir amartyo nirṇijānaḥ pari vyata |
   divas pṛṣṭham barhaṇā nirṇije kṛtopastaraṇaṃ camvor nabhasmayam ||

   अमृ॑क्तेन । रुश॑ता । वास॑सा । हरिः॑ । अम॑र्त्यः । निः॒ऽनि॒जा॒नः । परि॑ । व्य॒त॒ ।
   दि॒वः । पृ॒ष्ठम् । ब॒र्हणा॑ । निः॒ऽनिजे॑ । कृ॒त॒ । उ॒प॒ऽस्तर॑णम् । च॒म्वोः॑ । न॒भ॒स्मय॑म् ॥

   अमृक्तेन । रुशता । वाससा । हरिः । अमर्त्यः । निःऽनिजानः । परि । व्यत ।
   दिवः । पृष्ठम् । बर्हणा । निःऽनिजे । कृत । उपऽस्तरणम् । चम्वोः । नभस्मयम् ॥

   ámṛktena ǀ rúśatā ǀ vā́sasā ǀ háriḥ ǀ ámartyaḥ ǀ niḥ-nijānáḥ ǀ pári ǀ vyata ǀ
   diváḥ ǀ pṛṣṭhám ǀ barháṇā ǀ niḥ-níje ǀ kṛta ǀ upa-stáraṇam ǀ camvóḥ ǀ nabhasmáyam ǁ

   amṛktena ǀ ruśatā ǀ vāsasā ǀ hariḥ ǀ amartyaḥ ǀ niḥ-nijānaḥ ǀ pari ǀ vyata ǀ
   divaḥ ǀ pṛṣṭham ǀ barhaṇā ǀ niḥ-nije ǀ kṛta ǀ upa-staraṇam ǀ camvoḥ ǀ nabhasmayam ǁ

   9.69.5 Aṣṭaka 7.2.21.5Anuvāka 9.4.15Interpretations

6. Ṛk 6

   सूर्य॑स्येव र॒श्मयो॑ द्रावयि॒त्नवो॑ मत्स॒रासः॑ प्र॒सुपः॑ सा॒कमी॑रते ।
   तंतुं॑ त॒तं परि॒ सर्गा॑स आ॒शवो॒ नेंद्रा॑दृ॒ते प॑वते॒ धाम॒ किं च॒न ॥

   सूर्यस्येव रश्मयो द्रावयित्नवो मत्सरासः प्रसुपः साकम् ईरते |
   तन्तुं ततम् परि सर्गास आशवो नेन्द्राद् ऋते पवते धाम किं चन ||

   sū́ryasyeva raśmáyo drāvayitnávo matsarā́saḥ prasúpaḥ sākámīrate ǀ
   tántum tatám pári sárgāsa āśávo néndrādṛté pavate dhā́ma kím caná ǁ

   sūryasyeva raśmayo drāvayitnavo matsarāsaḥ prasupaḥ sākam īrate |
   tantuṃ tatam pari sargāsa āśavo nendrād ṛte pavate dhāma kiṃ cana ||

   सूर्य॑स्यऽइव । र॒श्मयः॑ । द्र॒व॒यि॒त्नवः॑ । म॒त्स॒रासः॑ । प्र॒ऽसुपः॑ । सा॒कम् । ई॒र॒ते॒ ।
   तन्तु॑म् । त॒तम् । परि॑ । सर्गा॑सः । आ॒शवः॑ । न । इन्द्रा॑त् । ऋ॒ते । प॒व॒ते॒ । धाम॑ । किम् । च॒न ॥

   सूर्यस्यऽइव । रश्मयः । द्रवयित्नवः । मत्सरासः । प्रऽसुपः । साकम् । ईरते ।
   तन्तुम् । ततम् । परि । सर्गासः । आशवः । न । इन्द्रात् । ऋते । पवते । धाम । किम् । चन ॥

   sū́ryasya-iva ǀ raśmáyaḥ ǀ dravayitnávaḥ ǀ matsarā́saḥ ǀ pra-súpaḥ ǀ sākám ǀ īrate ǀ
   tántum ǀ tatám ǀ pári ǀ sárgāsaḥ ǀ āśávaḥ ǀ ná ǀ índrāt ǀ ṛté ǀ pavate ǀ dhā́ma ǀ kím ǀ caná ǁ

   sūryasya-iva ǀ raśmayaḥ ǀ dravayitnavaḥ ǀ matsarāsaḥ ǀ pra-supaḥ ǀ sākam ǀ īrate ǀ
   tantum ǀ tatam ǀ pari ǀ sargāsaḥ ǀ āśavaḥ ǀ na ǀ indrāt ǀ ṛte ǀ pavate ǀ dhāma ǀ kim ǀ cana ǁ

