ते धर्मादय उपादानम् उत्पत्तिहेतुर् येषां ते संसार्यणोः प्रत्यायनात्प्रत्यया इष्टाः ॥ (१।०)

कियन्त इत्याह अष्टौ नवेत्यादि अष्टविधा सिद्धिर्नवविधा तुष्टिर् वक्ष्यमाणलक्षणा ॥ (२।०)

उक्तं च सांख्यैः । (३।१)

ऊहः शब्दोऽध्ययनं दुःखविघातत्रयं सुहृत्प्राप्तिः । (३।२)

दानं च सिद्धयोऽष्टौ ॥ (३।३)

इति ॥ (४।०)

तथा । (५।१)

आध्यात्मिक्यश् चतस्रः प्रकृत्युपादानकालभाग्याख्याः । (५।२)

बाह्या विषयोपरमात् पञ्च च नव तुष्टयो ऽभिहिताः ॥ (५।३)

इति ॥ (६।०)

चतुर्गुणाः सप्त अष्टाविंशतिसंख्या भवन्ति तावत्संख्यसंख्याता शक्तिः ॥ (७।०)

कर्मेन्द्रियबुद्धीन्द्रियमनसां विघाता एकादश । (८।१)

बाधिर्यम् आन्ध्यम् अघ्रत्वं मूकता जडता च या । (८।२)

उन्मादकौष्ठ्यकौण्यानि क्लैब्योदावर्तपङ्गुताः ॥ (८।३)

इति ॥ (९।०)

बुद्धिवधाश्च प्रागुक्तानां तुष्टिसिद्धीनां विपर्ययाः सप्तदशेत्यष्टाविंशतिः ॥ (१०।०)

तथा चाहुः कापिलाः । (११।१)

एकादशेन्द्रियवधाः सह बुद्धिवधैर् अशक्तिर् उद्दिष्टा । (११।२)

सप्तदश वधा बुद्धेर्विपर्ययात् तुष्टिसिद्धीनाम् ॥ (११।३)

इति ॥ (१२।०)

पञ्च च विख्याता इति विपर्ययभेदास् तमोमोहमहामोहतामिस्रान्धतामिस्राख्याः ॥ (१३।०)

एते पञ्च सिद्धयो ऽष्टौ तुष्टयो नव अशक्तयो ऽष्टाविंशतिर् इत्येवं वर्गशः वर्गक्रमेण पञ्चाशत् प्रत्ययाः ॥ (१४।०)

ये चैवं संख्यातः प्रतिपादिताः ॥ (१५।०)