तेन विद्याख्येन तत्त्वेन प्रकाशकत्वात् ज्ञानशक्त्यभिव्यञ्जकेन सर्वैर् बुद्धीन्द्रियैः कर्मेन्द्रियैर् यथास्वं निर्वर्त्यं परं कर्तृविषयात् कार्यात्मकविषयाद् अन्यत् ज्ञेयाख्यं यद्वा परम् इति अव्यवहितं विषयं प्रतिबिम्बितबाह्यविषयत्वेन संनिकृष्टं बुद्धितत्त्वम् अवैति जानाति ॥ (१।०)

विद्याख्येन करणेन किल प्रतिबिम्बितस्रक्चन्दनादिबाह्यविषया भोग्यरूपा बुद्धिर् गृह्यते ॥ (२।०)

यदाह खेटकनन्दनः । (३।१)

बुद्धिर् विषयाकारा सुखादिरूपा समासतो भोग्या ॥ (३।२)

इति ॥ (४।०)

तथा । (५।१)

रविवत्प्रकाशरूपो यदि नाम महांस्तथापि कर्मत्वात् । (५।२)

करणान्तरसापेक्षः शक्तो ग्राहयितुम् आत्मानम् ॥ (५।३)

इति ॥ (६।०)

रागतत्त्वाभिव्यक्तिम् आह ॥ (७।०)