   9.69.6 Aṣṭaka 7.2.22.1Anuvāka 9.4.16Interpretations

7. Ṛk 7

   सिंधो॑रिव प्रव॒णे नि॒म्न आ॒शवो॒ वृष॑च्युता॒ मदा॑सो गा॒तुमा॑शत ।
   शं नो॑ निवे॒शे द्वि॒पदे॒ चतु॑ष्पदे॒ऽस्मे वाजाः॑ सोम तिष्ठंतु कृ॒ष्टयः॑ ॥

   सिन्धोर् इव प्रवणे निम्न आशवो वृषच्युता मदासो गातुम् आशत |
   शं नो निवेशे द्विपदे चतुष्पदे ऽस्मे वाजाः सोम तिष्ठन्तु कृष्टयः ||

   síndhoriva pravaṇé nimná āśávo vṛ́ṣacyutā mádāso gātúmāśata ǀ
   śám no niveśé dvipáde cátuṣpade’smé vā́jāḥ soma tiṣṭhantu kṛṣṭáyaḥ ǁ

   sindhor iva pravaṇe nimna āśavo vṛṣacyutā madāso gātum āśata |
   śaṃ no niveśe dvipade catuṣpade 'sme vājāḥ soma tiṣṭhantu kṛṣṭayaḥ ||

   सिन्धोः॑ऽइव । प्र॒व॒णे । नि॒म्ने । आ॒शवः॑ । वृष॑ऽच्युताः । मदा॑सः । गा॒तुम् । आ॒श॒त॒ ।
   शम् । नः॒ । नि॒ऽवे॒शे । द्वि॒ऽपदे॑ । चतुः॑ऽपदे । अ॒स्मे इति॑ । वाजाः॑ । सो॒म॒ । ति॒ष्ठ॒न्तु॒ । कृ॒ष्टयः॑ ॥

   सिन्धोःऽइव । प्रवणे । निम्ने । आशवः । वृषऽच्युताः । मदासः । गातुम् । आशत ।
   शम् । नः । निऽवेशे । द्विऽपदे । चतुःऽपदे । अस्मे इति । वाजाः । सोम । तिष्ठन्तु । कृष्टयः ॥

   síndhoḥ-iva ǀ pravaṇé ǀ nimné ǀ āśávaḥ ǀ vṛ́ṣa-cyutāḥ ǀ mádāsaḥ ǀ gātúm ǀ āśata ǀ
   śám ǀ naḥ ǀ ni-veśé ǀ dvi-páde ǀ cátuḥ-pade ǀ asmé íti ǀ vā́jāḥ ǀ soma ǀ tiṣṭhantu ǀ kṛṣṭáyaḥ ǁ

   sindhoḥ-iva ǀ pravaṇe ǀ nimne ǀ āśavaḥ ǀ vṛṣa-cyutāḥ ǀ madāsaḥ ǀ gātum ǀ āśata ǀ
   śam ǀ naḥ ǀ ni-veśe ǀ dvi-pade ǀ catuḥ-pade ǀ asme iti ǀ vājāḥ ǀ soma ǀ tiṣṭhantu ǀ kṛṣṭayaḥ ǁ

   9.69.7 Aṣṭaka 7.2.22.2Anuvāka 9.4.17Interpretations

8. Ṛk 8

   आ नः॑ पवस्व॒ वसु॑म॒द्धिर॑ण्यव॒दश्वा॑व॒द्गोम॒द्यव॑मत्सु॒वीर्यं॑ ।
   यू॒यं हि सो॑म पि॒तरो॒ मम॒ स्थन॑ दि॒वो मू॒र्धानः॒ प्रस्थि॑ता वय॒स्कृतः॑ ॥

