सैषा बाधा सर्वस्याप्य् अनुमानवादिनः प्रसक्ता ॥ (१।०)

तथा हि महानसादिगतानां विशिष्टदेशकालाकाराणाम् एव धूमाग्निव्यक्तीनां सम्बन्धग्रहणे धूममात्राच् च पर्वतादौ वह्निमात्रानुमानम् इत्यगृहीतसम्बन्धैव धूमव्यक्तिः कथं तथाविधवह्निव्यक्तिं गमयेदिति सम्बन्धग्रहपर्यनुयोगः समानः ॥ (२।०)

ततश्च । (३।१)

यत्र स्याद् उभयोर्दोषः परिहारश्च वा समः । (३।२)

नैकः पर्यनुयोक्तव्यस् तादृगर्थविनिश्चये ॥ (३।३)

इति नैतद् अस्माकमेव चोद्यम् ॥ (४।०)

अथ धूममात्रस्यैव वह्निमात्राविनाभावलक्षणः सम्बन्धो गृहीतः तद् इहापि कार्यमात्रात् कर्तृमात्रानुमानमदुष्टम् ॥ (५।०)

अन्यथा सर्वानुमानोच्छेद एव स्यात् ॥ (६।०)

तदुक्तम् । (७।१)

प्रवृत्तिरनुमानस्य तदभावस् तदन्यथा ॥ (७।३)

इति ॥ (८।०)

इत्थं च विचित्रतत्तत्कर्माशयाधिवासितभोक्तृभोगतत्साधनतदुपादानादिविशेषज्ञः कर्ता अनुमानान्तरेणानुमीयत इति न कश्चिद्दोषः ॥ (९।०)

तदिदम् उक्तं तत्रभवद्बृहस्पतिपादैः । (१०।१)

भवभोक्तृभोगसाधनतदुपादानादि यो विजानाति । (१०।२)

तमृते भवेन् नहीदं पुंस्कर्माशयविपाकज्ञम् ॥ (१०।३)

इति अस्तु तर्हि ईश्वरः कर्ता स तु न तावदशरीरः प्रत्येतव्यः ॥ (११।०)

कार्यं शरीरयुक्तेन कर्त्रा व्याप्तं सदैव यत् ॥ (१२।०)

इत्यादिना देहविरहिणः कर्तृत्वायोगस्योक्तत्वात् ॥ (१३।०)

तथाहि ॥ (१४।०)