   आ नः पवस्व वसुमद् धिरण्यवद् अश्वावद् गोमद् यवमत् सुवीर्यम् |
   यूयं हि सोम पितरो मम स्थन दिवो मूर्धानः प्रस्थिता वयस्कृतः ||

   ā́ naḥ pavasva vásumaddhíraṇyavadáśvāvadgómadyávamatsuvī́ryam ǀ
   yūyám hí soma pitáro máma sthána divó mūrdhā́naḥ prásthitā vayaskṛ́taḥ ǁ

   ā naḥ pavasva vasumad dhiraṇyavad aśvāvad gomad yavamat suvīryam |
   yūyaṃ hi soma pitaro mama sthana divo mūrdhānaḥ prasthitā vayaskṛtaḥ ||

   आ । नः॒ । प॒व॒स्व॒ । वसु॑ऽमत् । हिर॑ण्यऽवत् । अश्व॑ऽवत् । गोऽम॑त् । यव॑ऽमत् । सु॒ऽवीर्य॑म् ।
   यू॒यम् । हि । सो॒म॒ । पि॒तरः॑ । मम॑ । स्थन॑ । दि॒वः । मू॒र्धानः॑ । प्रऽस्थि॑ताः । व॒यः॒ऽकृतः॑ ॥

   आ । नः । पवस्व । वसुऽमत् । हिरण्यऽवत् । अश्वऽवत् । गोऽमत् । यवऽमत् । सुऽवीर्यम् ।
   यूयम् । हि । सोम । पितरः । मम । स्थन । दिवः । मूर्धानः । प्रऽस्थिताः । वयःऽकृतः ॥

   ā́ ǀ naḥ ǀ pavasva ǀ vásu-mat ǀ híraṇya-vat ǀ áśva-vat ǀ gó-mat ǀ yáva-mat ǀ su-vī́ryam ǀ
   yūyám ǀ hí ǀ soma ǀ pitáraḥ ǀ máma ǀ sthána ǀ diváḥ ǀ mūrdhā́naḥ ǀ prá-sthitāḥ ǀ vayaḥ-kṛ́taḥ ǁ

   ā ǀ naḥ ǀ pavasva ǀ vasu-mat ǀ hiraṇya-vat ǀ aśva-vat ǀ go-mat ǀ yava-mat ǀ su-vīryam ǀ
   yūyam ǀ hi ǀ soma ǀ pitaraḥ ǀ mama ǀ sthana ǀ divaḥ ǀ mūrdhānaḥ ǀ pra-sthitāḥ ǀ vayaḥ-kṛtaḥ ǁ

   9.69.8 Aṣṭaka 7.2.22.3Anuvāka 9.4.18Interpretations

9. Ṛk 9

   ए॒ते सोमाः॒ पव॑मानास॒ इंद्रं॒ रथा॑ इव॒ प्र य॑युः सा॒तिमच्छ॑ ।
   सु॒ताः प॒वित्र॒मति॑ यं॒त्यव्यं॑ हि॒त्वी व॒व्रिं ह॒रितो॑ वृ॒ष्टिमच्छ॑ ॥

   एते सोमाः पवमानास इन्द्रं रथा इव प्र ययुः सातिम् अच्छ |
   सुताः पवित्रम् अति यन्त्य् अव्यं हित्वी वव्रिं हरितो वृष्टिम् अच्छ ||

   eté sómāḥ pávamānāsa índram ráthā iva prá yayuḥ sātímáccha ǀ
   sutā́ḥ pavítramáti yantyávyam hitvī́ vavrím haríto vṛṣṭímáccha ǁ

   ete somāḥ pavamānāsa indraṃ rathā iva pra yayuḥ sātim accha |
   sutāḥ pavitram ati yanty avyaṃ hitvī vavriṃ harito vṛṣṭim accha ||

   ए॒ते । सोमाः॑ । पव॑मानासः । इन्द्र॑म् । रथाः॑ऽइव । प्र । य॒युः॒ । सा॒तिम् । अच्छ॑ ।
   सु॒ताः । प॒वित्र॑म् । अति॑ । य॒न्ति॒ । अव्य॑म् । हि॒त्वी । व॒व्रिम् । ह॒रितः॑ । वृ॒ष्टिम् । अच्छ॑ ॥

   एते । सोमाः । पवमानासः । इन्द्रम् । रथाःऽइव । प्र । ययुः । सातिम् । अच्छ ।
   सुताः । पवित्रम् । अति । यन्ति । अव्यम् । हित्वी । वव्रिम् । हरितः । वृष्टिम् । अच्छ ॥

   eté ǀ sómāḥ ǀ pávamānāsaḥ ǀ índram ǀ ráthāḥ-iva ǀ prá ǀ yayuḥ ǀ sātím ǀ áccha ǀ
   sutā́ḥ ǀ pavítram ǀ áti ǀ yanti ǀ ávyam ǀ hitvī́ ǀ vavrím ǀ harítaḥ ǀ vṛṣṭím ǀ áccha ǁ

   ete ǀ somāḥ ǀ pavamānāsaḥ ǀ indram ǀ rathāḥ-iva ǀ pra ǀ yayuḥ ǀ sātim ǀ accha ǀ
   sutāḥ ǀ pavitram ǀ ati ǀ yanti ǀ avyam ǀ hitvī ǀ vavrim ǀ haritaḥ ǀ vṛṣṭim ǀ accha ǁ

   9.69.9 Aṣṭaka 7.2.22.4Anuvāka 9.4.19Interpretations

10. Ṛk 10

    इंद॒विंद्रा॑य बृह॒ते प॑वस्व सुमृळी॒को अ॑नव॒द्यो रि॒शादाः॑ ।
    भरा॑ चं॒द्राणि॑ गृण॒ते वसू॑नि दे॒वैर्द्या॑वापृथिवी॒ प्राव॑तं नः ॥

    इन्दव् इन्द्राय बृहते पवस्व सुमृऌईको अनवद्यो रिशादाः |
    भरा चन्द्राणि गृणते वसूनि देवैर् द्यावापृथिवी प्रावतं नः ||

    índavíndrāya bṛhaté pavasva sumṛḷīkó anavadyó riśā́dāḥ ǀ
    bhárā candrā́ṇi gṛṇaté vásūni deváirdyāvāpṛthivī prā́vatam naḥ ǁ

    indav indrāya bṛhate pavasva sumṛḷīko anavadyo riśādāḥ |
    bharā candrāṇi gṛṇate vasūni devair dyāvāpṛthivī prāvataṃ naḥ ||

    इन्दो॒ इति॑ । इन्द्रा॑य । बृ॒ह॒ते । प॒व॒स्व॒ । सु॒ऽमृ॒ळी॒कः । अ॒न॒व॒द्यः । रि॒शादाः॑ ।
    भर॑ । च॒न्द्राणि॑ । गृ॒ण॒ते । वसू॑नि । दे॒वैः । द्या॒वा॒पृ॒थि॒वी॒ इति॑ । प्र । अ॒व॒त॒म् । नः॒ ॥

    इन्दो इति । इन्द्राय । बृहते । पवस्व । सुऽमृळीकः । अनवद्यः । रिशादाः ।
    भर । चन्द्राणि । गृणते । वसूनि । देवैः । द्यावापृथिवी इति । प्र । अवतम् । नः ॥

    índo íti ǀ índrāya ǀ bṛhaté ǀ pavasva ǀ su-mṛḷīkáḥ ǀ anavadyáḥ ǀ riśā́dāḥ ǀ
    bhára ǀ candrā́ṇi ǀ gṛṇaté ǀ vásūni ǀ deváiḥ ǀ dyāvāpṛthivī íti ǀ prá ǀ avatam ǀ naḥ ǁ

    indo iti ǀ indrāya ǀ bṛhate ǀ pavasva ǀ su-mṛḷīkaḥ ǀ anavadyaḥ ǀ riśādāḥ ǀ
    bhara ǀ candrāṇi ǀ gṛṇate ǀ vasūni ǀ devaiḥ ǀ dyāvāpṛthivī iti ǀ pra ǀ avatam ǀ naḥ ǁ

    9.69.10 Aṣṭaka 7.2.22.5Anuvāka 9.4.20Interpretations

Text, recitation and interpretations from the Ṛgveda database of theveda.org.in.